Inhlupho Ezingu-10

KHANGELA imifanekiso le. Umfanekiso ngamunye utshengisa uhlupho uJehova alulethela amaGibhithe. Emfanekisweni wakuqala, kulo-Aroni etshaya amanzi oMfula uNayili ngenduku yakhe. Wathi esenzenjalo, amanzi omfula antshintsha aba ligazi. Inhlanzi zafa, lomfula waqalisa ukunuka phu.

Ngemva kwalokho, uJehova wenza kwaba lamaxoxo ayevela kuMfula uNayili. Agcwala indawo yonke, endaweni zokuphekela, emapanini okuphekela isinkwa, lasemibhedeni yabantu. Amaxoxo athi esefile, abaseGibhithe bawabuthelela aba zinqwabanqwaba, ilizwe lonke lanuka phu ngamaxoxo.

Khathesi ke, u-Aroni watshaya uthuli lomhlabathi ngenduku yakhe, uthuli lwantshintsha lwaba yizibungu ezincane. Lezi kwakuyizibungu eziphaphayo njalo ezilumayo. Lolu kwakuluhlupho lwesithathu elizweni laseGibhithe.

Ezinye inhlupho ezalandelayo zehlela abaseGibhithe kuphela, hatshi abako-Israyeli. Uhlupho lwesine kwakuzimpukane ezinkulu ezagcwala ezindlini zabantu baseGibhithe. Uhlupho lwesihlanu lwalusezinyamazaneni. Inkomo, izimvu lembuzi zabantu baseGibhithe kwafa.

Ngemva kwalokho, uMosi lo-Aroni bathatha umlotha bawujikela emoyeni. Lokhu kwenza abantu lezinyamazana kwaba lamathumba amabi. Lolu kwakuluhlupho lwesithupha.

Ngemva kwalokho, uMosi waphakamisa isandla sakhe saya phezulu, uJehova wasesenza ukuthi kube lombane lesiqhotho. Isiqhotho lesi esesabekayo sasingakaze sibe khona eGibhithe.

Uhlupho lwesi-8 kwakuzintethe ezinengi kakhulu. Kwakungakaze kube lentethe ezinengi kangaka. Zadla konke okwakutshiywe yisiqhotho.

Uhlupho lwesi-9 lwalungolobumnyama. Kwaba mnyama tshu elizweni lonke okwamalanga amathathu, kodwa ama-Israyeli ayelokukhanya lapho ayehlala khona.

Ekucineni, uNkulunkulu watshela abantu bakhe ukuthi bafake igazi lezinyane eminyango yabo. Ingilosi kaNkulunkulu yasifika eGibhithe. Lapho eyayibona khona igazi emnyango yayingabulali muntu kuleyondlu. Kodwa kuzozonke izindlu lapho okwakungela gazi emnyango, ingilosi kaNkulunkulu yayibulala amazibulo wonke awabantu lawezinyamazana. Lolu kwakuluhlupho lwesi-⁠10.

Ngemva kohlupho lokucina, uFaro watshela ama-Israyeli ukuthi ahambe. Abantu bakaNkulunkulu babevele sebelungele ukuhamba. Ngakho ngalobobusuku baphuma eGibhithe.