Nopa ompa carta tlen kintitlanilijkej Cristo itokilijkauaj tlen Corinto

5 Pampa tijmatij tlaj kixoleuasej* tochaj tlen tijpiaj ipan ni Tlaltipaktli, tlen kiijtosneki totlakayo tlen eli kej se yoyonkali, uajka Dios* techmakas se ueyi kali tlen uejkauas para nochipa ipan iluikaktli, se kali tlen maseualmej amo kichijchijtokej. 2 Nelia timokuesouaj ipan ni kali uan tlauel tijnektokej tijselisej nopa kali tlen uala iluikak, tlen elis toaxka uan techtsakuas kej se yoyomitl, 3 kiampa kema nopa kali techtsakuas, amo tiitstosej tixolotikej.* 4 Katli tiitstokej ipan ni yoyonkali timokuesouaj uan timotekipachouaj, amo pampa tijnekij timokixtilisej ni yoyonkali, timokuesouaj pampa tijnekij timotlalilisej nopa seyok, kiampa nopa nemilistli tlen amo kema tlamis kitsontlamiltis tlen kena ueli miki. 5 Pampa Dios techkualchijchijki para ni tlamantli uan techmakak ichikaualis* para kinextis temachtli tlen tijselisej teipa.*

6 Yeka, nochipa tlauel timotemachiaj ipan nopa tlamantli uan tijmatij tlaj nojua tiitstokej* ipan totlakayo, amo tiitstokej inechka toTeko; 7 pampa timonejnemiltiaj ika totlaneltokilis uan amo ika tlen tikitaj. 8 Pero tlauel timotemachiaj ipan* nopa tlamantli uan más tijnekij tiitstosej ika toTeko uan amo tiitstosej ipan totlakayo. 9 Yeka, tlaj tiitstokej iuaya o tlaj amo tiitstokej inechka, san tijnekij kuali ma techita. 10 Pampa nochi moneki timonextitij kampa Cristo tetlajtolsenkaua para sejse ma kiseli tlen kinamiki ika tlen kichijki ika itlakayo, tlaj elki tlen kuali o tlen amo kuali.

11 Tojuantij tijmatij tlake nelnelia kiijtosneki tijmakasisej toTeko, yeka nojua tikinpaleuiaj maseualmej ma kineltokakaj tlen titlamachtiaj, pero Dios kuali techixmati, uan na nijneki inmojuantij ika inmotlalnamikilis nojkia kuali xitechixmatikaj. 12 Amo tijnekij sampa tiinmechiljuisej kuali tlamantli tlen tojuantij, san tiinmechiljuijtokej ni tlamantli para uelis kuali inkamanaltisej tlen tojuantij, uan kiampa uelis inkinnankilisej katli moueyimatij ika tlen kiitaj uan amo ika tlen eltok ipan ininyolo. 13 Pampa tlaj titsonuiuitixtoyaj, kiampa timochijkej para Dios; uan tlaj ya titsontlalnamikij, tijchiuaj para inmojuantij. 14 Itlaiknelijkayo Cristo techchiualtia ma tijneltokakaj, pampa ya ni tlen tijkuamachilijtokej: se tlakatl mijki por nochi; uajka nochi ya miktoyaj. 15 Uan ya mijki por nochi, kiampa katli itstosej ayokmo kichiuasej san tlen inijuantij kinekij, itstosej para kichiuasej tlen kineki katli mijki por inijuantij uan moyolkuik.*

16 Uajka, desde nama ayokmo tikitaj se akajya kej maseualmej kiitaj. Nojkia, tlaj se keskij tikitakej Cristo kej maseualmej kiitaj, temachtli ayokmo kiampa tikitaj. 17 Yeka, tlaj se akajya itstok iuaya Cristo, nama eli se yankuik maseuali katli Dios kichijchijtok. Tlamantli tlen achtouia eltoya, ya panok. ¡Xikitakaj! Nama onka tlamantli tlen yajyankuik. 18 Pero nochi tlamantli uala tlen Dios, katli ika Cristo kichijki ma timoyoltlalikaj iuaya, uan techmakak ni tekitl para tikinpaleuisej maseualmej ma moyoltlalikaj iuaya. 19 Ni kiijtosneki Dios kitekiuiyaya Cristo para kichiuas nochi maseualmej ma moyoltlalikaj iuaya uan ayokmo kiilnamikiyaya inintlajtlakoljuaj, uan techtekimakak para ma tikinpaleuikaj maseualmej ma moyoltlalikaj iuaya.

20 Uajka, tielij itlatitlaniljuaj Dios* katli tiipatlakaj Cristo, uan eliskia kejuak Dios kintlajtlania maseualmej ika tojuantij. Kej tiipatlakaj Cristo, tiinmechtlajtlaniaj: “Ximoyoltlalikaj iuaya Dios”. 21 Cristo amo kema tlajtlakolchijki uan Dios temaktilik kej se ofrenda* para kiixpolos totlajtlakoljuaj, kiampa ika ya uelis tielisej tixitlauakej iixpa Dios.