Eyokuqala KwabaseThesalonika

5 Bafowethu, alidingi kubhalelwa lutho mayelana lezikhathi kanye lezinsuku ezibekiweyo 2 ngoba lina likwazi kuhle ukuthi usuku lukaJehova*+ luzafika njengesela lifika ebusuku.+ 3 Loba nini nxa besathi: “Ukuthula lokuvikeleka!” ukubhujiswa kuzabajuma masinyane+ njengemihelo yowesifazana ozithweleyo futhi abasoze baphunyuke ngitsho. 4 Kodwa lina bafowethu kalikho emnyameni okokuthi usuku lolo selungaze lulijume njengokukhanya kokusa kujuma amasela 5 ngoba lonke lingamadodana okukhanya lamadodana emini.+ Kasisibo abobusuku loba abobumnyama.+

6 Yikho kasingalali njengabanye+ kodwa asihlaleni siphapheme+ njalo sizisebenzise kuhle ingqondo zethu+ 7 ngoba labo abalalayo balala ebusuku lalabo abadakwayo badakwa ebusuku.+ 8 Kodwa thina abemini kasizisebenziseni kuhle ingqondo zethu futhi sigqoke isivikelo sesifuba esilukholo lothando, sigqoke lengwane okutsho ithemba lokusindiswa,+ 9 ngoba uNkulunkulu kasikhethelanga ulaka kodwa wasikhethela ukuthi sisindiswe+ ngeNkosi yethu uJesu Khristu. 10 UJesu wasifela+ ukuze siphile laye+ kungelani lokuthi silele* kumbe siqhubeka siphapheme. 11 Ngakho qhubekani likhuthazana* futhi lisakhana+ njengoba nje lisenza.

12 Siyalicela-ke bafowethu ukuthi libahloniphe abasebenza nzima phakathi kwenu belikhokhela eNkosini futhi beleluleka, 13 libaqakathekise kakhulu njalo libathande ngenxa yomsebenzi wabo.+ Hlalisanani ngokuthula.+ 14 Kodwa siyalincenga bafowethu ukuthi lixwayise* abaphambukayo,+ liduduze abahlulukelweyo* njalo lisekele ababuthakathaka, libekezelele wonke umuntu.+ 15 Nanzelelani kungabi lobuyisela okubi ngokubi kuloba ngubani,+ kodwa hlalani lizama ngamandla wonke ukwenza okuhle komunye lomunye lakwabanye bonke.+

16 Hlalani lijabula.+ 17 Thandazani kokuphela.+ 18 Libe ngababongayo kukho konke.+ Le yiyo intando kaNkulunkulu ngani kuKhristu uJesu. 19 Lingawucitshi umlilo womoya kaNkulunkulu.+ 20 Lingazeyisi iziphrofetho.+ 21 Hlolisisani zonke izinto,+ ligagadlele kokuhle. 22 Xwayani loba kuyini okubi.+

23 UNkulunkulu wokuthula kalingcwelise ngokupheleleyo, njalo umoya lomphefumulo* kanye lomzimba wenu bafowethu akube ngokungelasici kukho konke, kulondolozwe kungasoleki ngesikhathi sokuba khona kweNkosi yethu uJesu Khristu.+ 24 Lowo olibizayo uthembekile futhi uzakwenza sibili lokho.

25 Bafowethu qhubekani lisithandazela.+

26 Bingelelani bonke abafowethu ngokuqabuzana okungcwele.

27 Ngilipha umlandu eNkosini wokuthi incwadi le liyibalele bonke abafowethu.+

28 Umusa omkhulu weNkosi yethu uJesu Khristu kawube lani.