Amatlajkuiloli tlen toikniuaj Katli kinyakanaj Jehová itlajtoltemakauaj
Toikni katli timitsikneliaj:
Kej ta tijmati, Biblia kiijtoua tlen kinpanok maseualmej katli nelnelia itstoyaj. Kiijtoua kenijkatsa Jehová itekipanojkauaj, tlakamej uan siuamej, tlaijiyouijkej uan kiyolmatkej “keja tojuantij” (Santiago 5:17). Sekij kipixkej kuesoli uan motekipachojkej. Sekinok kinyolkokok tlen kichijkej ininchampoyouaj o ininuampoyouaj. Uan miakej kinyolkokouayaya inintlalnamikilis pampa kichijkej tlen amo kuali.
¿Kitlauelkajkej Jehová uan ayokmo kitekipanojkej maske kinpanok nopa? Amo. Miakej momaijtojkej kej katli kiijkuilok ni Salmo: “Nimokuapolojtok keja se pilborregojtsi, yeka xiuala [...] xinechtemoki, pampa na axnikilkajtok [...] [motlanauatiljuaj]” (Salmo 119:176). ¿Nojkia tijyolmajtok ni?
Jehová amo kema kinilkaua itekipanojkauaj katli kitlauelkauaj. Yeka kineki sampa ma kitekipanokaj, uan kemantika kinpaleuia ika toikniuaj. Ximoiljui kenijkatsa kipaleuik Job. Ya tlauel tlaijiyouik pampa kipolok nochi tlen kipixtoya, mijkej ikoneuaj uan kipixki se kokolistli tlen tlauel amo kuali. Uan katli kinamikiyaya kiyolchikauasej san kiyolkokojkej. Maske Job amo kema kitlauelkajki Jehová, nojkia mokuapolok uan moiljuik tlen amo kinamikiyaya (Job 1:22; 2:10). ¿Kenijkatsa kipaleuik Jehová?
Kipaleuik ika itekipanojka Eliú. Kema Job kiiljuik tlen kiyolmatiyaya, Eliú kuali kitlakakilik uan teipa kiiljuik tlen ya moiljuiyaya. ¿Tlake kiiljuik? ¿Kiiljuik amo kuali tlen kichijtoya? ¿Kiajuak uan kichijki ma moyolkoko o ma mopinaualti? ¿Kinextik yaya tlauel tlalnamikiyaya? Amo. ToTeotsij itonal kipaleuik Eliú ma kiiljui Job: “Na nojkia niitstok sanse keja ta iixpa toTeko. Na nojkia nitlachijchiuali ika sokitl keja ta”. Teipa kiiljuik amo ma kimakasi uan amo ma motekipacho ika tlen kiiljuiskia (Job 33:6, 7). Eliú amo kiyolkokok Job, ika miak tlaiknelili kitlajtolmakak uan kiyolchikajki.
Tojuantij nojkia ika miak tlaiknelili tijchijtokej ni pilamochtsi. Achtoui kuali tikintlakakilijkej sekij toikniuaj katli ayokmo monechikouayayaj ipan tlanechikoli uan kuali timoiljuijkej tlake kinpanoyaya (Proverbios 18:13). Teipa timomaijtojkej uan tijpojkej ipan Biblia kampa kiijtoua kenijkatsa Jehová kinpaleuik itekipanojkauaj katli nojkia kipixkej tlaouijkayotl, uan tikitakej kenijkatsa toikniuaj nojkia kinpano kej nopa maseualmej. Kej nopa uelki tijchijkej ni pilamochtsi. Timitstlaneuij kuali xijpoua uan ximomachti. Nochipa xikilnamikto tojuantij tlauel timitsikneliaj.
Katli kinyakanaj Jehová itlajtoltemakauaj