¿Kema kiijtoua Biblia uelis mokauasej o kiixpolosej nopa amatl kampa nesi mosenkajtokej?

Jehová kineki ma kichiuakaj tlen kiijtouaj kema mosenkauaj, yeka kema kinsansejkotilik nopa achtoui tlakatl uan nopa achtoui siuatl, kiijtok: “Se tlakatl [...] mosejkotilis iuaya isiua uan nopa omej mochiuasej san se inintlakayo”. Jesús nojkia kiijtok: “ToTeko kinsejkotilia se tlakatl iuaya isiua; uajka ma axaka kiniyokatlalis” (Génesis 2:24; Mateo 19:3-6). Jehová uan Jesús kinekij nochipa ma itstokaj sansejko (1 Corintios 7:39). Yeka amo kinamiki mokauasej. Jehová tlauel kualani kema mokauaj uan kiixpolouaj nopa amatl kampa nesi mosenkajtokej (Malaquías 2:15, 16).

¿Kema kiijtoua Biblia uelis kiixpolosej nopa amatl kampa nesi mosenkajtokej? Kej tijmatij, Jehová tlauel kualani kema momekatiaj (Génesis 39:9; 2 Samuel 11:26, 27; Salmo 51:4). Yeka, tlaj se tlen inijuantij momekatis, Jehová kinkaua ma kiixpolokaj nopa amatl kampa nesi mosenkajtokej. (Ipan tlamachtili chiknaui, párrafo chikome, kiijtoua tlake tlamantli amo kinamiki kichiuasej katli amo mosenkajtokej.) Jehová kiijtoua katli amo tlaixpanotok, uelis kiijtos tlaj nojua itstos iuaya isiua o iueue (Mateo 19:9). Uan tlaj kiijtos kineki kiixpolos nopa amatl kampa nesi mosenkajtok, amo tlajtlakolchiua. Tlaj amo kineki kikauas, toikniuaj amo kinamiki kiiljuisej ma kikaua. Uelis nojua kineki itstos iuaya pampa kiita nelia moyolkueptok. Yeka, maske Biblia kiijtoua uelis kiixpolos nopa amatl kampa nesi mosenkajtok, ya kimati tlaj nojua itstos iuaya maske uelis kipias kuesoli (Gálatas 6:5).

Nojkia uelis mokauasej o kiixpolosej nopa amatl kampa nesi mosenkajtokej maske amo momekatijtokej. Kema se akajya kichiua nopa, Biblia kiijtoua “ma mokaua iselti o ma mosejkotili sampa [iuaya]” (1 Corintios 7:11). Ni kiijtosneki amo kinamiki mosiuajtis o monamiktis iuaya seyok (Mateo 5:32). ¿Kema ueliskia mokauasej? Ma tikitakaj.

Kema amo kinekij kinmakasej tlen kinpoloua ininchampoyouaj. Sekij tlakamej amo kinekij kinmakasej tlen kinpoloua ininchampoyouaj, yeka kipiaj miak tlaouijkayotl. Biblia kiijtoua: “Tlaj se [tlakatl] axkineki kimakas [...] ichampoyouaj tlen kimonekilia, uajka [...] ayok kineltoka toTeko. Uan kichijtok más fiero kej se tlakatl tlen axkema kineltokatok toTeko” (1 Timoteo 5:8). Yeka kema se tlakatl amo kineki kinmakas tlen kinpoloua, isiua uelis kiijtos tlaj moneki kiixpolos nopa amatl kampa nesi mosenkajtokej uan kiampa kuali itstos ya uan ikoneuaj. Tlaj se toikni amo kinekis kinmakas tlen kinpoloua ichampoyouaj, ueuejtlakamej moneki kuali kiitasej tlake panotok, pampa ni ueliskia kichiuas ma kikixtikaj ipan tlanechikoli.

Kema tlauel mosisiniaj. Sekij tlauel mosisiniaj, yeka kemantika ueliskia kikokosej o kimiktisej ininsiua. Tlaj se toikni tlauel mosisinia, ueuejtlakamej moneki kiitasej tlaj nelia, pampa kema se akajya tlauel mosisinia uan temakilia kinamiki kikixtisej ipan tlanechikoli (Gálatas 5:19-21).

Kema amo kinekij ma kitekipanokaj toTeotsij. Sekij tlakamej o siuamej amo kinekij kinkauasej ininsiua o ininueue ma kitekipanokaj Jehová, uan kinchiualtiaj ma kiixpanokaj tlen kiijtoua Biblia. Yeka, nopa toikni o tosiuaikni uelis kiijtos tlaj moneki kikauas isiua o iueue uan kiampa ‘kineltokas toTeko Dios achtoui uan amo tlakamej’ (Hechos 5:29).

Kema se toikni kipias ni kuesoli, toikniuaj amo kinamiki kiiljuisej ma mokauakaj o nojua ma itstokaj sansejko. Maske ueuejtlakamej uan sekinok toikniuaj tlen kuali tlaneltokatokej, uelis kipaleuisej uan kitlajtolmakasej, moneki kimajtosej san Jehová kimati tlake kinpanotok. Tlaj se tosiuaikni o se toikni san istlakati pampa kineki kikauas iueue o isiua, kinextia amo kitlepanita toTeotsij yon amo kipatiita itstosej sansejko kej toTeotsij kineki. Jehová kimati kema se akajya san tlakajkayaua, Biblia kiijtoua: “Nempa nesi nochi tlen tijchiuaj uan tlen timoyoliljuiaj. Uan se tonal moneki timoketsasej iixtla para tijmakasej cuenta” (Hebreos 4:13). Nojkia, kema nopa toikni kiijtoua kikauas isiua o iueue, amo aka kinamiki kitlaijiljuis, pampa nochi “tojuantij moneki [tijmakasej] cuentas ika toTeko Dios ika tlen tijchijtokej” (Romanos 14:11, 12).