Incwadi KaJuda
1 Mina Juda inceku kaJesu Khristu futhi engingumfowabo kaJakhobe,+ ngibhalela ababiziweyo,+ labo abathandwa nguNkulunkulu uBaba labagcinelwe ukuba loJesu Khristu:+
2 Isihawu lokuthula kanye lothando akwandiswe kini.
3 Bathandekayo, lanxa ngangitshisekela ukulibhalela mayelana lensindiso esilayo sonke,+ ngikubone kuqakathekile ukuthi ngilibhalele ngilikhuthaza ukuthi lilulwele ngamandla enu wonke ukholo+ olwaphiwa abangcwele kwaba kanye kuphela. 4 Ngilibhalela incwadi le ngoba kulabanye abantu asebengene phakathi kwenu lingananzeleli. IMibhalo yayivele yatsho kudala ukuthi bazakwahlulelwa. Laba ngabantu abangamhloniphiyo uNkulunkulu, abatshintsha umusa wakhe omkhulu bawenze ube yisizatho sokwenza izinto ezilihlazo bengelandaba.*+ Kabathembekanga eNkosini yethu eyiyo yodwa eyasithengayo,* uJesu Khristu.+
5 Kungelani lokuthi likwazi mhlophe konke lokhu, ngifuna ukulikhumbuza ukuthi lanxa uJehova* wayekhulule abantu bakhe elizweni laseGibhithe,+ wababhubhisa abangazange babe lokholo.+ 6 Lezingilosi ezingazange ziqhubeke zisendaweni yazo yasekuqaleni kodwa ezatshiya indawo yazo+ okwakumele zihlale kuyo, uNkulunkulu uzibophe ngamaketane angaqamukiyo futhi zisemnyameni omkhulu, zigcinelwe ukwahlulelwa ngosuku olukhulu.+ 7 Labantu beSodoma leGomora kanye lababesemadolobheni ayeseduze babefeba,* beziphatha ngendlela eyenyanyekayo futhi belandela izifiso zenyama ezingayisizo zemvelo.+ Abantu laba bayisixwayiso kithi ngoba bahlulelwa bajeziswa ngokubhujiswa ngomlilo waphakade.+
8 Ngendlela efananayo, abantu laba asebengene phakathi kwenu labo bahlala beziphuphela nje, balemikhuba engcolileyo, badelela abakhokhelayo futhi bakhuluma kubi ngalabo uNkulunkulu abanike inkazimulo.+ 9 Kodwa uMikhayeli+ ingilosi enkulu+ wathi ephikisana loDeveli bebanga isidumbu sikaMosi,+ kazange ake amahlulele kumbe amthethise+ kodwa wathi: “Kwangathi uJehova* angakukhuza.”+ 10 Loba kunjalo, abantu laba bona bakhuluma kubi ngakho konke abangakuzwisisiyo+ futhi baqhubeka bezonakalisa lasezintweni zonke abazizwisisa ngemizwa yemvelo njengezinyamazana ezingacabangiyo.+
11 Maye kubo ngoba balandela indlela kaKhayini+ njalo bagijimela endleleni embi kaBhalamu+ befuna ukuthola umvuzo. Sebebhujisiwe ngoba bayahlamuka njengoKhora,+ bechothoza+ abakhokhelayo! 12 Nxa besidla lani emadilini+ enu lilabazalwane, bangamadwala acatshe ngaphansi kwamanzi. Bangabelusi abasuthisa ezabo izisu bengesabi lutho,+ bangamayezi angelazulu aphetshulwa ngumoya+ esiya le lale. Bayizihlahla ezingelazithelo lanxa kuyisikhathi sazo sokuthela,* izihlahla ezife kabili* zaqutshulwa lempande zazo. 13 Bangamagagasi olwandle alamandla, akhaphazelayo ephosela le lale ihlazo+ labo futhi bazinkanyezi ezingelandlela eqondileyo eziyilandelayo, ezigcinelwe ukuba semnyameni owesabekayo kuze kube nini lanini.+
14 Yikho u-Inokhi+ owayengowesikhombisa kusukela ku-Adamu laye waphrofetha ngabo wathi: “UJehova* weza lezingilosi zakhe ezingcwele ezingamatshumi ezinkulungwane+ 15 ezokwahlulela bonke abantu+ njalo ezobalahla ngecala bonke abangamesabiyo ngenxa yezenzo zabo ezimbi kakhulu langenxa yezinto ezethusayo izoni ezingamesabiyo uNkulunkulu ezazizikhuluma ngaye.”+
16 Abantu laba bathanda ukusola+ lokukhonona ngempilo yabo futhi balandela izifiso zabo+ ezimbi. Emilonyeni yabo kuphuphuma amazwi okuzikhukhumeza, ngapha bencoma abanye ngamanga ukuze bathole inzuzo.+
17 Kodwa lina bathandekayo, khumbulani amazwi ayekhulunywa* ngabaphostoli beNkosi yethu uJesu Khristu. 18 Babejayele ukuthi kini: “Esikhathini sokucina kuzakuba labeyisayo, belandela izinkanuko zabo zokungamesabi uNkulunkulu.”+ 19 Laba yibo ababangela ukuthi kube lokwehlukana,+ banjengezinyamazana njalo abalawo umoya kaNkulunkulu. 20 Kodwa lina bathandekayo, zakheni phezu kwesisekelo sokholo lwenu olungcwele kakhulu, lithandaze liqondiswa ngumoya ongcwele+ 21 ukuze lizigcine lisethandweni lukaNkulunkulu,+ lilindele isihawu seNkosi yethu uJesu Khristu esizakwenza lithole ukuphila okungapheliyo.+ 22 Kanti njalo qhubekani lisiba lesihawu+ kulabo abathandabuzayo,+ 23 libancede+ ngokubahluthuna masinyane emlilweni. Kodwa qhubekani lisiba lesihawu lakwabanye, likwenze ngokwesaba, lizonde ngitsho lesigqoko esingcoliswe yimisebenzi emibi.*+
24 Kulowo owenelisa ukulivikela ukuze lingakhubeki, lolamandla okwenza ukuthi lingabi lesici+ phambi kwenkazimulo yakhe,* alenze lithokoze kakhulu, 25 kuye yedwa uNkulunkulu onguMsindisi wethu, osisindisa ngoJesu Khristu iNkosi yethu, akube lenkazimulo lobukhulu lobukhosi kanye lamandla kusukela nininini kuze kube khathesi, kuqhubeke kuze kube phakade. Ameni.