Sekimej kijtouaj yimiak uelta yokitlajtoltijkej Biblia. Pero ¿kineltokaj tlen ompa kijtoua? ¿Tlen momachtiaj kinpatilia innemilis? Miakej amo kipatlaj innemilis. Pero tiiTlaixpantijkauan Jehová amo timokuayejyekouaj ijkon ken oksekimej. Ikinon timochijchikauaj tikteititiskej tikchiuaj tlen ompa kijtoua. Ualeua amo okachi timajxiliaj tiktlajtoltiskej iTlajtol toTajtsin Dios uan tikchiuaskej tlen ompa kijtoua. Noso amo tikilnamikij tlen tiktlajtoltiaj porque san totoka tiktlajtoltiaj. Noijki xamo timosotlauaskej porque tikitaj moneki tikpatlaskej miak tlamantli. Pero Jehová techpaleuis tla moneki itlaj tikpatlaskej. Moneki matikkauilikan matechpaleui uan matikchiuakan tlen ompa kijtoua. Okachi tipakiskej tla tiktlajtoltiskej Biblia uan tikchiuaskej tlen ompa kijtoua (Sant. 1:25). w24.09 7 párrs. 15, 16

Jehová mitsyolseuis ika iespíritu santo ijkuak itlaj mitspanos noso ijkuak itlaj tikixnamikis. Ikinon xikilui Jehová ken timomachilia ijkuak itlaj tikixnamiki uan sapanoua timoyolkokoua. Uelis iuan timotlapouis san keski uelta tiknekis uan noijki uelis tiuejkauas san keski horas tiknekis (Sal. 86:3; 88:1). Nochipa xikilui Jehová mamitsmaka iespíritu santo uan xikneltoka ye nochipa mitskakis. ¿Tisotlaua porque itlaj otikixnamik uan amo tikmati tlen tikchiuas? Iespíritu santo toTajtsin Dios mitsyolchikauas nochipa xiktekichiuili (Efes. 3:16). ¿Tlen moneki tikchiuas tla yotikilui Jehová mamitsmaka iespíritu santo? Ximonechiko, xitetlapoui uan nochipa xiktlajtolti Biblia. Non mitspaleuis ximokuayejyeko ijkon ken Jehová mokuayejyekoua (Filip. 4:​8, 9). Ijkuak tiktlajtoltis Biblia ximokuayejyeko ken okinpaleui Jehová matlaxikokan akinmej okitekichiuiliayaj ijkuak itlaj okixnamikiayaj. w24.10 9 párrs. 12-14

Jehová uan Jesús tetlasojtlaj ikinon tejuan noijki tikintlasojtlaj oksekimej (Prov. 8:31). Tikinmiknomatij akinmej tlajyouiaj uan amo kixmatij “toTajtsin Dios” (Efes. 2:12). Yejuan kixnamikij miak tlamantli ikinon tikintlapouiaj kuali tlajtoli tlen uelis kinmakixtis. Okachi timochijchikauaskej titetlapouiskej tla titetlasojtlaj uan titeiknomatij. Sapanoua kinpaleuis tlen tlamachtia Biblia. Kinpaleuis makichiakan tlen miak ipati, mapakikan uan noijki uelis kipiaskej “yolilistli tlen melauak” itech xochitlali (1 Tim. 6:19). Tla tikintlasojtlaj oksekimej tikinmiluiskej ayakmo miak poliui toTajtsin Dios kipojpolos nochi tlen amo kuali (Ezeq. 33:​7, 8). Tiknekij makimatikan oksekimej tlen panos ijkuak peuas ueyi tlajyouilistli. Achto kinpojpolos nochi religiones tlen tlakajkayauaj. Satepan itech Armagedón kipojpolos nochi tlen kiyekana Satanás (Apoc. 16:​14, 16; 17:​16, 17; 19:​11, 19, 20). w24.05 16, 17 párrs. 8, 9