Nopa carta tlen kintitlanilijkej hebreos

1 Uejkajkia, Dios* miakpa kinnojnotski totatauaj katli uejkajkia itstoyaj ika teokamanalouanij* uan ika miak tlamantli. 2 Nama, ipan itlamia ni tonali, technojnotstok ika se iKone katli kiaxkatis nochi tlamantli uan katli kitekiuik para kichijchiuas nochi tlen mochijtok ipan ni Tlaltipaktli.* 3 Yaya kinextia iueyitilis Dios uan xitlauak kinextia kenijkatsa eli, uan nochi kitlakechia* ika itlajtol tlen kipia chikaualistli. Uan kema ya techpajpakchijtoya tlen totlajtlakoljuaj, moseuito ika imanejmak Dios katli tlauel Ueyi uan itstok ne uejkapa. 4 Yeka mochijtok más ueyi que nochi ángeles, pampa kimakatokej se tokajyotl tlen más kuali que inijuantij.

5 Ma timoiljuikaj, Dios amo kiiljuijtok yon se ángel: “Ta tinokone; nama nimochijtok motata”. Nojkia Dios amo kiiljuijtok yon se ángel: “Na nielis itata uan ya elis nokone”. 6 Uan kema sampa kiualtitlanis iAchtouikone ipan ni Tlaltipaktli, ya kiijtoua: “Uan nochi iángeles Dios ma motlankuaketsakaj iixpa”.

7 Nojkia, tlen nopa ángeles kiijtoua: “Kichiua iángeles ma kipiakaj miak tetikayotl, uan itekipanojkauaj kinchiua kej tlilelemektli”. 8 Pero tlen iKone, kiijtoua: “Dios eli moueyi silla para nochipa uan amo kema tlamis, uan nopa kuatopili tlen ika titlanauatis ipan moTlanauatijkayo eli nopa kuatopili para tijchiuas tlen xitlauak. 9 Tikiknelik tlen xitlauak uan tijkualankaitak tlen amo kuali.* Yeka Dios, moDios, mitstlapejpenik ika aceite uan kichijki más xiyolpaki que katli ininuaya tiitstok”. 10 Nojkia kiijtoua: “ToTeko, kema pejki nochi tlen onka, ta tijtlalik itsinpeualtil Tlaltipaktli, uan ika momax ta tijchijchijki iluikaktli. 11 Tlaltipaktli uan iluikaktli ixpoliuisej, pero ta nojua tiitstos; tlantiasej sanse kej se yoyomitl tlantia, 12 uan nojkia kej tijkimiloua se yoyomitl tlen ika moajkoluijkomaj,* kiampa tijchiuas ika inijuantij uan mopatlasej kej se peseli. Pero ta amo kema timopatla uan moxiui amo kema tlamis”.

13 Pero Dios amo kiiljuijtok yon se ángel: “Ximoseui ika nomanejmak hasta kema nikintlalis mokualankaitakauaj kej pilbancojtsi kampa tijtlalis moikxi”. 14 Nochi inijuantij elij ángeles* katli kitekipanouaj Dios, uan yaya kintitlani para ma kinpaleuitij katli momakixtisej.*