Achto icarta Juan
4 Nokniuan, amo xikneltokakan nochi tlen tlamachtiaj. Kuali xikitakan kox iaxka toTajtsin Dios tlen tlamachtiaj. Porque ipan tlaltikpak yomonextijkej miakej profetas tekajkayajkej.
2 Ijkin nankimatiskej kox iaxka toTajtsin Dios tlen tlamachtiaj: nankimatiskej iaxka toTajtsin Dios tlen tlamachtiaj tla kijtouaj Jesucristo ouala ken se tlakatl. 3 Pero tla tlamachtiaj Jesucristo amo ouala ken se tlakatl kijtosneki tlen tlamachtiaj amo iaxka toTajtsin Dios. Non tlamachtia akin kixnamiki Cristo tlen namejuan onankikakej ualaskia uan yikajki inuan akinmej chantij tlaltikpak.
4 Nokonetsitsiuan, namejuan nankichiuaj ken toTajtsin Dios uan yonankintlanilijkej profetas tekajkayajkej. Porque akin namouan kajki okachi chikauak uan amo ken Diablo tlen kinpaleuia akinmej chantij tlaltikpak. 5 Yejuan kichiuaj ken akinmej amo yolkualmej ikinon kijtouaj tlen kichiuaj akinmej amo yolkualmej uan oksekimej kikakij tlen kijtouaj. 6 Tejuan tikchiuaj ken toTajtsin Dios. Techkaki akin kixmati toTajtsin Dios pero amo techkaki akin amo kichiua ken ye. Ijkon tikmatij kox iaxka toTajtsin Dios tlen tlamachtiaj noso amo melauak.
7 Nokniuan, nochipa matimosepantlasojtlakan porque toTajtsin Dios techmachtia matitetlasojtlakan. Akin tetlasojtla kijtosneki ikone toTajtsin Dios uan kixmati. 8 Akin amo tetlasojtla kijtosneki amo kixmati toTajtsin Dios porque toTajtsin Dios tlasojtlalistli. 9 ToTajtsin Dios okiteititi techtlasojtla ijkuak okiualtitlanki san ye se iKone ipan tlaltikpak, ikinon iKone techpaleuia matiyoltokan. 10 ToTajtsin Dios okiualtitlanki iKone ken se tetliokolil por totlajtlakol para kuali matimouikakan iuan toTajtsin Dios. Ye ijkon okichi porque otechtlasojtlak uan amo porque tejuan otiktlasojtlakej.
11 Nokniuan, tla toTajtsin Dios ijkon otechtlasojtlak, tejuan noijki moneki matimosepantlasojtlakan. 12 ToTajtsin Dios amo keman ikaj kita. Ye touan yetos tla nochipa timosepantlasojtlaskej uan ajsitok techititis itlasojtlalis. 13 Ye otechmakak iespíritu ikinon tikmatij iuan tikatej uan ye touan kajki. 14 Noijki tejuan otikitakej uan tiktematiltiaj toTajtsin okiualtitlanki iKone makinmakixtiki akinmej chantij tlaltikpak. 15 Tla ikaj kineltoka Jesús iKone toTajtsin Dios, kijtosneki kajki iuan toTajtsin Dios uan ye noijki iuan kajki. 16 Tejuan yotikmatkej toTajtsin Dios techtlasojtla uan melauak ijkon tikneltokaj.
ToTajtsin Dios tlasojtlalistli uan akin nochipa tetlasojtla kajki iuan toTajtsin Dios uan ye noijki iuan kajki. 17 Ijkon tlasojtlalistli ajsitok moteititia uan amitlaj techtsakuilis titlajtoskej ijkuak tlaixkomakaskej. Porque tikchiuaj ken Cristo axkan ijkuak ok tikatej inuan akinmej amo yolkualmej. 18 Akin tetlasojtla amo momojtia. Amo timomojtiaj tla ajsitok titetlasojtlaj, porque tla timomojtiaj techtsakuilia matikchiuakan tlen uelis tikchiuaskej. Amo ajsitok tetlasojtla akin momojtia. 19 Tejuan titetlasojtlaj porque ye achto otechtlasojtlak.
20 Tla ikaj kijtoua kitlasojtla toTajtsin Dios pero kikokolia ikni kijtosneki san tlakajkayaua. Porque akin amo kitlasojtla ikni maski kita, amo uelis kitlasojtlas toTajtsin Dios tlen amo kita. 21 Ye otechmakak nin tlanauatil: akin kitlasojtla toTajtsin Dios noijki makitlasojtla ikni.