¿Tijmajtoya?

MASKE ipan nopa Tlanauatili tlen kimakakej Moisés kiijtouayaya kena ueliskiaj kitenkauasej se tlenijki iixpa Jehová, kema Jesús itstoya, miakej judíos nochipa tlatestigojketsayayaj kema kitenkauayayaj se tlamantli. Kiampa kinekiyayaj kinextisej nelnelia tlen kiijtouayayaj. Jesús ompa kiijtok san tlapik tlen inijuantij momajtoyaj kichiuaj, kiijtok: “Xikijtokaj xitlauak ‘kena, nijchiuas’ o ‘axnijchiuas’” (Mat. 5:33-37; 23:16-22).

Se diccionario teológico kiijtoua ipan se keski tlapoualistli tlen nopa Talmud kinextia kenijkatsa judíos nochipa tlatestigojketsayayaj kema kitenkauayayaj se tlamantli. Nopa Talmud kuali kiixtoma tlake tlamantli tlen kitenkajtoyaj monekiyaya kena kichiuasej uan tlake amo.

Amo san Jesús kiijtok amo kuali tlen inijuantij momajtoyaj kichiuaj. Josefo, se historiador judío, kiijtok tlen kichiuayayaj ipan se religión judía: “Amo kinekij tlatestigojketsasej pampa moiljuiaj eli se ueyi tlajtlakoli uan amo kej titeistlakauis. Inijuantij kiijtouaj tlaj se akajya moneki tlatestigojketsas iixpa toTeotsij pampa kineki ma kineltokakaj, iselti motlatsakuiltia”. Se pilamochtsi tlen amo eli tlen toTeotsij iTlajtol, tlen kitokaxtiaj Eclesiástico o Sabiduría de Jesús Ben Sirá, nojkia kiijtoua: “Se tlakatl katli nochipa tlatestigojketsa, kichiua miak tlamantli tlen amo kuali” (23:11). Uajka, Jesús kiijtok amo kinamiki tlatestigojketsasej san ika tlen ueli tlamantli. Tlaj nochipa tikijtouaj tlen melauak, sekinok techneltokasej uan amo monekis titlatestigojketsasej.