U-Abhigeli loDavida

UYAMAZI yini owesifazana omuhle ozohlangabeza uDavida? Ibizo lakhe ngu-Abhigeli. Ulengqondo njalo wenza ukuthi uDavida engenzi into embi. Kodwa singakafundi ngalokhu, ake sibone ukuthi kuyini obekusenzakala kuDavida.

UDavida esebalekele uSawuli ucatsha obhalwini. Abanewabo lezihlobo zakhe bayabuya labo khonapho. Kubuya abantu abangaba yi-400, uDavida abesesiba ngumkhokheli wabo. UDavida uya enkosini yeMowabi athi: ‘Ngicela uvumele ubaba wami lomama wami bahlale lawe ngize ngibone ukuthi kwenzakalani kimi.’ Sekudlule isikhathi, uDavida labantu bakhe baqalisa ukucatsha ezintabeni.

UDavida uhlangana lo-Abhigeli sekudlule lokhu. Indoda ka-Abhigeli, uNabhali, inothile. Ulezimvu ezingu-3 000 lezimbuzi ezingu-1 000. UNabhali yindoda embi kakhulu. Kodwa umfazi wakhe muhle kakhulu. Njalo uyakwazi ukwenza okulungileyo. Uze asindise lemuli yakhe. Ake sibone ukuthi ukwenza njani lokhu.

UDavida labantu bakhe benzele uNabhali umusa. Bavikele izimvu zakhe. Yikho-ke ngelinye ilanga uDavida uthuma amanye amadoda alawo ukuthi ayecela uncedo kuNabhali. Abantu bakaDavida bafika kuNabhali ngesikhathi begela izimvu. Lusuku lwedili njalo uNabhali ulokudla okunengi. Amadoda avela kuDavida afika athi kuye: ‘Sibe lomusa kuwe. Kasizange sintshontshe izimvu zakho, kodwa sikuncedise ngokukukhangelela. Yikho-ke sicela usinike ukudla.’

UNabhali uthi: ‘Ngeke nginike ukudla kwami amadoda anjengani.’ Ukhuluma ngendlela embi kakhulu njalo ukhuluma izinto ezimbi ngoDavida. Lapho amadoda ebuyela kuDavida esiyamtshela okwenzakeleyo, uDavida uyazonda kakhulu. Utshela abantu bakhe athi: ‘Hlomani izinkemba zenu!’ Bangena indlela besiyabulala uNabhali labantu bakhe.

Omunye wamadoda kaNabhali utshela u-Abhigeli ukuthi kwenzakeleni ngoba uzwe amazwi akhulunywe nguNabhali. Ngokuphangisa u-Abhigeli ulungisa ukudla. Ukufaka phezu kwamadonki, ahle angene indlela. Lapho ehlangana loDavida, wehla edonkini yakhe aguqe athi: ‘Mnumzana, ngicela ungabi lendaba lomkami uNabhali. Uyisithutha njalo wenza izinto ngobuthutha. Nansi isipho. Ngicela usithathe, njalo usithethelele kulokhu okwenzakeleyo.’

UDavida uphendula esithi: ‘Ungumfazi ohlakaniphileyo. Usungivimbele ukuthi ngingabulali uNabhali ukuze ngiphindisele okubi asenzele khona. Hamba ngokuthula.’ UNabhali esefile, u-Abhigeli uba ngomunye wabafazi bakaDavida.