¿Ajkia nopa “tlalnamijkatlatekipanojketl tlen nelia temachtli”?

Kema nechka kimiktiskiaj Jesús kinkamanaljuik nauij apóstoles: Pedro, Santiago, Juan uan Andrés. Kema kiijtok tlake panoskia ipan itlamia tonali kiniljuik tlen tlauel ipati: “Ximoiljuikaj katlia itlatekipanojka se tekojtli kitekimakas para kinyakanas nochi sekinok ipan ichaj uan para kintlamakas kema asis hora. [...] Kitekimakas se tlalnamijkatlatekipanojketl tlen nelia temachtli” (Mateo 24:3, 45; Marcos 13:3, 4). Kej ni, Jesús kinextik yaya eliyaya nopa “tekojtli” katli kintlaliskia se keskij tlakamej ma kinmachtikaj Jesús itokilijkauaj, kiampa kejuak kintlamakaskiaj ipan itlamia tonali. Inijuantij eliskiaj nopa “tlalnamijkatlatekipanojketl tlen nelia temachtli”. ¿Ajkia inijuantij kichiuaj ni tekitl?

Se keskij Jesús itokilijkauaj katli toTeotsij kintlapejpenijtok ika itonal. Nopa “tlalnamijkatlatekipanojketl”, tijmatij eliskiaj se keskij toikniuaj tlapejpenilmej Katli kinyakanaj Jehová itlajtoltemakauaj. Inijuantij kinmachtiaj katli nojkia kiueyichiuaj Jehová kema kinamiki. Yeka tojuantij nochipa tijchiaj ‘mojmostla ma techtlamakakaj’ o ma techmachtikaj (Lucas 12:42).

Kiyakanaj tlen toTeotsij iaxka (1 Timoteo 3:15). Jesús kitekimakak nopa “tlalnamijkatlatekipanojketl tlen nelia temachtli” ma kimokuitlaui tlen Jehová iaxka ipan Tlaltipaktli, inoj kiijtosneki moneki kimokuitlauisej nochi tlen tlapijpiaj, kiyakanasej tlajtolmoyaualistli uan kichiuasej tlamachtili tlen ika techmachtisej ipan tlanechikoli. Yeka pampa kinekij techmachtisej tlen moneki kema kinamiki, inijuantij techmachtiaj toTeotsij iTlajtol ika amatlajkuiloli tlen tijtekiuiaj kema titlajtolmoyauaj uan nojkia ika tlamachtili tlen kipanoltiaj ipan tlanechikoli uan ipan uejueyi tlanechikolistli.

Nopa “tlalnamijkatlatekipanojketl” temachtli pampa nelia kichiua tlen kiijtoua Biblia uan kimoyaua tlen toTeotsij tlamachtia, uan tlalnamiki pampa kuali kimokuitlauia ipan Tlaltipaktli tlen Cristo kinauatijtok (Hechos 10:42). Jehová kinteochijtok pampa momiakilijtiauij Jehová itlajtoltemakauaj uan pampa kipiaj miak tlamachtili tlen toTeotsij iTlajtol (Isaías 60:22; 65:13).

• ¿Ajkia kintlalik Jesús ma kinmachti itokilijkauaj ika toTeotsij iTlajtol?

• ¿Kenke uelis tikijtosej nopa “tlalnamijkatlatekipanojketl” temachtli uan tlalnamiki?