Josué
4 Ijkuak nochtin israelitas okipanouijkej aueyatl* Jordán, Jehová san niman okilui Josué: 2 “Xikinpejpenakan 12 tlakamej, se tlakatl itech sejse tribu 3 uan xikinnauatikan: ‘Moneki xikinmololokan 12 temej* itlajkotia aueyatl Jordán kanin moketokej teopixkej, xikinuikakan uan xikintlalikan kanin nannochtin nanmokauaskej nin youak’”.
4 Satepan Josué okinnotski 12 tlakamej tlen yokinpejpenka, se tlakatl tlen poui itech sejse tribu 5 uan okinmilui: “Xiakan itlajkotia aueyatl Jordán kanin kajki iArca Jehová namoDios. Xikinmajkolmamatij temej uan moneki yetoskej 12 temej ijkon ken intribus israelitas, 6 ninmej temej moneki namechilnamiktis tlen okichi toTajtsin Dios. Ijkuak namokoneuan namechtlajtlaniskej tleka nikan onankintlalijkej ninmej temej, 7 namejuan moneki nankinmiluiskej: ‘Porque aueyatl Jordán ouaki iyekapan iarca Jehová tlen ika omochi acuerdo, ijkuak nin okipanoui aueyatl Jordán ouaki. Ikinon ninmej temej nochipa kinmilnamiktis israelitas tlen opanok’”.
8 Nonmej tlakamej tlen yokinpejpenka okichijkej ijkon ken Josué okinnauati. Yejuan okinmololojkej 12 temej itlajkotia aueyatl Jordán, sejse tetl* para sejse intribu israelitas. Okichijkej ijkon ken Jehová okiluijka Josué. Okinuikakej temej uan okintlalijkej kanin nochtin mokauaskiaj non youak.
9 Josué noijki okintlali 12 temej itlajkotia Jordán, kanin okatkaj teopixkej tlen okipixtokaj arca tlen ika omochi acuerdo. Nonmej temej hasta axkan ompa katej.
10 Teopixkej tlen okiuikayaj Arca omoketokaj itlajkotia Jordán uan ompa omokajkej hasta ijkuak israelitas okichijkej tlen Jehová okinnauati Josué makinmilui. Yejuan okichijkej ijkon ken Moisés okinauatijka Josué. Ijkuakon israelitas san niman opanokej. 11 Ijkuak nochtin israelitas opanokej, satepan inmixpan opanokej teopixkej uan iArca Jehová. 12 Ijkon ken Moisés okinnauatijka rubenitas, gaditas uan tlajko itribu Manasés, yejuan omotekpankej* uan opanokej inmixpan nochtin israelitas para temiktitiuij. 13 Kanaj 40,000* soldados tlen okiuikayaj tlen ika temiktiskiaj opanokej ixpan Jehová para ajsitiuij kanin tlauaki ik Jericó.
14 Ijkuakon inmixpan nochtin israelitas Jehová okiteititi okipaleuijtoka Josué, ikinon yejuan nochipa sapanoua okitlakaitakej* Josué, ijkon ken sapanoua okitlakaitayaj Moisés.
15 Jehová okilui Josué: 16 “Teopixkej tlen katej itlajkotia Jordán uan kipixtokej arca tlen ika omochi acuerdo xikinnauati makisakan”. 17 Ijkuakon Josué okinnauati teopixkej: “Xikisakan itlajkotia Jordán”. 18 Ijkuak teopixkej tlen okipixtokaj iarca Jehová tlen ika omochi acuerdo okiskej itlajkotia Jordán uan omoketskej ipan tlali uaki, atl oksepa opejki panoua.
19 Itech metstli abib* tonal majtlaktli, nochtin israelitas okikajkej Jordán uan oyajkej Guilgal, tlen omokauaya kanin otlamiaya Jericó ik kanin kisa tonaltsin.
20 Josué okintlali ompa Guilgal 12 temej tlen okinkixtijkej itlajkotia aueyatl Jordán. 21 Satepan okinmilui israelitas: “Ijkuak namokoneuan namechtlajtlaniskej tleka nikan onankintlalijkej ninmej temej. 22 Namejuan moneki nankinmiluiskej: ‘Aueyatl Jordán ouaki ikinon ueli otipanokej, 23 toTajtsin Dios Jehová okiuatski aueyatl Jordán toixpan uan ijkon ueli otipanokej. Ijkon ken Jehová toDios toixpan okiuatska mar Rojo uan ueli otipanokej. 24 Ijkon okichi para nochtin altepemej makimatikan Jehová sapanoua chikauak uan ijkon nochipa sapanoua xiktlakaitakan* Jehová toDios’”.