Xijkauakaj ma inmechyakana Jehová

1, 2. 1) ¿Kenke 24,000 israeleuanij amo kalajkej ipan nopa tlali tlen kinmakaskiaj? 2) ¿Kenijkatsa techpaleuia tlen kinpanok israeleuanij?

KEMA israeleuanij nechka kalakiskiaj ipan nopa tlali tlen kinmakaskiaj, miakej tlakamej pejkej momekatiaj ininuaya siuamej katli euayaya Moab, yeka mijkej 24,000 israeleuanij. ¡Tlauel amo kuali tlen kinpanok! Maske miak xiuitl kichixtoyaj kalakisej ipan nopa tlali uan ya nechka kalakiskiaj, amo uelkej pampa amo kineltokakej Jehová uan momekatijkej ininuaya nopa siuamej (Números 25:1-5, 9).

² Ni moijkuilok pampa kiampa uelis techpaleuis (1 Corintios 10:6-11). Biblia kiijtoua tiitstokej ipan “itlamia tonali” uan ni ya nechka tlamis, yeka tijmatij nechka tiitstosej ipan Xochimili (2 Timoteo 3:1; 2 Pedro 3:13). Maske tijmatij ni, miakej Jehová itekipanojkauaj amo kineltokaj uan kiixpanoj pampa momekatiaj, yeka nama tlaijiyouijtokej. Tlaj amo moyolkuepasej, amo uelis itstosej ipan Xochimili.

 3. ¿Kenke moneki Jehová kinmokuitlauis katli mosenkajtokej? (Xikita nopa achtoui tlaixkopinkayotl.)

³ Jehová moneki kinmokuitlauis katli mosenkajtokej pampa maseualmej kinekij kichiuasej san ma kinekikaj motekasej ininuaya sekinok (xijpoua Salmo 127:1). Ipan ni tlamachtili tikitasej se keski tlamantli tlen kinpaleuis. Se tlakatl uan isiua moneki kimokuitlauisej tlen kinyoltilana, kuali mouampojchiuasej, monojnotsasej ika tlaiknelili uan ika tlatlepanitakayotl, moyolchikauasej uan tlaj kinekisej motekasej sansejko, kej nopa ma kichiuakaj.

 4. ¿Tlake kichijtok se keskij toikniuaj ma momekatikaj?

⁴ ¿Tlake kichijtok se keskij ma momekatikaj? Kemantika pano pampa kiitaj tlen amo kinamiki. Yeka Jesús kiijtok: “Intla se tlakatl kiita se siuatl uan ipan itlalnamikilis kineki tlen ueli kichiuas iuaya, ya momekatijki iuaya ipan iyolo” (Mateo 5:27, 28; 2 Pedro 2:14). Uan sekij toikniuaj kinpano ni pampa amo kineltokaj toTeotsij itlanauatiljuaj. Miakej kiitaj pornografía, pilamochtsitsij kampa nesij xolomej o kitlachiliaj ipan Internet, sekij kiitaj películas o sekinok tlamantli ipan televisión kampa nesi kenijkatsa momekatiaj. Uan sekij yauij kampa iljuichiuaj ika tlayoua, kampa tlakamej uan siuamej moxolouiaj kema mijtotiaj o yauij kampa kinijitskiaj.

 5. ¿Kenke moneki ma tijmokuitlauikaj toyolo?

⁵ Sekij momekatiaj pampa peuaj mouikaj ininuaya katli amo ininsiua o ininueue. Maseualmej kinpaktia kichiuasej tlen amo kinamiki uan amo kiijtouaj amo kichiuasej. Uan pampa nochi titlajtlakolejkej uan toyolo uelis techkajkayauas, tlaj amo timomokuitlauiskiaj, ueliskia peuas tikiknelisej se akajya katli amo timosenkajtokej iuaya (xijpoua Jeremías 17:9 uan 10). Jesús kiijtok: “Tlen axkuali kisa ipan ininyolo tlakamej. Kema se tlakatl temiktia, o momekatia, o siuanemi” (Mateo 15:19).

6, 7. 1) ¿Tlake ueliskia panos tlaj ipan toyolo tijnekiskiaj tijchiuasej tlen amo kuali? 2) ¿Tlake kinpaleuis amo ma momekatikaj katli mosenkajtokej?

⁶ Kema omej moixtokaj, ipan ininyolo uelis kinekisej kichiuasej tlen amo kuali. Uelis peuas moiljuisej tlen san ininueue o ininsiua kinamikiskia kiiljuisej. Uelis kitemolisej kenijkatsa mopantisej uan san tlachiuasej kampa ueli mopantisej. Ika yolik moiknelijtiasej, uan nochipa kinekisej itstosej sansejko, uan pampa tlauel moiknelisej, amo kinekisej motlauelkauasej. Yeka, maske kimatisej amo kuali tlen kichiuaj, amo kikauasej kichiuasej nopa (Proverbios 7:21, 22).

⁷ Kema kiilkauaj Jehová itlanauatiljuaj, nopa tlen kinyoltilana uan tlen moiljuiaj kema monojnotsaj, kichiuas ma momaitskikaj, motsoponikaj, monajnauakaj uan ma moijitskikaj. Uan nopa kinamiki kichiuasej san ininuaya katli mosenkajtokej. Tlen kinyoltilana kichiuasej eliskia kejuak se tlaketstli, pampa kema tlauel kinekisej kichiuasej tlen amo kuali, kichiuas ma momekatikaj (Santiago 1:14, 15). ¡Nelia tlauel amo kuali! Tlaj kikauaskiaj Jehová ma kinpaleui tlauel ma kitlepanitakaj ininsiua o ininueue, amo kichiuaskiaj nopa. Ma tikitakaj kenijkatsa uelis kichiuasej.

 8. ¿Kenijkatsa kinpaleuis katli mosenkajtokej tlaj mouampojchiuasej iuaya toTeotsij?

⁸ (Xijpoua Salmo 97:10.) Tlaj katli mosenkajtokej kuali mouampojchiuasej iuaya toTeotsij, kinpaleuis amo ma momekatikaj. ¿Kenke? Pampa kema kuali kiixmajtiauij Jehová uan nopa kuajkuali tlamantli tlen kinextia, kinekisej kichiuasej kej ya uan nojkia tlauel moiknelisej. Ni kinpaleuis amo ma kichiuakaj tlen kinyoltilana yon ma momekatikaj (Efesios 5:1-4). Inijuantij kimatij toTeotsij kintlatsakuiltis katli momekatiaj (Hebreos 13:4). Yeka, katli mosenkajtokej kichiuaj kampeka amo kema motlauelkauasej.

 9. 1) ¿Kenke José amo tlaixpanok? 2) ¿Tlake techmachtia tlen kichijki José?

⁹ Tlaj amo tijchiuasej nochi Jehová itlanauatiljuaj, uelis techpanoskia se tlenijki tlen kichiuaskia ma titlajtlakolchiuakaj. Sekij kinpano nopa pampa kema tlamij tekitij mokauaj miak tonali katli ininuaya tekitij. José kipanok nopa kampa tekitiyaya. Ya kiitak iteko isiua kiixtokayaya uan mojmostla kitemoliyaya nojkia ma kiixtoka José. Se tonali kiitskik ipan iyoyo uan kiiljuik: “Ximoteka nouaya”. Ya amo kinejki uan mochololtik pampa kinekiyaya nochipa kuali mouikas iuaya Jehová. Maske kipolok iteki uan kitsajkej, Jehová kiteochijki pampa amo tlaixpanok (Génesis 39:1-12; 41:38-43). ¿Tlake techmachtia tlen kichijki José? Tlaj tiitstosej kampa titekitij o kampa ueli, moneki amo kema tijchiuasej tlen ueliskia kichiuas ma titlajtlakolchiuakaj.

10. ¿Kenke kema katli mosenkajtokej kipiaj ‘ininnemilis tlen yankuik’ kinpaleuia amo ma momekatikaj?

¹⁰ Biblia kiijtoua moneki tijnextisej ‘tonemilis tlen yankuik’. Katli kinextiaj ni, kichiuaj kej Jehová pampa temachmej uan kichiuaj tlen xitlauak. Uan tlaj katli mosenkajtokej kichiuasej kej Jehová, amo momekatisej (Efesios 4:24). Ni yankuik nemilistli kinpaleuia kinauatisej inintlakayo, amo san kinekisej motekasej iuaya se akajya, amo ma kinyoltilana tlen amo kuali yon tlauel ma tlapijpiakaj, pampa ni ueliskia kichiuas ma tlajtlakolchiuakaj (xijpoua Colosenses 3:5 uan 6). Kinauatisej inintlakayo kiijtosneki kichiuasej kampeka amo kichiuasej tlen kinyoltilana, uan nojkia amo kichiuasej tlen ueliskia kichiuas ma tlaixpanokaj (Job 31:1). Yeka, tlaj kineltokasej Jehová itlanauatiljuaj, kikualankaitasej tlen amo kuali uan kichiuasej kampeka kichiuasej tlen kuali (Romanos 12:2, 9).

11. ¿Kenke katli mosenkajtokej tlauel kuali itstokej kema kipiaj ‘ininnemilis tlen yankuik’?

¹¹ Tlaj katli mosenkajtokej kinekij kipiasej ‘ininnemilis tlen yankuik’, moneki kinextisej kuajkuali tlamantli kej Jehová (Colosenses 3:10). Ya kitekipachoua tlen kinpano sekinok, tenojnotsa ika kuali, amo moueyimati, yolpaki uan kipia iyolo. Tlaj nojkia kej nopa kichiuasej, tlauel kuali itstosej uan Jehová kinteochiuas (Colosenses 3:12). Uan tlaj kikauasej nopa ‘tlaseuilistli tlen Cristo temaka’ ma elto ipan ininyolo, itstosej ika pakilistli uan tlayolseuilistli (Colosenses 3:15). Uan tlaj “keja iknimej moikneliaj”, kichiuasej kampeka mopaleuisej uan motlepanitasej (Romanos 12:10).

12. ¿Tlake kuajkuali tlamantli timoiljuia moneki kinextisej katli mosenkajtokej uan kiampa yolpakisej?

¹² Se toikni iuaya isiua kiijtojkej tlake kuajkuali tlamantli kinpaleuik ma yolpakikaj. Iueue kiijtok tlauel monekiyaya ma moiknelikaj uan kichiuaj kampeka nochipa kinextisej. Nojkia kiijtok monekiyaya yolpakisej uan kipiasej ininyolo. Isiua nojkia kiijtok tlauel monekiyaya monojnotsasej ika kuali uan motlepanitasej. Uan kiijtok nochipa kichiuaj kampeka amo moueyimatisej, maske kemantika ouij.

13. ¿Tlake moneki kichiuasej katli mosenkajtokej tlaj kinekij tlauel kuali itstosej, uan kenke tlauel moneki?

¹³ Tlaj katli mosenkajtokej kinekij tlauel kuali itstosej, moneki kiyekosej monojnotsasej ika kuali, ika tlaiknelili uan kimajtosej tlen kiyolmatij (Efesios 4:31). Miakej amo kichiuaj nopa, yeka amo kuali itstokej. Sekij kinnojnotsaj ika miak tlaiknelili san sekinok uan inintlapialjuaj, uan amo ininsiua o ininueue. Uan nojkia amo kuali itstokej kema mokualankanojnotsaj, mokuatsajtsiliaj uan motlaijiljuiaj (Efesios 4:32). Nojkia kema moijiljuiaj tlen teyolkokoua o tlen amo kuali kichiuaj.

14. ¿Tlake amo kinamiki kichiuasej katli mosenkajtokej?

¹⁴ Tlaj katli mosenkajtokej kinekij yolpakisej, tlauel moneki ma monojnotsakaj. Kema Biblia kiijtoua “onka tonali para timokamatsakuas”, amo kiijtosneki amo monojnotsasej (Eclesiastés 3:7). Se tosiuaikni katli eua Alemania kiijtoua kema kipiasej se kuesoli moneki nochipa monojnotsasej, uan maske ouij amo mokualanisej, tlaj ayokmo monojnotsaskiaj ueliskia moyolkokosej. Nojkia moneki amo ma mokualankanojnotsakaj pampa ueliskia moyolkokosej uan moueyilis nopa kuesoli. Kema amo kinpaktia se tlamantli, amo moajuaj kema kinekij kisenkauasej yon ayokmo monojnotsaj. Kichiuaj kampeka nimantsi kisenkauasej uan kiampa amo mokualaniaj.

15. ¿Tlake nojkia kinamiki kichiuasej katli mosenkajtokej tlaj kinekij tlauel kuali itstosej?

¹⁵ Katli mosenkajtokej uelis kuali itstosej tlaj kiijtosej tlen moyoliljuiaj uan tlen kiyolmatij. Maske tlauel ipati tlen kiijtouaj, moneki kuali moyoliljuisej kenijkatsa kiijtouaj. Uan kema kipiasej se kuesoli moneki moyoliljuisej tlake kiitosej, uan monojnotsasej ika kuali uan ika tlatlepanitakayotl. Tlaj kiampa kichiuasej, amo kimatisej ouij motlakakilisej (xijpoua Colosenses 4:6). Nojkia kualtiaskia ma moiljuikaj tlen teyolchikaua (Efesios 4:29).

16, 17. ¿Kenke katli mosenkajtokej kinamiki kimajtosej moneki moyolchikauasej uan motekasej sansejko?

¹⁶ Katli mosenkajtokej uelis tlauel kuali itstosej tlaj kimajtosej moneki moyolchikauasej uan motekasej sansejko (xijpoua 1 Corintios 7:3 uan 4). Yeka, tlauel moneki ma kipatiitakaj tlen ininsiua o ininueue kinpoloua uan amo san tlen inijuantij kinpoloua (Filipenses 2:3, 4).

¹⁷ Kemantika, se amo kipaktia kinextis kenijkatsa kiiknelia isiua o iueue o amo kineki motekas iuaya. Maske sekij tlakamej moiljuiaj kinextiskiaj amo kipiaj chikaualistli tlaj kinojnotsasej ininsiua ika kuali, Biblia kiniljuia tlakamej ma kikuamachilikaj tlen kiyolmatij ininsiuajuaj (1 Pedro 3:7). Se tlakatl moneki kimajtos tlaj kineki kimakas isiua tlen kipoloua, kema motekas iuaya nochipa moneki kichiuas ika tlaiknelili, kiampa kichiuas ma yolpaki isiua. Kema nopa tlakatl uan isiua kinextiaj moikneliaj, amo kimatij ouij moyolchikauasej yon motekasej sansejko.

18. ¿Tlake moneki kichiuasej se tlakatl uan isiua tlaj kinekij tlauel kuali itstosej?

¹⁸ Maske katli mosenkajtokej amo kinamiki mokajkayauasej, kemantika pano pampa uelis amo monextiliyayaj kenijkatsa moikneliaj (Proverbios 5:18; Eclesiastés 9:9). Yeka, Biblia kiijtoua moneki amo kikauasej motekasej sansejko, san uelis kichiuasej kema moiljuisej amo motekasej sansejko se keski tonali. ¿Kenke? Pampa Satanás ueliskia kichiuas ma tlaixpanokaj (1 Corintios 7:5). Nelia tlauel amo kuali eliskia tlaj se tlakatl o isiua momekatiskia, pampa kiampa kikauaskia ma kiyejyeko Satanás. Kema katli mosenkajtokej moyolchikauaj uan motekaj sansejko, kinextiaj kintekipachoua tlen ininsiua o ininueue kineki, uan amo san tlen inijuantij kinpoloua. Ni kichiuaj pampa moikneliaj uan amo san pampa kinnauatiaj. Tlaj se tlakatl uan isiua kinekij tlauel kuali itstosej, moneki monextilisej moikneliaj uan motekasej sansejko (1 Corintios 10:24).

19. ¿Tlake moneki timosentlalisej tijchiuasej, uan kenke?

¹⁹ Tlaj katli mosenkajtokej mosentlalisej amo kema kitlauelkauasej Jehová yon ininsiua o ininueue, tlauel kuali itstosej (Mateo 19:5, 6). Tlauel amo kuali kinpanoskia tlaj momekatiskiaj katli mosenkajtokej pampa nama nechka mochiuas nopa Xochimili. Kema tikitaj tlen kichijkej nopa 24,000 israeleuanij katli momekatijkej ininuaya siuamej tlen Moab, tikilnamikij tlen Biblia kiijtoua: “Tlen inmoiljuiaj inmoketsaj uan intetikej ipan toTeko, xijpiakaj cuidado para amo xiuetsikaj ipan tlajtlakoli” (1 Corintios 10:12). Uajka, nochipa ma itstokaj ika tlayolseuilistli uan amo tisokiyojkej (2 Pedro 3:13, 14).