AmaNani

15 UJehova waphinda wakhuluma loMosi wathi: 2 “Khuluma labantu bako-Israyeli uthi kubo, ‘Nxa selingenile elizweni engizalinika lona ukuthi lihlale kulo,+ 3 beselinikela umnikelo otshiselwa uJehova ngomlilo ovela emihlambini yenu yenkomo loba eyezimvu leyembuzi, kungaba ngumnikelo wokutshiswa+ loba umhlatshelo wokwenza isifungo esiqakathekileyo, loba umnikelo wokuzithandela+ kumbe umnikelo eliwenza emikhosini yenu enziwa ngezikhathi ezibekiweyo,+ ukuze ube luqhatshi olumnandi kuJehova,+ 4 lowo oletha umnikelo wakhe kuJehova kumele alethe lomnikelo wamabele wefulawa ecolekileyo+ eyingxenye ye-efa* eyodwa etshumini ehlanganiswe lamafutha ayingxenye yehini* eyodwa kwezine. 5 Kanti njalo onikelayo kumele alethe iwayini eliyingxenye yehini eyodwa kwezine, ibe ngumnikelo wokunathwayo ozanikelwa lomnikelo wokutshiswa+ kumbe lomhlatshelo wemvana ngayinye enduna. 6 Nxa kuyinqama kumele alethe umnikelo wamabele wefulawa ecolekileyo ezingxenye ze-efa ezimbili etshumini ehlanganiswe lamafutha ayingxenye yehini eyodwa kwezintathu. 7 Kumele alethe lewayini elizakuba ngumnikelo wokunathwayo oyingxenye yehini eyodwa kwezintathu, kube luqhatshi olumnandi kuJehova.

8 “‘Kodwa nxa ezanikela ngenkunzi ukuthi ibe ngumnikelo wokutshiswa+ kumbe umhlatshelo wokwenza isifungo esiqakathekileyo+ kumbe ukuthi ibe ngumhlatshelo wobudlelwano oya kuJehova,+ 9 kumele ayilethe kanye lomnikelo wamabele+ wefulawa ecolekileyo ezingxenye ze-efa ezintathu etshumini, ehlanganiswe lamafutha ayingxenye yehini. 10 Kanti njalo kumele anikele iwayini eyingxenye yehini ibe ngumnikelo wokunathwayo,+ umnikelo wokutshiswa oloqhatshi olumnandi kuJehova. 11 Lokhu yikho okumele kwenziwe ngenkunzi ngayinye loba inqama ngayinye loba ngemvana ngayinye enduna loba ngembuzi ezinduna. 12 Kungelani lokuthi izifuyo elinikela ngazo zingaki, lokhu yikho okumele likwenze kwesinye lesinye isifuyo. 13 Le yiyo indlela okumele wonke umuntu ongum-Israyeli enze ngayo nxa eletha umnikelo ozatshiswa ngomlilo ube luqhatshi olumnandi kuJehova.

14 “‘Nxa umuntu wesinye isizwe ohlala lani kumbe umuntu oselesikhathi eside ephakathi kwezizukulwane zenu efuna ukunikela umnikelo wokutshiswa ube luqhatshi olumnandi kuJehova, kumele enze khona kanye elikwenzayo.+ 15 Kumele kube lomthetho owodwa kini elingamalunga ebandla lako-Israyeli lasemuntwini wesinye isizwe elihlala laye. Lo kuzakuba ngumlayo ozahlala ukhona kuzo zonke izizukulwane zenu. Umuntu wesinye isizwe kufanele afanane lani phambi kukaJehova.+ 16 Kumele kube lomthetho owodwa lendlela eyodwa yokwahlulela ezasebenza kini lasemuntwini wesinye isizwe ohlala lani.’”

17 UJehova wasesithi kuMosi: 18 “Khuluma labantu bako-Israyeli uthi kubo: ‘Nxa selifikile elizweni engilisa kulo 19 beselisidla loba yikuphi ukudla okuselizweni lelo,+ kufanele linikele umnikelo kuJehova. 20 Kumele linikele umnikelo wenu wesivuno sokuqala+ owezinkwa eziyisigombolozi ezenziwe ngefulawa engamahadlahadla. Kumele liwunikele ngendlela elinikela ngayo umnikelo wenu wesizeni.* 21 Esinye isivuno senu sokuqala sefulawa engamahadlahadla kumele lisinikele sibe ngumnikelo oya kuJehova kuzo zonke izizukulwane zenu.

22 “‘Nxa isizwe sonke singenza iphutha sehluleke ukulandela yonke imithetho le uJehova ayitshele uMosi, 23 yonke nje imilayo uJehova alinike yona esebenzisa uMosi, kusukela ngelanga uJehova alinika ngalo leyomilayo kusiya phambili ezizukulwaneni zenu, 24 njalo nxa lonke lenze iphutha lelo lingananzelelanga, isizwe sonke kumele sinikele ngejongosi libe ngumnikelo wokutshiswa oloqhatshi olumnandi kuJehova, ndawonye lomnikelo walo wamabele lomnikelo walo wokunathwayo kulandelwa lokho okufanele kwenziwe+ kanye lezinyane lembuzi elizakuba ngumnikelo wesono.+ 25 Umphristi uzahlawulela bonke abantu bako-Israyeli njalo bazathethelelwa+ ngenxa yokuthi abakwenzileyo bekuliphutha futhi balethile umnikelo wabo ozatshiselwa uJehova, baletha lomnikelo wabo wesono phambi kukaJehova ngenxa yephutha labo. 26 Ibandla lonke lako-Israyeli lizathethelelwa kanye lowesinye isizwe ohlala phakathi kwabo ngenxa yokuthi bekuliphutha elenziwe ngabantu bonke.

27 “‘Nxa loba ngubani angenza isono engananzeleli kumele anikele ngezinyane lembuzi elisikazi elilomnyaka owodwa libe ngumnikelo wesono.+ 28 Umphristi uzamhlawulela lowomuntu owenze iphutha, wenza isono engananzeleli phambi kukaJehova. Ngakho uzahlawulelwa isono sakhe abesethethelelwa.+ 29 Nxa umuntu enze iphutha engananzeleli kumele kusebenze umthetho owodwa kini kungelani lokuthi ngumuntu oyisizalwane sako-Israyeli loba owesinye isizwe ohlala phakathi kwenu.+

30 “‘Kodwa umuntu owona ngabomo+ kungelani lokuthi uyisizalwane sako-Israyeli kumbe ngowesinye isizwe, uyabe ethuka uJehova futhi kumele abulawe. 31 Lowomuntu kumele abulawe+ loba sekutheni ngenxa yokuthi udelele ilizwi likaJehova njalo wephula umthetho wakhe. Icala lakhe liphezu kwakhe.’”+

32 Abantu bako-Israyeli bathi belokhu besenkangala, basebethola omunye umuntu etheza inkuni ngelanga leSabatha.+ 33 Abantu abamthola etheza inkuni bamthatha baya laye kuMosi lo-Aroni lakulo lonke ibandla. 34 Yikho bamgcina evalelwe+ ngoba kwakungakacaciswa ukuthi kumele kwenziweni ngaye.

35 UJehova wasesithi kuMosi: “Lowomuntu kumele abulawe loba sekutheni.+ Abantu bonke kumele bamkhande ngamatshe ngaphandle kwezihonqo.”+ 36 Ngakho abantu bonke bamkhiphela phandle kwezihonqo bamkhanda ngamatshe waze wafa njengoba nje uJehova wayetshilo kuMosi.

37 UJehova wasesithi kuMosi: 38 “Khuluma labantu bako-Israyeli ubatshele ukuthi bathungele intshaka ngaphansi emphethweni wezigqoko zabo kuzo zonke izizukulwane zabo futhi bathungele intambo eluhlaza okwesibhakabhaka phezu kwentshaka ezisemphethweni wezigqoko zabo.+ 39 Kumele lithungele intshaka lezo ukuze lizibone beselikhumbula yonke imithetho kaJehova njalo liyilandele.+ Akumelanga lilandele inhliziyo zenu lamehlo enu okubangela ukuthi lingathembeki kimi.*+ 40 Lokhu kuzalinceda ukuthi likhumbule njalo lilandele yonke imithetho yami futhi libe ngcwele kuNkulunkulu wenu.+ 41 NginguJehova uNkulunkulu wenu owalikhipha elizweni laseGibhithe ukuze ngitshengise ukuthi nginguNkulunkulu wenu.+ NginguJehova uNkulunkulu wenu.’”+