Xijnexti titlaneltoka ipan tlen Jehová techtenkauilijtok

 1. ¿Kenijkatsa tijyolmatij pampa titlaneltokaj?

AMO nochi maseualmej tlaneltokaj (2 Tes. 3:2). Maske amo nochi tlaneltokaj, Jehová kinpaleuia ma tlaneltokakaj nochi katli kiueyichiuaj (Rom. 12:3; Gál. 5:22). ¡Nelia tlauel tijtlaskamatiliaj Jehová pampa techpaleuia ma titlaneltokakaj!

2, 3. 1) ¿Tlake ueli tijseliaj pampa titlaneltokaj? 2) ¿Tlake tlajtlanili tijnankilisej?

² Jehová temaktilik iKone katli tlauel kiikneliyaya, kiampa katli tlaneltokaskiaj ipan Jesús ueliskiaj kintlapojpoljuisej. Uan nojkia ueliskiaj mouampojchiuasej iuaya Jehová uan itstosej nochipa (Juan 6:44, 65; Rom. 6:23). ¡Jehová nelia kinextijtok tlauel kuali iyolo touaya! Maske titlajtlakolejkej uan kinamiki timikisej, Jehová kiitak kena ueliskia tijchiuasej tlen kuali (Sal. 103:10). Ya techpaleuik ma tikixmatikaj Jesús uan ma tijmatikaj tlen kichijki. Kema pejki titlaneltokaj ipan Jesús uan pejki tijtokiliaj, nojkia pejki timotemachiaj tiitstosej nochipa (xijpoua 1 Juan 4:9, 10).

³ ¿Tlake nojua kiijtosneki kuali se tlaneltokas? Tlaj ya tijmatij tlen toTeotsij kichijtok uan tlen kichiuas teipa, ¿kiijtosneki ya kuali titlaneltokatokej? Ma tikitakaj sekinok tlamantli tlen nojua uelis tijchiuasej.

 4. ¿Kenijkatsa techpaleuia kema titlaneltokaj?

⁴ Kema titlaneltokaj ipan Jehová uan Jesús amo san timoiljuiaj moneki tijmatisej tlen inijuantij kichijtokej, nojkia tijnekij timonejnemiltisej kej inijuantij techmachtiaj uan tijnekij tikinpaleuisej sekinok maseualmej nojkia ma kinixmatikaj. Apóstol Pablo kiijtok: “San moneki tikiniljuis sekinok para Jesús itstok moueyiTeko. Uan moneki tijneltokas ipan moyolo para toTeko kiyolitik kema ya miktoya. Uan toTeko mitsmakixtis tlen motlajtlakoljuaj. Pampa kema ipan toyolo tijneltokaj Jesucristo, toTeko techchiua tixitlauakej iixpa. Uan kema tikiniljuisej sekinok para tijneltokaj toueyiTeko Jesucristo, yajaya techmakixtia tlen totlajtlakoljuaj” (Rom. 10:9, 10; 2 Cor. 4:13).

 5. ¿Kenke tlauel moneki titlaneltokasej, uan kenijkatsa uelis kuali titlaneltokatiasej? Xikixtoma ika se neskayotl.

⁵ Uajka, tlaj tijnekij tiitstosej ipan Xochimili, moneki tijchiuasej kampeka nochipa kuali titlaneltokatosej. Totlaneltokilis kejuak eliskia se xochitl. Tlaj tijnekij ma xoxouixto uan kuali ma moskalti, moneki nochipa tikatekijtosej. Tlaj amo tijchiuaskiaj, uajka peuas pilinis uan teipa uakis. Nojkia kiampa pano ika totlaneltokilis, moneki nochipa tikitasej tlaj kuali titlaneltokaj uan tijchiuasej kampeka nojua kuali titlaneltokatiasej (Tito 2:2; 2 Tes. 1:3; Luc. 22:32; Heb. 3:12).

 6. Kej kiijtoua Hebreos 11:1, ¿tlake ome tlamantli kiijtosneki tlaneltokili?

⁶ Biblia kiixtoma tlake kiijtosneki se tlaneltokas ipan Hebreos 11:1 (xijpoua). Se: kiijtosneki “tijneltokaj para temachtli panos nopa tlamantli tlen toTeko techtenkauilijtok”. Nopa “tlamantli” eli nochi tlen toTeotsij kiijtojtok kichiuas teipa. Tojuantij timotemachiaj nelia kitsontlamiltis tlen amo kuali uan kichiuas se xochimili ipan Tlaltipaktli. Ome: nojkia kiijtosneki “tijmatij para temachtli ya eltok nopa tlamantli tlen ama niyon kentsi aya ueli tikinitaj”. Maske amo ueli tikinitaj, tojuantij tijmatij ne iluikak nelia itstokej Jehová, Jesús uan iluikaeuanij, uan nelia tekichijtok toTeotsij iTlanauatijkayo (Heb. 11:3). ¿Kenijkatsa uelis tijnextisej nelia kuali titlaneltokaj ipan tlen toTeotsij kiijtojtok kichiuas uan ipan tlamantli tlen amo ueli tikitaj? Kej timonejnemiltiaj, tlen tikijtouaj uan tlen tijchiuaj kinextia tlaj nelia kuali titlaneltokaj.

 7. ¿Kenijkatsa tlen Noé kichijki technextilia tlake kiijtosneki kuali se tlaneltokas? (Xikita nopa achtoui tlaixkopinkayotl).

⁷ Tlen Noé kichijki technextilia tlake kiijtosneki kuali se tlaneltokas. Pablo kiijtok “toTeko kiyolmelajki [Noé] para ualaskia tlauel miak atl yonke axuelki kiita para ualayaya”. Pampa Noé kinekiyaya kiyolpakiltis Jehová, “nimantsi pejki kichijchiua nopa ueyi kuakanaua” kampa “momanauiskiaj ya uan ichampoyouaj” (Heb. 11:7). Noé kineltokak tlen Jehová kiiljuik, yeka kichijki nopa ueyi akali. Uelis ikalnechkauaj kinejkej kimatisej kenke kichijchiuayaya nopa ueyi akali, uan tijmatij Noé kinixtomilik kenke kichijchiuayaya. Yeka Biblia kiijtoua “kinyolmelauayaya sekinok kenijkatsa ueliskiaj itstoskiaj xitlauak iixtla toTeko” (2 Ped. 2:5). Kiniljuik toTeotsij kititlaniskia “se tlauelatl” uan kiampa kintsontlamiltiskia maseualmej tlen amo kualmej. Uelis kiniljuik kej Jehová kiiljuijtoya: “Nikinpoliuiltis nochi tlakamej kampa ueli ipan Tlaltipaktli pampa nochi san mosisiniaj”. Uan nojkia kiiljuijtoya: “Nijtitlanis tlauel miak atl tlen momanas uejkapa hasta kitsonpoliuiltis nochi tlali uan nochi tlen kipiaj yolistli kampa ueli ipan Tlaltipaktli. Nochi tlen onka ipan tlali poliuis”. Teipa, uelis Noé kiniljuik tlake monekiyaya kichiuasej tlaj kinekiyayaj momanauisej, Jehová kiiljuijtoya ni: “[Moneki] tikalakis ipan kuakanaua” (Gén. 6:13, 17, 18).

 8. ¿Tlake kiijtok Santiago tlen nopa tlaneltokili?

⁸ Santiago nojkia kiijkuilok tlake kiijtosneki se tlaneltokas. Uelis kiijkuilok teipa kema Pablo kiijkuilojtoya Hebreos. Santiago kiijtok: “¿Kejatsa ueli tinechnextilis motlaneltokilis uan axtijchiua tlamantli tlen kuali? [...] Na, kena, uelis nimitsnextilis nijneltoka toTeko, pampa uelis nimitsnextilis nopa kuali tlamantli tlen nijchijtiuala” (Sant. 2:18). Kiijtok tlaj tijnekij kuali titlaneltokasej, moneki tijchiuasej sekinok tlamantli. Maske amo kuali ajakamej nojkia kimatij toTeotsij itstok, inijuantij amo tlaneltokaj ipan ya uan tlauel kikualankaitaj (Sant. 2:19, 20). Se akajya katli tlaneltoka moneki kiyolpakiltis toTeotsij ika tlen kichiua. Ya nopa kichijki Abraham. Santiago kiijkuilok: “¿Axinkiilnamikij para touejkapantata Abraham mochijki xitlauak iixpa toTeko pampa kichijki tlen toTeko kiiljuik? Yajaya kineltokak hasta kimakatoskia ikone, Isaac, keja se tlakajkaualistli ipan tlaixpamitl keja toTeko kinauatijtoya. Uajka Abraham kinextik para motemachiyaya ipan toTeko [...] pampa kichiuayaya tlen toTeko kiiljuik uan uajka kinextik para nelia asitok itlaneltokilis”. Teipa, Santiago kiijtok san tlapik titlaneltokaj tlaj amo tijnextiaj ika tlen tijchiuaj. Kiijtok: “Inkimatij intla se tlakatl axkipia itonal ipan itlakayo, uajka ya miktok. Uan se tlakatl tlen kiijtoua kineltoka toTeko, pero axkichiua tlamantli tlen kuali, ya miktok itlaneltokilis” (Sant. 2:21-23, 26).

9, 10. ¿Tlake moneki tijchiuasej tlaj tijnekij titlaneltokasej ipan Jesús?

⁹ Kema Santiago kiijkuilok ni uan panok 30 xiuitl, apóstol Juan kiijkuilok nopa evangelio uan nopa eyi amatlajkuiloli. Kej sekinok katli nojkia kiijkuilojkej Biblia, Juan kikuamachiliyaya tlake kiijtosneki se tlaneltokas. Ya miakpa kitekiuik se tlajtoli ika griego tlen motlajtolkuepa kej “kineltoka”.

¹⁰ Juan kiijtok: “Tlaj se tlakatl kineltoka iKone toTeko, yajaya kipia yolistli para nochipa. Pero tlaj se axkineltoka iKone toTeko, axkipias nopa yolistli uan temachtli toTeko kitlatsakuiltis” (Juan 3:36). Tlaj tijnekij titlaneltokasej ipan Jesús, moneki tijchiuasej tlen technauatia. Kema tijpouaj nochi tlen Juan kiijkuilok, tikitaj Jesús kiijtok tlaj tijnekij tiitstosej nochipa, moneki titlaneltokasej ipan ya uan ipan iTata (Juan 3:16; 6:29, 40; 11:25, 26; 14:1, 12).

11. ¿Tlake moneki tijchiuasej pampa Jehová techmachtijtok tlen melauak?

¹¹ Ika itonal, Jehová techpaleuik kuali ma tikixmatikaj ya uan iKone uan nojkia kuali ma tlaneltokakaj ipan inijuantij (xijpoua Lucas 10:21). ¿Kenijkatsa uelis tijnextisej tijtlaskamatiliaj? Pampa titlaneltokaj ipan Jesús, katli technextilia “kejatsa ma tijneltokakaj toTeko uan techpaleuia mojmostla achi más ma tijneltokakaj”, Jehová techkaua kuali ma timouikakaj iuaya, yeka moneki nochipa tikiljuisej tlauel tijtlaskamatiliaj (Heb. 12:2). Nojkia moneki nojua tijchiuasej kampeka kuali titlaneltokatiasej. ¿Kenijkatsa uelis tijchiuasej? Moneki nochipa timomaijtosej uan timomachtisej Biblia (Efes. 6:18; 1 Ped. 2:2).

12. ¿Tlake tijchiuasej tlaj kuali titlaneltokaj?

¹² Tlaj kuali titlaneltokaj ipan tlen Jehová techtenkauilijtok, uajka tijnextisej ika tlen tijchiuaj. Nojua tikinkamanaljuisej maseualmej tlen toTeotsij iTlanauatijkayo uan tikinpaleuisej ma mochiuakaj Cristo itokilijkauaj. Nojkia nojua tikinchiuilijtosej “tlen kuali nochi tlakamej” uan ‘achi más tikinchiuilisej tlen kuali toikniuaj ipan Cristo’ (Gál. 6:10). Uan nojua tijchijtosej kampeka amo tijchiuasej se tlenijki tlen amo kuali, pampa tijnekij nochipa kuali timouikasej iuaya Jehová (Col. 3:5, 8-10).

13. 1) ¿Kenke tlauel ipati titlaneltokasej ipan toTeotsij? 2) ¿Tlake kiijtoua Biblia tlen totlaneltokilis, uan kenke?

¹³ Biblia kiijtoua se akajya amo uelis kiyolpakiltis toTeotsij tlaj amo tlaneltoka, pampa “aki ueli tlen kineki monechkauis kampa toTeko, moneki kineltokas para toTeko itstok, uan para yajaya kintlaxtlauia tlakamej tlen nelia kitemouaj ika tlen kuali” (Heb. 11:6). Biblia nojkia kiijtoua nopa tlaneltokili eli se tlen nopa kuajkuali tlamantli katli achtoui moneki kipias se Cristo itokilijka, pampa totlaneltokilis techpaleuia kuali ma timouikakaj iuaya toTeotsij (Heb. 6:1, TNM). Uan amo san moneki titlaneltokasej, nojkia moneki tijnextisej sekinok kuajkuali tlamantli tlen techpaleuis nojua kuali ma timouikakaj iuaya Jehová (xijpoua 2 Pedro 1:5-7; Judas 20, 21).

14, 15. ¿Kenke tlaiknelili tlauel ipati uan totlaneltokilis amo tlauel?

¹⁴ Katli kiijkuilojkej Biblia tlauel miakpa kiijtojkej nopa tlajtoli totlaneltokilis, uan amo tlauel kiijtojkej sekinok kuajkuali tlamantli. ¿Kiijtosneki san totlaneltokilis nelia tlauel ipati uan sekinok kuajkuali tlamantli amo tlauel ipati?

¹⁵ Kema Pablo kiijtok tlen totlaneltokilis, nojkia kiijtok tlen tlaiknelili. Ya kiijtok: “Yonke nijpiaskia miak tlaneltokili hasta niueliskia nikiljuiskia se tepetl ma moijkuini uan nelia moijkuiniskia, intla axniteiknelia, axtleno nopati” (1 Cor. 13:2). Uan Jesús kiijtok tikiknelisej Jehová ya nopa “tlen más ueyi [tlanauatili] uan tlen más moneki tijchiuasej” (Mat. 22:35-40). Nopa tlaiknelili techpaleuia ma tijnextikaj sekinok kuajkuali tlamantli tlen toTeotsij kipaktia. Biblia kiijtoua se tlen teiknelia “motemachia [o kineltoka] para asis tlen kuali”. Uajka nopa tlaiknelili techpaleuia ma timotemachikaj o ma tijneltokakaj nochi tlen toTeotsij techiljuia ipan Biblia (1 Cor. 13:4, 7).

16, 17. 1) ¿Tlake kiijtoua Biblia tlen totlaneltokilis uan tlaiknelili? 2) ¿Kenke san tlaiknelili tlauel ipati?

¹⁶ Biblia kinextia totlaneltokilis uan tlaiknelili tlauel ipati, yeka katli kiijkuilojkej Biblia miakpa kiijtojkej ni ome kuajkuali tlamantli: kema kiijtouayayaj se, nojkia kiijtouayayaj nopa seyok. Ma tikitakaj kema nesi sansejko. Pablo kiniljuik toikniuaj: “Ma tijneltokakaj toTeko ika nochi toyolo. Ma titeiknelikaj” (1 Tes. 5:8). Apóstol Pedro kiijtok ni tlen Jesús: “Inkiikneliaj Jesucristo yonke axkema inkiitstokej. Uan inkineltokaj yonke axueli inkiitaj ama” (1 Ped. 1:8). Santiago kiniljuik toikniuaj katli kintlapejpenijtoyaj: “ToTeko kintlapejpenijtok yajuantij tlen teikneltsitsij para achi más nimantsi kineltokasej. Uan yajuantij kiselisej ininparte nepa kampa toTeko tlanauatia, pampa keja nopa yajaya techtenkauilijtok nochi tojuantij tlen tikikneliaj” (Sant. 2:5). Uan Juan kiijtok toTeotsij technauatia “ma tijneltokakaj itoka iKone, Jesucristo, uan [...] ma timoiknelikaj se ika seyok” (1 Juan 3:23).

¹⁷ Uan Pablo nojkia kiijkuilok: “Onka eyi tlamantli tlen uejkauas. Moneki tijpiasej tlaneltokili. Moneki timotemachisej para panos nochi tlen toTeko kiijtok panos, uan moneki titeiknelisej, pero nopa tlen más ueyi ipati ika ni eyi tlamantli eltok ya ni, moneki titeiknelisej” (1 Cor. 13:13). ¿Kenke san nopa tlaiknelili tlauel ipati uan nopa sekinok ome amo tlauel? Pampa kema tiitstosej ipan Xochimili ayokmo monekis tijnextisej titlaneltokaj ipan tlen toTeotsij techtenkauilijtok, pampa ya mochijtos nochi tlen toTeotsij kiijtok kichiuas. Uan tlaiknelili nojua tijnextisej, pampa nojua monekis tikiknelisej toTeotsij uan tikiniknelisej maseualmej. Kej panotias tonali, nojua tlauel tikiniknelijtiasej uan amo kema tlamis.

18, 19. ¿Tlake panotok pampa toTeotsij itekipanojkauaj tlaneltokaj, uan ajkia kinamiki tijueyichiuasej?

¹⁸ Jehová itekipanojkauaj kikauaj toTeotsij itonal ma kinyakana ipan ininnemilis. Yeka motemachiaj ipan toTeotsij iTlanauatijkayo uan kipaleuiaj, uan nojkia nochi moikneliaj (Gál. 5:22, 23). ¿Tlake panotok pampa kiampa kichiuaj? Nochi toikniuaj, kipano ocho millones, itstokej ika tlaseuilistli ipan tlanechikoli uan nochi kuali mouikaj. Ni kinextia totlaneltokilis uan tlaiknelili nelia tlauel ipati uan tepaleuia.

¹⁹ Nochi kuali timouikaj pampa Jehová techpaleuijtok. Yeka kinamiki tlauel ma tijueyichiuakaj (Is. 55:13). Tlauel tijtlaskamatiliaj Jehová pampa techkaua ma timomakixtikaj ika “nopa tlaneltokili” (Efes. 2:8). Jehová nojua kinpaleuijtos miakej maseualmej ma tlaneltokakaj ipan ya. Uan se tonali, ipan nochi Tlaltipaktli itstosej maseualmej katli ayokmo elisej tlajtlakolejkej, nochi elisej xitlauakej uan itstosej ika pakilistli uan sentik kiueyichiuasej Jehová.