Diciembre

Uelis kemantika tijmatij ouij tijkuamachilisej tlen Biblia kiijtoua. O uelis Jehová amo technankilia kej tojuantij tijnekiskiaj. Kema kiampa pano uelis kichiuas ayokmo ma timotemachikaj ipan tlen tijneltokaj. Yeka, tlaj amo tijtemouaj sekinok tlamachtili, uelis ayokmo kuali titlaneltokasej uan ayokmo kuali timouampojchijtosej ika Jehová (Sant. 1:7, 8). Uan uelis kichiuas ayokmo ma timotemachikaj ipan tlen tijselisej teipa. Pablo kiixnextik tlen tijselisej teipa, eli kejuak se “tepostli tlen moatsintlanoua” (Heb. 6:19, TNM). Kema nopa tepostli kimajkauaj atitla, kipaleuia nopa akali amo ma motejtsona kema chikauak tlaajaka. Nojkia, nopa tepostli san kipaleuia nopa akali tlaj amo kotoni. Kema nopa tepostli tlen kisaloua moxixa, ayokmo tlauel kipaleuia nopa akali. Nojkia, uelis kiampa panos ika totlaneltokilis tlaj amo tijtemouaj tlamachtili tlen amo tijkuamachiliaj, pampa kema tikixnamikisej tlaouijkayotl, uelis ayokmo timotemachisej ipan tlen Jehová techtenkauilijtok. Se maseuali amo kema yolpakis tlaj kiampa kichiuas. w21.02 30 párrs. 14, 15

Ipan nochi nopa tonali, Abraham kipixki iyolo uan kichixki tlen Jehová kitenkauilijtoya. Abraham uelis kipixtoya kipano 70 xiuitl kema ya uan ichampoyouaj kistejkej altepetl Ur (Gén. 11:31-12:4). Uan se cien xiuitl itstoya san ipan yoyonkali uan nenki ipan tlali Canaán. Mijki kema kipixtoya 175 xiuitl (Gén. 25:7). Abraham amo kiitak kenijkatsa Jehová kinmakak iteipaixuiuaj nopa tlali kampa ya nenki. Nojkia, maske amo kiitak nopa “altepetl” o toTeotsij iTlanauatijkayo, Biblia kiijtoua mijki ika pakilistli pampa nochipa kitekipanok toTeotsij (Gén. 25:8). Maske kiixnamijki miak tlaouijkayotl, ya nochipa kuali tlaneltokak uan kichixki tlen Jehová kitenkauilijtoya. ¿Kenke kiijiyouik tlen kipanok? Pampa Jehová nochipa kimokuitlauik uan kuali mouampojchijtoya iuaya (Gén. 15:1; Is. 41:8; Sant. 2:22). Kej Abraham, tojuantij nojkia tijchiaj nopa “altepetl tlen kichijchijtokej ika kuajkuali tlamantli” (Heb. 11:10). Tojuantij amo tijchiaj ma kichijchiuakaj nopa “altepetl” o toTeotsij iTlanauatijkayo, pampa pejki tekichiua iluikak ipan 1914 (Apoc. 12:7-10). Maske amo tijchiaj ma kichijchiuakaj, kena tijchixtokej ma tekichiua ipan Tlaltipaktli. w20.08 4 párrs. 11, 12

Tlaj tijnekij kuali tikintlakakilisej sekinok, moneki timoechkapantlalisej uan tijpiasej toyolo. Amo san tlapik tlaj tijchiuasej ni. Ma tikitakaj san eyi tlamantli. Se, kiampa amo timoiljuisej tlen amo ijki tlen se toikni. Ome, kiampa tijmatisej kenijkatsa kiyolmati uan kenke kichiua se keski tlamantli. Ni techpaleuis ma tijyolmatikaj tlen ya kiyolmati. Uan eyi, tlaj tijkauaj ma kamanalti, uelis tijpaleuisej kuali ma moixmati. Kemantika se maseuali peua kikuamachilia kenke kichiua o kiyolmati se tlenijki kema kiijtoua tlen kipanotok o tlen kiyolmati. Sekij toikniuaj kimatij ouij kiijtosej tlen kiyolmatij pampa uelis uejkajkia kinpanok se tlenijki, amo momajtokej kiampa kichiuaj o pampa ipa kiampa elij. Uan sekij amo nimantsi motemachisej ipan tojuantij uan yeka amo nima moyoltlaposej. Tlaj kiampa pano, ma tijpiakaj toyolo kej Jehová, kiampa inijuantij uelis motemachisej ipan tojuantij uan uelis techiljuisej tlen nelia kiyolmatij. Uan kema moyoltlaposej, kuali ma tikintlakakilikaj. w20.04 15, 16 párrs. 6, 7

Michimej itstokej kampa onka tlen kikuasej uan kampa kinpaktia itstosej. Michtlajtlamanij, nojkia moneki kimatis tlake hora uelis tlajtlamas. ¿Kenke kiampa tikijtouaj? Ma tikitakaj tlake kiiljuik se toikni katli itstok nechka ueyi atl, se misionero. Kema toikni kitlanejki ma michtlajtlamati iuaya, nopa misionero kiiljuik: “Timoitasej mostla a las 9 ika ijnalok”. Uan nopa toikni kinankilik: “Amo noikni, tiasej kema uelis tikinpantisej michimej, amo kema tojuantij tijnekisej”. Sanse kej michtlajtlamanij, Cristo itokilijkauaj tlen achtoui siglo kintemouayayaj maseualmej kema kimatiyayaj ueliskiaj kinpantisej. Se neskayotl, Jesús itokilijkauaj tlajtolmoyauayayaj ipan teokali, sinagogas, kajkalpa uan kampa tlanamakayayaj (Hech. 5:42; 17:17; 18:4). Tojuantij nojkia moneki tijmatisej tlake tlamantli momajtokej kichiuaj maseualmej kampa titlajtolmoyauaj. Yeka, moneki tijchiuasej kampeka tikitasej kema uan kanke uelis tikinpantisej, maske monekis tijpatlasej se keski tlamantli tlen timoiljuijtoyaj tijchiuasej (1 Cor. 9:19-23). w20.09 4 párrs. 8, 9

Tlaj tijneki kuali timouikas iuaya Jesús moneki ma titlapaleuikaj kema mopatla se keski tlamantli ipan tlanechikoli. Kema tikinpaleuiaj ueuejtlakamej katli Jesús kintekimakatok, techpaleuia nojua kuali ma timouampojchijtokaj iuaya (Efes. 4:16). Ma timoiljuikaj ipan ni tlamantli: Jehová itlanechikol kineki kuali ma motekiui nopa kali kampa timosentiliaj, yeka se keski tlanechikoli kinsansejkotilijtokej. Pampa kiampa kichijtokej, tlapaleuijtok amo ma motekiui miak tomij. Uan pampa mopatlatok se keski tlamantli, se keskij toikniuaj moneki momatisej. Uelis nopa toikniuaj miak xiuitl monechikojtoyaj ipan nopa tlanechikoli uan kuali mouikayayaj ininuaya sekinok toikniuaj. Nama, kiniljuijtokej ma yakaj ipan seyok tlanechikoli. Jesús tlauel yolpaki kema kiita toikniuaj tlapaleuiaj kema mopatla se keski tlamantli ipan tlanechikoli. w20.04 24 párr. 14

Nopa tlanauatijketl tlen norte uan tlanauatijketl tlen sur nojua moteuijtokej pampa kinekij inijuantij tlayakanasej ipan nochi Tlaltipaktli. Ma timoiljuikaj kema onkak nopa Ompa Ueyi Tlauilankayotl, Unión Soviética uan katli kipaleuiyayaj tlanauatijkej ipan miak altepemej tlen Europa. Yeka, nopa tlanauatijketl tlen sur monejki mopaleuis ika sekinok altepemej, uan kiixmatij kej OTAN. Nopa omej tlanauatianij kinekij motlanisej uan yeka nojua kimiakiliaj tlen ika tlateuisej. Uan nojkia kejuak moteuiaj pampa mokalakiaj kema sekinok kipiaj tlauilankayotl o kema tlaijixnamikij, kej altepemej tlen África, Asia uan América Latina. Uan nojkia kejuak moteuiaj ipan Internet. Nopa omej tlanauatianij mokajkauiliaj kenijkatsa kitlalijtokej ipan Internet se keski tlamantli tlen kichiua amo ma kitlanikaj tomij o amo ma tlatlanikaj ipan política. Uan kej kiijtok tlajtolpanextijketl Daniel, nopa tlanauatijketl tlen norte nojua kintlaijiyouiltia toTeotsij itekipanojkauaj (Dan. 11:41). w20.05 13 párrs. 5, 6

Kema itstoya tlajtolpanextijketl Isaías, Jehová kiniljuik itekipanojkauaj: “¿Uelis se tenantsi ueli kitlauelkauas ipilkone? [...]. Yonke se tenantsi ueliskia kiilkauaskia ikone, na axkema nikilkauas” (Is. 49:15). Maske toTeotsij amo nochipa kiijtoua eli kej se tenaj, ipan ni texto kena kiampa kiijtok. Kema Jehová kiijtok kenijkatsa se tenaj tlauel kiiknelia ikone, kinejki kinextis kenijkatsa tlauel kiniknelia itekipanojkauaj. Miakej siuamej katli kinpiaj ininkoneuaj, nojkia kiyolmatij kej tosiuaikni Jasmín, ya kiijtok: “Kema tijchichitis mopilkone, kichiua nochipa tlauel xikikneli”. Jehová kiita kema se itekipanojka ayokmo tlajtolmoyaua yon ayokmo monechikoua. Miakej tlen ni toikniuaj sampa peuaj monechikouaj uan tojuantij kuali tikinseliaj. Jehová kineki sampa ma kitekipanokaj, uan tojuantij nojkia (1 Ped. 2:25). w20.06 18 párrs. 1-3

Amo nochi tlen tijpiaj tiuelij tikitaj. Tlamantli tlen nelia tlauel ipati amo nesi uan yeka amo tikitaj. Ipan Sermón del Monte, Jesús kiijtok nopa tlamantli katli tlauel pajpatiyo eltok iluikak, uan yon se tlamantli uelis kiaxilis ipati. Teipa kiijtok: “Kampa tijpixtok tlen tlauel ipati, nojkia nopaya eltos moyolo” (Mat. 6:19-21, TNM). Toyolo kichiuas ma tijtemokaj san tlamantli tlen tlauel tijpatiitaj. Tijnechikouaj “tlen nelia ipati ne iluikak” kema tijchiuaj kampeka kuali tiitstosej iixpa toTeotsij uan kema ya kuali techita. Kej Jesús kiijtok, amo aka uelis kinempolos o kiichtekis nopa tlamantli tlen tlauel ipati. Apóstol Pablo techiljuia ma timosentlalikaj ipan “tlamantli tlen axaka ueli kiita” (2 Cor. 4:17, 18). Se keski tlamantli tlen tlauel ipati katli amo tiuelij tikitaj eli nochi nopa tlateochiualistli tlen tijselisej ipan yankuik Tlaltipaktli. ¿Kenijkatsa uelis tijtlaskamatisej nochi nopa tlamantli tlen amo tikitaj? w20.05 26 párrs. 1, 2

Tlen Moisés kiniljuik israeleuanij kinyolchikajki, kej kema pitsajatl kiasi xiuitl. ¿Kenijkatsa tijchiuasej kema titlamachtiaj? Kema titlajtolmoyauaj kajkalpa uan kampa nemij miakej, moneki tijtekiuisej Biblia kema tikinnextilisej maseualmej toTeotsij itoka. Nojkia, moneki tijtekiuisej tlen kiueyichiua Jehová, kej pilamochtsitsij, videos uan jw.org. Maske tiitstokej kampa titekitij, ipan escuela o kema tipaxalouaj, ma tijchiuakaj kampeka tikiniljuisej tlen toTata Jehová uan kenijkatsa eli. Nojkia ma tikiniljuikaj kenijkatsa tiitstosej teipa uan tlen kichiuas ipan Tlaltipaktli. Kema maseualmej kikakij ni tlamantli, uelis kiitasej kenijkatsa Jehová tlauel techiknelia. Uan kema titlamachtiaj tlen melauak, tijueyichiuaj itoka uan tikinpaleuiaj maseualmej ma kikuamachilikaj tlen kinmachtijtokej amo eli melauak. Tlen tikinnextiliaj ipan Biblia kichiua kuali ma kiyolmatikaj (Is. 65:13, 14). w20.06 10 párrs. 8, 9

¿Tlake kuajkuali tlamantli moneki tijnextisej tlaj tijnekij tikinpaleuisej katli mouejkatlalijtokej? Ma tikitakaj tlake techmachtia nopa tlapoualistli tlen nopa telpokatl katli sampa tlakuepilik (Luc. 15:17-24). Nopa telpokatl moiljuik kenijkatsa itstoya iuaya itata uan sampa kinejki tlakuepilis. Itata motlalok kema kinamikito uan kikuanajnauajki ika miak tlaiknelili pampa kinekiyaya ma kimati nojua kiikneliyaya. Nopa telpokatl kiyolkokouayaya tlen kichijki uan moiljuiyaya ayokmo kinamikiyaya ma kiita kej ikone. Nopa tetaj yolpajki kema itelpoka kiiljuik nochi tlen kiyolmatiyaya uan kiitak nelia moyolpatlatoya. Yeka, nopa tetaj tlanauatik ma iljuichiuakaj uan ma kimakakaj se kuali uan yejyektsi yoyomitl. Ika tlen kichijki kinextik kiseliyaya kej ikone uan amo kej se itlatekipanojka. Jehová eli kej nopa tetaj tlen Jesús kiijtok. Ya kiniknelia katli mouejkatlalijtokej uan kineki sampa ma kitekipanokaj. Tlaj tijchiuasej kej Jehová, uelis nojkia tikinpaleuisej ma tlakuepilikaj. Yeka, tlauel ipati tijnextisej ueyi toyolo, tijkuamachilisej tlen kiyolmatij uan tikiniknelisej. w20.06 25, 26 párrs. 8, 9

Jesús kiijtok maske sekij kiseliskiaj ika pakilistli tlen melauak, kema kipiaskiaj kuesoli ayokmo kuali tlaneltokaskiaj (Mat. 13:3-6, 20, 21). Uelis amo kikuamachiliaj tlaj elisej Cristo itokilijkauaj, kipiasej tlaouijkayotl uan kuesoli (Mat. 16:24). Nojkia, moiljuiaj se Cristo itokilijka san kiselia miak tlateochiualistli uan amo kema tlaijiyouia. Nopa amo nelia, pampa ipan ni Tlaltipaktli nochi titlaijiyouia. Kemantika techpano se tlamantli tlen kichiua ayokmo ma tiyolpakikaj (Sal. 6:6; Ecl. 9:11). Miakej Jehová itlajtoltemakauaj motemachiaj tlen kineltokaj nelia eli melauak. ¿Kenke? Pampa amo kitlauelkauaj Jehová kema se toikni kinyolkokoua o kichiua se tlamantli tlen amo kuali (Sal. 119:165). Kema kiixnamikij se kuesoli, kinpaleuia nojua kuali ma tlaneltokakaj (Sant. 1:2-4). Moneki tijchiuasej kampeka kuali titlaneltokasej. w20.07 8 párr. 1; 9 párrs. 4, 5

Kema tijpouasej Biblia ma tikiljuikaj Jehová ma techpaleui tikitasej kenijkatsa techpaleuis tlen tijpouasej. Tlaj tijnekij tijmatisej tlake uelis tijchiuasej kema tijpiaj kuesoli, ma tikiljuikaj ma techpaleui tijpantisej tlen Biblia tetlajtolmaka (Filip. 4:6, 7). Jehová kichijki maseualmej ma monejneuilikaj. Kema tijpouaj Biblia uan tijnekij ma techpaleui, moneki timonejneuilisej uan timoiljuisej kejuak nopaya tiitstokej. Nojkia, ma tijchiuakaj kampeka tikitasej tlen kiitak katli nopaya itstoya uan tijyolmatisej tlen kiyolmatki. Uan nojkia ma timoyoliljuikaj. Timoyoliljuisej kineki kiijtos timoiljuisej ipan tlen tijpouaj uan ipan tlen techmachtijtia. Tlaj kiampa tijchiuaj, techpaleuis nojua tijmatisej tlen ya tijmatij uan nojua kuali tijkuamachilisej se tlamachtili. Tlaj tijpouaj Biblia uan amo timoyoliljuiaj, eli sanse kej kema se akajya kipixtok miak tlamantli tlen ika kiajuiyaltia tlakualistli. Tlaj kineki ajuiyak ma mokaua, moneki kitemilis tlen kiajuiyajmakas. Uajka, tlaj timoyoliljuiaj, nelia tlauel techpaleuis. w21.03 15 párrs. 3-5

Apóstol Pablo ueltoskia mosentlalis ipan tlen uejkajkia kichijki uan ueltoskia moiljuis tlaj kitlapejpenijtoskia seyok tlamantli amo kitsaktoskiaj. Ueltoskia kinkualankaitas nopa tlakamej tlen Asia katli kitlauelkajtoyaj uan ayokmo motemachiskia ipan sekinok iuampoyouaj. Ya amo kiampa kichijki. Maske kimatiyaya nechka kimiktiskiaj, mosentlalik kiueyichiuas Jehová. Nojkia, kitemoliyaya kenijkatsa kinyolchikauas sekinok uan momaijtouayaya ika nochi iyolo. Pablo amo mosentlalik san kiilnamiktos tlen kichiuilijkej sekinok. Ya kichijki kampeka kiniknelis uan kinpaleuis iuampoyouaj katli amo kitlauelkajtoyaj. Nojkia, nojua momachtiyaya toTeotsij iTlajtol (2 Tim. 3:16, 17; 4:13). Uan nochipa motemachiyaya Jehová uan Jesús kiikneliyayaj. w21.03 18 párrs. 17, 18

Uelis ipan siglo 2 y.u.J., kalajkej ipan toTeotsij itlanechikol miakej katli amo nelia eliyayaj Cristo itokilijkauaj. Inijuantij tlamachtijkej tlen maseualmej kineltokayayaj uan kipatlakej tlen toTeotsij iTlajtol tlamachtia. Ipan nopa xiuitl tlanki toTeotsij itlanechikol ipan Tlaltipaktli, uan ipan itlamia siglo 19, nojua ayamo onkayaya se tlanechikoli kampa mosentikapaleuiskiaj toTeotsij itekipanojkauaj. Katli amo nelia eliyayaj Cristo itokilijkauaj momiakilijkej sanse kej nopa amo kuali xiuitl uan yeka ayokmo neskej ajkia nelia eliyayaj Cristo itokilijkauaj (Mat. 13:36-43). ¿Kenke tlauel moneki tijkuamachilisej ni tlamantli? Daniel capítulo 11 techpaleuia tijkuamachilisej nopa tlanauatijketl tlen norte uan sur amo elkej katli itstoyaj ipan siglo 2 uan tlanki ipan itlamia siglo 19. Ipan nopa tonali amo eltoya se tlanechikoli katli ueliskiaj kitlatsakuiltisej. Uajka, nopa tlanauatianij tlen norte uan sur sampa nesiskiaj ipan itlamia siglo 19. w20.05 3 párr. 5

Joel kiijtoua tlauel miakej chapolimej tlanempoloskiaj ipan tlali Israel uan kampa panoj amo tleno mokaua pampa nochi kitlamikuaj (Joel 1:4). Miak xiuitl timoiljuiyayaj nopa tlajtolpanextili kamanaltiyaya tlen Jehová itekipanojkauaj, katli tlauel tlajtolmoyauaj kejuak eliskiaj miakej chapolimej. Timoiljuiyayaj inijuantij kejuak tlasojsolouayayaj ipan “tlali”, o ipan maseualmej katli itstokej ininmako religiones tlen amo melauak. Maske kiampa nesi, kema tijpouaj tlen ijkuilijtok teipa, tikitaj moneki tijpatlasej kej tijkuamachiliaj ni tlajtolpanextili. Ma tikitakaj tlake kitenkaua Jehová ipan Joel 2:20: “Teipa nikinuejkatlalis nopa chapoltsitsij tlen ualauij neka norte keja soldados”. Tlaj nopa chapolimej kinixnextia Jehová itlajtoltemakauaj, katli tlajtolmoyauaj uan kinpaleuiaj sekinok ma kitokilikaj Jesús, ¿uajka kenke Jehová kinuikaskia uejka? (Ezeq. 33:7-9; Mat. 28:19, 20). Jehová amo kinuejkatlalia katli kuali kitekipanouaj, ya san kiuejkatlalia se tlenijki tlen amo kuali o se akajya katli kineki kintsakuilis itekipanojkauaj. w20.04 2, 3 párrs. 3-5

¿Tlake uelis tijchiuasej kema tikitaj Jehová amo nima technankilia kema tijtlajtlaniaj se tlamantli? Santiago kiijtok nochipa ma timomaijtokaj. Jehová amo kema kualanis tlaj nochipa tikiljuiaj ma techmaka tlalnamikilistli pampa tijnekij tikijiyouisej kuesoli. Jehová techmakas tlen tijtlajtlaniaj pampa ya temaka ika nochi iyolo tlen kipia (Sal. 25:12, 13). Ya nochipa kiita tlen techpano, kiyolkokoua kema kiita titlaijiyouiaj uan kineki techpaleuis. ¡Tlauel tiyolpakij pampa tijmatij Jehová kiampa kichiua! Nama, ¿kenijkatsa Jehová techmaka tlalnamikilistli? Ika iTlajtol (Prov. 2:6). Yeka, tlaj tijnekij tijpiasej tlalnamikilistli, moneki tijpouasej Biblia uan amatlajkuiloli. Maske kiampa tijchiuasej, amo moneki san tijmatisej miak tlamantli tlen Jehová techiljuia, moneki tijchiuasej ipan tonemilis. Santiago kiijtok: “Xijchiuakaj nochi tlen inmechiljuia iTlajtol toTeko. Amo ximoiljuikaj para kuali san inkikakisej iTlajtol” (Sant. 1:22). Kema tijchiuaj tlen Jehová techtlajtolmaka, techpaleuia ma tijpiakaj toyolo, tijchiuaj tlen sekinok techiljuiaj uan titetlasojtlaj (Sant. 3:17). Nopa kuajkuali tlamantli techpaleuia nojua ma tiyolpakikaj maske tikixnamikij uejueyi tlaouijkayotl. w21.02 28, 29 párrs. 10, 11

Katli momachtia Biblia uelis nojua kuali tlaneltokas uan moatsonpoliuiltis tlaj nochi toikniuaj kipaleuiaj. Nochi toikniuaj uelis tlapaleuisej ma moskalti tlanechikoli. Se precursora, kiijtok: “Miakej kiijtouaj tlaj kinekij kuali ma moskalti se okichpil, moneki tlapaleuisej miakej maseualmej. Uan nimoiljuia kiampa pano kema titlamachtiaj, pampa moneki ma tlapaleuikaj nochi toikniuaj ipan tlanechikoli tlaj kinekij se akajya ma mochiua se Cristo itokilijka”. Kema kiiskaltiaj se konetl nochi tlapaleuiaj, kej ichampoyouaj, iuampoyouaj uan katli kimachtisej pampa nochi kiyolchikauaj uan kinextiliaj kuajkuali tlamantli. Nojkia, nochi toikniuaj uelis kipaleuisej se katli kimachtiaj ma moatsonpoliuilti tlaj kitlajtolmakaj, kiyolchikauaj uan kimachtiaj ika tlen kichiuaj (Prov. 15:22). Tlaj tijmachtiaj se akajya, ¿kenke moneki tijkauasej sekinok nojkia ma kipaleuikaj? Pampa kiampa uelis tijpaleuisej katli tijmachtiaj nojua kuali ma tlaneltoka. w21.03 8 párrs. 1-3

Tlaj ya tiuejueyij o nojua titelpokamej, moneki tijchiuasej kampeka amo timoiljuisej uelis tijtekipanosej Jehová uan nojkia tijchiuasej tlen amo kuali. Apóstol Juan kiijtok amo uelis tinemisej ipan tlen melauak uan nojkia timomekatisej (1 Juan 1:6). Tlaj tijnekij nochipa kuali ma techita Jehová, moneki kuali timonejnemiltisej uan timoiljuisej nochipa techtlachilijtokej. Jehová kiita nochi tlamantli tlen tijchiuaj (Heb. 4:13). Nojkia amo ma tikitakaj kej maseualmej kiitaj tlajtlakoli. Kema Juan itstoya, apóstatas kiijtouayayaj se maseuali maske tlajtlakolchiuas nojua uelis mouampojchijtos iuaya Jehová. Ipan ni tonali miakej kiampa moiljuiaj. Maske kiijtouaj kineltokaj nelia itstok toTeotsij, inijuantij amo kiitaj se tlajtlakoli kej Jehová kiita, kej kema omej motekaj sansejko o kema momekatiaj. Tlen Jehová kiita kej tlajtlakoli, maseualmej amo kiampa kiitaj, yeka kiijtouaj se akajya uelis kichiuas tlen kipaktia. w20.07 22 párrs. 7, 8

Uan tojuantij, ¿tikinmanauiaj tosiuaikniuaj kema moneki? Se keski toikniuaj kiitaj se tosiuaikni, katli iueue amo tlaneltoka, miakpa asi ipan tlanechikoli kema ya pejtok uan kema tlami nima yaui ichaj, uan nojkia amo kema kinuika ikoneuaj ipan tlanechikoli. Yeka, peuaj kiijilnamikij uan motlatsintokiaj kenke nopa tosiuaikni amo kiiljuia iueue ma kikaua kinuikas ikoneuaj. Maske kiampa moiljuiaj, amo kimatij nopa tosiuaikni kichiua se ueyi kampeka. Uelis pampa nojua moneki kichijteuas se keski tlamantli ichaj, uan nojkia tosiuaikni amo iselti kitlapejpenia tlake kichiuas ika ikoneuaj. Tlaj tikiljuiaj nopa tosiuaikni tlauel kuali tlen kichiua uan nojkia tikiniljuiaj sekinok, uelis ayokmo kiijilnamikisej. Ueuejtlakamej moneki kiitasej tlaj Jehová kiita kuali kinmokuitlauiaj (Sant. 1:27). Yeka, sanse kej Jesús, moneki kiitasej tlake tlamantli amo uelij kichiuaj, kinnojnotsasej ika yamanik uan amo kinnauatisej ma kichiuakaj se tlenijki (Mat. 15:22-28). Kema ueuejtlakamej kichiuaj kampeka kinpaleuisej tosiuaikniuaj, kinpaleuiaj ma kiyolmatikaj tlauel kinpatiitaj. w20.09 24, 25 párrs. 17-19

Tlajtolpanextijketl Daniel amo moueyimatki uan nochipa kitemok Jehová itlapaleuil. Se tonali kema Jehová kiiljuik ma kiijto tlake kiijtosneki tlen Nabucodonosor kitemijki, Daniel amo kiijtok iselti kichijki nopa tlamantli, kiampa kinextik amo moueyimatiyaya uan kiueyichijki Jehová (Dan. 2:26-28). Tlen Daniel kichijki, techmachtia kinamiki tijuejkapantlalisej Jehová kema tijpanoltiaj se tlamachtili uan kinpaktia toikniuaj o kema kuali techtlakakiliaj kema titlajtolmoyauaj. Yeka, amo ma timoueyimatikaj uan ma tikilnamikikaj amo tleno ueliskia tijchiuasej tlaj Jehová amo techpaleuiskia (Filip. 4:13). Kiampa tijchiuasej kej Jesús kichijki. Jesús nochipa kinejki ma kipaleui iTata (Juan 5:19, 30). Jesús amo kema kinejki kikixtilis Jehová itlanauatil. Filipenses 2:6 kiijtoua “axmoiljuik para moneki mokauas nopona ika nopa ueyi tlanauatili” tlen iTata kipia. Jesús kimajtoya amo kipia nochi tlanauatili, yeka kitlepanitayaya itlanauatil iTata uan kichiuayaya tlen kiiljuiyaya. w20.08 10, 11 párrs. 12, 13

Sekij toikniuaj kipiaj kuesoli tlen sekinok amo uelij kiitaj uan uelis amo kikuamachiliskiaj. Tlaj amo tiuelij tijchiuaj miak tlamantli uan timoiljuiaj amo techkuamachiliaj, uajka tlen kipanok Mefi Boset tlauel techpaleuis (2 Sam. 4:4). Amo san tlaijiyouik pampa amo ueliyaya nejnemi, nojkia tlaijiyouik kema David amo xitlauak kitlajtolsenkajki uan kichiuili tlen amo kuali. Maske ya amo motemolik yon se tlen ni kuesoli, amo mosentlalik ipan tlen amo kuali kipanoyaya, tlauel kipatiitayaya nochi tlen kuali katli kipanoyaya. Uan kitlaskamatiliyaya David pampa achtouia kinextik kitlasojtlayaya (2 Sam. 9:6-10). Yeka, kema amo kuali kitlajtolsenkajki, ya uelki kiitak sekinok tlamantli tlen panoyaya. Amo mokualankamakak pampa David mokuapolok yon kitlajtlakoltik Jehová. Mosentlalik kipaleuis nopa tlanauatijketl tlen toTeotsij kitlalijtoya (2 Sam. 16:1-4; 19:24-30). Jehová kichijki ma moijkuilo ipan Biblia tlen kipanok nopa tlakatl pampa kimatiyaya techpaleuiskia (Rom. 15:4). w20.04 26 párr. 3; 30 párrs. 18, 19

Itstokej toikniuaj katli senkistok tlajtolmoyauaj, yeka uelis ipan totlanechikol itstokej misioneros, precursores especiales o precursores regulares. Maske nochi ni toikniuaj amo tlauel tlapijpiaj, Jehová tlauel kinteochijtok (Mar. 10:29, 30). ¡Tlauel tiyolpakij pampa ipan totlanechikol itstokej toikniuaj katli senkistok tlatekipanouaj! Uajka, ¿san ni toikniuaj katli kintekimakatokej uan katli senkistok tlatekipanouaj kipiaj se tekitl ipan tlanechikoli? Amo, pampa Jehová kinpatiita sejse toikniuaj uan ipan tlanechikoli nojkia tlauel kinpatiitaj (Rom. 10:15; 1 Cor. 3:6-8). Tlauel tikinpatiitaj toikniuaj pampa sansejko tijnekij tikinpaleuisej maseualmej ma elikaj Cristo itokilijkauaj (Mat. 28:19, 20, TNM; 1 Tim. 2:4). Nochi toikniuaj katli moatsonpoliuiltijtokej uan katli amo, kichiuaj kampeka kiachtouitlalisej ipan ininnemilis tlajtolmoyaualistli (Mat. 24:14). w20.08 21 párrs. 7, 8

Ipan texto tlen ni tonali techilnamikilia Jesús nochipa itstos touaya kema tikixnamikisej kuesoli. ¿Kenke tlauel techyolchikaua tlen kiijtok? Pampa nochi tikixnamikij tlaouijkayotl. Se neskayotl, kema miki se akajya katli tikikneliaj, titlaijiyouiaj miak xiuitl uan amo san keski tonali. Sekij tlaijiyouiaj pampa ya uejueyij uan sekij pampa mokuesouaj miak tonali. Maske tikixnamikij miak tlamantli, tijmatij Jesús “mojmostla” itstok touaya. Nojkia kema tijyolmatisej tlauel titlaijiyouijtokej (Mat. 11:28-30). Biblia kiijtoua Jehová techpaleuia ika iluikaeuanij (Heb. 1:7, 14). Se neskayotl, iluikaeuanij techpaleuiaj uan techyakanaj kema tijmoyauaj “ipan nochi tlaltinij, uan ipan nochi xinachtli tlakamej, uan hasta tlakamej tlen kamatij nochi tlajtoli” nopa kuali tlamachtili (Mat. 24:13, 14; Apoc. 14:6). w20.11 13, 14 párrs. 6, 7

Katli tijmachtiaj tijnekij ma kiita nochi tlen momachtia mokixtijtok ipan Biblia (1 Tes. 2:13). ¿Kenijkatsa uelis tijchiuasej? Uelis tikiljuisej nojkia ma kamanalti tlen nopa tlamachtili o ma kiixtoma se keski textos uan amo san tojuantij tikixtomasej. Nojkia ma tijpaleuikaj ma kiita kenijkatsa uelis kichiuas ipan inemilis tlen momachtijtok. Uan ma tijchiuilikaj se keski tlajtlanili tlen kipaleuis ma kiixtoma tlen moiljuia o kiyolmati tlen se texto (Luc. 10:25-28). Uelis tijtlatsintokisej: “Ipan ni texto, ¿tikitak tlake kuajkuali tlamantli kinextia Jehová?, ¿Kenijkatsa uelis mitspaleuis ni tlamachtili? Uan, ¿tlake tijyolmati ika tlen timomachtijkej?”. Moneki tijpaleuisej ma kiikneli nopa tlamachtili uan ma kichiua ipan inemilis tlen kiyekojtia, amo san ma kimati miak tlamantli. Nojkia moneki tijtekiuisej Biblia. Tlaj tijnekij kuali titlamachtisej moneki amo timoueyimatisej. w20.10 15 párrs. 5, 6

Timotemachiaj ayokmo titlajtolmoyauasej ipan nopa tonali kema toTeotsij kiixtlalijtok. Ma timoiljuikaj tlake panok kema Noé itstoya. Jehová kinextik kichiua tlen kiijtoua kema kinamiki. Ya kiijtok poliuiyaya se 120 xiuitl kema uetsiskia tlauel miak atl. Teipa, Jehová kiiljuik Noé ma kichiua se akali, uan ya uejkajki kichiua se cuarenta o cincuenta xiuitl. Ya tlauel tlajtolmoyajki maske maseualmej amo kitlakakilijkej, uan tlanki kema Jehová kiiljuik ma kalaki ipan akali. Uan ipan nopa tonali kema Jehová kiixtlalijtoya, “kitsajki ipuerta” nopa akali (Gén. 6:3; 7:1, 2, 16). Jehová nechka kiijtos ayokmo ma titlajtolmoyauakaj. Ipan nopa tonali tlen kiixtlalijtok, Jehová kitlamiltis tlen amo kuali uan kiualikas iTlanauatijkayo kampa nochi kichiuasej san tlen xitlauak. Yeka, tlauel moneki ma tijchiuakaj kej Noé, Habacuc uan toikniuaj katli tlauel mosentlalijtokej kinmachtisej sekinok. Nochipa ma timosentlalijtokaj, ma tijpiakaj toyolo uan kuali ma titlaneltokakaj ipan Jehová uan ipan tlen kiijtojtok techmakas. w20.09 13 párrs. 18, 19

Tlaj amo itstoskia se katli tlayakanaskia, nochi amo kuali itstoskiaj uan amo aka yolpakiskia pampa kema kitlapejpeniskiaj se tlamantli amo aka kiijtoskia tlake mochiuaskia uan amo itstoskia katli peuaskia kichiuas tlen kitlapejpenijkej. Tlaj nopa tlanauatili tlen Jehová kitlalik nelia tlauel techpaleuia, ¿kenke miakej siuamej tlauel kintlaijiyouiltiaj? Kiampa pano pampa miakej tlakamej amo kitlepanitaj tlen Jehová kiniljuia katli mosenkajtokej uan pampa kichiuaj san tlen momajtokej kichiuaj ipan ininaltepe. Nojkia, kinchiuiliaj tlen amo kuali ininsiua pampa san inijuantij kinekij moyolpakiltisej. Uelis se tlakatl kichiualtia isiua ma kitlepanita pampa kineki kinextis san ya kipia tlanauatili o “amo kikaua se siuatl ma kinauati”. Nojkia, uelis moiljuia maske amo uelis kichiualtis isiua ma kiikneli, kena uelis kichiuas ma kimakasi uan ma kitlepanita. Uan se keskij tlakamej kiampa kichiuaj pampa kinekij ininsiua ma kichiua san tlen inijuantij kiijtouaj. Yeka, kema tlakamej kiampa kichiuaj, sekinok nojkia ayokmo kintlepanitakaj siuamej yon kinpatiitaj. Uan Jehová tlauel amo kuali kiita ni tlamantli (Efes. 5:25, 28). w21.02 3 párrs. 6, 7

Kema tlauel mitstetsopa kuesoli, tlauel mitspaleuis tlaj tikiljuis Jehová tlen mitspano. Tlaj kiampa tijchiuas Jehová mitsmakas “tlaseuilistli” ipan moyolo tlen sekinok “axuelis kimachilisej” (Filip. 4:6, 7). ToTeotsij kitekiuia itonal uan kiampa techpaleuia amo tlauel ma timotekipachokaj (Gál. 5:22). Kema timomaijtos ika Jehová, xijtlapo moyolo. Xikiljui tlen nelnelia mitstekipachoua uan kenijkatsa tijyolmati. Tlaj tikita onka se tlamantli tlen mitspaleuis, uajka xikiljui Jehová ma mitsmaka tlalnamikilistli uan ma mitspaleui tijchiuas ipan monemilis. Uan tlaj amo tleno ueli tijchiua, uajka xikiljui Jehová ma mitspaleui amo tlauel timotekipachos. Tlaj tikiljuiaj tlen nelnelia techtekipachoua, tikitasej kenijkatsa technankilis ika tlen tikiljuiaj. Tlaj amo nima technankilia, amo ma timokuesokaj. Jehová kineki ajachika ma timomaijtokaj uan ma tikiljuikaj tlen nelnelia techtekipachoua (Luc. 11:8-10). w21.01 3 párrs. 6, 7

Ipan tlanechikoli amo san itstokej toikniuaj katli mosenkajtokej uan katli kinpiaj ininkoneuaj, nojkia itstokej toikniuaj uan tosiuaikniuaj katli amo mosenkajtokej. ¿Kenijkatsa moneki tikinitasej? Ma tikitakaj kenijkatsa Jesús kinitayaya katli amo mosenkajtoyaj. Kema Jesús itstoya ipan Tlaltipaktli amo mosiuajtik, ya mosentlalik san tlajtolmoyauas. Maske amo kema kiijtok se itokilijka monekiyaya mosiuajtis o amo, kena kiijtok se keskij itokilijkauaj amo kinekiskiaj mosenkauasej (Mat. 19:12). Jesús kintlepanitayaya katli amo mosenkajtoyaj uan amo moiljuiyaya inijuantij amo ininpati o kinpolouayaya se tlamantli ipan ininnemilis. Pablo nojkia kichijki kej Jesús uan amo mosiuajtik. Maske ya kiampa kichijki, amo kema kiijtok amo kuali tlaj se akajya mosiuajtis. Ya kimajtoya se Cristo itokilijka monekiyaya kitlapejpenis tlaj mosiuajtiskia o amo. w20.08 28 párrs. 7, 8

Apóstol Juan itstoya miak xiuitl uan kipanok miak tlamantli. Kipixki miak tlaouijkayotl tlen ueltoskia kichiuas ayokmo kuali ma tlaneltoka. Maske kiampa kipanok, nochipa kichijki kampeka kichiuas tlen Jesús tlanauatik, kej kiniknelis iikniuaj. Juan motemachijtoya Jehová uan Jesús kiikneliyayaj uan kipaleuiskiaj kiijiyouis tlen ueli tlaouijkayotl (Juan 14:15-17; 15:10). Ya nochipa kinextik ika tlen kiijtok uan ika tlen kichijki kinikneliyaya iikniuaj, maske Satanás uan tlen kinauatia kinekiyayaj kichiuasej ayokmo ma teikneli. Sanse kej kema Juan itstoya, ipan ni tonali pampa Satanás tlanauatia nojkia itstokej miakej maseualmej katli amo teikneliaj uan tekokoliaj (1 Juan 3:1, 10). Ya amo kineki ma tikiniknelikaj toikniuaj, yeka amo ma tijkauakaj kiampa ma kichiua. Ma timosentlalikaj tikiniknelisej toikniuaj, uan ma tijnextikaj ika tlen tikijtouaj uan ika tlen tijchiuaj. Tlaj kiampa tijchiuaj, tlauel kuali tijyolmatisej pampa tiitstokej ipan Jehová itlanechikol uan nelnelia tiyolpakisej (1 Juan 4:7). w21.01 13 párrs. 18, 19

Pampa ipan ni tonali Satanás kinauatia ni Tlaltipaktli, uelis tijpiasej tlaouijkayotl uan amo tijmatisej tlake tijchiuasej (2 Tim. 3:1). Maske tlauel ouij kej tiitstokej, amo kinamiki timajmauisej o tlauel timotekipachosej. Jehová kimati tlake techpano, yeka techtenkauilia: “Niinmechpaleuis uan niinmechmaitskitos ika nonejmatl tlen ika nitlatlani” (Is. 41:10, 13). Timotemachiaj Jehová nochipa techpaleuis, uan Biblia nojkia techpaleuis ma tikixnamikikaj tlaouijkayotl. Ipan videos, ipan tlapoualistli tlen mokixtijtok ipan Biblia uan ipan amochtli “Tlen nechmachtia Biblia” kiijtoua tlen kinpanotok toTeotsij itekipanojkauaj. Kema tikitasej, tijtlakakilisej o tijpouasej nopa tlamachtili, ma tikiljuikaj Jehová ma techpaleui tikitasej kenijkatsa uelis tijchiuasej ipan tonemilis. Ma timonejneuilikaj kejuak nopaya tiitstokej, ma timoyoliljuikaj ipan tlen kichijki katli nopaya itstoya uan ma tikitakaj kenijkatsa Jehová kipaleuik kiixnamikis tlen kipanok. Teipa, ma tijchiuakaj ipan tonemilis tlen timomachtijkej uan ma tijtlaskamatikaj Jehová ika nochi tlamantli tlen techmakatok, uan nojkia ma tikinyolchikauakaj uan ma tikinpaleuikaj sekinok kiampa tijnextisej tijtlaskamatij. w21.03 19 párrs. 22, 23

Tlaj ta uan mosiua inkinekij inkipiasej inmokoneuaj, ximotlatsintokikaj: “¿Techtlapejpeniskia Jehová ma tikiskaltikaj se pilkonetsi pampa amo timoueyimatij uan kuali titlaneltokaj?” (Sal. 127:4). Tlaj ya tikinpia mokoneuaj, uajka ximotlatsintoki: “¿Nikinmachtia ma kiitakaj moneki tekitisej?” (Ecl. 3:12, 13). “¿Nikinmokuitlauia nokoneuaj tlen auilnemilistli uan ika tlen amo kuali?” (Prov. 22:3). Maske tijnekis tikinmokuitlauis, amo nochipa kiampa tijchiuas. ¿Tlake uelis kinpaleuis kema kiixnamikisej kuesoli? Moneki tikinmachtis ma kitemokaj tlen Biblia tlamachtia (Prov. 2:1-6). Se neskayotl, tlaj se tlen mochampoyouaj kitlauelkaua toTeotsij, moneki tikiniljuis uan tikinmachtis mokoneuaj kenke tlauel ipati amo ma kitlauelkauakaj Jehová (Sal. 31:23). Uan tlaj se akajya katli tlauel tikiknelia miki, uajka xikinnextili se keski textos tlen kinpaleuis amo tlauel ma moyolkokokaj uan ma kipiakaj tlaseuilistli (2 Cor. 1:3, 4; 2 Tim. 3:16). w20.10 27 párr. 7