Mayo

Itech achto siglo sapanoua otlaapistik ipan nochi tlaltikpak ikinon tokniuan noijki otlajyouijkej. Telpochmej uan ichpochmej tlen okinekiayaj okachi kitekichiuiliskiaj toTajtsin Dios xamo omokuayejyekouayaj ayakmo ijkon kichiuaskiaj. Pero tokniuan nochipa omochijchikajkej tetlapouiskej uan ika nochi inyolo okinpaleuijkej tokniuan tlen ochantiayaj Judea (Hech. 11:​29, 30). Tokniuan akinmej okinpaleuijkej okitakej Jehová okinmaluiaya (Mat. 6:​31-33). Kuali omouikakej iuan tokniuan tlen okinpaleuijkej. Noijki tokniuan sapanoua oyolpakej porque okitemakakej tomin ika nochi inyolo uan okinpaleuijkej oksekimej tokniuan (Hech. 20:35). w23.04 16 párrs. 12, 13

Ualeua Jehová technankilia ijkuak kichiua akinmej amo kitekichiuiliaj matechpaleuikan. Jehová okipaleui Nehemías ijkuak okichi tekiua Artajerjes makikauili mamokopa Jerusalén para matlayektlaliti (Neh. 2:​3-6). Axkan Jehová noijki uelis kinyolinis akinmej amo kitekichiuiliaj matechpaleuikan ijkuak moneki. Jehová amo kichiua se ueyi milagro para matikitakan ken technankilia. Pero ijkuak technankilia techpaleuia matiktekichiuilijtokan. Ikinon matimochijchikauakan tikitaskej ken Jehová technankilia. Tejuan moneki timokuayejyekoskej ken technankilia Jehová ijkuak tiktlatlaujtiaj (Sal. 66:​19, 20). Moneki tikneltokiliskej Jehová para tikiluiskej tlen tikmachiliaj pero noijki moneki tikseliskej ken technankilia maski amo ijkon ken otiknekiayaj (Heb. 11:6). w23.05 11 párr. 13; 12 párrs. 15, 16

Ijkuak otimotemakakej ixpan Jehová otikiluijkej nochipa tikueyichiuaskej uan tikchiuaskej tlen ye kineki. Tejuan moneki tikchiuaskej ijkon ken otikiluijkej Jehová uan amo tikitaj oui tikchiuaskej tlen otikiluijkej. Porque Jehová otechchijchi para matikchiuakan tlen ye kipaktia (Apoc. 4:11). Ye otechchijchi ken ye uan okitlali ipan toyolo matiknekikan tikixmatiskej uan matikueyichiuakan. Ikinon uelis iuan timouikaskej uan tiyolpakiskej tiktekichiuiliskej. Noijki kuali timomachiliaj ijkuak tikchiuaj tlen Jehová kineki uan noijki tikchiuaj ijkon ken iKone okichi (Mat. 11:​28-30). Okachi tiktlasojtlaskej Jehová tla timokuayejyekouaj tlen topatka yokichi uan ken techteochiuas satepan. Amo oui tiktlakamatiskej Jehová tla sapanoua tiktlasojtlaj. Non techpaleuis amo oui matikitakan tikchiuaskej tlen ye technauatia (1 Juan 5:3). Jesús okitlakamatki toTajtsin Dios porque okitlatlaujtiaya makipaleui uan okilnamiktoka tlen kiseliskia (Heb. 5:7; 12:2). Tejuan noijki matikiluikan Jehová matechpaleui ijkon ken Jesús okichi uan matikilnamiktokan satepan nochipa tiyoltoskej. w23.08 27, 28 párrs. 4, 5

Tinochtin techpaktia timouikaskej inmiuan akinmej kimatij mochiaskej. Porque tikintlakaitaj akinmej amo san niman kualanij. Tikpatioitaj ijkuak oksekimej amo san niman kualanij tla tejuan timotlapololtiaj. Noijki tiktlasojkamatiliaj akin otechmachti porque amo okualaniaya ijkuak tejuan itlaj amo otikajsikamatiayaj noso amo san niman otikchiuayaj tlen otimomachtiayaj. Pero okachi tiktlasojkamatiliaj Jehová porque ye kimati mochias. Tinochtin techpaktia ijkuak oksekimej kimatij mochiaskej. Pero xamo tikitaj oui ijkuak tejuan moneki timochiaskej. Xamo san niman tikualanij ijkuak tikatej carretera uan katej miakej carros porque amo san niman tiajsij kanin tiauij. Noijki xamo san niman tikualanij ijkuak ikaj techkualania. Ualeua xamo noijki timokuayejyekouaj amo san niman mochiua tlen Jehová yokijto kichiuas. Pero moneki timochiaskej. w23.08 20 párrs. 1, 2

Matikilnamikikan Jehová okilui Gedeón ayakmo miakej soldados iuan mamokauakan uan oksekimej omonekiaya mokopaskej inchan. Ye xamo omokuayejyeko: “¿Moneki ijkon nikchiuas? ¿Kuali kisas tlen nikchiuas?”. Pero ye okichi tlen Jehová okinauati. Tlayekankej kiteititiaj tetlakamatij ijkon ken okichi Gedeón ijkuak kichiuaj tlen kijtoua ialtepe Jehová (Heb. 13:17). Gedeón okitlakamatki Jehová maski okitak oui uan omomojtiaya (Juec. 9:17). Ye okineltokaya Jehová kipaleuiskia makimalui ialtepe. Tlayekankej tlen chantij kanin amo kinkauiliaj matetlapouikan nion mamonechikokan kichiuaj ijkon ken Gedeón. Yejuan yolchikauakej uan kinpaleuiaj tokniuan mamonechikokan uan matetlapouikan maski kimatij uelis kinkitskiskej, kipoloskej inteki noso kintlajyouiltiskej. Tlayekankej moneki yetoskej yolchikauakej ijkuak peuas ueyi tlajyouilistli para uelis kichiuaskej tlen kinmiluis ialtepe toTajtsin Dios maski kitaskej oui. w23.06 5, 6 párrs. 12, 13

Jehová okichi makijkuilokan itech itlajtol nochi tlen kuali okichi teopixki Jehoiadá uan ijkon matimomachtikan (Rom. 15:4). Biblia kijtoua ijkuak Jehoiadá oixpoliuik, “okitokakej itech ialtepe David kanin otoktokaj tekiuajkej porque okichiuili tlen kuali toTajtsin Dios uan ikal ompa Israel” (2 Crón. 24:​15, 16). Tlen okichi Jehoiadá techpaleuia okachi matiktlakaitakan toTajtsin Dios. Tlayekankej uelis kichiuaskej ken ye okichi tla mochijchikauaj kinmaluiskej tokniuan (Hech. 20:28). Tokniuan tlen yikipiaj miak xiuitl uelis kineltokaskej tla nochipa kitlakaitaj Jehová, uelis tlapaleuiskej mamochiua tlen ye kineki. Non kinmachtia telpochmej yejuan noijki moneki kintlakaitaskej tokniuan tlen yikipiaj miak xiuitl uan yiuejkika kitekichiuilijtokej Jehová (Prov. 16:31). Nochipa matikinpaleuikan akinmej techyekanaj uan matikintlakamatikan (Heb. 13:17). w23.06 17 párrs. 14, 15

Kuali ximokuayejyeko keski uelta titlanankilis ijkuak timonechikouaj. Xamo tokni akin tlamachtijtos mitsiluis xitlanankili porque kita nochipa tikajkokui moma. Pero xamo oksekimej mokuayejyekoskej ayakmo moneki tlanankiliskej (Ecl. 3:7). Xamo okachi oui titlanankiliskej tla katej miakej tokniuan tlen kinekij tlanankiliskej. Xamo tlamis nechikol uan amo techiluiskej matitlanankilikan. Pero amo matimoyolkokokan nion amo matikualanikan (Ecl. 7:9). Maski amo miak titlanankilis, uelis tikinkakis ken tlanankiliaj tokniuan uan uelis tikinyolchikauas ijkuak tlamis nechikol. Ijkon tikinyolchikauas tokniuan ken yetoskia te otitlanankili. w23.04 23, 24 párrs. 14-16

Matimomachtikan iTlajtol toTajtsin Dios uan matimokuayejyekokan tlen ompa kijtoua. Se kuauitl moneki kipias ineluayo uejkatlan para uelis tlaxikos. Tejuan noijki moneki timomachtiskej Biblia para okachi titlaneltokaskej uan titlaxikoskej. Ijkuak se kuauitl moskaltia, ineluayo noijki moskaltia uan okachi motoka. Tejuan ijkuak timomachtiaj uan timokuayejyekouaj tlen timomachtiaj okachi titlaneltokaj uan tikitaj techpaleuia tlen toTajtsin Dios techmachtia (Col. 2:​6, 7). Matimokuayejyekokan ken yiuejkika itekipanojkauan Jehová okinpaleui tlen ye okinmachti, okinpaleui ijkuak okinyekanki uan okinmalui. Ezequiel okiyekitak se ángel okitamachiuaya teokali. Tlen okitak Ezequiel okipaleui okachi matlaneltoka, pero noijki techpaleuia matiktlakamatikan Jehová para matikueyichiuakan (Ezeq. 40:​1-4; 43:​10-12). Noijki techpaleuia ijkuak timomachtiaj seki tlamantli oui tlen kajki itech iTlajtol toTajtsin Dios uan timokuayejyekouaj tlen otimomachtijkej. Tla tikneltokaj Jehová uelis tiktlakamatiskej ika nochi toyolo (Sal. 112:7). w23.07 18 párrs. 15, 16

Biblia kijtoua tlen okichijkej tlakamej tlen okitlasojtlayaj toTajtsin Dios uan okimaluiayaj ialtepe. Xamo sekimej mofamiliares uan tokniuan kanin timonechikoua kiteititiaj kuali tlaneltokaj uan uelis tikchiuas ijkon ken yejuan kichiuaj (Heb. 13:7). Noijki uelis tikchiuas ijkon ken okichi Jesús (1 Ped. 2:21). Ijkuak tikitas tlen okichijkej, ximokuayejyeko tlen okachi mitspaktia tlen yejuan okichijkej (Heb. 12:​1, 2). Satepan ximokuayejyeko ken uelis tikchiuas ijkon ken yejuan okichijkej. Tlakamej tlen ijkon kichiuaj achto mokuayejyekouaj tlen kipejpenaskej kichiuaskej. Ikinon nochipa ximochijchikaua kuali ximokuayejyeko. Achto moneki timomachtis principios bíblicos uan timokuayejyekos tleka Jehová mitsiluia itlaj xikchiua. Satepan xikita tlen otimomachti uan xikpejpena tikchiuas tlen Jehová kipaktia (Sal. 119:9). Ijkon okachi titlaneltokas (Prov. 2:​11, 12; Heb. 5:14). w23.12 24, 25 párrs. 4, 5

Tetajmej uelis kinpaleuiskej inkoneuan mayetokan yolyamankej ijkuak ikaj kintlajtlanis tlen kineltokaj (Sant. 3:13). Sekimej tetajmej momachtiaj inuan inkoneuan ijkuak san sekan kiueyichiuaj Jehová. Momachtiaj inuan inkoneuan tlen uelis kintlajtlaniskej kanin momachtiaj uan ken uelis tlanankiliskej. Noijki kinmachtiaj inkoneuan amo makualanikan ijkuak itlaj kintlajtlaniskej uan ijkon uelis kinkakiskej. Telpochmej uan ichpochmej kinpaleuia kuali matlanankilikan ijkuak momachtiaj iuan infamilia. Pero noijki kinpaleuia okachi makineltokakan tlen momachtiaj. Noijki kinpaleuis tlen kajki itech jw.org kanin kijtoua “Telpochmej uan ichpochmej”. Non kinpaleuis okachi matlaneltokakan uan makiyekijtokan tlen kineltokaj. Tla timomachtiskej iuan tofamilia tlen ompa kijtoua, tinochtin tikmatiskej ken titlanankiliskej ijkuak techtlajtlaniskej tlen tikneltokaj uan amo tikualaniskej. w23.09 17 párr. 10; 18 párrs. 15, 16

¿Tikneki tikchiuas se tlamantli para okachi tiktekichiuilis Jehová pero tikita oui? Amo ximotekipacho porque miakej ijkon kinpanoua. Matikitakan tlen okipanok Philip. Ye okinekiaya okachi motlatlaujtis pero okitaya oui ijkon kichiuas. Erika okijto mochijchikauaskia ajsis kualkan ijkuak tetlapouiti. Pero nochipa oajsiaya yitlajka. Amo ximotekipacho tla tikita oui okachi tiktekichiuilis Jehová. Moneki timochijchikauas uan timajxilis para tikchiuas seki tlamantli. Xamo ijkon tikchiuaj porque tiktlasojtla Jehová uan tikpatioita kuali iuan timouika. Ye kimati tlen uelis tikchiuas uan amo mitsiluia xikchiua tlen amo tiueli (Sal. 103:14; Miq. 6:8). Xikita kox melauak uelis tikchiuas tlen tikneki para okachi tiktekichiuilis Jehová. w23.05 26 párrs. 1, 2

Akinmej yolchikauakej noijki momojtiaj pero mochijchikauaj kichiuaskej tlen kuali. Daniel okatka yolchikauak desde ijkuak okatka telpochtli, nochipa omomachtiaya tlen okijkuilojkej iprofetas toTajtsin Dios. Ye omomachti tlen okijkuilo Jeremías. Non okipaleui makajsikamati judíos oksepa mokopaskiaj Jerusalén (Dan. 9:2). Ye okachi okineltokak Jehová ijkuak okitaya omochiuaya nochi tlen okijtouayaj profecías. Akin kineltoka Jehová kipaleuia mayeto yolchikauak (noijki xikita Romanos 8:​32, 37-39). Daniel nochipa okitlatlaujtiaya toTajtsin Dios uan non sapanoua okipaleui (Dan. 6:10). Ye okiluiaya ijkuak itlaj amo kuali okichiuaya, okiluiaya ken omomachiliaya uan okiluiaya makipaleui (Dan. 9:​4, 5, 19). Ijkuak oneski Daniel amo okatka yolchikauak ikinon ye omonekiaya itlaj kichiuas para yetoskia yolchikauak. Ye omomachti, omotlatlaujti uan okineltokak Jehová uan non okipaleui mayeto yolchikauak. w23.08 2 párr. 4; 4 párr. 7

Tejuan kuali tiyetoskej tla tikintlakamatij tekiuajkej uan noijki tikinpaleuiskej oksekimej. ¿Tleka ijkon tikijtouaj? Tekiuajkej kintlajyouiltiaj akinmej kichiuaj tlen amo kuali pero tejuan amo ijkon techpanos tla tikintlakamatij (Rom. 13:4). Noijki ijkuak sejse tejuan titetlakamatij, titlapaleuiaj para tekiuajkej kuali kinmitaskej itlaixpantijkauan Jehová. Yiuejkika ijkon opanok itech altepetl Nigeria. Sekimej soldados okalakej kanin omonechikojtokaj tokniuan. Okintemouayaj sekimej tlen amo okinekiayaj tlatlaxtlauaskej uan okinmixnamikiayaj tekiuajkej. Pero akin okinyekanaya soldados okinnauati san niman makisakan. Ye okinmilui: “ITlaixpantijkauan Jehová amo kinmixnamikij tekiuajkej ijkuak moneki tlatlaxtlauaskej”. Titlapaleuiaj kuali makitakan ialtepe Jehová ijkuak tejuan tikintlakamatij tekiuajkej. Ajsis tonal non uelis kinpaleuis tokniuan. w23.10 9 párr. 13

Sekimej itekipanojkauan Jehová yikipiaj miak xiuitl kichixtokej matlami nochi tlen amo kuali. Oksekimej kijtouaj youejka amo tlami tlen amo kuali. Jehová techajsikamati ikinon okilui profeta Habacuc: “Porque ok poliui maajsi tonal tlen omoijto para mochiuas tlen onimitsnextili, uan nin san niman mochiuas uan amo tekajkayauas. Maski uejkauas, ¡xitlachixto! Porque melauak mochiuas. ¡Amo uejkauas!” (Hab. 2:3). Tlen Jehová okilui Habacuc noijki axkan techyolchikaua. Jehová okiyolini apóstol Pablo makinmijkuilo nonmej tlajtolmej tlen kinpaleuia nochtin tokniuan tlen kichixtokej yetoskej itech xochitlali (Heb. 10:37). Matikneltokakan Jehová melauak kichiuas tlen yokijto maski ualeua timokuayejyekouaj uejkaua ijkon kichiuas. w23.04 30 párr. 16

Miakej israelitas amo okineltokakej Jehová okitlali Moisés makinyekana maski okinmititi miak tlamantli (Núm. 14:​10, 11). Akinmej ijkon okichijkej, Jehová amo okinkauili makalakikan itech tlali tlen yokinmiluijka kinmakas (Núm. 14:30). Oksekimej israelitas okikauilijkej Jehová makinyekana. Jehová okijto Caleb okitlakamatki ika nochi iyolo (Núm. 14:24). ToTajtsin Dios okiteochi uan okikauili makipejpena kanin chantiskia ompa Canaán (Jos. 14:​12-14). Satepan sekimej israelitas okikauilijkej makinyekana Jehová ijkon ken okichi Caleb. Yejuan okitlakaitakej Josué porque Jehová okitlali makinyekana ijkuak Moisés oixpoliuik (Jos. 4:14). Ikinon Jehová okinteochi uan okinkauili makalakikan itech tlali tlen yokinmiluijka kinmakaskia (Jos. 21:​43, 44). w24.02 21 párrs. 6, 7

Se tepajti uelis kimatis ken tekipanoua toyolo ijkuak kimachilia ken panoua estli itech toma. Tejuan noijki tikmatiskej kox tiktlasojtlaj Jehová tla tikitaj kox tikintlasojtlaj oksekimej. Tla tikitaj ayakmo okachi tikintlasojtlaj tokniuan, xamo noijki ayakmo okachi tiktlasojtlaj Jehová. Pero tla nochipa tikteititiaj timosepantlasojtlaj kijtosneki noijki tiktlasojtlaj Jehová. ¿Tleka moneki san niman itlaj tikchiuaskej tla tikitaj ayakmo okachi tikintlasojtlaj tokniuan? Porque non uelis kichiuas ayakmo matimouikakan iuan Jehová. Ijkon kiteititia tlen okijto apóstol Juan: “Akin amo kitlasojtla ikni maski kita, amo uelis kitlasojtlas toTajtsin Dios tlen amo kita” (1 Juan 4:20). Non techmachtia tikyolpaktiskej Jehová tla timotlasojtlaj (1 Juan 4:​7-9, 11). w23.11 8 párr. 3; 9 párrs. 5, 6

Itajtsin Jehoás oixpoliuik ijkuak ye okatka tsikitsin. Pero teopixki Jehoiadá okiskalti ken ikone uan okipaleui makixmati Jehová. Jehoás okatka ixtlamatki porque okikak tlen okiluiaya Jehoiadá. Jehoás opejki kitekichiuilia Jehová porque omouikaya iuan Jehoiadá uan okinpaleui oksekimej noijki ijkon makichiuakan. Noijki otlapaleui makiyektlalikan teokali (2 Crón. 24:​1, 2, 4, 13, 14). Tla motatajuan noso oksekimej mitsmachtiaj xiktlasojtla Jehová uan xiktlakamati, yetoskia ken mitsmakaj se tetliokolil sapanoua kualtsin (Prov. 2:​1, 10-12). Tetajmej tlatlamantli uelis kinmachtiskej inkoneuan. Motatajuan sapanoua pakiskej tla tikchiuas tlen mitsmachtiaj ika Biblia. Noijki Jehová sapanoua pakis uan uelis nochipa iuan timouikas (Prov. 22:6; 23:​15, 24). Nin seki tlamantli miak ipati tlen uelis tikchiuas ijkon ken okichi Jehoás ijkuak okatka telpochtli. w23.09 8, 9 párrs. 3-5

Jehová techiluia techkaki ijkuak tiktlatlaujtiaj. Jehová kintlasojtla akinmej kitekichiuiliaj uan nochipa kinkaki (Sal. 10:17; 37:28). Pero non amo kijtosneki nochipa techmakas tlen tiktlajtlaniliaj. Xamo ijkuak tiyetoskej itech xochitlali Jehová techmakas tlen tiktlajtlaniliaj ikinon moneki timochiaskej. Jehová kilnamiktok tlen kineki kichiuas ijkuak technankilia (Is. 55:​8, 9). Ye kineki ipan tlaltikpak matechyekana iTekiuajkayo uan san sekan matiktekichiuilikan ika pakilistli. Pero Satanás okijto okachi kuali tiyetoskej tla san tejuan timonauatiskej (Gén. 3:​1-5). Jehová kinkauilia miakej makichiuakan tlen yejuan kinekij para kiteititis Diablo san tlakajkayaua. Ikinon axkan titlajyouiaj (Ecl. 8:9). Tejuan tikmatij axkan Jehová amo kachiuas tlen techtlajyouiltia. w23.11 21 párrs. 4, 5

Jehová okilui Abrahán kinteochiuaskia ixuiuan. Pero ijkuak Abrahán yokipiaya 100 xiuitl uan Sara 90, ayamo okipiayaj inkone. Xamo ikaj uelis kijtoskia ayakmo mochiuaskia tlen okiluijkej. Maski Abrahán okitaya oui, ye “okineltokaya yetos tepapa itech miakej altepemej maski omotaya amo ijkon panoskia” (Rom. 4:​18, 19). Satepan omochi tlen okichiaya porque okipixki ikone tlen omotokayotiaya Isaac (Rom. 4:​20-22). Jehová noijki uelis techselis uan touan mouikas ijkon ken okiseli Abrahán. Ikinon Pablo okijto: “Ninmej tlajtolmej: ‘Okitakej okatka se tlakatl yolkuali’ amo omoijkuilo san para ye. Noijki okijkuilojkej para tejuan porque titlaneltokaj uan techitaskej tiyolkualmej. Tejuan tikneltokaj toTajtsin Dios akin okiyoliti toTeko Jesús” (Rom. 4:​23, 24). Moneki titlaneltokaskej, tikchiuaskej tlen kuali uan tikchiaskej mamochiua tlen yotechiluijkej ijkon ken okichi Abrahán. w23.12 7 párrs. 16, 17

Xamo tejuatsin itlaj tikixnamiki uan timomojtia. Pero xikilnamiki Jehová kimati tlen mitspanotok uan noijki kajsikamati ken timomachilia. Ijkon okinpanok israelitas tlen okatkaj tlakeualmej ompa Egipto. Jehová kuali okimatiaya ken omoyolkokouayaj uan ‘ken otlajyouiayaj’ (Éx. 3:7). Pero ualeua amo tikitaj ken techpaleuia Jehová ijkuak sapanoua titlajyouiaj. ¿Tlen uelis tikchiuaskej? Matiktlatlaujtikan matechpaleui matikitakan ken techpaleuijtok (2 Rey. 6:​15-17). Satepan matimokuayejyekokan: ¿Yotechyolchika se tlamachtil noso tlen otlanankili se tokni kanin timonechikouaj? ¿Yotechyolchika tlen otiktlajtoltijkej itech se amatlajkuilol, tlen otikitakej itech se video noso tlen otikkakej itech se tlakuikali? ¿Se tokni yotechititi se texto noso otechilui itlaj tlen otechyolchika? Jehová techpaleuijtok ijkuak tokniuan techtlasojtlaj uan techmaka miak tlamantli tlen techpaleuia okachi matitlaneltokakan. Pero ualeua tikilkauaj non tlamantli (Is. 65:13; Mar. 10:​29, 30). Nochi non kiteititia Jehová kitekipachoua tlen techpanoua uan uelis tikneltokaskej ye techpaleuis (Is. 49:​14-16). w24.01 4, 5 párrs. 9, 10

Ijkuak Jesús yiyaskia iluikak, okinmilnamikti imachtijkauan omonekiaya tetlapouiskej “Jerusalén, Judea, Samaria; iwa itech nochi n tlaltíkpaktli” (Hech. 1:8; Luc. 24:​46-48). Satepan judíos tlen otlayekanayaj okinkitskijkej Pedro uan Juan uan okinuikakej inmixpan akinmej otlanauatiayaj Sanedrín. Okinnauatijkej ayakmo matetlapouikan porque uelis itlaj kinpanoskia (Hech. 4:​18, 21). Pedro uan Juan okijtojkej: “Kuali xikyejyekolikah nomejwah, kox kuali inawak Dios tlan nomejwah nontechnawatiah, ¿akin okachi moneki se makitlakita, nomejwah noso Dios? Mach weletis san tejwah matikpixtokah tlan otiktakeh iwa otikkakeh” (Hech. 4:​19, 20). Teopixkej tlen otlayekanayaj okinkixtijkej nonmej apóstoles. Satepan Pedro uan Juan omonechikojkej inuan sekimej imachtijkauan Jesús. Okitlatlaujtijkej Jehová makinpaleui makichiuakan tlen ye kineki. Jehová okinnankili ijkuak ijkon omotlatlaujtijkej (Hech. 4:31). w23.05 5 párrs. 11, 12

Jehová iuan iKone yiuejkika san sekan katej. Ikinon kuali mouikaj uan sapanoua motlasojtlaj. Yejuan yiuejkika kuali mouikaj. Itech texto tlen axkan timomachtijtokej Jehová okijto kitlasojtla Jesús. Ye amo san okijto ‘kichiua mapakiʼ. Ye okijto: “Nin noKone niktlasojtla”. Ijkon okijto porque okinekiaya matikmatikan ye kitlasojtla uan okipatioitaya tlen kichiuaskia (Efes. 1:7). Jesús okineltokaya iTajtsin kitlasojtla. Ikinon nochipa okijto iTajtsin okitlasojtlaya (Juan 3:35; 10:17; 17:24). w24.01 28 párr. 8

Ximokuayejyeko akin tiktlasojtla kijtoua otikchi itlaj amo kuali. Te tikmati non amo melauak. Pero sekimej kineltokaj uan peua kinmiluiaj oksekimej tlen otikchi. ¿Ken timomachiliskia? Xamo timoyolkokoskia porque amo otikchi tlen amo kuali. Nin uelis techpaleuis matikajsikamatikan ken omomachili Jehová ijkuak se ikone okijto tlen amo melauak uan okisokioti itoka. Eva okineltokak tlen okiluijkej uan ijkon ye uan inamik okixnamikej Jehová. Ikinon titlajtlakolchiuaj uan tiixpoliuij (Gén. 3:​1-6; Rom. 5:12). Satanás otlakajkaya uan ijkon opejki nochi tlen amo kuali. Ikinon axkan tiixpoliuij, onka guerras uan titlajyouiaj. Jehová moyolkokoua ijkuak kita nochi tlen panotok porque Satanás otlakajkaya. Pero non amo kichiua Jehová san mayolchichia nion san makilnamikto tlen opanok. Biblia kijtoua ye “toTajtsin Dios tlen paki” (1 Tim. 1:11). w24.02 8 párrs. 1, 2

¿Ken uelis tikchiuaskej ijkon ken José okichi uan nochipa tiktlakamatiskej Jehová? Axkan matimokuayejyekokan tlen tikchiuaskej tla itlaj techyoltilanas. Amo matimokuayejyekokan tlen uelis panos tla tikchiuaskej tlen amo kuali. Okachi kuali san niman matikixtopeuakan tlen amo kipaktia Jehová (Sal. 97:10; 119:165). Non techpaleuis amo matitlajtlakolchiuakan. Xamo tikmati melauak tlen timomachtia uan tikneki tiktekichiuilis Jehová ika nochi moyolo. Pero ¿itlaj mitstsakuilia amo ximotemaka ixpan Jehová uan amo ximoapolakti? Xikchiua ken tekiua David okichi uan xiktlatlaujti Jehová: “Notech xitlatemo, oh Dios uan xikixmati noyolo. Techita uan xikixmati tlen nimokuayejyekoua uan tlen nechtekipachoua. Xikita kox notech onka se ojtli tlen amo kuali uan techyekana itech ojtli tlen amo keman tlamis” (Sal. 139:​23, 24). Tikteititis tikneki tikixmatis Jehová tla timochijchikauas ixpan timotemakas uan timoapolaktis. Biblia kijtoua kinteochiua akinmej mochijchikauaj kitemouaj (Heb. 11:6). w24.03 6 párrs. 13-15

Teopixki tlen otlayekanaya okinpaleuiaya israelitas ixpan toTajtsin Dios. Jehová okitlali Aarón ken achto teopixki ompa Israel. Noijki ye achto okitlali matlapaleui itech tabernáculo. Pero apóstol Pablo okijto: “Teopixkej amo ouelik nochipa otekipanojkej porque oixpolitiajkej, ikinon okintlalijkej oksekimej teopixkej uan okichijkej inteki” (Heb. 7:​23-26). Teopixkej okatkaj tlajtlakolejkej ikinon noijki omonekiaya kintemakaskej yolkamej para makintlapojpolui toTajtsin Dios. Pero Jesucristo “teopixki tlen tlayekana” amo omonekiaya ijkon kichiuas. Jesucristo teopixki tlen tlayekana “tlapaleuia […] itech kaltsintli tlen melauak. Non kaltsintli Jehová okitlali uan amo se tlakatl okitlali” (Heb. 8:​1, 2). Pablo okiyekijto: “Jesús nochipa yoltok ikinon amo moneki kipatkayotiskej oksekimej teopixkej”. Noijki okijto Jesús “chipauak, amo kichiua ken tlajtlakolejkej. Ye amo ijkon ken oksekimej teopixkej porque amo moneki mojmostla kinmiktis yolkamej para makitlapojpoluilikan itlajtlakol”. w23.10 26 párrs. 8, 9

Iluikak tlen achto okatka kijtosneki tekiuajkej tlen kinyekana Satanás uan iejekauan (Mat. 4:​8, 9; 1 Juan 5:19). Ijkuak Biblia kijtoua tlaltikpak ualeua kijtosneki akinmej chantij ipan tlaltikpak (Gén. 11:1; Sal. 96:1). Tlaltikpak tlen achto okatka kijtosneki akinmej amo yolkualmej. Non kijtosneki Jehová amo san kiyektlalis iluikak uan tlaltikpak. Ye kinpojpolos uan kitlalis se yankuik “iluikak” uan se yankuik “tlaltikpak”. Non kijtosneki kitlalis se yankuik tekiua uan ye kinnauatis akinmej yolkualmej. Jehová kiyektlalis tlaltikpak uan techpaleuis ayakmo matiyetokan titlajtlakolejkej. Tlaltikpak yetos se xochitlali ijkon ken okijto profeta Isaías. Kualtsin yetos ijkon ken yiuejkika okatka xochitlali Edén. Tejuan noijki techyankuilis toTajtsin Dios porque kinpajtis akinmej amo ueli nejnemij, akinmej amo tlachiaj uan akinmej amo tlakakij. Noijki kinyolitis akinmej yoixpolikej (Is. 25:8; 35:​1-7). w23.11 4 párrs. 9, 10

Amo tikmatij keman peuas ueyi tlajyouilistli (Mat. 24:21). Pero ueyi tlajyouilistli amo ijkon ken ijkuak tlaxixini porque tejuan yitikmatij ijkon panos. Yikipia kanaj 2,000 xiuitl Jesús okijto imachtijkauan moneki moyektlaliskej ijkuak ayamo peua non tlajyouilistli. Tejuan uelis titlaxikoskej tla tikchiuaskej tlen Jesús okijto. Noijki uelis tikinpaleuiskej oksekimej matlaxikokan (Luc. 21:36). Tejuan moneki titlaxikoskej para uelis tikchiuaskej tlen technauatis Jehová uan tikneltokaskej ye techmaluis. ¿Tlen tikchiuaskej tla tokniuan kipoloskej nochi tlen kipiaj? (Hab. 3:​17, 18). Tejuan moneki tikinmiknomatiskej para uelis tikinpaleuiskej uan tikinmakaskej tlen ika mopanoltiskej. Noijki ¿tlen tikchiuaskej ijkuak tekiuajkej mosetiliskej uan kinekiskej techteuiskej? ¿Tlen tikchiuaskej tla techiluiskej kanaj keski tonal san sekan matiyetokan inmiuan tokniuan? (Ezeq. 38:​10-12). Para uelis inmiuan tiyetoskej moneki sapanoua tikintlasojtlaskej. w23.07 2 párrs. 2, 3

Akinmej yomonamiktijkej uelis kichiuaskej ken Áquila uan Priscila. Itech achto siglo miakej tokniuan okintlasojtlayaj (Rom. 16:​3, 4). San sekan otekipanouayaj, otetlapouiayaj uan okinpaleuiayaj oksekimej (Hech. 18:​2, 3, 24-26). Biblia kijtoua san sekan omopaleuiayaj Áquila uan Priscila. ¿Ken uelis ijkon kichiuaskej akinmej yomonamiktijkej? Moneki mokuayejyekoskej tlen tlamantli inselti kichiuaskej. ¿Uelis itlaj nankichiuaskej san sekan? Áquila uan Priscila san sekan otetlapouiayaj. ¿Noijki ijkon nankichiuaj? Áquila uan Priscila san sekan otekipanouayaj. Xamo nankipiaj tlatlamantli nanmoteki pero uelis nanmopaleuiskej namokalijtik (Ecl. 4:9). Akinmej mopaleuiaj okachi kuali mouikaj uan majxiliaj motlapouiskej. w23.05 22, 23 párrs. 10-12

Tinochtin uelis itlaj techmomojtis David ualeua noijki omomojti. Ye oyajki altepetl Gat ijkuak tekiua Saúl okinekiaya kimiktis. David omomojti ijkuak okimatki tekiua Akís okimatki akin okatka ye. Non tekiua otlanauatiaya Gat uan okimatki David okatka chikauak uan okinmikti sapanoua miakej filisteos (1 Sam. 21:​10-12). Omomojti porque omokuayejyekouaya tekiua itlaj kitoktiskia. ¿Tlen okichi David para ayakmo momojtis? Itech Salmo 56 David okijto ken omomachiliaya ijkuak okatka itech altepetl Gat. Ompa okiyekijto tleka omomojtiaya uan ken okipaleui makineltoka Jehová para ayakmo momojtis (Sal. 56:​1-3, 11). Amitlaj okipanok porque okineltokak Jehová. ToTajtsin Dios okipaleui David ijkuak okichi oksekimej mamokuayejyekokan ye okuatlapolo. Ikinon tekiua Akís omokuayejyeko amitlaj kintoktiskia uan ijkon David ocholo (1 Sam. 21:​13–22:1). w24.01 2, 3 párrs. 1-3

Ikinon ijkuak nochtin tlapejpenalmej yetoskej iluikak, kinnauatiskej mamomakakan inuan oksekimej. Pero ijkuak yetoskej iluikak kipaleuiskej Cristo uan noijki ángeles. Ijkuakon momakaskej inuan akinmej kikokoliaj toTajtsin Dios. Sekimej tlapejpenalmej tlen katej nikan tlaltikpak yikipiaj miak xiuitl uan ayakmo chikauakej. Pero ijkuak yetoskej iluikak, nochipa yoltoskej uan yetoskej chikauakej ijkuak kipaleuiskej toTekiua Jesucristo. Ijkuak tlamis Armagedón kinpaleuiskej akinmej mokauaskej nikan tlaltikpak ayakmo mayetokan tlajtlakolejkej. Ijkuakon okachi uelis kinpaleuiskej inmikniuan desde iluikak uan amo ijkon ken axkan porque ok katej nikan tlaltikpak. w24.02 6, 7 párrs. 15, 16

Sekimej yiuelis motemakaskej ixpan Jehová uan moapolaktiskej pero amo kinekij ijkon kichiuaskej. Xamo momojtiaj tlajtlakolchiuaskej uan kinkixtiskej itech tlanechikol. Pero Biblia kijtoua Jehová kinpaleuis itekipanojkauan ‘mayeknemikan’ ken ye kineki uan ‘nochipa makiyolpaktikan’ (Col. 1:10). Ikinon matikneltokakan Jehová techyolchikauas matikchiuakan tlen kuali. Uelis ijkon tikneltokaskej porque yokinpaleui oksekimej (1 Cor. 10:13). Jehová techpaleuia ikinon amo miakej kinkixtiaj itech tlanechikol. Jehová techpaleuis nochipa matiktlakamatikan. Tinochtin titlajtlakolejkej ikinon ualeua tiknekij tikchiuaskej tlen amo kuali (Sant. 1:14). Pero san tejuan uelis tikpejpenaskej tlen tikchiuaskej ijkuak itlaj techyoltilanas. Miakej kijtouaj amo uelis timonauatiskej ijkuak itlaj techyoltilana pero non amo melauak. Uelis tikmatiskej ken timonauatiskej ijkuak itlaj techyoltilanas uan noijki uelis tikitaskej tlen tikchiuaskej. w24.03 5 párrs. 11, 12