Tlen kiijkuilok Marcos

1 Tlen ika peua nopa kuali tlamachtili tlen Jesucristo, iKone Dios. 2 Panok kej ijkuilijtok ipan libro tlen teokamanalojketl* Isaías: “(¡Xikita! Achtoui nijtitlanis notlayolmelajka ma tlayakantia, uan yaya mitskualchijchiuilis nopa ojtli). 3 Se akajya chikauak kiijtoua* ipan uaktok tlali: ‘¡Xijkualtlalikaj* iojui Jehová!* Xijchiuakaj kuali ma elto’”. 4 Juan katli teAtsonpoliuiltiyaya itstoya ipan uaktok tlali uan kiniljuiyaya maseualmej: “Ximoatsonpoliuiltikaj, kiampa inkinextisej inmoyolkueptokej uan Dios* inmechtlapojpoljuis inmotlajtlakoljuaj”. 5 Uajka, nochi katli itstoyaj ipan tlali Judea uan Jerusalén yauiyayaj kiitaj. Ya kinatsonpoliuiltiyaya ipan ueyatl Jordán, uan inijuantij kiijtouayayaj inintlajtlakoljuaj ininixpa sekinok. 6 Juan moyoyontiyaya ika iijuiyo camello uan motsinkechilpiyaya ika se kuetlaxtli, kinkuayaya chapolimej uan nektli tlen kampa ueli onka. 7 Uan kimoyauayaya ni tlajtoli: “Katli ualas teipa kipia más tlanauatili que na. Uan na amo kinamiki ma nimopacho para nijkixtilis ihuaraches. 8 Na niinmechatsonpoliuiltik ika atl, pero ya inmechatsonpoliuiltis ika ichikaualis Dios”.*

9 Ipan nopa tonali, Jesús kistejki Nazaret tlen Galilea uan Juan kiatsonpoliuiltik ipan ueyatl Jordán. 10 Kema Jesús pankiski atitla, nimantsi kiitak motlapok iluikaktli uan ichikaualis Dios ualtemoyaya itsonixko* kej se paloma. 11 Uan inijuantij kikajkej Dios kiijtok ipan iluikak: “Ta tieli noKone katli tlauel nimitsiknelia, ta tijchiua ma niyolpaki”.

12 Nimantsi, ichikaualis Dios kichijki ma yaui ipan uaktok tlali. 13 Jesús itstoya 40 tonali ipan uaktok tlali, uan Satanás kinekiyaya kichiuas ma tlajtlakolchiua. Nopaya itstoyaj kuatitlantlapialmej, pero ángeles kipaleuiyayaj.

14 Teipa, kema kitsajkej Juan, Jesús yajki Galilea kimoyauato nopa kuali tlamachtili tlen Dios. 15 Kiijtouayaya: “Nopa tonali tlen kiixtlalijtoyaj ya moaxitijtok, uan nopa Tlanauatijkayotl tlen eltok iluikak ya monechkauijtok. Ximoyolkuepakaj uan xijneltokakaj nopa kuali tlamachtili”.

16 Kema nejnentiauiyaya iteno mar tlen Galilea, kinitak Simón uan iikni Andrés kimajkauayayaj ininmatla ipan mar, pampa eliyayaj michtlajtlamanij. 17 Jesús kiniljuik: “Xinechtokilikaj uan na niinmechpaleuis xikintemokaj maseualmej sanse kej kema inmichtlajtlamaj”. 18 Inijuantij nimantsi kikajtejkej ininmatla uan kitokilijkej. 19 Kema ya nejnentoya se kentsi, kiitak Santiago ikone Zebedeo uan iikni Juan, itstoyaj ipan ininbarco* uan kiijtsomayayaj ininmatla, 20 uan nimantsi kinnotski. Uajka, inijuantij kikajtejkej inintata Zebedeo ipan barco uan katli kipaleuiyayaj, uan kitokilijkej. 21 Uan yajkej* Capernaúm.

Kema pejki sábado, Jesús kalajki kampa tlaueyichiuaj judíos uan pejki kinmachtia. 22 Maseualmej mosentlachilijkej kema kikajkej kenijkatsa tlamachtiyaya, pampa kinmachtiyaya kej se akajya katli kipia tlanauatili uan amo kej nopa escribas.* 23 Ipan nopa tlalochtli,* se tlakatl katli kipixtoya se amo kuali ajakatl,* kuatsajtsik: 24 “¿Tlake tijchiua nikaj Jesús, katli tieua Nazaret? ¿Tiualajtok titechtsontlamiltiki? ¡Kuali nijmati ta tieli katli Dios kiualtitlanki!”. 25 Pero Jesús kiajuak uan kiiljuik: “¡Ximokamatsakua uan xikisa tlen ni tlakatl!”. 26 Uan nopa amo kuali ajakatl kichijki nopa tlakatl ma uiuipika uan chikauak ma kuatsajtsi, uan teipa kiski. 27 Nochi mosentlachilijkej uan pejkej moiljuiaj tlake panotoya. Kiijtouayayaj: “¿Ni tlake eli? ¡Ni eli se yankuik tlamachtili! Hasta kipia tlanauatili para kinkixtis amo kuali ajakamej uan inijuantij kichiuaj tlen kiniljuia”. 28 Yeka, ipan nochi tlali Galilea nimantsi momatki tlen Jesús kichiuayaya.

29 Teipa kiskej kampa tlaueyichiuaj judíos, uan Jesús yajki ininuaya Santiago uan Juan ininchaj Simón uan Andrés. 30 Nopaya, imona Simón uilantoya* pampa totoniayaya, uan nimantsi kiiljuijkej Jesús. 31 Ya kinechkauik nopa toaui, kimaitskik uan kitlananki. Uan ayokmo totonixki,* uan pejki kintlachijchiuilia.

32 Kema tiotlakixki uan ya kalaktoya Tonati, maseualmej pejkej kiuikiliaj nochi katli mokokouayayaj uan katli kinpixtoyaj amo kuali ajakamej. 33 Nochi katli itstoyaj ipan nopa altepetl mosentilijtoyaj iixmelak nopa kali. 34 Uajka, kinchikajki miakej maseualmej katli kipixtoyaj tlen ueli kokolistli uan kinkixtik miakej amo kuali ajakamej, pero amo kinkauayaya ma kamanaltikaj pampa nopa amo kuali ajakamej kimatiyayaj ya eliyaya nopa Cristo.*

35 Ika ijnalok, kema nojua tlatlayouatoya, mejki uan yajki kampa tlatsitsikatok uan pejki momaijtoua. 36 Pero Simón uan katli iuaya itstoyaj, kampa ueli yajkej kitemotoj, 37 uan kema kipantijkej, kiiljuijkej: “Nochi mitstemojtinemij”. 38 Jesús kiniljuik: “Ma tiakaj sejkanok,* ipan pilaltepetsitsij tlen nechka mokaua, kiampa nojkia nitlajtolmoyauas nopaya pampa yeka niualajtok”. 39 Uajka, Jesús yajki ipan nochi tlali Galilea uan tlamachtijtinenki kampa tlaueyichiuaj judíos uan kinkixtiyaya amo kuali ajakamej.

40 Se tlakatl katli kipixtoya se kokolistli tlen itoka lepra,* kinechkauik, motlankuaketski iixpa uan kiiljuik: “Na nijmati tlaj ta tijneki, uelis tinechchikauas”.* 41 Jesús tlauel kiteikneltiitak,* yeka kitlalik imax ipani* uan kiiljuik: “Kena, na nijneki. Ximochikaua”. 42 Uan nimantsi nopa lepra polijki uan nopa tlakatl mochikajki. 43 Uajka Jesús kinauatik ma yaui, pero achtoui xitlauak kiiljuik: 44 “Amo aka xikiljui. San xia ximonextiti iixpa sacerdote uan xijuika nopa ofrenda* para timotlapajpakchiuas* kej tlanauatik Moisés, kiampa kiitasej nelnelia timochikajtok”. 45 Kema nopa tlakatl yajki sejkanok, pejki teiljuia tlen panotoya uan kampa ueli kimoyajki. Yeka Jesús ayokmo ueliyaya kalaki ipan yon se altepetl pampa nima kiixmatiyayaj. Uan maske mokauayaya altepeteno, kampa amo aka itstoya, maseualmej katli kampa ueli euaj hasta nopaya yauiyayaj kiitaj.