Tlen maseualmej kinekij kimatisej

Tlaj Jehová kiampa kichiuaskia, ¿kenijkatsa tijyolmatiskia? Ma tikitakaj se neskayotl. Se toikni ikone momiktik. Nopa toikni nelia tlauel moyolkokok. Pejki moiljuia tlaj Jehová kimajtoya tlen panoskia uan tlaj kimajtoya ya iuaya isiua ueliskiaj kiijiyouisej nopa tlaouijkayotl. Maske ipan ni tonali miakej tlauel titlaijiyouisej, ¿kinamiki timoiljuisej Jehová kitlapejpenia tlake tlaouijkayotl tijpiasej ipan tonemilis?

Tlaj kuali timomachtisej 1 Corintios 10:13, tikitasej Jehová amo kiita tlake uelis tikijiyouisej uan amo kitlapejpenia tlake tlaouijkayotl tikixnamikisej. ¿Kenke tikijtouaj ni? Ma tikitakaj naui tlamantli.

Se: Jehová kichijki maseualmej inijuantij ma kitlapejpenikaj tlake kichiuasej. Ya kineki toselti ma tijtlapejpenikaj tlake tijchiuasej ipan tonemilis uan tlake amo (Deut. 30:19, 20; Jos. 24:15). Tlaj tijtlapejpenisej tijchiuasej tlen Jehová kipaktia, uajka ya nochipa techyakanas (Prov. 16:9). Uan tlaj amo kuali tijtlapejpenisej tlen tijchiuasej, uajka titlaijiyouisej (Gál. 6:7). Tlaj Jehová kitlapejpeniskia tlake tlaouijkayotl tikixnamikisej, ¿ueliskia tikijtosej nelia toselti tijtlapejpeniaj tlen tijchiuasej?

Ome: Jehová amo techmanauia kema ipan “tlen ueli tlalochtli” techpano tlen amo kuali (Ecl. 9:11). Se maseuali uelis kipanos tlen tlauel amo kuali san pampa itstos kampa amo kinamiki uan kema amo kinamiki. Kema Jesús kiijtok 18 maseualmej mijkej pampa se uejkapantik kali uetski ininpani, kuali kinixtomilik toTeotsij amo kichijtoya ma mikikaj nopa maseualmej (Luc. 13:1-5). Uajka kema pano se tlamantli tlen amo kuali, amo kinamiki timoiljuisej toTeotsij kitlapejpenia ajkia momanauis uan ajkia mikis.

Eyi: sejse maseuali moneki kinextis tlaj amo kitlauelkauas Jehová. Satanás kiijtok tojuantij tijtekipanouaj Jehová san pampa techmaka miak tlamantli. Nojkia kiijtok tojuantij tijtlauelkauasej Jehová tlaj tijpiasej tlaouijkayotl (Job 1:9-11; 2:4; Apoc. [Rev.] 12:10). Tlaj Jehová amo kikauaskia ma tijpiakaj se keski tlaouijkayotl, uajka tlen Satanás kiijtok eliskia melauak.

Naui: Jehová amo kineki kiitas tlake techpanos teipa. Tlaj Jehová kinekiskia, ueliskia kiitas o kimatis tlake techpanos teipa (Is. 46:10). Maske kena ueliskia, Biblia kiijtoua Jehová amo kineki kimatis se keski tlamantli tlen panos teipa (Gén. 18:20, 21; 22:12). ¿Kenke kiampa kichiua? Pampa tlauel teiknelia uan kineki kitlepanitas tlen tojuantij tijtlapejpeniaj tijchiuasej (Deut. 32:4; 2 Cor. 3:17).

Uajka, ¿tlake kinejki kiijtos Pablo kema kiijtok Jehová amo kikauas ma tijpiakaj “se tlayejyekoli” tlen amo uelis tikijiyouisej? Pablo kinekiyaya kinextis kenijkatsa Jehová techpaleuia kema tijpiaj se tlaouijkayotl, uan amo tlen kichiua achtoui kema ayamo tijpiaj nopa tlaouijkayotl.a Tlaj timotemachiaj ipan Jehová, yaya techpaleuis ma tikijiyouikaj tlen ueli tlaouijkayotl (Sal. 55:22). Nama ma tikitakaj ome tlamantli tlen techpaleuis tijkuamachilisej kenke Pablo kiijtok toTeotsij amo kikauas ma tijpiakaj se tlayejyekoli tlen amo uelis tikijiyouisej.

Se: amo tijpiaj yon se kuesoli “tlen sekinok amo kinpanotok”. Pampa tiitstokej kampa Satanás tlanauatia, nochi tijpiasej kuesoli, uan uelis kemantika techpanos se ueyi tlaouijkayotl. Tlaj timotemachisej ipan Jehová, uelis tikijiyouisej nopa tlaouijkayotl uan amo kema tijtlauelkauasej Jehová (1 Ped. 5:8, 9). Kema Pablo kiijkuilok 1 Corintios 10:13, achtoui kiijtok ipan se keski versículos kenijkatsa israeleuanij kiixnamijkej miak tlaouijkayotl kema nemiyayaj kampa uaktok tlali (1 Cor. 10:6-11). Katli motemachijkej ipan Jehová kiijiyouijkej nochi. Uan katli amo motemachijkej ayokmo kineltokakej toTeotsij uan kitlauelkajkej.

Ome: “toTeotsij nelia temachtli”. ¿Tlake kiijtosneki ni? Tlaj timoyoliljuiaj kenijkatsa Jehová nochipa kinmokuitlauijtok itekipanojkauaj, tikitasej kenijkatsa ya amo kema tetlauelkaua uan nochipa kinpaleuia katli kiikneliaj uan kineltokaj itlanauatiljuaj (Deut. 7:9). Uan nojkia, Jehová nochipa kichiua tlen kiijtoua (Jos. 23:14). Uelis timotemachisej ipan ome tlamantli: 1) Jehová amo kema kikauas ma tijpiakaj se ueyi tlaouijkayotl tlen amo uelis tikijiyouisej, uan 2) techpaleuis ma tijmatikaj ‘kenijkatsa uelis tikijiyouisej’ se tlaouijkayotl.

¿Kenijkatsa techpaleuia Jehová tlaj timotemachiaj ipan ya? Maske uelis techkixtilis se tlaouijkayotl, moneki tikilnamikisej Pablo kiijtok Jehová “kinextis” kenijkatsa uelis tikijiyouisej. Kemantika Jehová techpaleuis kema techmakas chikaualistli, kiampa tikijiyouisej se tlaouijkayotl uan amo kema tijtlauelkauasej. Ma tikitakaj kenijkatsa techmaka nopa chikaualistli.

• Jehová “techyoltlalia ipan nochi nopa tlaouijkayotl katli techpanotiuala” (2 Cor. 1:3, 4, Icamanal Toteco). Ya uelis kichiuas ma tijpiakaj tlaseuilistli uan kuali ma tijyolmatikaj ika Biblia, ika itonal uan ika nopa tlalnamijkatlatekipanojketl (Mat. 24:45; Juan 14:16; Rom. 15:4).

• Jehová uelis techyakanas ika itonal (Juan 14:26). Itonal techpaleuis ma tikilnamikikaj tlen ijkuilijtok ipan Biblia, kej kampa kiijtoua tlake kichijkej itekipanojkauaj o tlake tetlajtolmaka se keski textos, kiampa uelis kuali tijtlapejpenisej tlen tijchiuasej.

• Jehová uelis techpaleuis ika iiluikaejkauaj (Heb. 1:14).

• Jehová uelis techpaleuis ika toikniuaj. Inijuantij uelis techyolchikauasej ika tlen kichiuasej uan ika tlen techiljuisej (Col. 4:11).

Uajka, ¿tlake techmachtia tlen Pablo kiijkuilok ipan 1 Corintios 10:13? Techmachtia Jehová amo kitlapejpenia tlake tlaouijkayotl tijpiasej. Uan nojkia techmachtia tlaj timotemachiaj ipan ya, uelis tikijiyouisej nochi tlaouijkayotl tlen tijpiasej. Temachtli tijmatij Jehová nochipa technextilis kenijkatsa uelis tikijiyouisej se tlaouijkayotl uan kiampa amo kema tijtlauelkauasej.