¿Tlen techpaleuis melauak matimotlasojtlakan?

1, 2. (1) ¿Tleka Pablo okijto “okachi ipati titetlasojtlaskej”? (2) ¿Tlen tlajtlanilmej tikinnankiliskej?

APÓSTOL Pablo okijto matitlaneltokakan, matikchiakan toTajtsin Dios matechpaleui uan matitetlasojtlakan pero okijto “okachi ipati titetlasojtlaskej” (1 Cor. 13:13). ¿Tleka ijkon okijto? Porque ijkuak toTajtsin Dios kichiuas tlen yokijto ayakmo monekis titlaneltokaskej. Pero monekis nochipa tiktlasojtlaskej Jehová uan noijki oksekimej. Ijkuak tiyetoskej itech xochitlali okachi titetlasojtlaskej.

² Nochipa moneki tikteititiskej titetlasojtlaj ikinon tikinnankiliskej eyi tlajtlanilmej. ¿Tleka moneki timosepantlasojtlaskej? ¿Ken uelis tikteititiskej timotlasojtlaj? ¿Tlen techpaleuis melauak matimotlasojtlakan?

 3. ¿Tlen kiteititia moneki timotlasojtlaskej?

³ ¿Tleka miak ipati matimosepantlasojtlakan? Porque ijkuak timotlasojtlaj tikteititiaj melauak tikchiuaj ken Cristo. Jesús okinmilui iapóstoles: “Tla nanmosepantlasojtlaj, nochtin kimatiskej namejuan nannodiscípulos” (Juan 13:35). Noijki tla timotlasojtlaj techpaleuis san sekan matiyetokan. Ikinon Pablo okijto “non kinpaleuia nochtin kuali mamouikakan” (Col. 3:14). Apóstol Juan okijto okse tlamantli miak ipati tlen kiteititia tleka moneki timotlasojtlaskej. Ye okijto: “Akin kitlasojtla toTajtsin Dios noijki makitlasojtla ikni” (1 Juan 4:21). Ikinon ijkuak tikintlasojtlaj tokniuan tikteititiaj noijki tiktlasojtlaj Jehová.

4, 5. Xikyekijto tleka tikijtouaj tla tiktlasojtlaj Jehová kijtosneki tikintlasojtlaj tokniuan.

⁴ ¿Tleka tikijtouaj tla tiktlasojtlaj Jehová kijtosneki tikintlasojtlaj tokniuan? Para tikajsikamatiskej matimokuayejyekokan ken salitok toyolo iuan okseki tlamantli tlen kipia tocuerpo. Se tepajti uelis kimatis ken tekipanoua toyolo ijkuak kimachilia ken panoua estli itech toma. ¿Tlen techmachtia tlen kichiua tepajti?   

⁵ Se tepajti uelis kimatis ken tekipanoua toyolo ijkuak kimachilia ken panoua estli itech toma. Tejuan noijki tikmatiskej kox tiktlasojtlaj Jehová tla tikitaj kox tikintlasojtlaj oksekimej. Tla tikitaj ayakmo okachi tikintlasojtlaj tokniuan, xamo noijki ayakmo okachi tiktlasojtlaj Jehová. Pero tla nochipa tikteititiaj timosepantlasojtlaj kijtosneki noijki tiktlasojtlaj Jehová.

 6. ¿Tleka moneki san niman itlaj tikchiuaskej tla tikitaj ayakmo okachi tikintlasojtlaj tokniuan? (1 Juan 4:​7-9, 11).

⁶ ¿Tleka moneki san niman itlaj tikchiuaskej tla tikitaj ayakmo okachi tikintlasojtlaj tokniuan? Porque non uelis kichiuas ayakmo matimouikakan iuan Jehová. Ijkon kiteititia tlen okijto apóstol Juan: “Akin amo kitlasojtla ikni maski kita, amo uelis kitlasojtlas toTajtsin Dios tlen amo kita” (1 Juan 4:20). Non techmachtia tikyolpaktiskej Jehová tla timotlasojtlaj (xiktlajtolti 1 Juan 4:​7-9, 11).

7, 8. ¿Ken uelis tikteititiskej timotlasojtlaj?

⁷ Biblia miak uelta kijtoua: “Ximosepantlasojtlakan” (Juan 15:​12, 17; Rom. 13:8; 1 Tes. 4:9; 1 Ped. 1:22; 1 Juan 4:11). Tlasojtlalistli moskaltia toyolipan ikinon amikaj uelis kitas. Ikinon ¿ken uelis tikteititiskej titetlasojtlaj para oksekimej makitakan tlen tikpiaj toyolipan? Tlen tikijtouaj uan tlen tikchiuaj kiteititia kox titetlasojtlaj.

⁸ Uelis tikchiuaskej miak tlamantli para tikinmititiskej tokniuan tikintlasojtlaj. Biblia techiluia seki tlamantli tlen uelis tikchiuaskej. Kijtoua: “Xikmoluikan tlen melauak” (Zac. 8:16). “Kuali ximouikakan inuan oksekimej” (Mar. 9:50). “Namejuan achto xitetlakaitakan” (Rom. 12:10). “Kuali xikinselikan oksekimej” (Rom. 15:7). “Nochipa [...] xikintlapojpoluikan” oksekimej (Col. 3:13). “Ximopaleuikan ijkuak nantlajyouiaj” (Gál. 6:2). “Nochipa ximosepanyolchikauakan” (1 Tes. 4:18). “Nochipa [...] ximosepanpaleuikan” (1 Tes. 5:11). “Ximotlatlaujtikan inpatka oksekimej” (Sant. 5:16).

 9. ¿Tleka tikijtouaj ijkuak tikinyolchikauaj oksekimej tikteititiaj tikintlasojtlaj? (Noijki xikinmita fotos).

⁹ Matimomachtikan se tlamantli tlen kiteititia titetlasojtlaj. Pablo okijto: “Nochipa ximosepanyolchikauakan”. ¿Tleka tikijtouaj ijkuak tikinyolchikauaj oksekimej tikteititiaj tikintlasojtlaj? Se amochtli kijtoua tlajtoli “ximosepanyolchikauakan” kijtosneki “tiyetoskej inauak ikaj para tikyolchikauaskej ijkuak sapanoua tlajyouia”. Ijkuak tikyolchikauaj se tokni tlen tlajyouia tikpaleuiaj nochipa makitekichiuili Jehová. Tikteititiaj tiktlasojtlaj se tokni ijkuak tikyolchikauaj (2 Cor. 7:​6, 7, 13).

10. ¿Tleka tikijtouaj ijkuak titeiknomatij noijki moneki titeyolchikauaskej?

¹⁰ ¿Tleka ijkuak titeiknomatij noijki moneki titeyolchikauaskej? Porque ijkuak tikiknomatij akin tlajyouia tiknekij tikyolchikauaskej uan tikpaleuiskej. Achto titeiknomatij uan non techyolinia matiknekikan tikinyolchikauaskej oksekimej. Jehová ijkon kichiua. Pablo okijto “ye toTajtsin Dios tlen sapanoua techiknomati uan nochipa techyolseuia” (2 Cor. 1:3). “Ye [...] sapanoua techiknomati” uan techpaleuia. Non kiyolinia matechyolchikaua ijkuak titlajyouiaj (2 Cor. 1:4). Jehová kinyolseuia uan kinyolchikaua akinmej tlajyouiaj. Yetoskia ken ijkuak ikaj amiki sapanoua koni atl uan kualtsin momachilia. ¿Tlen techpaleuis matikinmiknomatikan oksekimej uan matikinyolchikauakan ijkon ken Jehová kichiua? Matikchiuakan seki tlamantli tlen techpaleuis matiteyolchikauakan. Matikitakan tlen uelis tikchiuaskej.

11. Ijkon ken kijtoua Colosenses 3:12 uan 1 Pedro 3:​8, ¿tlen techpaleuis matikintlasojtlakan oksekimej uan matikinyolchikauakan?

¹¹ ¿Tlen techpaleuis nochipa matimotlasojtlakan uan matimoyolchikauakan? Matimochijchikauakan matiteajsikamatikan, matimotlasojtlakan ken tiknimej uan matiyetokan tiyolkualmej (xiktlajtolti Colosenses 3:12; 1 Pedro 3:8). Tikinyolchikauaskej tokniuan ijkuak tlajyouiaj tla tikinmiknomatij uan techtekipachoua tlen kinpanoua. Jesús okijto: “Tlen kajki toyolipan non tlen tikijtouaj. Akin yolkuali kijtoua tlen kuali porque kuali mokuayejyekoua” (Mat. 12:​34, 35). Yotikajsikamatkej tikteititiaj tikintlasojtlaj tokniuan ijkuak tikinyolchikauaj.   

12. (1) ¿Tleka moneki timomaluiskej? (2) ¿Tlen tlajtlanilistli tiknankiliskej?

¹² Tinochtin tiknekij tiktlakamatiskej nin tlanauatil: “Nochipa matimosepantlasojtlakan” (1 Juan 4:7). Pero amo matikilkauakan tlen okijto Jesús. Ye okijto: “Miakej ayakmo tetlasojtlaskej” (Mat. 24:12). Ye amo okijto idiscípulos ayakmo motlasojtlaskiaj. Pero moneki timomaluiskej para amo tikchiuaskej ken akinmej amo tetlasojtlaj. Ikinon matiknankilikan nin tlajtlanilistli: ¿Ken uelis tikmatiskej kox melauak tikintlasojtlaj tokniuan?

13. ¿Tlen kiteititis kox melauak titetlasojtlaj?

¹³ Matimokuayejyekokan tlen tikchiuaj ijkuak itlaj techtoktiaj tokniuan uan ijkon uelis tikmatiskej kox melauak tikintlasojtlaj (2 Cor. 8:8). Apóstol Pedro okijto: “Okachi ipati sapanoua ximosepantlasojtlakan, porque akin tetlasojtla nochipa tetlapojpoluia” (1 Ped. 4:8). Ikinon ijkuak tokniuan itlaj techtoktiaj noso motlapololtiaj tikteititiskej kox melauak tikintlasojtlaj.

14. Xikyekijto ken moneki titetlasojtlaskej ijkon ken kijtoua 1 Pedro 4:8.

¹⁴ Matimomachtikan tlen okijto Pedro. Kanin peua versículo 8 kijtoua “sapanoua ximosepantlasojtlakan”. Ika griego tlajtoli “sapanoua” kijtosneki “momelaua”. Kanin tlami versículo kijtoua ijkuak sapanoua titetlasojtlaj nochipa titetlapojpoluiaj. Ika griego tlajtoli titetlapojpoluiaj kijtosneki tikpachouaj. Tlasojtlalistli yetoskia ken se tsotsoli tlen uelis tikmelauaskej hasta kipachos nochi tlajtlakoli. Tlasojtlalistli uelis techpaleuis amo matikitakan ijkuak oksekimej motlapololtiaj ijkon ken se tsotsoli kipachoua itlaj tlen sokio.

15. ¿Ken techpaleuia ijkuak melauak titetlasojtlaj? (Colosenses 3:13).

¹⁵ Tla sapanoua tikintlasojtlaj tokniuan, tikintlapojpoluiskej ijkuak motlapololtiskej maski tikitaskej oui ijkon tikchiuaskej (xiktlajtolti Colosenses 3:13). Ijkuak tikintlapojpoluiaj oksekimej tikteititiaj melauak titetlasojtlaj uan tiknekij tikyolpaktiskej Jehová. ¿Tlen okachi techpaleuis matikintlapojpoluikan oksekimej ijkuak motlapololtiaj? Noijki ¿tlen techpaleuis amo san niman matikualanikan ijkuak kichiuaj tlen amo techpaktia?

16, 17. Xikyekijto tlen uelis techpaleuis matikilkauakan tlen oksekimej techtoktiaj. (Noijki xikinmita fotos).

¹⁶ Matikitakan tlen kuali kichiuaj oksekimej uan amo san matikitakan tlen amo kuali kichiuaj. Matikijtokan timoyolpaktijtok inuan sekimej tokniuan uan tikneki inuan tikmokixtilis se foto. Te tikinkixtia eyi fotos pero tikita se foto amo kuali okiski se tokni. Ikinon tikpojpoloua non foto uan tikinmokauia ome fotos kanin nochtin kuali okiskej.

¹⁷ Fotos tlen tikintlatiaj yetoskia ken itlaj tlen tikilnamiktokej. Ualeua tikilnamiktokej ijkuak otimoyolpaktiayaj inuan tokniuan. Pero xamo tikilnamikij se tokni okijto noso okichi itlaj tlen amo kuali. ¿Tlen tikchiuaskej? Uelis tikilkauaskej ijkon ken ijkuak tikpojpolouaj se foto (Prov. 19:11; Efes. 4:32). Uelis tikilkauaskej tlen amo kuali otechtokti uan okachi matikilnamikikan kuali iuan otimouikayaj. Okachi kuali tla tikintlatiaj “fotos tlen kuali okiskej”.

18. ¿Tlen okachi ipati techmachtia nin tlamachtil?

¹⁸ ¿Tleka tiknekij melauak timotlasojtlaskej? Porque yotimomachtijkej tikteititiaj tiktlasojtlaj Jehová ijkuak tikintlasojtlaj tokniuan. ¿Ken uelis tikteititiskej tikintlasojtlaj tokniuan? Uelis ijkon tikchiuaskej tla tikinyolchikauaj. Pero moneki tikinmiknomatiskej uan ijkon nochipa tikinyolchikauaskej. ¿Tlen techpaleuis melauak matimotlasojtlakan? Matimochijchikauakan matikintlapojpoluikan oksekimej ijkuak motlapololtiaj.

19. ¿Tleka miak ipati matimotlasojtlakan axkan?

¹⁹ ¿Tleka miak ipati axkan matimotlasojtlakan? Matikitakan tlen okijto Pedro: “Yitlamis nochi tlen onka, ikinon [...]. Okachi ipati sapanoua ximosepantlasojtlakan” (1 Ped. 4:​7, 8). ¿Tlen uelis panos ijkuak yitlamis tlen amo kuali? Jesús okijto: “Itech nochi altepemej namechkokoliskej porque nankichiuaj ken ne nikchiua” (Mat. 24:9). Moneki san sekan tiyetoskej para nochipa tiktekichiuiliskej Jehová ijkuak techkokoliskej. Satanás kineki techxelos pero amo uelis ijkon kichiuas tla melauak timosepantlasojtlaj. Porque tlasojtlalistli “kinpaleuia nochtin kuali mamouikakan” (Col. 3:14; Filip. 2:​1, 2).