Tlen kiijkuilok Mateo

14 Ipan nopa tonali, Herodes,* katli eliyaya gobernador ipan tlali Galilea, kikajki tlen kiijtouayayaj tlen Jesús 2 uan kiniljuik itlatekipanojkauaj: “Eli Juan katli teAtsonpoliuiltiyaya. Moyolkuik, yeka ueli kichiua nopa milagros”. 3 Herodes tlanauatik ma kiitskikaj Juan, ma kiilpikaj ika cadenas uan ma kitsakuakaj pampa kiampa kinekiyaya Herodías, katli eliyaya isiua Filipo, ni tlakatl eliyaya iikni Herodes. 4 Kiampa kichijki pampa Juan kiiljuiyaya: “Amo kinamiki ma eli mosiua”. 5 Herodes kinekiyaya kimiktis pero kinmakasiyaya maseualmej pampa kiitayayaj Juan kej se teokamanalojketl.* 6 Pero kema kiiljuichiuilijkej Herodes pampa kiaxitik ixiui, iichpoka Herodías mijtotik ipan nopa iljuitl uan Herodes tlauel kipaktik, 7 yeka kitenkauilik kimakaskia tlen ueli tlamantli tlen kitlajtlaniskia. 8 Uajka inana kitetsopki, yeka nopa ichpokatl kiijtok: “Xinechmaka namantsi ipan se plato itsonteko Juan katli teAtsonpoliuiltia”. 9 Nopa tlanauatijketl mokuesok; pero kiilnamijki tlen kitenkajtoya ininixpa katli kintlanejtoya, yeka tlanauatik* ma kimakakaj. 10 Kichijki ma kikechtsontekikaj Juan kampa tsaktoya. 11 Uajka kiualikakej nopa tsontekomitl ipan se plato, kimakakej nopa ichpokatl uan ya kiuikilik inana. 12 Teipa ualajkej itokilijkauaj Juan, kiuikakej itlakayo uan kitlapachotoj.* Teipa kipouilitoj Jesús. 13 Kema Jesús kimatki tlen panotoya, kistejki kampa itstoya, uan yajki uejka ipan se barco* kampa ueliskia itstos iselti. Pero kema nopa miakej maseualmej kimatkej, kiskej tlen ininaltepeko uan ikxinejnenkej kema kitokilijtiauiyayaj.

14 Kema asito iteno mar, kinitak itstoyaj miakej maseualmej, uan tlauel kinteikneltiitak,* yeka kinchikajki katli mokokouayayaj.* 15 Kema tiotlakixki, itokilijkauaj kinechkauijkej uan kiiljuijkej: “Tlauel uejka kampa tiitstokej uan ya tiotlak. Xikiniljui ni maseualmej ma yakaj ipan pilaltepetsitsij ma mokouitij tlen kikuasej”. 16 Pero Jesús kiniljuik: “Amo moneki ma yakaj. Inmojuantij xikintlamakakaj”. 17 Inijuantij kinankilijkej: “Nikaj san tijpixtokej makuili pantsi uan omej michimej”. 18 Ya kiniljuik: “Xinechualikilikaj”. 19 Uajka kinnauatik maseualmej ma moseuikaj xiuiixko. Teipa, kikuik nopa makuili pantsi uan nopa omej michimej, ajkotlachixki uan kichijki se tlamaijtoli.* Uan kema kitlapanki nopa pantsi, kinmajmakak itokilijkauaj uan inijuantij kinmajmakakej nopa miakej maseualmej. 20 Nochi tlakuajkej uan ixuikej. Teipa kisentilijkej 12 kuachikiuitl temitok ika tlakualistli tlen mokajki. 21 Tlakuajkej se 5 mil tlakamej, uan amo kinpojkej siuamej yon konemej. 22 Uajka, nimantsi kiniljuik itokilijkauaj ma tlejkokaj ipan barco uan ma tlaixkotonakaj ne seyok nali uan ya mokajki para kinnauatijteuas* nopa miakej maseualmej.

23 Kema kinnauatijtejki, yajki iselti tepeixko para momaijtos. Kema tlayouixki, ya nojua itstoya iselti nopaya. 24 Pero nopa barco ya uejka* yajtoya ipan mar, uan nopa atl chikauak mokojkoxoniyaya uan kitsouitekiyaya nopa barco pampa kiixnamikiyaya ajakatl. 25 Kema tlanestiualayaya,* Jesús nejnentiajki aixko kampa inijuantij itstoyaj. 26 Kema itokilijkauaj kiitakej nejnentiauiyaya ipan mar, momajmatijkej uan kiijtojkej: “¿Ne tlake uala?”.* Uan pejkej kuatsajtsij pampa majmauiyayaj. 27 Pero Jesús nimantsi kiniljuik: “¡Amo xiyoluiuipikakaj! Nieli na, amo ximajmauikaj”. 28 Pedro kinankilik: “NoTeko, tlaj ta tieli, xinechkaua ma ninejnemi aixko kampa ta tiitstok”. 29 Ya kiiljuik: “¡Xiuala!”. Uajka Pedro temok tlen nopa barco uan nejnenki aixko hasta kampa Jesús itstoya. 30 Pero kema kiitak chikauak tlaajakayaya, majmajki. Uan pampa pejki atsonpoliui, chikauak kuatsajtsik: “¡NoTeko, xinechmanaui!”. 31 Jesús nimantsi momaxitlajki, kiitskik uan kiiljuik: “Tlakatl katli kentsi titlaneltoka, ¿kenke amo timotemachik ipan na?”. 32 Kema tlejkokej ipan barco, moketski nopa ajakatl. 33 Uajka katli itstoyaj ipan barco, motlankuaketskej iixpa uan kiiljuijkej: “Ta nelia tiiKone Dios”.* 34 Uan kitlamiixkotonkej nopa mar uan asitoj tlali Genesaret.

35 Kema kimatkej ajkia eliyaya, nopa tlakamej katli nopaya euayayaj, tematiltijkej ipan nochi pilaltepetsitsij tlen nechka mokauayaya, uan maseualmej kiualikilijkej nochi katli mokokouayayaj. 36 Uan kitlajtlaniyayaj ma kinkauili kiitskilisej maske san iyoyo itenuaxo, uan nochi katli kiitskiyayaj, mochikauayayaj.