Kema Jehová tetlapojpoljuia, ya kiita tlaj nopa maseuali kimatiyaya amo kuali tlen kichijki. Jesús kiampa kiijtok ipan Lucas 12:47, 48. Kema se akajya kichiua se tlamantli maske kimati Jehová amo kipaktia, kichiua se ueyi tlajtlakoli. Uan uelis toTeotsij amo kitlapojpoljuis (Mar. 3:29; Juan 9:41). Uajka, ¿ayokmo kema techtlapojpoljuis Jehová? Kena, pampa ya kiita tlaj katli tlajtlakolchijki nelia moyolkueptok. Kema se akajya moyolkuepa kipatla tlen moiljuia, kej monejnemiltia uan tlen kinekiyaya kichiuas. Nojkia, tlauel moyolkokoua uan tlauel mokuesoua pampa kichijki tlen amo kuali o amo kichijki tlen kinamikiyaya. Uan amo san kiyolkokoua pampa tlajtlakolchijki, nojkia pampa ayokmo kuali tlaneltokak uan yeka tlaixpanok. w22.06 6 párrs. 15-17

Katli techkualankaitaj kinistlakauiaj toikniuaj katli tlayakanaj ipan Jehová itlanechikol (Sal. 31:13). Tekichiuanij kintsaktokej se keskij toikniuaj pampa kiijtouaj kichijkej tlen amo kuali. Ipan achtoui siglo nojkia kiampa panok. Apóstol Pablo kitsajkej maske amo tleno kichijtoya. Kema Pablo tsaktoya ipan Roma, se keskij kitlauelkajkej (2 Tim. 1:8, 15; 2:8, 9). Uelis Pablo tlauel moyolkokok kema kitlauelkajkej, pampa ya amo san kiixnamijki miak tlamantli tlen amo kuali, nojkia nechka kimiktiaj pampa kinekiyaya kinpaleuis toikniuaj (Hech. 20:18-21; 2 Cor. 1:8). Amo kema ma tijchiuakaj kej katli kitlauelkajkej Pablo. Satanás kintlatsakuiltia katli tlayakanaj ipan tlanechikoli pampa kineki ma kitlauelkauakaj Jehová uan techmajmatis (1 Ped. 5:8). Amo xikintlauelkaua uan xikinpaleui toikniuaj katli tlayakanaj (2 Tim. 1:16-18). w22.11 16, 17 párrs. 8-11

Uelis nopa tlakatl katli moyolkuepki eliyaya judío. Judíos kiueyichiuayayaj Jehová, uan sekinok maseualmej kinueyichiuayayaj miakej teotsitsij (Éx. 20:2, 3; 1 Cor. 8:5, 6). Tlaj nopa tlakatl amo eliskia judío, uajka nopa tlakatl, ipan texto tlen ni tonali, kiijtojtoskia: “¿Yon kentsi tikinmakasi teotsitsij?”. Jehová kititlantoya Jesús ma kinpaleui israeleuanij, yeka amo kinmachtiyaya maseualmej tlen sekinok altepemej (Mat. 15:24). Uan Jehová kiniljuijtoya israeleuanij ya kinyolkuiskia katli miktokej. Uelis nopa tlakatl kimatiyaya nopa, yeka tlen kiijtok kinextik kimatiyaya Jehová kiyolkuiskia Jesús uan kitekimakaskia ipan iTlanauatijkayo. Kej tikitaj, nopa tlakatl motemachiyaya toTeotsij nojkia kiyolkuiskia. Nopa tlakatl katli moyolkuepki uelis eliyaya judío uan kimatiyaya tlen Adán uan Eva. Yeka, uelis moiljuik nopa xochimili tlen Jesús kiijtouayaya ipan Lucas 23:43 mochiuaskia ipan Tlaltipaktli (Gén. 2:15). w22.12 8, 9 párrs. 2, 3