Eyesibili EyamaKhosi

6 Amadodana abaphrofethi+ athi ku-Elisha: “Indawo le esihlala kuyo incane kakhulu futhi sesiminyene. 2 Sicela ukuya eJodani siyegamula izihlahla, sakhe indawo esizahlala kuyo.” U-Elisha wathi: “Hambani.” 3 Omunye wawo wasesithi: “Sicela uhambe lezinceku zakho.” Yena waphendula wathi: “Kulungile ngizahamba lani.” 4 Ngakho wahamba lawo bayafika eJodani baqalisa ukugamula izihlahla. 5 Omunye wawo wathi egamula isihlahla ihloka laphuma layawela emanzini, wasememeza esithi: “Awu nkosi yami, ngilibolekile!” 6 Umuntu kaNkulunkulu weqiniso wambuza wathi: “Liwele ngaphi?” Yena wasemtshengisa. U-Elisha waquma isigodo wasiphosela lapho ihloka elaliwele khona, ihloka laselindenda phezu kwamanzi. 7 U-Elisha wasesithi: “Lithathe,” waselilalamela walithatha.

8 Inkosi yeSiriya yasuka yayahlasela abantu bako-Israyeli.+ Yacebisana lezinceku zayo yazitshela ukuthi bazamisa ngaphi inkamba yabo. 9 Umuntu kaNkulunkulu weqiniso+ wathumela ilizwi enkosini yako-Israyeli wathi: “Unanzelele ungadluli endaweni le ngoba yikho lapho amaSiriya azakuya khona.” 10 Ngakho inkosi yako-Israyeli yathumela ilizwi ebantwini ababehlala endaweni umuntu kaNkulunkulu weqiniso ayemxwayise ukuthi angayi kuyo. Wayixwayisa kanengi inkosi futhi kayizange ifike endaweni lezo.+

11 Lokhu kwayizondisa kakhulu inkosi yeSiriya, yikho yabiza izinceku zayo yathi kuzo: “Ake lingitshele, ngubani phakathi kwethu osehlamukele enkosini yako-Israyeli?” 12 Eyinye inceku yayo yathi: “Akulamuntu ohlamukileyo phakathi kwethu nkosi yami! Ngu-Elisha umphrofethi wako-Israyeli otshela inkosi yako-Israyeli izinto ozikhuluma usendlini yakho yokulala.”+ 13 Inkosi yeSiriya yathi: “Hambani liyedingisisa ukuthi ungaphi ukuze ngithume amadoda ayemthumba.” Ngemva kwesikhathi inkosi yabikelwa ukuthi u-Elisha useDothani.+ 14 Yahle yathumela amabutho ayegade amabhiza lezinqola zempi kanye lebutho elikhulu. Bafika ebusuku bagombolozela idolobho.

15 Inceku yomuntu kaNkulunkulu weqiniso yavuka ekuseni kakhulu yaphuma phandle. Yathi isithi mehlo suka yabona ibutho elilamabhiza lezinqola zempi ligombolozele idolobho. Ngakho yathi ku-Elisha: “Awu nkosi yami, sizakwenza njani?” 16 Kodwa u-Elisha wayiphendula wathi: “Ungesabi!+ Abalathi banengi ukwedlula abalabo.”+ 17 U-Elisha waseqalisa ukuthandaza esithi: “Awu Jehova, ngicela uvule amehlo akhe abone.”+ UJehova wahle wavula amehlo enceku ka-Elisha, yabona ezintabeni kugcwele amabhiza lezinqola zempi zomlilo+ zigombolozele u-Elisha.+

18 AmaSiriya athi esesiza elanda u-Elisha, yena wathandaza kuJehova wathi: “Ngicela utshaye abantu laba babe yiziphofu.”+ Ngakho uNkulunkulu wabatshaya baba yiziphofu njengoba nje u-Elisha wayecelile. 19 U-Elisha wasesithi kubo: “Indlela elihamba ngayo ayisiyo, ledolobho elikulo ayisilo. Ngilandelani ngiyelitshengisa umuntu elimdingayo.” Kodwa wabakhokhela waya labo eSamariya.+

20 Bathi befika eSamariya u-Elisha wathi: “Awu Jehova, bavule amehlo babone.” UJehova wasebavula amehlo, babona ukuthi babephakathi kwedolobho leSamariya. 21 Inkosi yako-Israyeli yathi ibabona yathi ku-Elisha: “Ngibabulale yini? Ngibabulale baba?” 22 Kodwa yena wathi: “Ungababulali. Kanti nxa ungathumba abantu empini* uyababulala? Banike ukudla lamanzi badle banathe+ besebebuyela enkosini yabo.” 23 Yikho inkosi yabenzela idili elikhulu badla banatha. Ngemva kwalokho yabayekela babuyela enkosini yabo. Amabutho eSiriya+ ayethumba impahla zabantu awazange aphinde alugxobe elizweni lako-Israyeli.

24 Ngemva kwesikhathi uBheni-hadadi inkosi yeSiriya waqoqa lonke ibutho lakhe wasuka wayavimbezela iSamariya.+ 25 Kwaba lendlala enkulu+ eSamariya. AmaSiriya aqhubeka elivimbezele idolobho, inhloko kababhemi+ yaze yathengiswa ngenhlamvu zesiliva ezingu-80, lomquba wamajuba ogcwala izandla ezimbili* wacina usuthengiswa ngenhlamvu zesiliva ezinhlanu. 26 Inkosi yako-Israyeli yathi idlula ihamba phezu komduli, omunye owesifazana wamemeza wathi: “Awu nkosi yami, sincede!” 27 Inkosi yaphendula yathi: “Nxa uJehova engakuncedi, mina ngingakuthola ngaphi engingakunceda ngakho? Kulolutho yini esizeni* loba esikhamelweni sewayini* kumbe esamafutha?” 28 Inkosi yasimbuza yathi: “Ukhathazwa kuyini?” Owesifazana waphendula wathi: “Umama lo uthe kimi, ‘Letha indodana yakho siyidle lamuhla, kusasa sizakudla eyami.’+ 29 Yikho siyiphekile indodana yami sayidla,+ ngelanga elilandelayo ngasengisithi kuye, ‘Letha phela indodana yakho siyidle,’ kodwa yena wayifihla.”

30 Inkosi yathi isizwa okutshiwo ngowesifazana lo yadabula izigqoko zayo.+ Ngesikhathi ihamba phezu komduli, abantu babona ukuthi yayigqoke isembatho sesaka ngaphansi kwezigqoko zayo. 31 Inkosi yathi: “UNkulunkulu kangijezise kakhulu nxa ikhanda lika-Elisha indodana kaShafathi lingaqunywanga lamuhla!”+

32 U-Elisha wayehlezi endlini yakhe elabadala bako-Israyeli. Inkosi yathuma isithunywa kodwa sathi singakafiki, u-Elisha wakhuluma labadala wathi: “Liyakwazi nje ukuthi indodana yombulali+ ithume umuntu ukuthi azongiquma ikhanda? Hlalani lilindile, nxa isithunywa singafika livale umnyango liwubambe liqinise. Kalizizwa yini izisinde zenkosi yaso ilandela ngemva kwaso?” 33 U-Elisha wathi esakhuluma isithunywa safika. Inkosi layo yafika yasisithi: “Uhlupho lolu luvela kuJehova. Manje ngiyabe ngisamlindelelani uJehova?”