Ma tikinyolchikauakaj sekinok nojkia ma kichiuakaj tlen kuali

Hebreos 10:24 kiijtoua ma tikitakaj “kejatsa [timoyolchikauasej] se ika seyok para más timoiknelisej uan tijchiuasej tlen kuali”. Uelis tikinyolchikauasej sekinok ika tlen tijchiuasej uan tikijtosej. Yeka ma tikiniljuikaj nochi tlen kuali tlen techpanotok, uan ma kiitakaj kenijkatsa tlauel tiyolpakij pampa tijtekipanouaj Jehová. Uan amo ma tikinpinaualtikaj pampa amo uelij kichiuaj kej tojuantij (Gál. 6:4). Ma tikinyolchikauakaj sekinok ‘ma moiknelikaj uan ma kichiuakaj tlen kuali’ uan amo ma tikinyolkokokaj pampa tijnekij ma kichiuakaj “tlen kuali” (xikita amochtli Benefíciese, iamayo 158, párr. 4). Tlaj titeikneliaj, uajka nojkia tikinchiuilisej sekinok tlen kuali, uan ni tijnextisej kema titlajtolmoyauasej o kema titemakasej se tlenijki (2 Cor. 1:24).