Tlen kiijkuilok Juan

11 Ipan altepetl Betania itstoya se tlakatl katli motokaxtiyaya Lázaro uan mokokouayaya.* Nopaya nojkia euayayaj María uan iikni Marta. 2 Ni María eli katli kitekilik aceite tlen ajuiyak mijyotia ipan iikxi toTeko uan kiuachilik ika itsonkal. Katli mokokouayaya eliyaya iikni Lázaro. 3 Uajka isiuaikniuaj* tlatitlankej ma kiiljuitij Jesús: “ToTeko, xikita, mouampox* katli tlauel tikiknelia mokokoua”. 4 Pero kema Jesús kikajki nopa, kiijtok: “Ni kokolistli amo kichiuas ma miki, kichiuas ma kiueyichiuakaj Dios* uan ma kiuejkapantlalikaj iKone Dios ika nopa kokolistli”.

5 Jesús kinikneliyaya Marta, María uan Lázaro. 6 Pero kema kikajki Lázaro mokokouayaya, nojua mokajki ome tonali kampa itstoya. 7 Teipa kiniljuik itokilijkauaj: “Sampa ma tiakaj Judea”. 8 Uan itokilijkauaj kiiljuijkej: “Tlamachtijketl,* namanok katli itstokej Judea kinekiyayaj mitstepachosej,* ¿uan tijneki sampa tias nopaya?”. 9 Jesús kinnankilik: “Ipan se tonal tlatlanestok 12 horas, ¿axke? Katli nejnemi tonaya, amo motepotlamia ika yon se tlamantli, pampa kiita nopa tlauili tlen ni Tlaltipaktli. 10 Pero katli nejnemi ika tlayoua, motepotlamia pampa nopa tlauili amo eltok ipan ya”.

11 Kema ya kiijtojtoya nopa, kiijtok: “Touampox Lázaro ya kochki, pero nias nepa para nikixititi”. 12 Uajka itokilijkauaj kiiljuijkej: “ToTeko, tlaj kochtok, mochikauas”. 13 Jesús kinekiyaya kiijtos Lázaro ya miktoya. Pero inijuantij moiljuiyayaj kinekiyaya kiijtos san kochtoya o mosiajketstoya. 14 Uajka Jesús xitlauak kiniljuik: “Lázaro ya mijki, 15 uan niyolpaki pampa amo niitstoya nopaya, kiampa inmojuantij intlaneltokasej. Ma tiakaj tikitatij”. 16 Yeka Tomás, katli kiiljuiyayaj Kuate,* kiniljuik nopa sekinok itokilijkauaj Jesús: “Tojuantij nojkia ma tiakaj uan ma timikikaj iuaya”.

17 Kema Jesús asito, Lázaro ya miktoya uan kipiayaya naui tonali kitlalijtoyaj ipan se mijkaostotl. 18 Nopa altepetl Betania eltoya nechka Jerusalén, se eyi kilómetros iuejkaka.* 19 Miakej judíos yajtoyaj kinitaj Marta uan María para kinyolchikauasej pampa miktoya ininikni. 20 Kema Marta kimatki yauiyaya Jesús, kinamikito; pero María mokajki moseuijtok ichaj. 21 Uajka Marta kiiljuik Jesús: “NoTeko, tlaj nikaj tiitstoskia, noikni amo miktoskia. 22 Pero, maske ya mijki, nijmati Dios mitsmakas nochi tlen tijtlajtlanis”. 23 Jesús kiiljuik: “Moikni moyolkuis”.* 24 Marta kinankilik: “Na nijmati motlananas kema moyolkuisej katli miktokej, kema asis nopa tonali”. 25 Jesús kiiljuik: “Na nieli katli nikinyolkui maseualmej uan katli nikinmaka nemilistli. Katli tlaneltokas ipan na, maske mikis, sampa itstos; 26 uan nochi katli yoltosej uan tlaneltokasej ipan na, amo kema mikisej. ¿Tijneltoka ni tlamantli?”. 27 Marta kiiljuik: “Kena noTeko, na nijneltoka ta tiCristo, iKone Dios, katli ualaskia ipan Tlaltipaktli”. 28 Kema kiijtok ni tlamantli, yajki kiitato iikni María uan ichtakatsi kiiljuik: “ToTlamachtijka itstok nikaj uan mitsnotsa”. 29 Kema María kikajki nopa, nimantsi moketski uan kiitato.

30 Jesús ayamo kalaktoya ipan pilaltepetsi, nojua itstoya kampa Marta kinamikito. 31 Kema nopa judíos katli itstoyaj kalijtik pampa kiyolchikauayayaj María kiitakej moketstiuetski uan yajki, kitokilijkej pampa moiljuijkej chokati kampa mijkaostotl. 32 Uajka María asito kampa Jesús itstoya, uan kema kiitak, motlankuaketski iixpa uan kiiljuik: “NoTeko, tlaj nikaj tiitstoskia, noikni amo miktoskia”. 33 Kema Jesús kiitak María uan judíos katli itstoyaj iuaya mochokiliyayaj, tlauel moyolpitsauilik uan mokuesok. 34 Uan kintlatsintokik: “¿Kanke inkitlalijtokej?”. Inijuantij kinankilijkej: “Xiuala toTeko, uan tikitas”. 35 Uan Jesús ixayotemok.* 36 Kema judíos kiitakej, pejkej kiijtouaj: “¡Xikitakaj, tlauel kiikneliyaya!”. 37 Pero sekij kiijtouayayaj: “Tlaj ni tlakatl kichikajki katli amo ueliyaya tlachia, ¿amo ueltoskia kichiuas amo ma miki Lázaro?”.

38 Jesús sampa moyolpitsauilik uan yajki kampa mijkaostotl. Nopa mijkaostotl eliyaya se tekakauako,* uan tsaktoya ika se tetl. 39 Jesús kiijtok: “Xikijkuenikaj nopa tetl”. Pero Marta, iikni nopa mijkatsi, kiiljuik: “NoTeko, uelis ya poteui pampa ya panok naui tonali”. 40 Uan Jesús kitlatsintokik: “¿Amo nimitsiljuik tlaj titlaneltokaskia tikitaskia iueyitilis Dios?”. 41 Uajka kiijkuenijkej nopa tetl. Jesús ajkotlachixki uan kiijtok: “NoTata, nimitstlaskamatilia pampa tinechtlakakilijtok. 42 Na nijmati ta nochipa tinechtlakakilia, pero nikijtoua ni para katli nikaj itstokej ma kineltokakaj ta tinechualtitlanki”. 43 Uan kema tlanki kiijtoua nopa, chikauak kitsajtsilik: “¡Lázaro, xikisa!”. 44 Uan katli miktoya kiski. Kiuijkontoyaj iikxi uan imax, uan kiixtsaktoyaj ika se yoyomitl.* Jesús kiniljuik: “Xijkixtilikaj tlen ika kiuijkontokej uan xijkauakaj ma yaui”.

45 Yeka, kema kiitakej tlen Jesús kichijki, miakej judíos katli yajtoyaj kipaxalouaj María tlaneltokakej ipan Jesús. 46 Pero sekij yajkej uan kinpouilijkej fariseos* tlen Jesús kichijtoya. 47 Uajka sacerdotes katli kipiayayaj tlanauatili uan fariseos kinsentilijkej nopa Tekichiuanij katli kipiaj más Tlanauatili* uan kiijtojkej: “¿Tlake tijchiuasej? Pampa nopa tlakatl kichiua miak milagros.* 48 Tlaj tijkauaj nojua kiampa ma kichijto, nochi tlaneltokasej ipan ya uan romaeuanij ualasej uan techkixtilisej kampa titlaueyichiuaj uan nojkia toaltepe”. 49 Pero se tlen inijuantij, Caifás, katli eliyaya sumo sacerdote ipan nopa xiuitl, kiniljuik: “Amo tleno inkikuamachiliaj. 50 Inmojuantij amo inkiitaj más kuali ma miki san se tlakatl para kinpaleuis nochi maseualmej uan amo ma kixoleuakaj* nochi altepetl”. 51 Pero amo kiijtok nopa pampa iselti kiampa moiljuik, kiijtok pampa eliyaya sumo sacerdote ipan nopa xiuitl uan Dios kitekiuik para ma kiijto Jesús mikiskia para kinpaleuis nochi katli euayayaj ipan nopa altepetl. 52 Uan amo san inijuantij, nojkia para kinsentilis san ipan se pamitl ikoneuaj Dios katli kampa ueli mosemantoyaj.* 53 Uajka ipan nopa tonali pejkej kitemoliaj kenijkatsa kimiktisej.

54 Yeka Jesús ayokmo nenki kampa itstoyaj miakej judíos uan yajki nechka uaktok tlali, ipan se altepetl tlen kiiljuiaj Efraín, uan nopaya mokajki ininuaya itokilijkauaj. 55 Monechkauiyaya nopa Pascua tlen judíos kichiuayayaj, uan miakej maseualmej katli euayayaj ipan pilaltepetsitsij ixtlejkokej para Jerusalén kema ayamo peuayaya Pascua para motlapajpakchiuasej kej kiijtoua iTlanauatil Moisés. 56 Uan pejkej kitemouaj Jesús. Kema itstoyaj ipan teokali kiijtouayayaj: “¿Inmojuantij tlake inmoiljuiaj? ¿Uelis amo ualas ipan iljuitl?”. 57 Pero sacerdotes katli kipiayayaj tlanauatili uan fariseos tlanauatijtoyaj tlaj se akajya kimatiskia kanke itstok Jesús, ma kiijto, uan kiampa ueliskiaj kiitskisej.