Josué
14 Ye nin tlali tlen okinkajteuilijkej israelitas ompa Canaán. Teopixki Eleazar, Josué ikone Nun uan tlakamej akinmej okinyekanayaj sejse intribu israelitas okinmakakej nin tlali. 2 Chiknaui tribus uan tlajko okinkajteuilijkej tlali ijkon ken okistiaj, ijkon ken Jehová okinauatijka Moisés. 3 Pero Moisés amitlaj okinkajteuili levitas ijkuak okinmakak tlali ome tribus uan tlajko ik okse lado* Jordán. 4 Akinmej okatkaj ixuiuan José okinmitayaj ken ome tribus, yejuan okatkaj itribu Manasés uan Efraín. Pero levitas amo okinkajteuilijkej nion se tlali, san okinmakakej seki altepemej kanin chantiskiaj uan tlali kanin yetoskiaj inyolkauan uan nochi tlen okipiayaj. 5 Israelitas okixexelojkej tlali ijkon ken Jehová okinauatijka Moisés.
6 Ompa Guilgal kanin okatka Josué oajsitoj sekimej tlakamej tlen pouij itech itribu Judá. Caleb ikone Jefuné akin okatka quenizita okilui Josué: “Te tikmati tlen Jehová akin melauak toTajtsin Dios okilui itekipanojka Moisés. Tikmati tlen okilui de tejuan ompa Cadés-Barnea. 7 Ne onikpiaya 40 xiuitl ijkuak Moisés itekipanojka Jehová, onechtitlanki desde Cadés-Barnea manikichtakaitati tlali. Ijkuak onimokopato, onikijto nochi tlen onikitak uan amo onitlakajkaya. 8 Ne ok oniktlakamatki* Jehová noDios ika nochi noyolo, maski nokniuan akinmej nouan oyajkej okichijkej israelitas mamomojtikan. 9 Ijkuakon Moisés okijto:* ‘Te otiktlakamatki* Jehová noDios ika nochi moyolo, ikinon yetos moaxka uan inmiaxka mokoneuan tlali kanin otinenki’. 10 Jehová okichi tlen okijto uan amo okika manimiki. Yopanok 45 xiuitl desde ijkuak Jehová nochi non okilui Moisés uan israelitas onemiayaj kanin tlauaki. Axkan ok niyoltok uan nikpia 85 xiuitl. 11 Ok nichikauak ken ijkuak Moisés onechtitlanki, ok ueli nio guerra uan nikchiua okseki tlamantli porque ok nichikauak ijkon ken itech nonmej tonalmej. 12 Ikinon techmaka nochi tepeyo ijkon ken Jehová okijtojka non tonal. Te otikkak ijkuak okijtojkej ompa okatkaj anaquim uan altepemej tlen okinpiayaj kuali otsaktokaj. Maski non okijtojkej, xamo Jehová nechpaleuis manikinkixtili intlal ijkon ken Jehová okijtojka”.
13 Josué okiteochi Caleb ikone Jefuné uan okikauili makimoaxkati altepetl Hebrón. 14 Caleb ikone Jefuné akin quenizita okitlakamatki* ika nochi iyolo Jehová inDios israelitas, ikinon okikajteuilijkej altepetl Hebrón uan hasta axkan ok iaxka. 15 Altepetl Hebrón achto omotokayotiaya Quiryat-Arbá (Arbá okatka se tlakatl tlen okachi oueyititoka intlajkotia anaquim). Ik kanin yejuan okatkaj ayakmo omochi guerra.