Tlen kiijkuilok Mateo

9 Jesús tlejkok ipan barco,* kiixkotonki mar uan asito ipan ialtepe. 2 Uan se keskij maseualmej kiualikilijkej ipan se tlapechtli se katli amo ueliyaya kiojolinia itlakayo. Kema Jesús kiitak tlauel kuali tlaneltokayayaj, kiiljuik katli mokokouayaya:* “¡Amo ximokueso nokone! Nimitstlapojpoljuia motlajtlakoljuaj”. 3 Uajka se keskij escribas* moiljuijkej: “Ni tlakatl kiixpano Dios* ika tlen kiijtoua”. 4 Jesús, katli kimatiyaya tlake moiljuiyayaj, kiniljuik: “¿Kenke inmoiljuiaj tlen amo kuali ipan inmoyolo? 5 Amo ouij nikijtos ‘nimitstlapojpoljuia motlajtlakoljuaj’, ¿pero uelis se akajya kiiljuis ni tlakatl ‘ximoketsa uan xinejnemi’? 6 Uan para inkiitasej katli eli iKone se Maseuali* kipia tlanauatili para kintlapojpoljuis inintlajtlakoljuaj katli itstokej ipan Tlaltipaktli...”. Uajka kiiljuik katli mokokouayaya: “Ximoketsa, xijtlanana motlapech uan xia mochaj”. 7 Uan ya moketski uan yajki ichaj. 8 Kema nopa miakej maseualmej kiitakej tlen panok, mosentlachilijkej* uan kiueyichijkej Dios, pampa kinmakatoya maseualmej nopa tlanauatili.

9 Kema Jesús yajki sejkanok,* kiitak se tlakatl katli motokaxtiyaya Mateo moseuijtoya kampa tlainamaj impuestos, uan kiiljuik: “Ximochiua notokilijka”. Mateo nimantsi moketski uan kitokilik. 10 Teipa, kema Jesús tlakuayaya ichaj Mateo, asitoj miakej katli tlainamayayaj impuestos uan katli tlajtlakolchiuayayaj, uan pejkej tlakuaj iuaya uan itokilijkauaj. 11 Pero kema fariseos* kiitakej nopa, pejkej kintlatsintokiaj itokilijkauaj: “¿Kenke inmotlamachtijka tlakua ininuaya katli tlainamaj impuestos uan katli tlajtlakolchiuaj?”. 12 Jesús kikajki tlen kiijtojkej uan kiniljuik: “Katli amo mokokouaj amo moneki kiitatij se tepajtijketl, pero katli mokokouaj kena. 13 Uajka xiakaj uan ximomachtikaj tlake kiijtosneki ni tlajtoli: ‘Nijneki xitetlasojtlakaj, uan amo xinechmakakaj tlapialmej’. Pampa amo niualajtok para nikinnotsas katli kichiuaj tlen kuali, nikinnotsako katli tlajtlakolejkej”.

14 Uajka, itokilijkauaj Juan kinechkauitoj uan kitlatsintokijkej: “¿Kenke tojuantij uan fariseos timomajtokej timosauaj* uan motokilijkauaj amo?”. 15 Jesús kinnankilik: “Iuampoyouaj* se katli mosiuajtis amo kinamiki mokuesojtosej kema nojua itstok ininuaya, ¿axke? Pero asis se tonali kema katli mosiuajtis ayokmo itstos ininuaya,* uajka kena mosauasej. 16 Amo aka kitlatlamania* se yoyomitl tlen sosoltik ika se yoyomitl tlen yankuik, pampa yoyomitl tlen yankuik motsokoyolos, kitilanas* tlen sosoltik uan achi más tsayanis. 17 Nojkia, amo aka kiteka vino tlen yankuik ipan se kuetlaxbolsa tlen ya sosoltik. Tlaj kiampa kichiuaskia, nopa kuetlaxtli tsayaniskia uan toyauiskia vino, uan nopa kuetlaxbolsa ayokmo ueliskia kitekiuisej. Yeka maseualmej kitekaj vino tlen yankuik ipan kuetlaxbolsa tlen yankuik, kiampa amo tleno nempoliui”.*

18 Kema kiniljuiyaya ni tlamantli, kinechkauito se tlayakanketl, motlankuaketski iixpa uan kiiljuik: “Temachtli nosiuapil ya mijki, pero xiuala uan xijtlali momax ipani, uan sampa moyolkuis”.

19 Uajka Jesús moketski uan yajki iuaya, uan itokilijkauaj nojkia yajkej. 20 Uan se siuatl katli kipiayaya 12 xiuitl esotemoyaya, kinechkauijtiuetsiko ika iika uan kiitskilik itenuaxo iyoyo, 21 pampa moiljuiyaya: “Maske san nikitskilis iyoyo, nimochikauas”. 22 Jesús moikankuepki* uan kema kiitak, kiiljuik: “¡Amo ximokueso nosiuapil! Timochikajki pampa kuali titlaneltoka”. Uan nopa siuatl nimantsi mochikajki.

23 Teipa, kema kalajki ichaj nopa tlanauatijketl uan kinitak katli kipitsayayaj flauta uan nopa miakej maseualmej katli chikauak chokayayaj, 24 Jesús kiniljuik: “Xikisakaj, pampa ni pilsiuapiltsi amo miktok, san kochtok”. Kema kikajkej nopa, pejkej kiuetskiliaj uan kipinajtiaj. 25 Uajka, kema kinkixtijkej nopa maseualmej, kalajki kampa kitektoyaj nopa siuapil uan kimaitskik, uan ya mejki. 26 Uan ipan nochi pilaltepetsitsij tlen nechka mokauayaya, kimatkej tlen panok.

27 Kema Jesús kiski kampa itstoya, kitokilijkej omej katli amo tlachiayayaj uan kitsajtsiliyayaj: “¡Xitechtlasojtla, tiiKone David!”. 28 Kema Jesús kalajki ipan nopa kali, nopa tlakamej kinechkauijkej uan ya kintlatsintokik: “¿Inkineltokaj na uelis niinmechchikauas?”. Inijuantij kinankilijkej: “Kena toTeko”. 29 Uajka, kiitskik ininixteyol uan kiniljuik: “Pampa intlaneltokaj, ma mochiua tlen intlajtlankej”. 30 Uan pejkej tlachiaj. Uajka Jesús xitlauak kiniljuik: “Amo aka xikiljuikaj tlen panok”. 31 Pero kema kiskej kalteno, kamanaltijtiajkej tlen Jesús ipan nochi pilaltepetsitsij tlen nechka mokauayaya.

32 Kema ya yauiyayaj, maseualmej kiualikilijkej Jesús se tlakatl katli amo ueliyaya kamanalti pampa kipixtoya se amo kuali ajakatl.* 33 Kema Jesús kikixtik nopa amo kuali ajakatl, nopa tlakatl kamanaltik. Maseualmej mosentlachilijkej uan kiijtojkej: “Amo kema tikitstoyaj ni tlamantli ipan Israel”. 34 Pero fariseos kiijtouayayaj: “Kinkixtia amo kuali ajakamej pampa kipaleuia katli kinyakana amo kuali ajakamej”.

35 Uan Jesús pejki nemi ipan nochi altepemej uan pilaltepetsitsij. Tlamachtijtinenki kampa tlaueyichiuayayaj judíos, kimoyajtinenki nopa kuali tlamachtili tlen iTlanauatijkayo Dios uan kinchikauayaya nochi katli mokokouayayaj uan katli kipixtoyaj tlen ueli tlakuajkualojkayotl. 36 Kema kinitayaya nopa miakej maseualmej, tlauel kinteikneltiitayaya* pampa kinkokojtoyaj uan kintlauelkajtoyaj* kej pilborregojtsitsij katli amo kipiaj ajkia kinmokuitlauis. 37 Uajka kiniljuik itokilijkauaj: “Nelia onka miak pixkistli, pero amo itstokej miakej pixkanij. 38 Yeka, xijtlajtlanikaj katli iAxka nopa mili ma kintitlani sekinok pixkanij”.