Tlen kiijkuilok Marcos

4 Jesús sampa pejki tlamachtia iteno mar. Kinechkauijtoyaj tlauel miakej maseualmej, yeka tlejkok ipan se barco,* moseuik nopaya uan yajki achi más uejka. Uan nochi nopa maseualmej mokajkej iteno mar. 2 Uajka pejki kinmachtia miak tlamantli ika neskayotl. Kema kinmachtiyaya, kiniljuiyaya: 3 “¡Xitlakakikaj! Se tlatojketl yajki tokato. 4 Uan kema toktiajki, se keski xinachtli tepejki ojteno, uan ualajkej totomej uan kikuajkej. 5 Sekij tepejki kampa teyo, kampa amo onkayaya miak tlali uan nima ixuak pampa eltoya tlalixkotsi. 6 Pero kema kiski Tonati, nopa tlatoktli tonaltlatlak* uan pilinki pampa amo uejkatla moneljuayotijtoya. 7 Sekij uetski uitstsala, uan nopa uitstli moskaltik uan kiijiyomiktik, yeka amo temakak itlajka. 8 Uan sekij tepejki kampa kuali tlali, ixuak uan moskaltik, uan pejki temaka itlajka: sekij temakak 30 imiakpa más que tlen kitoktoyaj; sekij 60 uan sekinok 100”. 9 Uajka, nojua kiijtok: “Katli kipia inakas para tlakakis, kuali ma tlakaki”.

10 Uan kema itstoya iselti, katli itstoyaj inechka uan nopa 12 apóstoles, pejkej kitlatsintokiaj tlen nopa neskayotl. 11 Ya kinnankilik: “Inmojuantij inmechkauiliaj xijkuamachilikaj tlen Dios* ayamo tematiltia* tlen iTlanauatijkayo. Pero ne sekinok nikinmachtia nochi ika neskayotl, 12 kiampa maske tlachiasej amo kiitasej, uan maske tlakakisej amo tleno kikuamachilisej. Kiampa amo kema tlakuepilisej ika Dios uan amo kintlapojpoljuis”. 13 Nojkia kiniljuik: “Tlaj ni neskayotl amo inkikuamachiliaj, ¿kenijkatsa inkikuamachilisej nochi sekinok neskayotl?

14 ”Nopa tlatojketl kejuak kitoka itlajtol Dios. 15 Sekij maseualmej elij kej nopa xinachtli tlen kitojkej ojteno, kema kikakij itlajtol Dios, Satanás nimantsi uala uan kinkuilia nopa tlajtoli tlen kitojkej ipan inijuantij. 16 Nopa sekinok elij kej nopa xinachtli tlen kitojkej kampa teyo, kema kikakij nopa tlajtoli kiseliaj ika pakilistli. 17 Pero ipan ininyolo amo uejkatla moneljuayotijtok. Maske tlaneltokaj se keski tonali, kema kipiaj kuesoli uan kintlaijiyouiltiaj pampa kineltokaj nopa tlajtoli, motepotlamiaj.* 18 Nojkia, nopa xinachtli tlen kitojkej uitstsala elij katli kitlakakiliaj nopa tlajtoli 19 pero mokuatotoniaj* ika tlen onka ipan ni tonali* uan kikauaj tomij ma kinkajkayaua, uan nochi sekinok tlamantli tlen kinekiskiaj kipiasej uan kiijiyomiktia nopa tlajtoli; yeka ayokmo temakaj inintlajka. 20 Uan nojkia, nopa xinachtli tlen kitojkej kampa kuali tlali, elij katli kikakij nopa tlajtoli uan kiseliaj ika pakilistli uan temakaj inintlajka: sekij temakaj nojua 30 imiakpa; sekij 60 uan sekinok 100”.

21 Uan nojkia kiniljuik: “Amo aka kitlatia* se tlauili uan teipa kitsakua ika se chikiuitl* o kitlalia camajtantitla,* ¿axke? Nopa tlauili kitlaliaj ipan se tlauilketsali. 22 Pampa nochi tlen motlatijtok,* teipa nesis, uan tlen eltok ichtakatsi, teipa momatis. 23 Nochi katli kipiaj ininnakas para tlakakisej, kuali ma tlakakikaj”.

24 Teipa kiniljuik: “Kuali xijtlakakilikaj tlen inkikaktokej. Tlen inkinchiuilisej sekinok, nojkia kiampa inmechchiuilisej. Uan tlen inkinchiuilisej, ya nopa inkiselisej. 25 Pampa katli kipia, nojua más kimakasej, pero katli amo tleno kipia, kikuilisej hasta tlen kipixtok”.

26 Nojua kiniljuik: “ITlanauatijkayo Dios eli kej se tlakatl katli kitoka xinachtli. 27 Kema ika tlayoua kochi uan ika ijnalok meua, nopa xinachtli moskaltia maske amo kimati kenijkatsa pano. 28 Nopa tlatoktli iselti moskaltijtia tlalijtik: achtoui kisa ipilkuayo, teipa ijtiyolkisa uan teipa chikauia itlajka. 29 Kema chikauia tlen kitojki, nopa tlakatl yaui uan kitsonteki pampa ya moneki pixkas”.

30 Uan nojkia kiijtok: “¿Ika tlake tlamantli ueliskia tikixnextisej iTlanauatijkayo Dios o ika tlake neskayotl ueliskia tikixtomasej? 31 Eli kej se iyol mostaza, kema kitokaj nesi más pilsiltsi* que nochi sekinok xinachtli, 32 pero kema ya kitojkej peua moskaltia uan mochiua más ueyi que nochi sekinok tlatoktli. Uan moskaltia uejueyi imakuayo kampa totomej uelij momanauiaj ipan iekauil”.*

33 Kitekiuiyaya miak neskayotl kej ni kema kinmachtiyaya itlajtol Dios, uan kiitayaya tlen ueliskia kikuamachilisej. 34 Nochipa kinkamanaljuiyaya ika neskayotl, uan itokilijkauaj iyoka kinixtomiliyaya nochi.

35 Uan ipan nopa tonali kema tlayouixki, Jesús kiniljuik itokilijkauaj: “Ma titlaixkotonakaj hasta seyok nali mar”. 36 Uajka, kema kinnauatijtejki* nopa maseualmej, itokilijkauaj kiuikakej ipan barco kiampa kej itstoya. Uan sekinok barcos yauiyayaj ininnechka. 37 Pero sanima* pejki chikauak tlaajaka. Nopa atl chikauak kitsouitekiyaya nopa barco uan nechka temiskia ika atl. 38 Pero Jesús kochtoya ika iika nopa barco, uan motsontetonijtoya ipan se tsontetomitl. Uajka inijuantij kiixitijkej uan kiiljuijkej: “Tlamachtijketl, ¿amo tikita para timikisej?”. 39 Uajka moketski uan kitlakaualtik ajakatl uan kiiljuik mar: “¡San xielto! ¡Amo ximolini!”. Uajka, ayokmo tlaajakak uan ayokmo tleno mojmolinik. 40 Teipa kiniljuik: “¿Kenke tlauel inmomajmatijtokej? ¿Ayamo intlaneltokaj?”. 41 Inijuantij tlauel momajmatijkej uan kiijtouayayaj: “¿Ajkia nelnelia eli ni tlakatl? Hasta ajakatl uan mar kichiuaj tlen kiniljuia”.