Tlen kiijkuilok Lucas

11 Se tonali, Jesús momaijtouayaya,* uan kema tlanki, se itokilijka kitlajtlanik: “NoTeko, xitechmachti kenijkatsa timomaijtosej, sanse kej Juan kinmachtik itokilijkauaj”.

2 Uajka Jesús kiniljuik: “Kema inmomaijtosej, xikijtokaj: ‘ToTata, ma kiuejkapantlalikaj* motoka. Tijnekij moTlanauatijkayo ma uala tlanauatiki. 3 Xitechmaka tlen tijkuasej* kej monektias ipan sejse tonal. 4 Xitechtlapojpoljui totlajtlakoljuaj pampa tojuantij nojkia tikintlapojpoljuiaj katli techtlauikiliaj. Uan xitechpaleui amo ma tiuetsikaj ipan tlajtlakoli’”.

5 Uajka kiniljuik: “Ximoiljuikaj se tlen inmojuantij kipia se iuampox* uan yaui tlajkoyoual uan kiiljuia: ‘Nouampox, xinechtlanejti eyi pantsi. 6 Pampa onasiko nochaj se nouampox katli paxaloua uan amo tleno nijpia para nijmakas’. 7 Uan ne se kinankilia desde kalijtik: ‘Ayokmo xinechkuatotoni, ya nikaltsajki ika llave uan nokoneuaj uan na ya timotektokej. Ayokmo uelis nimeuas para nimitsmakas tlen tijneki’. 8 Niinmechiljuia: maske eli iuampox uelis amo meuas para kimakas se tlenijki, pero pampa miakpa kitlajtlania, meuas uan kimakas nochi tlen kineki. 9 Yeka niinmechiljuia: nojua xitlajtlantokaj uan inmechmakasej, nojua xijtemojtokaj uan inkipantisej, nojua xikaltajtakanijtokaj uan inmechkaltlaposej. 10 Pampa nochi katli tlajtlanij kiseliaj, uan nochi katli kitemouaj kipantiaj, uan nochi katli kaltajtakaniaj kinkaltlaposej. 11 ¿Ajkia tlen inmojuantij tlaj ikone kitlajtlania se michij kimaka se kouatl?* 12 O tlaj kitlajtlania se teksistli, ¿kimaka se kolotl? 13 Yeka, tlaj inmojuantij maske intlajtlakolejkej inkinmakaj kuajkuali regalos inmokoneuaj, ¡inmoTata katli itstok iluikak nojua más kinmakas ichikaualis* katli kitlajtlaniaj!”.

14 Teipa kikixtik se amo kuali ajakatl* tlen kipixtoya se tlakatl, uan kichiuayaya amo ma kamanalti.* Kema kiski nopa amo kuali ajakatl, nopa tlakatl kamanaltik uan nopa miakej maseualmej mosentlachilijkej. 15 Pero se keskij tlen inijuantij kiijtojkej: “Kinkixtia amo kuali ajakamej pampa kipaleuia Belcebú,* katli kinyakana amo kuali ajakamej”. 16 Uan sekinok kinekiyayaj ma kinexti Dios* kititlantoya, yeka pejkej kitlajtlaniaj ma kichiua se milagro ika Dios itoka. 17 Ya kimatiyaya tlen moiljuiyayaj, yeka kiniljuik: “Se tlanauatijkayotl ixpoliuis tlaj maseualmej katli itstokej nopaya moteuiaj, uan katli itstokej ipan se kali, amo kuali itstosej tlaj moteuiaj. 18 Nojkia, tlaj Satanás iselti moteuia, ¿kenijkatsa uejkauas tlanauatijtos? Pampa inmojuantij inkiijtouaj nikinkixtia amo kuali ajakamej pampa Belcebú nechpaleuia. 19 Tlaj na nikinkixtia amo kuali ajakamej pampa nechpaleuia Belcebú, ¿ajkia kinpaleuia inmokoneuaj* ma kinkixtikaj amo kuali ajakamej? Yeka inijuantij inmechtlajtolsenkauasej. 20 Pero tlaj na nikinkixtia amo kuali ajakamej pampa ichikaualis* Dios nechpaleuia, uajka iTlanauatijkayo Dios inmechichtakauiko.* 21 Kema se tetikatlakatl* kipia tepostli tlen ika momanauis kema kimokuitlauia ichaj, amo uelis kiichtekilisej tlen kipixtok. 22 Pero kema seyok katli eli más tetik kej ya, kiteuia uan kitlani, kikixtilia nochi tepostli tlen ipan motemachiyaya uan kixexeloua tlen kikuilik. 23 Katli amo itstok nouaya, nechijixnamiki; uan katli amo tlaolchoua* nouaya, tlaxoyaua.

24 ”Kema se amo kuali ajakatl kisa tlen se maseuali, pano kampa tlauaktok pampa kitemoua kanke mosiajketsas, pero amo kipantia, yeka kiijtoua: ‘Nitlakuepilis nochaj, kampa nikistejki’. 25 Uan kema asi, kipantia tlachpantokej uan kuali tlayejyektlalijtokej. 26 Uajka yaui uan kinuika sekinok chikomej amo kuali ajakamej katli más amo kualmej kej ya, uan kema kalakij ipan nopa maseuali, nopaya mokauaj. Uan nopa maseuali kichiua tlen nojua más amo kuali uan amo kej achtouia”.

27 Kema kiijtouayaya nopa, se siuatl katli itstoya ininuaya nopa miakej maseualmej, chikauak kiijtok: “¡Yolpaki nopa siuatl katli mitstlakatiltik uan mitschichitik!”. 28 Pero Jesús kinankilik: “Amo, ¡yolpakij katli kikakij itlajtol Dios uan kichiuaj!”.

29 Kema mosentilijkej miakej maseualmej kampa itstoya, pejki kiijtoua: “Ni maseualmej amo yolkualmej. Kinekij kiitasej se milagro, pero amo kiitasej yon se, san kiitasej tlen panok ika Jonás. 30 Pampa sanse kej Jonás elki se tlaneskayotl* para níniveeuanij, nojkia katli eli iKone se Maseuali* elis se tlaneskayotl para katli nama itstokej. 31 Uan kema Dios tetlajtolsenkauas, nopa siuatlanauatijketl tlen sur moyolkuis ininuaya ni maseualmej katli nama itstokej uan kiijtos kinamiki ma kintlatsakuiltikaj. Pampa maske itstoya hasta iyakapaj* Tlaltipaktli, ualajki kikakiko nopa tlalnamikilistli tlen Salomón kipiayaya. Pero xikitakaj, nikaj itstok se katli más ueyi que Salomón. 32 Uan kema Dios tetlajtolsenkauas, katli itstoyaj Nínive moyolkuisej ininuaya ni maseualmej katli nama itstokej uan kiijtosej kinamiki ma kintlatsakuiltikaj. Pampa inijuantij moyolpatlakej kema kikajkej tlen Jonás tematiltik. Pero xikitakaj, nikaj itstok se katli más ueyi que Jonás. 33 Amo aka kitlatia* se tlauili uan kitlalia kampa amo nesi o kitsakua ika se chikiuitl,* ya kitlalia ipan se tlauilketsali, kiampa katli kalakij kiitaj nopa tlauili. 34 Moixteyol eli kej se tlauili tlen kitlauilia motlakayo. Kema moixteyol san mosentlalia kiitas se tlamantli, nochi motlakayo tlauia. Pero kema moixteyol tekokolia,* motlakayo mochiua tsintlayoua. 35 Uajka, ximomokuitlaui para nopa tlauili tlen tijpia amo ma mochiua tsintlayoua. 36 Yeka, tlaj nochi motlakayo tlauia uan amo tleno eltok tlatlayoua, nochi tlauijtos, sanse kej kema se tlauili mitstlauilia”.

37 Kema Jesús ya kiijtojtoya nopa, se fariseo* kitlanejki ma tlakuati, uajka ya kalajki uan moseuik kampa mesa. 38 Pero nopa fariseo mosentlachilik kema kiitak Jesús amo momajtekik* kema tlakuaskia. 39 Uajka toTeko kiiljuik: “Inmojuantij infariseos inkipojpouaj iixkotsi nopa copa uan plato, pero iijtiko tlauel sokiyo pampa san inmoiljuijtokej inkiichtekisej tlen ininaxka sekinok uan amo inyolkualmej. 40 ¡Inuiuitikej! Katli kichijki itlakayo se akajya nojkia kichijki iyolo, ¿axke? 41 Yeka, más kuali xikinpaleuikaj katli amo tleno kipiaj ika tlen kisa ipan inmoyolo, uan xikitakaj, tlaj inkichiuaj nopa, inelisej senkistok intlapajpaktikej. 42 Pero, ¡inteikneltikej infariseos, pampa intemakaj* ajloueno,* ruda uan sekinok pilxiuitsitsij, pero inmojuantij amo inteikneliaj kej Dios kichiua, yon inkichiuaj tlen ya kiijtoua eli kuali! Monekiyaya intemakasej nopa tlamantli, pero amo kinamikiyaya inkiilkauasej ni sekinok. 43 ¡Inteikneltikej infariseos, pampa tlauel inmechpaktia inmoseuisej tlaixpa kampa tlaueyichiuaj judíos, uan ma inmechtlajpalokaj kampa mochiua tiankis!* 44 ¡Inteikneltikej inmojuantij, pampa inelij kej cementerios tlen amo tlauel nesi: maseualmej panoj iixko uan amo kimatij tlaj ipan mokejketsaj!”.

45 Se katli kuali momachtijtoya iTlanauatil Moisés kinankilik: “Tlamachtijketl, kema tikijtoua nopa nojkia titechyolkokoua”. 46 Uajka Jesús kiijtok: “¡Inteikneltikej nojkia inmojuantij, katli kuali inmomachtijtokej iTlanauatil Moisés, pampa inkintlaliliaj maseualmej tlamamali tlen ouij kiuikasej, pero inmojuantij amo inkiitskiaj yon ika se inmomakpil!

47 ”¡Inteikneltikej inmojuantij, pampa inkinchiuiliaj cementerios kampa kintokaj teokamanalouanij,* pero inmotatauaj katli uejkajkia itstoyaj kinmiktijkej! 48 Nima nesi inmojuantij inelij testigos tlen kichijkej inmotatauaj katli uejkajkia itstoyaj uan kuali inkiitaj tlen kichijkej, pampa inijuantij kinmiktijkej teokamanalouanij, pero inmojuantij inkinchijchiuiliaj kampa kintlalpachojtokej.* 49 Yeka, Dios katli tlauel tlalnamiki, kiijtok: ‘Na nikintitlanilis teokamanalouanij uan apóstoles, uan se keskij, inijuantij kinmiktisej uan kintlaijiyouiltisej, 50 kiampa inineso nochi teokamanalouanij katli kinmiktijtokej desde kema pejkej tlakatij maseualmej ipan Tlaltipaktli, kininamasej ni maseualmej katli nama itstokej, 51 pejki ika ieso Abel hasta ieso Zacarías, katli kimiktijkej tlatlajko tlaixpamitl uan teokali’. Kena, niinmechiljuia: kininamasej* ni maseualmej katli nama itstokej.

52 ”¡Inteikneltikej inmojuantij, katli kuali inmomachtijtokej iTlanauatil Moisés, pampa inkinkuilijkej maseualmej nopa llave tlen ika ueliskiaj kiixmatisej Dios! ¡Inmojuantij amo inkalajkej, uan katli kalaktiauij inkintsakuiliaj!”.

53 Kema kiski kampa itstoya, nopa escribas* uan fariseos pejkej tlauel kitetsopaj uan kikuatotoniyayaj ika miak tlajtlanili,* 54 pampa kinekiyayaj ma kiijto se tlenijki ika tlen ueliskia kitlateljuisej.