Nopa carta tlen kintitlanilijkej Cristo itokilijkauaj tlen Roma

10 Noikniuaj, nelnelia nijneki ika nochi noyolo uan nijtlajtlania Dios* para inijuantij ma momanauikaj. 2 Pampa uelis nikijtos inijuantij kichiuaj kampeka kitekipanosej Dios, pero amo nelia kiixmatij. 3 Inijuantij amo kimatij tlen Dios kiita xitlauak uan san kichiuaj tlen kiitaj para kuali, yeka amo kineltokakej tlen Dios kiijtoua eli xitlauak. 4 Pampa Cristo kichijki ma tlami iteki nopa Tlanauatili, kiampa nochi katli tlaneltokasej ipan ya, Dios uelis kinitas xitlauakej.

5 Moisés kiijkuilok kenijkatsa nopa Tlanauatili kichiua se akajya ma eli xitlauak. Kiijtok: “Katli kichiuas ni tlamantli, kipaleuis ma itsto”. 6 Pero iTlajkuilol Dios nojkia kiijtoua para se akajya mochiua xitlauak pampa tlaneltoka. Nopaya kiijtoua: “Amo ximoiljui ipan moyolo ‘¿Ajkia tlejkos iluikak?’, kineki kiijtos para kichiuas Cristo ma temo. 7 Nojkia amo xikijto ‘¿Ajkia temos ipan nopa ostotl tlen tlauel uejkatla?’,* kineki kiijtos para kichiuas Cristo ma moyolkui”. 8 Uajka, ¿tlake kiijtoua? “Nopa tlajtoli eltok monechka, ipan mokamak uan ipan moyolo”, ni kiijtosneki nopa “tlajtoli” tlen tijneltokaj uan tlen titematiltiaj. 9 Pampa tlaj titematiltis ika mokamak para Jesús eli toTeko, uan titlaneltokas ika nochi moyolo para Dios kiyolkuik, uajka timomakixtis.* 10 Pampa ika moyolo tijnextia titlaneltoka uan nopa kichiua Dios ma mitsita tixitlauak, pero ika mokamak titematiltia ininixpa sekinok tlen kichiua ximomakixti.

11 Uan iTlajkuilol Dios nojkia kiijtoua: “Nochi katli tlaneltokasej ipan ya, amo mopinaualtisej”.* 12 Pampa judíos elij sanse ika griegos. Nochi kipiaj sanse ininTeko katli kipia kuali iyolo ika nochi katli motemachiaj ipan ya.* 13 Pampa “nochi katli kitsajtsilisej itoka Jehová,* momakixtisej”. 14 Pero, ¿kenijkatsa kitsajtsilisej itoka tlaj amo tlaneltokatokej ipan ya? ¿Uan kenijkatsa tlaneltokasej ipan ya tlaj amo kiixmatij? ¿Uan kenijkatsa kiixmatisej tlaj amo aka kimoyaua nopa tlajtoli? 15 ¿Uan kenijkatsa kimoyauasej nopa tlajtoli tlaj amo kintitlantokej? Sanse kej ijkuilijtok: “¡Tlauel yejyektsitsij ininikxi katli tematiltiaj nopa kuali tlamachtili tlen kuali tlamantli!”.

16 Pero amo nochi kitlakakilijkej nopa kuali tlamachtili, pampa Isaías kiijtoua: “Jehová,* ¿ajkia tlaneltokatok ipan tlen titlayolmelauaj?”. 17 Uajka se akajya tlaneltoka kema ya kikaktok nopa tlamachtili, uan nopa tlamachtili san kikakij kema se akajya tepouilia tlen Cristo. 18 Pero na nitlatsintoka: ¿kiijtosneki inijuantij amo kikajkej nopa tlamachtili? Kena, pampa “ipan nochi Tlaltipaktli kakistik nopa tlamachtili uan katli itstokej hasta iyakapaj* Tlaltipaktli kikajkej tlen tematiltiyayaj”. 19 Pero na nitlatsintoka: ¿israeleuanij amo kimatiyayaj? Achtoui, Moisés kiijtoua: “Niinmechkualankamakas pampa nikinpaleuis katli amo israeleuanij. Nijchiuas tlauel xikualanikaj pampa nikinpaleuis katli kinitaj kej uiuitikej”. 20 Pero Isaías mosemaka uan kiijtoua: “Katli amo nechtemouayayaj, nechpantijkej. Katli amo tlajtlaniyayaj ika na, nechixmatkej”. 21 Pero tlen israeleuanij, kiijtoua: “Se tonal* nijmelajtok nomax para nikinnojnotsas katli amo tlaneltokaj uan tochontikej* para ma mokuepakaj kampa na”.