Tlen kiijkuilok Marcos

5 Uajka asitoj seyok nali mar, kampa inintlal gerasenos. 2 Uan kema Jesús temok ipan nopa barco,* kinamikito se tlakatl katli kipiayaya se amo kuali ajakatl uan ualayaya kampa cementerio. 3 Itstoya nopaya ipan cementerio uan amo aka ueltoya kiilpia yon ika cadena. 4 Miakpa kimailpiyayaj uan kimetsilpiyayaj* ika cadena, pero nochipa kikokototsayaya. Amo aka ueliyaya kitlani. 5 Nochipa, tonaya uan tlayoua, nemiyaya kampa cementerio uan kampa tepemej, tsajtsitinemiyaya uan motejtekiyaya ika tetl. 6 Uan kema kiuejkaitak Jesús, motlalok uan motlankuaketski iixpa. 7 Uajka chikauak kuatsajtsik: “¿Tlake tijchiua nikaj Jesús, tiiKone Dios* katli Más Ueyi? Xitlatestigojketsa ika Dios para amo tinechtlaijiyouiltis”. 8 Pampa Jesús ipa kiiljuijtoya: “Ta, amo kuali ajakatl, xikisa tlen nopa tlakatl”. 9 Uajka Jesús kitlatsintokik: “¿Kenijkatsa motoka?”. Ya kinankilik: “Notoka Legión,* pampa tielij timiakej”. 10 Uan chikauak kitlajtlaniyaya Jesús amo ma kinkixti tlen nopa tlali.

11 Ipan se tepetl tlakuayayaj miakej pitsomej. 12 Uajka nopa amo kuali ajakamej pejkej kitlajtlaniaj Jesús: “Xitechtitlani ma tikalakitij ipan ne pitsomej”. 13 Uan ya kinkauilik ma yakaj. Uajka nopa amo kuali ajakamej kiskej tlen nopa tlakatl uan kalajkej ipan pitsomej. Uan nochi pitsomej, momajkajkej ipan tepexitl uan uetsitoj ipan mar. Nochi pitsomej katli misauijkej eliyayaj se 2 mil. 14 Pero katli kinmokuitlauiyayaj nopa pitsomej, cholojtejkej uan yajkej tepouilitoj ipan altepetl uan pilaltepetsitsij. Uajka nochi maseualmej yajkej kiitatoj tlake panotoya. 15 Kema asitoj kampa itstoya Jesús, kiitakej nopaya moseuijtoya nopa tlakatl katli kinpixtoya miakej amo kuali ajakamej, ya moyoyontijtoya uan tlalnamikiyaya, uan tlauel momajmatijkej. 16 Uan katli kiitakej tlen kipanotoya nopa tlakatl katli kinpixtoya amo kuali ajakamej uan tlen kinpanotoya nopa pitsomej, kinixtomilijkej kenijkatsa panotoya nochi. 17 Yeka maseualmej pejkej chikauak kitlajtlaniaj Jesús ma yaui sejkanok.*

18 Uajka, kema Jesús tlejkoyaya ipan barco, nopa tlakatl katli kinpixtoya nopa amo kuali ajakamej kitlajtlanik ma kikauili yas iuaya. 19 Pero Jesús amo kikauilik, kiiljuik: “Xia mochaj. Xitlakuepili kampa mouikaljuaj* uan xikiniljui nochi tlen Jehová* mitschiuilik uan kenijkatsa mitstlasojtlak”. 20 Nopa tlakatl yajki uan pejki tematiltia ipan Decápolis* nochi tlen Jesús kichiuilijtoya, uan nochi maseualmej mosentlachiliyayaj.

21 Jesús tlakuepilik ne seyok nali ipan barco. Uan kema nojua itstoya iteno mar, miakej maseualmej mosentilijkej inechka. 22 Uajka ualajki se tlen nopa katli tlayakanayayaj kampa tlaueyichiuaj judíos, katli motokaxtiyaya Jairo. Kema kiitak Jesús, motlankuaketski iixpa 23 uan miakpa kitlajtlanik: “Nopilsiuapil tlauel mokokoua. Nimitsontlajtlania xiuala uan xijtlali momax ipani para ma mochikaua, kiampa amo mikis”. 24 Jesús nimantsi yajki iuaya. Uan kitokilijtiauiyayaj tlauel miakej maseualmej uan kikuatetsoptiauiyayaj.

25 Nojkia, nopaya itstoya se siuatl katli kipiayaya 12 xiuitl esotemoyaya. 26 Ya yajtoya ika miakej tepajtianij uan san kitlaijiyouiltijtoyaj. Nojkia kitekiuijtoya nochi itomij uan amo mochikauayaya, uan más motlaueltiyaya.* 27 Kikaktoya tlen kiijtouayayaj tlen Jesús, yeka kalajki inintsala maseualmej, kinechkauik ika iika uan kiitskilik iyoyo tlen ika moajkoluijkomayaya,* 28 pampa moiljuiyaya: “Maske san nikitskilis iyoyo, nimochikauas”. 29 Ipan nopa tlalochtli,* ayokmo esotemok uan ipan itlakayo kimatki mochikajtoya tlen nopa kokolistli tlen kitlaijiyouiltijtoya.

30 Jesús nimantsi kimatki kistoya ichikaualis. Uajka moikankuepki* uan tlatsintokak: “¿Ajkia kiitskik noyoyo?”. 31 Uan itokilijkauaj kinankilijkej: “Tikita miakej mitskuatetsoptokej... ¿uan titlatsintoka ajkia mitsitskik?”. 32 Pero ya nojua tlajtlachiayaya para kiitas ajkia kiitskitoya. 33 Nopa siuatl, katli kimatiyaya tlen kipanotoya, uiuipikayaya pampa tlauel momajmatijtoya. Uajka kinechkauik, motlankuaketski iixpa uan kiiljuik nochi. 34 Jesús kiiljuik: “Nosiuapil, timochikajki pampa kuali titlaneltoka. Xia ika kuali pampa ya timochikajtok tlen ni kokolistli tlen mitstlaijiyouiltijtoya”.

35 Kema nojua kamanaltitoya, ualajkej se keskij tlakamej katli tekitiyayaj ichaj Jairo uan kiiljuijkej: “Mosiuapil ya mijki. ¿Kenke nojua tijkuatotonis ni Tlamachtijketl?”. 36 Pero kema Jesús kikajki tlen kiijtouayayaj, kiiljuik Jairo: “Amo ximomajmati, san xitlaneltoka”. 37 Uan amo kinejki sekinok ma yakaj iuaya, san kinuikak Pedro, Santiago uan Juan, iikni Santiago.

38 Kema asitoj ichaj Jairo, kinitak maseualmej tlauejchiuayayaj, chokayayaj uan kuatsajtsiyayaj. 39 Yeka kema kalajki, kiniljuik: “¿Kenke inchokaj uan tlauel intlauejchiuaj? Ni siuapil amo miktok, san kochtok”. 40 Kema kikajkej nopa, pejkej kiuetskiliaj uan kipinajtiaj. Uajka, kema kinkixtijkej nopa maseualmej, Jesús kinuikak itata uan inana kampa kitektoyaj* nopa siuapil uan nojkia itokilijkauaj katli yauiyayaj iuaya. 41 Uajka kimaitskik nopa siuapil uan kiiljuik: “Tálitha cúmi”, tlen kiijtosneki “pilsiuapiltsi, nimitsiljuia: ¡ximeua!”. 42 Nimantsi, nopa siuapil mejki uan pejki nejnemi. (Kipixtoya 12 xiuitl). Kema kiitakej nopa, inijuantij tlauel mosentlachilijkej uan hasta amo kimatiyayaj kenijkatsa kinextisej tlauel yolpakiyayaj. 43 Pero Jesús miakpa* kinnauatik amo aka ma kipouilikaj. Nojkia kiniljuik ma kitlamakakaj nopa siuapil.