Tlaiknelili, se yejyektsi kuali tlamantli

TOTEOTSIJ kichijki apóstol Pablo ma kiijkuilo chiknaui kuajkuali tlamantli tlen tijnextiaj kema tijpiaj toTeotsij itonal (Gál. 5:22, 23). Sansejko nopa chiknaui kuajkuali tlamantli mochiua kejuak setsi itlajka “itonal toTeko”a tlen moneki tijnextisej kema tijpiaj ‘tonemilis tlen yankuik’ (Col. 3:10). Kej se kuauitl katli kuali moskaltijtok temaka kuali itlajka, se maseuali kinextis nopa kuajkuali tlamantli kema kikauas toTeotsij itonal ma kiyakana ipan inemilis (Sal. 1:1-3).

Nopa achtoui kuali tlamantli tlen Pablo kiijtok elki nopa tlaiknelili. ¿Kenke nelia tlauel yejyektsi? Pablo kiijtok tlaj amo teikneliskia, uajka “axtleno [i]pati” (1 Cor. 13:2). ¿Tlake nopa tlaiknelili, uan kenijkatsa uelis tijpiasej uan mojmostla tijnextisej?

Maske tlauel ouij tikijtosej ika se keski tlajtoli tlake kiijtosneki tlaiknelili, Biblia kiijtoua kenijkatsa uelis tijnextisej. Kiijtoua “se tlen teiknelia kipia iyolo ininuaya sekinok uan kinchiuilia tlen kuali”, “san paki ika tlen melauak” uan “kiijiyouia nochi tlamantli tlen uala uan motemachia para asis tlen kuali. Nochipa kichia para sekinok ma kichiuakaj tlen kuali uan mokaua temachtli yonke tlen ueli kipanotiuala”. Nojkia katli teiknelia nelia kitekipachoua tlen kinpano sekinok uan amo kema tetlauelkaua. Uan se katli amo teiknelia san tetlasojmati, moueyimati, san kej ueli kamanalti, amo kintekipachoua sekinok, tekualankaita uan amo tetlapojpoljuia. Tojuantij amo tijnekij tijnextisej nopa tlamantli tlen amo kuali uan tlen amo tepaleuia, tijnekij tijnextisej tlaiknelili tlen kichiuas ma timoiljuikaj achtoui tlake kinpaleuis sekinok (1 Cor. 13:4-8).

Jehová “yajaya teiknelijkayotl”. Ya kuali kiixnextia nopa tlaiknelijkayotl (1 Juan 4:8). Nesi itlaiknelijkayo ipan nochi tlen kichiua uan tlen onka. Uan kinextik nelia tlauel techiknelia kema kititlanki iKone ma techmakixtiki ika imikilis. Apóstol Juan kiijkuilok: “ToTeko technextilik hasta kanke techiknelia pampa techtitlanilik iKone iyojtsi para ma uala ipan ni Tlaltipaktli para ma tijpiakaj yolistli yankuik ipampa ya [...]. Axtojuantij tikiknelijkej toTeko uan yeka Cristo ualajki. [...] ToTeko Dios techiknelik uan yeka techtitlanilik iKone para yajaya elis nopa tlakajkaualistli tlen tlaxtlauas ipampa totlajtlakoljuaj” (1 Juan 4:9, 10). Pampa toTeotsij techiknelia, techtlapojpoljuia totlajtlakoljuaj, timotemachiaj timomakixtisej uan tiitstosej nochipa.

Jesús kinextik kinikneliyaya maseualmej kema kinejki ualas ipan Tlaltipaktli uan kichiuas tlen toTeotsij kinekiyaya. Pablo kiijtok: “Uan ipakilis toTeko elki para Cristo ma techtlatsejtselolchiua para nochipa kema san se uelta motemaktilik” (Heb. 10:9, 10). Tlaj se maseuali kichiuaskia nopa, kinextiskia kenijkatsa tlauel teiknelia. Jesús kiijtok: “Se tlen motemaktilis uan mikis ipampa iuampoyouaj, yajaya más teiknelia que nochi tlakamej” (Juan 15:13). ¿Uelis titeiknelisej kej Jehová uan Jesús maske titlajtlakolejkej? ¡Kena tiuelisej! Ma tikitakaj kenijkatsa.

Pablo techtlajtolmaka: “Inmojuantij ininkoneuaj toTeko, uajka xijchiuakaj keja yajaya kichiua. Mojmostla xikiniknelikaj [maseualmej] keja Cristo techiknelia hasta motemaktilik” (Efes. 5:1, 2). Tlaj tijnekij “mojmostla” titeiknelisej, moneki tijnextisej ni kuali tlamantli ipan nochi tonemilis. Uelis tijnextisej ika tlen tijchiuaj uan amo san ika tlen tikijtouaj. Juan kiijkuilok: “Nokoneuaj tlen niinmechiknelia, ma axsan tikijtosej tikinikneliaj toikniuaj, [...] ma tijnextikaj para melauak tikinikneliaj ika tlen kuali tikinchiuiliaj” (1 Juan 3:18). Tlaj tojuantij tikikneliaj Jehová uan tikinikneliaj maseualmej, uajka tijmoyauasej nopa “kuali tlamachtili” (Mat. 24:14; Luc. 10:27). Nojkia tijnextiaj tlaiknelili kema tijpiaj toyolo, titetlasojtlaj uan titetlapojpoljuiaj. Yeka Biblia techtlajtolmaka: “Más kuali ximochiuilikaj tlen kuali se ika seyok. Ximotlasojtlakaj uan ximotlapojpoljuikaj se ika seyok keja toTeko inmechtlapojpoljuijtok ipan Cristo” (Efes. 4:32).

Titeiknelisej amo kiijtosneki tijkauasej ma pano se keski tlamantli. Ma timoiljuikaj ipan tetajmej. Uelis inijuantij kikauaj ininkone ma kichiua tlen ya kineki o inijuantij kichiuaj tlen kiniljuia pampa ayokmo kinekij ma choka. Tetajmej katli nelia kinikneliaj ininkoneuaj moneki kintlalnamiktisej. Nojkia kiampa pano ika Jehová, maske yaya tlaiknelijkayotl, kintlalnamiktia “nochi tlen kiniknelia” (Heb. 12:6). Uajka, tlaj titetlalnamiktiaj kema kinamiki, tijnextiaj titeikneliaj (Prov. 3:11, 12). Kema tijchiuasej ni, moneki tikilnamikisej nochi titlajtlakolejkej uan amo nochipa tijnextiaj tlaiknelili. Yeka nojua moneki kuali tijnextisej ipan tonemilis. Ma tikitakaj eyi tlamantli tlen techpaleuis.

Se. Ma tikiljuikaj toTeotsij ma techmaka itonal. Jesús kiijtok Jehová kinmakas “itonal nochi tlen kitlajtlanisej” (Luc. 11:13). Tlaj titlajtlanij toTeotsij itonal kema timomaijtouaj uan tijchiuaj kampeka ‘timonejnemiltisej ika itlapaleuil itonal toTeko’, techpaleuis nojua ma tijnextikaj tlaiknelili (Gál. 5:16). Ueuejtlakamej uelis kitlajtlanisej Jehová itonal uan kiampa kinpaleuis ma tetlajtolmakakaj ika tlaiknelili. Uan tetajmej uelis momaijtosej uan kiampa toTeotsij itonal kinpaleuis ma kintlalnamiktikaj ininkoneuaj ika tlaiknelili, amo ika kualantli.

Ome. Ma timoiljuikaj kenijkatsa Jesús kinextik tlaiknelili maske kitlaijiyouiltijkej (1 Ped. 2:21, 23). Tlen kichijki tlauel techpaleuis kema se akajya techyolkokoua o kema techchiuiliaj tlen amo kuali. Kema kiampa techpanos, uelis timotlajtlanisej: “¿Tlake kichiuaskia Jesús?”. Se toikni katli itoka Leigh tlauel kipaleuik nopa tlajtlanili ma kimati tlake kichiuaskia. Ya kiijtoua: “Se tonali, se siuatl katli iuaya nitekitiyaya kintlajkuiljuilik sekinok katli nopaya tekitiyayaj uan kiniljuik na amo kuali nijchiuayaya noteki uan tlauel nechijilnamijki. Maske tlauel nechyolkokok, nimotlajtlanik: ‘¿Tlake kichijtoskia Jesús?’. Kema nimoyoliljuik tlake kichijtoskia, nikitak kualtiaskia nikilkauas uan ayokmo nimoiljuijtos ipan nopa tlamantli. Teipa nijmatki ya tlauel mokokouayaya uan motekipachojtoya, uelis yeka nechijilnamijki uan amo pampa nechkualankaitayaya. Pampa nimoyoliljuik kenijkatsa Jesús kinextik tlaiknelili maske kitlaijiyouiltijkej nechpaleuik nojkia ma nijchiua kej ya uan ma nijnextili tlaiknelili katli iuaya nitekitiyaya”. Tlaj tijchiuasej kej Jesús, nochipa tijnextisej titeikneliaj.

Eyi. Ma timomatikaj achtoui tijchiuasej tlen kinpaleuis sekinok, kiampa nochi kimatisej nelia tielij Cristo itokilijkauaj (Juan 13:34, 35). Biblia techiljuia ma timoyoliljuikaj kej “Cristo Jesús moiljuia”. Kema ualajki, kikajki nochi tlen kipixtoya ipan iluikak pampa kinekiyaya techpaleuis uan kinejki motemaktilis (Filip. 2:5-8). Tlaj nojkia tijkauasej se keski tlamantli uan titeiknelisej, tlen timoiljuisej uan tlen tijyolmatisej elis sanse kej Jesús uan achtoui tijnekisej tijchiuasej tlen sekinok kinpaleuis. ¿Kenijkatsa techpaleuis tijnextisej tlaiknelili?

Kema tijnextiaj titeikneliaj nelia tlauel techpaleuia. Ma tikitakaj san ome tlamantli.

• NOCHI TIMOPALEUIAJ. Pampa nochi timoikneliaj, tijmatij kema tiasej ipan seyok tlanechikoli, toikniuaj techselisej ika tlaiknelili. ¡Nelia se ueyi tlateochiualistli pampa nochi toikniuaj ipan Tlaltipaktli techikneliaj! (1 Ped. 5:9). San Jehová itlanechikol kinextia nopa tlaiknelili.

• TLASEUILISTLI: Kema tijpiaj toyolo “se ika seyok” techpaleuia ma tiitstokaj ika ‘tlaseuilistli’ (Efes. 4:2, 3). Tijpiaj tlaseuilistli kema tiitstokej ipan tlanechikoli uan ipan uejueyi tlanechikolistli. Tojuantij amo techpano kej maseualmej katli mokualaniaj uan moxejxelouaj (Sal. 119:165; Is. 54:13). Kema tijchiuaj kampeka kuali timouikasej ininuaya sekinok, tijnextiaj tlauel tikinikneliaj uan nojkia tijyolpakiltiaj Jehová (Sal. 133:1-3; Mat. 5:9).

Pablo kiijtok: “Intla timoiknelisej tikinpaleuisej sekinok ma moskaltikaj” (1 Cor. 8:1). ¿Kenijkatsa tlaiknelili tepaleuia ma moskaltikaj? Pablo kiixtonki kenijkatsa tepaleuia ipan 1 Corintios 13, katli miakej kiiljuiaj “kiuikatiaj tlaiknelili”. Kema se akajya teiknelia, achtoui nochipa kichiuas tlen sekinok kinpaleuis (1 Cor. 10:24; 13:5). Nojkia, se katli teiknelia kipia iyolo, tetlasojtla uan moiljuia ipan sekinok. Yeka katli teiknelia, kinpaleuia ichampoyouaj ma teiknelikaj uan nojkia kinpaleuia toikniuaj ma itstokaj sansejko (Col. 3:14).

Nelia tlauel ipati uan yejyektsi nopa tlaiknelili tlen tijnextiliaj toTeotsij. Nopa tlaiknelili kinpaleuia maseualmej sansejko ma kiueyichiuakaj Jehová ika miak pakilistli uan ma kitekipanokaj “ika san se ininyolo” maske kampa ueli euaj uan amo sanse inintlajtol (Sof. 3:9). Ma tijchiuakaj kampeka mojmostla tijnextisej nopa kuali tlamantli tlen toTeotsij itonal.