Tlen kiijkuilok Marcos

6 Uajka Jesús kiski kampa itstoya uan yajki ialtepe, uan itokilijkauaj nojkia yajkej iuaya. 2 Kema elki sábado, pejki tlamachtia kampa tlaueyichiuaj judíos, uan miakej katli kitlakakilijkej mosentlachilijkej uan kiijtojkej: “¿Kanke kiyekok nochi ni tlamantli? ¿Kenke kimati miak tlamantli? ¿Uan ajkia kimakatok chikaualistli para ma kichiua ni milagros? 3 Ya eli nopa kuaxinketl, ikone María uan ininikni Santiago, José, Judas uan Simón, ¿axke? Uan isiuaikniuaj nojkia nikaj itstokej touaya”. Uan ni kichijki amo ma tlaneltokakaj ipan ya. 4 Pero Jesús kiniljuik: “Se teokamanalojketl* ejeliuis* kitlepanitaj, pero ipan ialtepe amo, yon ika iuikaljuaj* yon ipan ichaj”. 5 Yeka nopaya amo uelki kichiua yon se milagro, san kinchikajki se keskij katli mokokouayayaj kema kintlalilik imax ininpani. 6 Jesús hasta mosentlachilik kema kiitak amo kuali tlaneltokayayaj. Uan tlamachtijtinenki ipan pilaltepetsitsij tlen nechka mokauayaya.

7 Uajka kinsentilik nopa 12 apóstoles uan pejki kintitlani ojomej, uan kinmakak tlanauatili para kinkixtisej amo kuali ajakamej.* 8 Nojkia kinnauatik amo tleno ma kiuikakaj kema yaskiaj ipan ojtli, san kiuikaskiaj se kuatopili. Amo monekiyaya kiuikasej tlen kikuaskiaj* yon kuetlaxmorral kampa motlatejtemiliskiaj yon tomij ipan inintsinkechilpika.* 9 Kiniljuik ma motlalilikaj ininhuaraches, pero amo ma kiuikakaj ome ininyoyo. 10 Uan nojkia kiniljuik: “Kema inkalakisej ipan se kali, nopaya ximokauakaj* hasta kema inyasej sejkanok.* 11 Pero tlaj kanajya amo inmechseliaj yon inmechtlakakiliaj, kema inkisasej, ximoikxitsejtselokaj para ma tepeui tlaltejpoktli,* kiampa inijuantij kiitasej kichiuaj tlen amo kuali”. 12 Uajka yajkej uan pejkej tematiltiaj para maseualmej monekiyaya moyolkuepasej; 13 kinkixtiyayaj miakej amo kuali ajakamej, kintlaliliyayaj aceite miakej katli mokokouayayaj uan kinchikauayayaj.

14 Nopa tlanauatijketl Herodes kikajki ni tlamantli, pampa nochi kamanaltiyayaj tlen Jesús uan kiijtouayayaj: “Juan katli teAtsonpoliuiltiyaya ya moyolkuik uan yeka ueli kichiua milagros”. 15 Sekinok kiijtouayayaj: “Eli Elías”. Uan sekij kiijtouayayaj: “Eli se teokamanalojketl, kej nopa teokamanalouanij katli uejkajkia itstoyaj”. 16 Pero kema Herodes kikajki kamanaltiyayaj tlen Jesús, kiijtok: “Juan katli nijkechtsontejki, ya moyolkuik”.* 17 Herodes tlanauatijtoya ma kiitskikaj Juan, ma kiilpikaj ika cadenas uan ma kitsakuakaj pampa kiampa kinekiyaya Herodías, katli eliyaya isiua Filipo, ni tlakatl eliyaya iikni Herodes; uan ya mosiuajtijtoya iuaya nopa siuatl, 18 uan Juan kiiljuiyaya Herodes: “Amo kinamiki timokuilis moikni isiua”. 19 Yeka Herodías kikualankaitayaya uan kinekiyaya kimiktis, pero amo ueliyaya, 20 pampa Herodes kimakasiyaya Juan. Ya kimatiyaya eliyaya se tlakatl katli kichiuayaya tlen kuali uan kiueyichiuayaya Dios,* yeka kimokuitlauiyaya. Kema kitlakakiliyaya, amo kikuamachiliyaya uan amo kimatiyaya tlake kichiuas; pero ya kipaktiyaya kitlakakilis.

21 Pero asik tonali kema ueliskia kichiuas tlen moiljuijtoya. Herodes kichijki se ueyi tlakualistli pampa kiaxitik ixiui uan kintlanejki uejueyij tekichiuanij, uan nojkia katli kinyakanayayaj soldados uan katli tlauel kinixmatiyayaj ipan Galilea. 22 Uajka kalajki iichpoka Herodías uan mijtotik; uan Herodes uan katli tlakuayayaj iuaya tlauel kinpaktik. Yeka nopa tlanauatijketl kiiljuik nopa ichpokatl: “Xinechtlajtlani tlen tijnekis uan nimitsmakas”. 23 Nojkia kitenkauilik: “Nimitsmakas tlen ueli tlamantli tlen tinechtlajtlanis, hasta tlajko notlanauatijkayo”. 24 Nopa ichpokatl kiski uan kitlatsintokito inana: “¿Tlake nijtlajtlanis?”. Inana kinankilik: “Itsonteko Juan katli teAtsonpoliuiltia”. 25 Nimantsi nopa ichpokatl motlalok kampa itstoya nopa tlanauatijketl uan kitlajtlanik: “Nijneki namantsi xinechmaka ipan se plato itsonteko Juan katli teAtsonpoliuiltia”. 26 Maske nopa tlanauatijketl tlauel mokuesok, amo kiiljuik para amo kimakaskia tlen kitlajtlanijtoya, pampa kiilnamijki tlen kitenkajtoya ininixpa katli kintlanejtoya. 27 Yeka nopa tlanauatijketl nimantsi kititlanki se isoldado ma kikuiti itsonteko Juan. Nopa soldado yajki, kikechtsontejki kampa kitsaktoyaj 28 uan kiualikak itsonteko ipan se plato. Uajka kimakak nopa ichpokatl uan ya kimakato inana. 29 Kema Juan itokilijkauaj kimatkej kimiktijtoyaj, ualajkej, kiuikakej itlakayo uan kitlalijkej ipan se mijkaostotl.

30 Nopa apóstoles monechkauijkej kampa Jesús uan kipouilijkej nochi tlen kichijtoyaj uan tlen tlamachtijtoyaj. 31 Uan ya kiniljuik: “Xiualakaj nouaya, ma tiakaj timosiajketsatij se kentsi kampa tlatsitsikatok”. Pampa miakej maseualmej yauiyayaj uan ualayayaj, uan inijuantij amo kipiayayaj tonali yon para tlakuasej. 32 Yeka yajkej uejka ipan barco* kampa ueliskiaj itstosej ininselti. 33 Pero se keskij maseualmej kinitakej kema yajkej uan miakej nojkia kimatkej. Yeka maseualmej katli euayayaj ipan nochi altepemej moisiuiltijkej uan asitoj nopaya achtoui que inijuantij. 34 Kema temok ipan barco, kinitak itstoyaj miakej maseualmej uan tlauel kinteikneltiitak,* pampa eliyayaj kej pilborregojtsitsij katli amo kipiayayaj ajkia kinmokuitlauis. Uan pejki kinmachtia miak tlamantli.

35 Kema tiotlakixki, itokilijkauaj kinechkauijkej uan kiiljuijkej: “Tlauel uejka kampa tiitstokej uan ya tiotlak. 36 Xikiniljui ni maseualmej ma yakaj kampa tlatojtokaj uan ipan pilaltepetsitsij tlen eltok nechka para mokouisej tlen kikuasej”. 37 Pero Jesús kinnankilik: “Inmojuantij xikintlamakakaj”. Uajka kitlatsintokijkej: “¿Tijneki ma tijkouatij 200 denarios* pantsi para tikintlamakasej?”. 38 Ya kiniljuik: “¿Keski pantsi inkipixtokej? Xikitatij”. Kema kimatkej keski, kiiljuijkej: “Makuili pantsi uan omej michimej”. 39 Uajka kiniljuik maseualmej ma moseuikaj xiuiixko ika pamitl. 40 Yeka moseuijkej ika pamitl tlen 100 uan 50 maseualmej. 41 Teipa, kikuik nopa makuili pantsi uan nopa omej michimej, ajkotlachixki uan kichijki se tlamaijtoli.* Uajka kitlajkoitak nopa pantsi uan kinmakak itokilijkauaj ma kinmajmakakaj maseualmej. Nojkia kinmajmakak nopa omej michimej. 42 Nochi tlakuajkej uan ixuikej. 43 Teipa kisentilijkej 12 kuachikiuitl temitok ika pantsi tlen mokajki, uan iyoka nojkia kisentilijkej michimej tlen mokajki. 44 Kikuajkej pantsi se 5 mil tlakamej.

45 Uajka nimantsi kiniljuik itokilijkauaj ma tlejkokaj ipan barco uan ma tlaixkotontiakaj hasta seyok nali kampa altepetl Betsaida, uan ya nojua kinnauatijtejki* maseualmej. 46 Uan kema tlanki kinnauatijteua, yajki momaijtoto ipan se tepetl. 47 Kema tlayouixki, nopa barco eltoya itlajkotipa mar, pero Jesús nojua itstoya iselti ipan tepetl. 48 Uajka kiitak tlauel ouijtiyayaj kiuikasej barco pampa kiixnamikiyayaj ajakatl. Kema tlanestiualayaya,* nejnentiajki aixko kampa inijuantij, pero ya moiljuiyaya san kinpanoti. 49 Kema kiitakej nejnentiauiyaya ipan mar, inijuantij moiljuijkej: “¿Ne tlake uala?”.* Uan pejkej kuatsajtsij, 50 pampa nochi kiitakej uan momajmatijkej. Pero Jesús nimantsi kiniljuik: “¡Amo xiyoluiuipikakaj! Nieli na, amo ximajmauikaj”. 51 Ya tlejkok ininuaya ipan barco, uan moketski nopa ajakatl. Kema kiitakej nopa, tlauel mosentlachilijkej, 52 pampa ayamo kikuamachilijtoyaj tlake kiijtosnekiyaya kema kimiakilik pantsi, uan nojua yoltetixtoyaj, yeka amo ueliyayaj kikuamachiliaj.

53 Kema kiixkotonkej mar, asitoj Genesaret, uan nopaya nechka kiilpijkej ininbarco. 54 Uan kema temokej ipan barco, maseualmej nima kiitakej eliyaya Jesús. 55 Motlalojtiajkej ipan nochi nopa tlali, uan pejkej kiuikiliaj kokoyanij ipan inintlapech. Yauiyayaj kampa kimatiyayaj itstoya. 56 Nochipa kema kalakiyaya ipan se pilaltepetsi o altepetl, o ipan se rancho, maseualmej kintlaliyayaj kokoyanij kampa tiankischiuayayaj,* uan kitlajtlaniyayaj ma kinkauili kiitskilisej maske san itenuaxo iyoyo. Uan nochi katli kiitskiyayaj, mochikauayayaj.