“Xiakaj, uan xijchiuakaj ma elikaj notokilijkauaj maseualmej tlen nochi altepemej”

1, 2. ¿Tlake timotlajtlaniaj kema tijpouaj Mateo 24:14?

JESÚS kiijtok ipan itlamia tonali nopa kuali tlamachtili momoyauaskia ipan nochi Tlaltipaktli (Mat. 24:14). Jehová itlajtoltemakauaj techixmatij ipan nochi Tlaltipaktli pampa titlajtolmoyauaj. Maske sekij maseualmej kinpaktia tlen tijmoyauaj uan sekij amo, miakej techtlepanitaj pampa titlajtolmoyauaj. ¿Kenke tijmatij san tojuantij tijchiuaj tlen Jesús tlanauatik? ¿Timoueyimatij pampa kiampa timoiljuiaj?

² Miakej katli tlamachtiaj ipan religiones kiijtouaj inijuantij kimoyauaj tlen Jesús tlamachtik. Maske kiampa kiijtouaj, inijuantij san tlamachtiaj ipan iglesia, ipan televisión o ipan Internet, nojkia kema tepouiliaj tlen kinpanok. Sekij moiljuiaj tlajtolmoyauaj san pampa kinpaleuiaj sekinok, kej kema kinpajtiaj o kinmachtiaj. ¿Nelia tlajtolmoyauaj katli kichiuaj nochi ni tlamantli?

 3. Kej kiijtoua Mateo 28:19, 20, ¿tlake moneki kichiuasej Jesús itokilijkauaj?

³ Kema Jesús kinnauatik itokilijkauaj ma tlajtolmoyauakaj, ¿kinekiyaya san ma kinkamanaljuikaj katli monechkauiskiaj? Amo. Kema moyolkuik, kiniljuik miakej itokilijkauaj: “Xiakaj, uan xijchiuakaj ma elikaj notokilijkauaj maseualmej tlen nochi altepemej, xikinatsonpoliuiltikaj [...], xikinmachtikaj ma kineltokakaj nochi tlen niinmechnauatijtok” (Mat. 28:19, 20, TNM). Uajka moneki tijchiuasej naui tlamantli. Moneki tikinpaleuisej ma elikaj Jesús itokilijkauaj, tikinpaleuisej ma moatsonpoliuiltikaj uan tikinmachtisej. Maske moneki tijchiuasej ni eyi tlamantli, achtoui moneki ‘tiasej’ tikintemotij maseualmej. Se tlakatl tlen tlauel kiixmati Biblia kiijtok: “Nopa tlanauatili ‘xiakaj’ kinamiki kineltokasej nochi Cristo itokilijkauaj, maske monekis tlauel nejnemisej o kiixkotonasej ueyi atl” (Mat. 10:7; Luc. 10:3).

 4. ¿Tlake kinejki kiijtos Jesús kema kiniljuik itokilijkauaj kejuak ‘tlajtlamaskiaj’?

⁴ Kema Jesús kinnauatik itokilijkauaj ma tlajtolmoyauakaj, ¿kiijtok sesentsitsij tlajtolmoyauaskiaj? ¿O kiijtok miakej mosentikapaleuiskiaj? Setsi maseuali amo ueliskia yas ipan “nochi altepemej”, moneki miakej ma mosentikapaleuikaj. Ya nopa kinekiyaya kiijtos Jesús kema kiniljuik se keskij itokilijkauaj kejuak ‘tlajtlamaskiaj’ uan kinitskiskiaj maseualmej (xijpoua Mateo 4:18-22). Kema Jesús kiijtok ‘tlajtlamaskiaj’ amo moiljuijtoya ipan se tlakatl tlen iselti michtlajtlama, katli san kichixtok se michi iselti ma masi. Ya kiijtok moneki michtlajtlamaskiaj ika se matlatl, kampa miakej maseualmej mopaleuiskiaj (Luc. 5:1-11).

 5. ¿Tlake naui tlajtlanili moneki tijnankilisej, uan kenke techpaleuis?

⁵ Tlaj tijnekij tijmatisej ajkia inijuantij kimoyauaj nopa kuali tlamachtili tlen Jesús kiijtok momoyauaskia ipan ni tonali, moneki tijnankilisej ni naui tlajtlanili:

• ¿Tlake tlamachtili kimoyauaj?

• ¿Kenke tlajtolmoyauaj?

• ¿Kenijkatsa tlajtolmoyauaj?

• ¿Kanke tlajtolmoyauaj, uan kema tlamis tlajtolmoyauasej?

Ni tlajtlanili techpaleuis ma tijmatikaj ajkia inijuantij kichiuaj tlen Jesús kiijtok uan kiampa kinpaleuisej maseualmej ma momanauikaj. Nojkia techpaleuis ma timosentlalikaj nojua titlajtolmoyauasej (1 Tim. 4:16).

 6. ¿Kenke tikijtouaj san Jehová itlajtoltemakauaj kimoyauaj tlen Jesús tlanauatik?

⁶ (Xijpoua Lucas 4:43a). Jesús kimoyajki “nopa kuali tlajtoli tlen toTeotsij iTlanauatijkayo”, uan kineki itokilijkauaj nojkia ma kimoyauakaj tlen ya kimoyajki. ¿Ajkia inijuantij kimoyauaj nopa kuali tlamachtili tlen toTeotsij iTlanauatijkayo “ipan nochi tlaltinij”? Nochi tijmatij san Jehová itlajtoltemakauaj kichiuaj. Uan sekij katli techkualankaitaj, kimatij tojuantij tijmoyauaj tlen toTeotsij iTlanauatijkayo kichiuas. Se tonali, se sacerdote katli yajtoya ipan miak altepemej kiiljuik se toikni: “Ipan sejse altepetl kampa nikinpantiyaya Jehová itlajtoltemakauaj, nikintlajtlaniyaya: ¿Tlake tlamachtili inkimoyauaj?, nochi tlauel uiuitikej pampa nochi nechnankilijkej: ‘Tijmoyauaj nopa kuali tlamachtili tlen toTeotsij iTlanauatijkayo’”. Tlen kiijtok nopa sacerdote kinextia Jehová itlajtoltemakauaj amo “uiuitikej”, kimoyauaj sanse tlamachtili pampa mosentikapaleuiaj kej kinamiki kichiuasej katli nelia Cristo itokilijkauaj (1 Cor. 1:10). Tlen tijmoyauaj nojkia kiijtoua ipan pilamochtsi Tlen Tematiltia tlen Jehová iTlanauatijkayo. Sejse pilamochtsi kichijchiuaj se 59 millones ipan 254 tlajtoli. Ipan nochi Tlaltipaktli amo onka seyok amochtli tlen tlauel momoyaua kej pilamochtsi Tlen Tematiltia.

 7. ¿Kenke tikijtouaj katli tlamachtiaj ipan religiones amo kimoyauaj tlen Jesús tlanauatik?

⁷ Katli tlamachtiaj ipan religiones kampa kiijtouaj kineltokaj Cristo, amo kimoyauaj nopa kuali tlamachtili tlen toTeotsij iTlanauatijkayo. Inijuantij tlamachtiaj toTeotsij iTlanauatijkayo eli san se tlamantli tlen Cristo itokilijkauaj kipixtokej ipan ininyolo, amo kiniljuiaj toTeotsij iTlanauatijkayo tekichiuas ne iluikak uan Jesús kitlapejpenijtokej ma tekichiua. Nojkia amo kiniljuiaj san toTeotsij iTlanauatijkayo kitlamiltis nochi tlen amo kuali uan kichiuas ayokmo ma titlaijiyouikaj (Apoc. [Rev.] 19:11-21). Inijuantij san kiilnamikij Jesús kema iljuichiuaj ipan Navidad uan ipan Semana Santa. Amo kimatij tlen Jesús kichiuas kema tlanauatis ipan Tlaltipaktli, uan amo kikuamachiliaj nopa kuali tlamachtili tlen Jesús kimoyajki, yeka amo kimatij kenke tlauel ipati tlajtolmoyauasej.

 8. ¿Tlake kiijtok Jesús amo kinamiki tijchiuasej kema titlajtolmoyauasej?

⁸ Katli tijtokiliaj Cristo amo titlajtolmoyauaj san pampa tijnekij tijtlanisej tomij o pampa tijnekij tijchijchiuasej uejueyi kali. Jesús kiijtok: “San tlapik niinmechmaka ni chikaualistli, uajka axkema xitlainamakaj kema intepaleuisej” (Mat. 10:8). ToTeotsij iTlajtol amo kinamiki tijtekiuisej pampa tijnekij tijtlanisej tomij (2 Cor. 2:17). Yeka, Cristo itokilijkauaj amo kinamiki tlainamasej kema tlajtolmoyauasej (xijpoua Hechos 20:33-35). Maske Jesús kiijtok amo kinamikiyaya titlainamasej, ipan miak religiones san kinekij kisentilisej tomij uan san moiljuijtokej kikualchijchiuasej iglesia kampa itstokej. Nojkia, ika nopa tomij kintlaxtlauiaj katli tlamachtiaj uan katli kinpaleuiaj. Yeka, miakej katli tlayakanaj ipan religiones, tlauel kipixtokej miak tomij (Apoc. 17:4, 5).

 9. ¿Kenke tlajtolmoyauaj Jehová itlajtoltemakauaj?

⁹ ¿Tlajtlanij tomij Jehová itlajtoltemakauaj? Amo, nochi moixtlaua ika tomij tlen temakaj ika nochi ininyolo. Yeka, ipan kali kampa mosentiliaj amo tlajtlanij tomij yon kema mochiua ueyi tlanechikolistli (2 Cor. 9:7). Ipan xiuitl tlen panok, Jehová itlajtoltemakauaj tlajtolmoyajkej nechka 2 millones tlen horas uan sejse metstli kinmachtijkej ika Biblia kipano 9 millones maseualmej, uan amo aka kitlaxtlauijkej. Ika nochi ininyolo kitekiuijkej inintomij kema tlajtolmoyajkej. Se tlakatl kiijtok tlen Jehová itlajtoltemakauaj: “Inijuantij kinekij tlajtolmoyauasej uan kinmachtisej maseualmej, [...] uan amo itstokej se keskij tlakamej katli moneki kintlaxtlauisej pampa kinyakanaj, kiampa kuali kitekiuiaj tomij”. Uajka, ¿kenke titlajtolmoyauaj? Pampa tlauel tikikneliaj Jehová uan tikinikneliaj maseualmej. Kiampa tijchiuaj tlen kiijtoua Salmo 110:3 (xijpoua).

10. ¿Kenijkatsa tlajtolmoyauayaya Jesús uan itokilijkauaj?

¹⁰ Jesús uan itokilijkauaj tlajtolmoyajkej kampa kinpantiskiaj maseualmej: ipan ojtli, ipan tiankis uan kajkalpa (Mat. 10:11; Luc. 8:1; Hech. 5:42; 20:20). Mosentikapaleuiyayaj kema tlajtolmoyauayayaj kajkalpa, kiampa kinnojnotsayayaj miakej maseualmej.

11, 12. ¿Kenke Jehová itlajtoltemakauaj amo tlajtolmoyauaj sanse kej ipan sekinok religiones?

¹¹ Ipan religiones katli kiijtouaj kineltokaj Jesús, ¿tlajtolmoyauaj kej ya kichijki? Katli tlayakanaj, kintlaxtlauiaj kema kinmachtiaj katli nopaya mosentiliaj. Inijuantij amo yauij kintemouaj katli kinmachtisej, san kinmachtiaj katli ipa mosentiliaj ininuaya. Kemantika kiniljuiaj katli nopaya mosentiliaj ma tlajtolmoyauakaj. Ipan xiuitl 2001, nopa papa Juan Pablo II kintitlanilik católicos se amatlajkuiloli, uan nopaya kiniljuik monekiyaya kimoyauasej nopa kuali tlamachtili kej kichijki apóstol Pablo, katli nochipa kichiuayaya kampeka tlajtolmoyauas pampa kimatiyaya kinamikiyaya kichiuas nopa. Nojkia kiniljuik moneki nochi tlajtolmoyauasej uan amo san se keskij. Maske kiampa kiniljuik, san se keskij pejkej tlajtolmoyauaj.

¹² Jehová itlajtoltemakauaj amo kichiuaj kej katli itstokej ipan sekinok religiones, pampa san inijuantij kimoyauaj Jesús pejki tlanauatia ipan 1914. Kichiuaj tlen Jesús tlanauatik, yeka tlauel tlajtolmoyauaj pampa kimatij ya nopa achtoui moneki kichiuasej (Mar. 13:10). Ipan se amochtli kiijkuilojkej Jehová itlajtoltemakauaj tlauel kipatiitaj tlajtolmoyauasej. Nojkia kiijkuilojkej maske kena kinpaleuiaj katli itstokej ininselti, katli amo tleno kipiaj uan katli mokokouaj, inijuantij nochipa kinekij kinmachtisej toTeotsij nechka kitsontlamiltis nochi tlen amo kuali uan kinmachtiaj kenijkatsa momakixtisej (Pillars of Faith—American Congregations and Their Partners). Jehová itlajtoltemakauaj tlajtolmoyauaj sanse kej Jesús uan itokilijkauaj kichijkej.

13. ¿Kanke tlajtolmoyauaskiaj Jesús itokilijkauaj?

¹³ Jesús kiijtok itokilijkauaj kimoyauaskiaj nopa kuali tlamachtili ipan nochi Tlaltipaktli. Uan itokilijkauaj eliskiaj tlen nochi altepemej (Mat. 24:14; 28:19, 20, TNM). Ni kiijtosneki moneki titlajtolmoyauasej ipan nochi Tlaltipaktli.

14, 15. ¿Kenke tikijtouaj san Jehová itlajtoltemakauaj tlajtolmoyauaj ipan nochi Tlaltipaktli? (Xikita nopa achtoui tlaixkopinkayotl).

¹⁴ San Jehová itlajtoltemakauaj tlajtolmoyauaj ipan nochi Tlaltipaktli kej Jesús kiijtok. ¿Kenijkatsa tijmatij ni? Ipan altepetl Estados Unidos itstokej 1,200,000 Jehová itlajtoltemakauaj, uan ipan sekinok religiones san itstokej 600,000 katli tlamachtiaj. Ipan nochi Tlaltipaktli, ipan nopa Iglesia Católica Romana san itstokej 400,000 katli tlamachtiaj, uan Jehová itlajtoltemakauaj tielij kipano 8 millones katli titlajtolmoyauaj ipan 240 uejueyi altepemej. Nochi tlen tijchiuaj kiueyichiua Jehová (Sal. 34:1; 51:15).

¹⁵ Jehová itlajtoltemakauaj tijnekij tikiniljuisej nochi maseualmej nopa kuali tlamachtili, pampa toTeotsij nechka kintsontlamiltis katli amo kualmej. Yeka titlajtolkuepaj uan tijchijchiuaj miak amatlajkuiloli ipan kipano 700 tlajtoli. Amo aka kichiua tlen tojuantij tijchiuaj. Tikinmakatokej maseualmej miak amochtli, pilamochtsitsij uan pilamatsitsij, uan nojkia miak amatl tlen ika tikintlaneuij ma yakaj ipan ueyi tlanechikolistli o kema moilnamiki Cristo imikilis, nochi ni amatlajkuiloli amo tijnamakaj. Nopa Traducción del Nuevo Mundo de las Santas Escrituras titlajtolkueptokej ipan 130 tlajtoli, uan tijchijchijtokej kipano 200 millones. Ipan nopa xiuitl tlen panok, tijchijchijkej 4,500 millones tlen amatlajkuiloli. Nojkia eltok tlamachtili ipan jw.org ipan kipano 750 tlajtoli. San tojuantij tijchiuaj ni tlamantli.

16. ¿Kenijkatsa tijmatij toTeotsij kinpaleuia Jehová itlajtoltemakauaj ika itonal?

¹⁶ ¿Kema tlamis titlajtolmoyauasej? Jesús kiijtok tijmoyauaskiaj nopa kuali tlamachtili ipan itlamia tonali uan teipa ‘ualaskia itlamia nochi’ tlen amo kuali. Maske tlauel ouij tiitstokej, san Jehová itlajtoltemakauaj titlajtolmoyauaj pampa Jehová techpaleuia ika itonal (Hech. 1:8; 1 Ped. 4:14). Kema titlajtolmoyauaj, sekij maseualmej kiijtouaj: “Tojuantij tijpiaj toTeotsij itonal”. Katli kiampa kiijtouaj, ¿nelia tlajtolmoyauaj ipan ni tonali kej kichiuaj Jehová itlajtoltemakauaj? Maske miakej kichijtokej kampeka tlajtolmoyauasej, teipa ayokmo tlajtolmoyauaj. Sekij kinekij tlajtolmoyauasej san se keski tonali. Uan sekinok, kema yauij tlajtolmoyauaj amo kiniljuiaj maseualmej tlen toTeotsij iTlanauatijkayo. Uajka, maske yauij kajkalpa, amo kichiuaj kej Jesús.

17, 18. 1) ¿Kenke tijmatij Jehová itlajtoltemakauaj nelia kimoyauaj nopa kuali tlamachtili tlen toTeotsij iTlanauatijkayo? 2) ¿Kenke ueli titlajtolmoyauaj ipan nochi Tlaltipaktli?

¹⁷ ¿Ajkia inijuantij nelia kimoyauaj nopa kuali tlamachtili? ¡San Jehová itlajtoltemakauaj! ¿Kenke tikijtouaj ni? Pampa tijmoyauaj nopa kuali tlamachtili tlen toTeotsij iTlanauatijkayo. Titlajtolmoyauaj kej kinamiki, uan tiauij tikintemouaj maseualmej. Uan tijchiuaj pampa titeikneliaj, uan amo pampa tijnekij tijtlanisej tomij. Nojkia pampa titlajtolmoyauaj ipan nochi Tlaltipaktli. Uan tlaj toTeotsij ayamo kitsontlamiltis tlen amo kuali, tojuantij nojua titlajtolmoyajtosej.

¹⁸ Tlauel kuali tlen Jehová itlajtoltemakauaj kichiuaj ipan ni itlamia tonali. ¿Kenke ueli titlajtolmoyauaj ipan nochi Tlaltipaktli? Pablo kiijtok: “ToTeko tlen tekiti ipan inmoyolo uan inmechchiua xijnekikaj xijchiuakaj ipakilis, uan yajaya inmechmakas chikaualistli para inkichiuasej” (Filip. 2:13). Tijtlajtlaniaj Jehová nojua ma techpaleuijto titlajtolmoyauasej (2 Tim. 4:5).