Rut uan Noemí

IPAN Biblia tijpantis se pilamochtsi tlen itoka Rut. Nopaya ijkuilijtok tlen kinpanok Rut uan Noemí katli itstoyaj kema israeleuanij kinyakanayayaj tetlajtolsenkauanij. Rut eliyaya se ichpokatl tlen euayaya altepetl Moab, uajka amo kitekipanouayaya toTeotsij pampa amo eliyaya israelejketl. Uan kema Rut kiixmatki toTeotsij Jehová katli melauak, Rut tlauel kiiknelik. Noemí eliyaya se ilamatsij katli kipaleuik Rut ma kiixmati Jehová.

Noemí eliyaya israelejketl. Ya, iueue uan omej itelpokauaj mochantitoj Moab kema amo miak onkayaya tlen kikuaskiaj ne Israel. Se tonali, Noemí iueue mijki. Teipa Noemí itelpokauaj mosiuajtijkej ininuaya omej katli euayayaj Moab. Motokaxtiyayaj Rut uan Orfa. Kema ya panotoya se matlaktli xiuitl, nopa omej Noemí itelpokauaj mijkej. ¡Tlauel mokuesojkej! ¿Tlake kichiuaskia Noemí?

Se tonali Noemí sampa kinejki yas ialtepeko maske uejka nejnemiskia. Rut uan Orfa kinejkej itstosej iuaya, yeka no yajkej. Kema ya uejka nejnentoyaj, Noemí kiniljuik nopa ichpokamej: ‘Sampa xiakaj inmochajchaj kampa inmonanauaj’.

Noemí kintsoponik uan kiniljuik ma mokuepakaj. Inijuantij pejkej chokaj pampa tlauel kiikneliyayaj Noemí. Yeka kiiljuijkej: ‘¡Amo! Tojuantij tiasej mouaya kampa moaltepe’. Uan Noemí kinnankilik: ‘Amo uelis inyasej nokoneuaj. San tlapik tlaj inyasej nouaya’. Uajka Orfa mokuepki ichaj. Uan Rut amo yajki.

Noemí sampa kiiljuik Rut: ‘Xikita, Orfa ya mokuepki. Xia iuaya’. Uan Rut kinankilik: ‘¡Amo xinechiljui ma nimitskajteua! Xinechkaua ma nia mouaya. Kampa tias, nias. Kampa tiitstos, nopaya nimokauas. Moaltepe elis noaltepe uan moTeko elis noTeko. Kampa timikis, nimikis uan nopaya ma nechtlalpachokaj’. Kema Rut kiijtok ni, Noemí ayokmo kichiualtik ma mokuepa.

Teipa Noemí uan Rut asitoj altepetl Israel. Nopaya mochantijkej. Rut nima pejki tekiti milaj, pampa uajkaya kisentiliyayaj cebada. Se tlakatl katli motokaxtiyaya Booz (o Boaz) kikajki ma kisentili cebada ipan imilaj. ¿Tijmati ajkia eliyaya Booz inana? Eliyaya Rahab, katli euayaya Jericó.

Se tonali Booz kiiljuik Rut: ‘Nijkaktok nochi tlen tijchijtok uan kenijkatsa tikiknelijtok Noemí. Nijmati tikinkajtejki motata, monana uan moaltepe. Uan tiualajki tiitstoki ipan se altepetl kampa amo kema tiualajtoya. ¡Ma mitspaleui toTeko [Jehová]!’.

Rut kinankilik: ‘Nelia kuali moyolo. Uan tinechyolchikajki pampa tinechnojnotski ika kuali’. Booz tlauel kiixtokak Rut uan teipa mosiuajtik iuaya. ¡Ni tlauel kiyolpakiltik Noemí! Uan nojua tlauel yolpajki kema Rut uan Booz kipixkej nopa achtoui ininkone, tlen kitokaxtijkej Obed. Uan Obed elki David iueyitata. Teipa nojua timomachtisej tlen kichijki David.