Ma tikinmachtikaj maseualmej kenijkatsa toTeotsij nelia tlauel ueyi iyolo

1, 2. ¿Kenijkatsa Pablo kinextik kitlaskamatiliyaya toTeotsij pampa kinextilijtoya ueyi iyolo?

APÓSTOL Pablo kiijtok: “Axsan tlapik toTeko kipixki ueyi iyolo noka na” (xijpoua 1 Corintios 15:9, 10). Pablo tlauel kintlatsakuiltijtoya Cristo itokilijkauaj, yeka kimajtoya amo kinamikiyaya toTeotsij ma kinextili ueyi iyolo o ma kitlasojtla.

² Kema nechka kimiktiskiaj, Pablo kiiljuik Timoteo: “Nijtlaskamati toueyiteko Jesucristo tlen nechyolitak para nitemachtli uan yeka nechmakak ni iteki uan nechfuerzajmakatok ma nijchiua” (1 Tim. 1:12-14). ¿Tlake tekitl kimakatoyaj? Pablo kiniljuik ni nopa ueuejtlakamej katli itstoyaj ipan Éfeso: “Axnimajmaui uan axkenijki yonke nechmiktisej. Axipati nonemilis tlaj axnijtlamiltis noteki ika pakilistli. Uan nopa tekitl tlen toueyiteko nechmakatok ma nijchiua eltok para nikiniljuis nochi tlakamej [toTeotsij] itlajtol uan para nelia ueyi iyolo toueyiteko ika nochi tojuantij” (Hech. 20:24).

 3. ¿Tlake tekitl kimakakej Pablo? (Xikita nopa achtoui tlaixkopinkayotl).

³ ¿Tlake kimoyajki Pablo? ¿Kenke tlen kimoyajki kinextik toTeotsij kipia ueyi iyolo? Pablo kiniljuik Cristo itokilijkauaj katli itstoyaj ipan Éfeso: “Uelis ya inkikaktokej kejatsa toTeko, pampa ueyi iyolo noka na, nechtekimakatok ma niinmechiljuis [...] iTlajtol” (Efes. 3:1, 2). Jesús kitekimakatoya Pablo ma kinkamanaljui nochi maseualmej katli amo eliyayaj judíos. Nopa kuali tlamachtili tlen kimoyajki kiijtouayaya katli amo eliyayaj judíos ueliskiaj tlanauatisej iuaya Mesías (xijpoua Efesios 3:5-8). Pablo tlajtolmoyajki ika miak pakilistli uan technextilik kenijkatsa kinamiki titlajtolmoyauasej ipan ni tonali. Kiampa kinextik “axsan tlapik toTeko kipixki ueyi iyolo” iuaya.

4, 5. ¿Kenke nopa kuali tlamachtili tlen toTeotsij iTlanauatijkayo sanse kej kema titematiltiaj toTeotsij ueyi iyolo?

⁴ Ipan ni tonali, Jehová technauatijtok ma tijmoyauakaj nopa kuali tlamachtili tlen toTeotsij iTlanauatijkayo. Uan moneki tijmoyauasej ipan “nochi tlaltinij ipan ni Tlaltipaktli para nochi [maseualmej] ma kimatikaj” (Mat. 24:14). Nopa kuali tlamachtili tlen toTeotsij iTlanauatijkayo sanse kej kema titematiltiaj toTeotsij ueyi iyolo. ¿Kenke kiampa tikijtouaj? Pampa nochi nopa tlateochiualistli tlen toTeotsij iTlanauatijkayo techmakas, tijselisej pampa Jehová ueyi iyolo (Efes. 1:3). Pablo kinextik kitlaskamatiliyaya toTeotsij pampa ueyi iyolo, uan yeka ika miak pakilistli tlauel tlajtolmoyajki. ¿Nojkia tijchiuaj kej Pablo? (Xijpoua Romanos 1:14-16).

⁵ Ipan nopa tlamachtili tlen panok tikitakej tlauel techpaleuia pampa toTeotsij ueyi iyolo maske titlajtlakolejkej. Uan nojkia tikitakej pampa ueyi iyolo, tijseliaj miak tlateochiualistli. Yeka, kinamiki tikiniljuisej sekinok kenijkatsa Jehová tlauel techiknelia uan tlake moneki kichiuasej tlaj kinekij toTeotsij ma kinikneli. ¿Kenijkatsa uelis tikinpaleuisej sekinok nojkia ma kinextikaj kitlaskamatiliaj toTeotsij pampa ueyi iyolo?

6, 7. ¿Kenke kema tikinixtomiliaj maseualmej kenijkatsa techpaleuia Jesús imikilis nojkia tijnextiaj kenijkatsa Jehová tlauel ueyi iyolo?

⁶ Ipan ni tonali, miakej maseualmej amo kenijki kiitaj tlaj tlajtlakolchiuaj. Yeka amo kikuamachiliaj kenijkatsa uelis kinmakixtis Jesús imikilis. Uan sekinok amo yolpakij maske monejnemiltiaj kej inijuantij kinekij. Kema kamanaltij iuaya se tlen Jehová itlajtoltemakauaj kikuamachiliaj tlake kiijtosneki tlajtlakoli, tlake kinpanos pampa tlajtlakolchiuaj uan tlake moneki kichiuasej tlaj ayokmo kinekij tlajtlakolchijtosej. Tlaj kuali ininyolo, kitlaskamatiliaj toTeotsij pampa kiualtitlanki iKone ma mikiki uan ma techmakixtiki tlen tlajtlakoli uan mikilistli. Nojkia, kimatij Jehová kiampa kichijki pampa tlauel techiknelia uan pampa nelia tlauel ueyi iyolo (1 Juan 4:9, 10).

⁷ Xikita tlake kiijtok Pablo tlen Jehová iKone: “Pampa tlauel ueyi iyolo toTeko touaya, tlaxtlajki tlen monejki para techtojtomas tlen totlajtlakoljuaj ika ieso iKone. Uan ama tijpiaj tlapojpoljuili tlen totlajtlakoljuaj” (Efes. 1:7). Jehová kinextik nelia tlauel techiknelia ika Jesús imikilis uan ika nopa technextilia kenijkatsa tlauel ueyi iyolo. Tijmatij tlaj timotemachisej ipan Jesús imikilis, toTeotsij techtlapojpoljuis uan ayokmo techyolkokojtos totlalnamikilis. ¡Nopa kichiua tlauel kuali ma tijyolmatikaj! (Heb. 9:14). ¡Nelia tlauel kinyolchikauas maseualmej tlaj tikiniljuisej ni kuali tlamantli!

 8. ¿Kenke maseualmej moneki kuali mouikasej iuaya toTeotsij?

⁸ Maseualmej katli amo tlaneltokaj ipan Jesús imikilis, toTeotsij kinita kej ikualankaitakauaj. Yeka moneki tikiniljuisej uelis mouampojchiuasej iuaya toTeotsij. Apóstol Juan kiijkuilok: “Tlaj se tlakatl kineltoka iKone toTeko, yajaya kipia yolistli para nochipa. Pero tlaj se axkineltoka iKone toTeko, axkipias nopa yolistli uan temachtli toTeko kitlatsakuiltis” (Juan 3:36). Tlauel techyolchikaua tijmatisej Cristo imikilis techpaleuia ma timoyoltlalikaj o kuali ma timouikakaj iuaya toTeotsij. Pablo kiijtok ni: “Uajka inmojuantij nojkia tlen achtouia inmouejkatlalijtoyaj tlen toTeko toTata, uan inkikokoliyayaj ipan inmotlalnamikilis uan inkichijtinemiyayaj tlen axkuali, ama Jesucristo inmechyoltlalijtok ika ya. Pampa Jesucristo mokuepki tlakatl uan mijki” (Col. 1:21, 22).

9, 10. 1) ¿Tlake tekitl kinmakak Cristo katli yasej iluikak? 2) ¿Kenijkatsa nopa “sekinok tlakamej” kinpaleuiaj toikniuaj katli kintlapejpenijtokej?

⁹ Cristo kintekimakatok katli yasej iluikak ma kinpaleuikaj maseualmej “ma moyoltlalikaj iuaya” toTeotsij. Pablo kiijtok: “Nochi ni yankuik nemilistli uala tlen toTeko Dios. Kena, toTeko Dios techualikak kampa ya iselti para ma timoyoltlalikaj iuaya ipampa tlen toueyiteko Cristo kichijki. Uan ama yajaya techtekimakatok para ma tikinualikakaj nochi tlakamej kampa ya para ma moyoltlalikaj iuaya. Kineki ma tikiniljuikaj tlakamej para yajaya toTeko Dios itstoya ipan Cristo uan tekitiyaya para ma moyoltlalikaj nochi tlakamej ipan Tlaltipaktli. Yajaya axkipouayaya sejse inintlajtlakoljuaj tlakamej. Uan ama techtekimakatok ma tikiniljuikaj nochi tlakamej ni kuali tlajtoli para kejatsa Cristo uelis kinyoltlalis ika toTeko Dios. Uajka tojuantij tiitlatitlaniljuaj Cristo, toTeko Dios techtekiuia para tiinmechnotsasej para xiakaj kampa ya. Yeka ika itekiuejkayo Cristo chikauak tiinmechtlajtlaniaj, ximoyoltlalikaj iuaya toTeko Dios tlen inmechiknelia miak” (2 Cor. 5:18-20).

¹⁰ Nopa “sekinok tlakamej” tlauel kipatiitaj kinpaleuisej toikniuaj katli yasej iluikak (Juan 10:16). Inijuantij kinpaleuiaj toikniuaj katli kintlapejpenijtokej kejuak eliskiaj Jesús itlatitlaniljuaj. Uan tlauel tlajtolmoyauaj uan kinnextiliaj maseualmej tlen Biblia tlamachtia. Nojkia kinpaleuiaj ma mouampojchiuakaj iuaya toTeotsij. Ni se tlen nopa tlamantli tlen tlauel ipati katli moneki tijmoyauasej, moneki tikinmatiltisej kenijkatsa toTeotsij tlauel ueyi iyolo.

11, 12. ¿Kenke tlauel kuali ma tikinmachtikaj maseualmej uelis momaijtosej uan kinojnotsasej toTeotsij?

¹¹ Miakej moiljuiaj toTeotsij amo kintlakakilia kema momaijtouaj, yeka san momaijtouaj pampa kiampa kuali kiyolmatij. Nopa maseualmej moneki kimatisej Jehová kena kintlakakilia. Se tonali, David kiiljuik Jehová: “Ta titechnankilia kema timomaijtouaj uan titechmaka tlen timitstlajtlaniaj, uajka nochi tlakamej ipan Tlaltipaktli ma ualakaj kampa ta. Yonke toyolo temitok ika tlajtlakoli, ta titechtlapojpoljuia nochi totlaixpanoljuaj” (Sal. 65:2, 3).

¹² Jesús kiniljuik itokilijkauaj: “Nochi tlen inkitlajtlanisej [noTata] ipan notoka, yajaya inmechmakas” (Juan 16:23). Ika ni tlajtoli Jesús kiijtok uelis titlajtlanisej Jehová tlen ueli tlamantli tlen ya kipaktia. Yeka Juan kiijkuilok: “Tijmatij temachtli intla tijtlajtlaniaj toTeko tlen kinamiki ika tlen yajaya kineki, yajaya techtlakakilia” (1 Juan 5:14). Tlauel techpaktia tikinmachtisej maseualmej amo kinamiki momaijtosej san pampa kiampa kuali kiyolmatij. Moneki kikuamachilisej kema momaijtouaj monechkauiaj “kampa moseuijtok” Jehová tlen nelia ueyi iyolo (Heb. 4:16). Moneki tikinmachtisej kenijkatsa momaijtosej uan tlake uelis tlajtlanisej. Kiampa tikinpaleuisej ma mouampojchiuakaj iuaya Jehová, uan ya uelis kinyolchikauas kema tlaijiyouisej (Sal. 4:1; 145:18).

13, 14. 1) ¿Kenijkatsa teipa Jehová tlauel kinteochiuas katli kintlapejpenijtok? 2) ¿Kenijkatsa katli kintlapejpenijtokej kinpaleuisej maseualmej?

¹³ Teipa Jehová nojua tlauel kinextis “kejatsa onpano ueyi iyolo”. ¿Kenijkatsa kinextis? Ya nelia tlauel kinteochiuas nopa 144,000 katli tlanauatisej iuaya Cristo. Pablo kiijtok kenijkatsa kinteochiuaskia kema kiijkuilok: “ToTeko tlen tlauel miak tetlasojtla, techiknelik kema tijchiuayayaj tlen axkuali pampa kipia ueyi iteiknelijkayo ika tojuantij. Uan kema noja timiktoyaj iixpa toTeko ipan totlajtlakoljuaj, toTeko techmakak yolistli yankuik sansejko ika Cristo. Kena, techmakixtik san pampa ueyi iyolo ika tojuantij. Uan toTeko techyolitik ika Cristo uan techseuik iuaya Cristo nepa iluikak. Uan amantsi toTeko techita keja para ya tiitstokej nepa iluikak pampa techtlatskiltik ipan Cristo Jesús. Techseuijtok ipan iluikak pampa kinejki kinextis para nochipa kejatsa onpano ueyi iyolo ika tojuantij ipampa tlen Cristo Jesús techchiuilijtok” (Efes. 2:4-7).

¹⁴ Amo uelis tijmatisej nochi nopa kuajkuali tlamantli tlen Jehová kinmakas katli kintlapejpenijtok kema tlanauatisej iuaya Cristo ne iluikak (Luc. 22:28-30; Filip. 3:20, 21; 1 Juan 3:2). Jehová kinextis ika nopa toikniuaj nelia tlauel “onpano ueyi iyolo”. Inijuantij elisej tlen nopa yankuik “altepetl Jerusalén” uan nopa “ichpokatl” katli iuaya mosenkauas Cristo (Apoc. [Rev.] 3:12; 17:14; 21:2, 9, 10). Sansejko tekitisej iuaya Jesús uan “kinfuerzajmakasej tlen ualajtoyaj ipan nochi tlaltinij”. Ni kiijtosneki kinpaleuisej maseualmej ma momakixtikaj tlen tlajtlakoli uan mikilistli, kiampa ayokmo elisej tlajtlakolejkej (xijpoua Apocalipsis 22:1, 2, 17).

15, 16. ¿Kenijkatsa Jehová kinextis nelia ueyi iyolo kema tiitstosej ipan Xochimili?

¹⁵ Efesios 2:7 kiijtoua kenijkatsa teipa toTeotsij kinextis tlauel ueyi iyolo. Ipan nopa tonali, kinextis “kejatsa onpano ueyi iyolo” ika nochi maseualmej tlen itstosej ipan Tlaltipaktli (Luc. 18:29, 30). Se tlamantli tlen ika kinextis nelia ueyi iyolo, elis kema kinyolkuis katli miktokej (Job 14:13-15; Juan 5:28, 29). ¿Ajkia inijuantij kinyolkuis? Kinyolkuis nochi itekipanojkauaj katli amo kema kitlauelkajkej, katli mijkej kema Jesús ayamo kimiktiyayaj. Nojkia kinyolkuis tlen nopa “sekinok tlakamej” katli miktiauij ipan itlamia tonali. Nochi inijuantij sampa itstosej uan nojua kitekipanosej Jehová.

¹⁶ ToTeotsij nojkia kinyolkuis tlauel miakej maseualmej katli amo kiixmatkej. Juan kiijkuilok: “Uan nikinitak nochi mijkatsitsij tlen uejueyij uan pilsiltsitsij moketstoyaj iixtla nopa ueyi silla. Uan kintlapok nochi amatlapouali. Uan kitlapok seyok amatlapouali[,] tlen kitlapok kipixki inintoka tlakamej tlen itstosej para nochipa. Uan toTeko kintlajtolsenkajki nochi nopa mijkatsitsij ika tlen ijkuilijtok ipan nopa sekinok amatlapouali pampa kipixkej nochi tlen kichijtoyaj. Uan itstoyaj nepa nochi mijkatsitsij tlen miktoyaj ipan tlali uan kintlalpachojkej uan nochi tlen mijkej ipan ueyi atl. [...] Uan toTeko kintlajtolsenkajki nochi keja nopa tlamantli tlen kichijtoyaj ipan Tlaltipaktli” (Apoc. 20:12, 13). Katli moyolkuisej uelis kiixmatisej Jehová uan kiitasej kej inintlanauatijka. Nojkia kimatisej moneki monejnemiltisej kej Biblia tlanauatia uan kej technauatisej ipan nopa tonali kema motlapos “nopa sekinok amatlapouali”. Ika nopa yankuik tlanauatili Jehová kinextis nelia ueyi iyolo.

17. ¿Tlake moneki tikilnamikisej kema titlajtolmoyauasej?

¹⁷ ToTeotsij nechka kitsontlamiltis nochi tlen amo kuali, yeka tlauel moneki ma tijmoyauakaj nopa kuali tlamachtili tlen toTeotsij iTlanauatijkayo (Mar. 13:10). Nochipa ma tikilnamiktokaj ni: titlajtolmoyauaj pampa tijnekij tijueyichiuasej Jehová. ¿Kenijkatsa tijueyichiuaj? Tijchiuaj kema tikiniljuiaj nochi maseualmej kenijkatsa toTeotsij tlauel ueyi iyolo, uan tlaj amo kinextiskia ueyi iyolo, uajka amo ueliskia tijselisej nochi nopa tlateochiualistli ipan Xochimili.

18, 19. ¿Kenijkatsa uelis tijueyichiuasej Jehová pampa nelia ueyi iyolo?

¹⁸ Kema titlajtolmoyauaj ueli tikinixtomiliaj maseualmej kenijkatsa tiitstosej kema Cristo tlanauatis ipan Tlaltipaktli. Ipan nopa tonali, pampa Jesús motemaktilik, nochi maseualmej ayokmo elisej tlajtlakolejkej. Biblia kiijtoua: “Nochi [...] inijuantij nojkia itstosej keja tojuantij tlen tiikoneuaj toTeko. Uan nochi tiitstosej timalakantokej tlen nopa tlatelchiuali, uan nochi elis tlauel yejyektsi” (Rom. 8:21). Ni uelis mochiuas pampa Jehová nelia tlauel ueyi iyolo.

¹⁹ Nochi tojuantij tijpiaj se ueyi tlateochiualistli, pampa ueli tikiniljuiaj maseualmej nopa yejyektsi tlajtoli tlen ijkuilijtok ipan Apocalipsis 21:4, 5: “ToTeko kinuachilis nochi ininixayo. Uan ayok kema aki mikis, niyon mokuesos, niyon chokas, niyon mokokos pampa ya panotos nochi ni tlamantli tlen achtouia eltoya ipan nopa achtoui Tlaltipaktli”. Uan Jehová, katli moseuijtok kampa tlanauatia, kiijtoua: “Xikita, na nijchijchiuas yankuik nochi tlen onka”. Uan nojkia kiijtoua: “Xikijkuilo ni pampa ni tlajtoli temachtli uan melauak”. ¡Ma tijmoyauakaj ika nochi toyolo uan ika miak pakilistli ni kuajkuali tlamantli tlen toTeotsij kichiuas, uan kiampa tijueyichiuasej Jehová, katli nelia tlauel ueyi iyolo!