Abamemezeli BoMbuso Badlulisela Izindaba Zabo Emthethwandaba

1, 2. (a) Kuyini abakhokheli benkolo abaphumelela ukukwenza ngomsebenzi wokutshumayela, kodwa abaphostoli benzani? (b) Kungani abaphostoli bengawulalelanga umthetho wokuthi bangasatshumayeli?

KUSANDA kwedlula iPhentekhosti lika-33 C.E. Ibandla lamaKhristu eJerusalema lisacathula, kalilamaviki amangaki lisunguliwe. Akumangalisi ukuthi uSathane ubona leli kulithuba elihle lokuthi ahle alisusele amanqe. Ufuna ukulithanyela aliqede nya lingakakhuli. Ngesikhatshana nje uSathane usebangele ukuthi abakhokheli benkolo bavimbele umsebenzi wokutshumayela ngoMbuso. Kodwa abaphostoli bayaqhubeka betshumayela ngesibindi njalo amadoda labesifazane abanengi ‘bayakholwa eNkosini.’​—ImiSeb. 4:18, 33; 5:14.

² Abaphikisi sebezondile futhi sebephinde bahlasela, khathesi baphosele abaphostoli entilongweni. Kodwa phakathi kobusuku ingilosi kaJehova ivula iminyango yentilongo, kuthi nxa sekusemadabukakusa abaphostoli sebetshumayela! Bayaphinda babotshwe njalo bamiswe phambi kwababusi, ababafaka icala lokuthi bephule umthetho wokuthi bangatshumayeli. Abaphostoli baphendula ngesibindi bathi: “Simele silalele uNkulunkulu kulokulalela abantu.” Ababusi bayathukuthela babile okokuthi sebefuna ukuthi abaphostoli “babulawe.” Kodwa khathesi njengoba impilo yabo isilenga ngomnxeba, umfundisi woMthetho ohlonitshwayo uGamaliyeli uyabaxwayisa ababusi laba athi: ‘Cabangani kuhle. Bayekeleni abantu laba! Wothani kabahambe!’ Ngesimanga, ababusi bayamlalela besebebatshiya bazihambele. Enzani amadoda la athembekileyo esuka lapha? Kawethuki kodwa ayaqhubeka ‘ngokufundisa lokutshumayela izindaba ezinhle ukuthi uJesu unguKhristu.’​—ImiSeb. 5:17-21, 27-42; Zaga. 21:1, 30.

3, 4. (a)  Yiphi indlela uSathane aselesikhathi eyisebenzisa ekuhlaseleni abantu bakaNkulunkulu? (b) Sizahlolani esahlukweni lesi kanye lakwezimbili ezilandelayo?

³ Icala leli elathethwa ngo-33 C.E. lalingelokuqala kulawo ibandla lamaKhristu elawathonisiswa yiziphathamandla, kodwa lalingayisilo lokucina. (ImiSeb. 4:5-8; 16:20; 17:6, 7) Lalamuhla uSathane ulokhu etshotshozela labo abalwisana lokukhonza kweqiniso ukuthi basebenzise iziphathimandla ukuba zivimbele umsebenzi wethu wokutshumayela. Abaphikisi bethese abantu bakaNkulunkulu amacala atshiyeneyo. Elinye ngelokuthi sibangela ukuxokozela emphakathini, bathi siyahlupha. Baphinda bathi sikhuthaza abantu ukuthi bavukele umbuso; kanti njalo bathi singabathengisi bevangeli. Abafowethu bebedlulisela izikhalazo zabo emthethwandaba ngesikhathi esifaneleyo, ukuze kucace ukuthi bamangalelwe ngamanga. Abomthetho bona bathini ngamacala la? Izinqumo ezenziwa yimithethwandaba eminyakeni eyadlulayo zikunceda ngani khathesi? Ake sihlole amanye amacala athonisiswayo ukuze sibone ukuthi ‘alivikele njalo aliqinisa’ njani ‘ivangeli.’​—Flp. 1:7.

⁴ Esihlokweni lesi sizakhangela indlela esavikela ngayo ilungelo lethu lokuba lenkululeko yokutshumayela. Izahluko ezimbili ezilandelayo zizahluza ezinye izindaba esazidlulisela emthethwandaba, silwela ukungabi yingxenye yomhlaba kanye lokuthi siphile ngezimiso zoMbuso.

 5. Kungani abamemezeli boMbuso babotshwa ekupheleni kwabo 1930, njalo abakhokhelayo babona kungcono ukuthi benzeni?

⁵ Ekupheleni kwabo-1930, amadolobho amanengi ase-United States of America ayefuna ukubamba oFakazi bakaJehova ngamandla ukuthi babe lelayisensi ebavumela ukuthi benze inkonzo yabo. Kodwa abafowethu kabazange bawadinge lawo malayisensi. Ilayisensi ingaqabuka ingasasebenzi, njalo babekholwa ukuthi akulahulumende owayelelungelo lokuvimbela ukutshunyayelwa kwezindaba zoMbuso, okungumlayo uJesu awunika amaKhristu. (Mak. 13:10) Ngenxa yalokho kwabotshwa abamemezeli boMbuso abanengi kakhulu. Ababekhokhela enhlanganisweni babona kungcono ukuthi bayezivikela emthethwandaba. Babelenhloso yokuveza ukuthi ohulumende babevimbele ilungelo laboFakazi lokukhonza bekhululekile kungekho emthethweni. Ngo-1938 kwaba lesehlakalo esenza ukuthi kuthethwe icala elantshintsha indlela amanye amacala anjengalo ayesezathethwa ngayo. Kuyini okwenzakalayo?

6, 7. Kwenzakalani emulini yakoCantwell?

⁶ KwakungoLwesibili ekuseni, mhlaka 26 April, 1938, uNewton Cantwell owayeleminyaka engu-​60; lomkakhe u-Esther; kanye lamadodana abo uHenry, uRussell, loJesse, balungiselela ukuyatshumayela edolobheni laseNew Haven, eConnecticut. Imuli yonke yayingamaphayona aqakathekileyo. Babekwazi ukuthi kwakungenzeka bangaphenduki mhlalokho. Ngenxa yani? Ngenxa yokuthi babeke babotshwa kanengi, ngakho babekwazi ukuthi babengaphinda babotshwe. Kodwa lokhu akuzange kuqede intshiseko yemuli yakoCantwell yokutshumayela izindaba zoMbuso. Bahamba eNew Haven ngezimota ezimbili. UNewton wayetshayela imota yangakibo eyayilamabhuku asekelwe eBhayibhilini legilamafoni (i-phonograph) ethwalekayo, ngapha uHenry, owayeleminyaka engu-​22, etshayela imota eyayilama-speaker. Lakanye akuhlalanga sikhathi esingakanani, kwenzakala lokho ababekulindele bamiswa ngamapholisa.

⁷ Kwaqala kwabotshwa uRussell owayeleminyaka engu-​18, kwasekulandela uNewton lo-Esther. UJesse, owayeleminyaka engu-16 wayemi khatshana, wasebona abazali bakhe kanye lomfowabo beqhutshwa ngamapholisa. UHenry wayetshumayela kwenye indawo yedolobho ngakho uJesse wasala eseyedwa. Lanxa kunjalo wathatha igilamafoni yakhe waqhubeka etshumayela. Amadoda amabili angamaKatolika avumela uJesse ukuthi awalalelise irekhodi eyayilenkulumo kaMfowethu uRutherford eyayilesihloko esithi “Izitha.” Kodwa athi esalalele acatshulwa yilokho ayekuzwa aze afuna lokutshaya uJesse. Ngokuthula uJesse wasuka wazihambela, kodwa engakayingaphi wayesemiswe lipholisa. Ngakho uJesse laye wacina esesesitokisini. Amapholisa athi uDade Cantwell wayengelacala, kodwa athi ababelecala nguMfowethu uCantwell lamadodana akhe. Lanxa kunjalo babhadala ibheyili bakhululwa ngalelolanga.

 8. Kungani umthethwandaba wathi uJesse Cantwell uluhlupho?

⁸ Ngemva kwezinyanga ezingatheni, imuli yakoCantwell yathonisiswa emthethwandaba waseNew Haven ngoSeptember 1938. UNewton, uRussell kanye loJesse betheswa icala lokuhamba becela imali bengela layisensi. Lanxa bazama ukudlulisela icala eMthethwandaba Omkhulu oseConnecticut, uJesse watholakala elecala lokuphambanisa ukuthula kwabantu, kwathiwa uluhlupho. Lokhu kungenxa yokuthi amadoda angamaKatolika ayelalele irekhodi, afakaza emthethwandaba athi inkulumo ayeyizwile yayikhulume kubi ngenkolo yawo njalo yayiwacaphule kakhulu. Ngenxa yokuthi abafowethu ababekhokhela enhlanganisweni yethu babengavumelani lakho, badlulisela indaba le eMthethwandaba Omkhulu kulayo yonke e-United States.

9, 10. (a) UMthethwandaba Omkhulu we-United States wethula siphi isinqumo endabeni yemuli yakoCantwell? (b) Isinqumo esenziwayo sisinceda njani lamuhla?

⁹ Kusukela ngoMarch 29, 1940, uNdunankulu waBahluli uCharles E. Hughes labanye bakhe abangu-8 balalela uMfowethu uHayden Covington, owayeligqwetha laboFakazi bakaJehova ngesikhathi esethula udaba lwakhe.a Ngemva kokuthi umtshutshisi owayemele uhulumende weConnecticut eselethe ubufakazi bakhe ezama ukutshengisa ukuthi oFakazi babeluhlupho, omunye umahluli wambuza wathi: “Akusiqiniso yini ukuthi abantu babezizonda izindaba ezazimenyezelwa nguJesu Khristu?” Umtshutshisi waphendula wathi: “Yikho sibili, njalo nxa ngikhumbula kuhle iBhayibhili lami liyatsho lokuthi uJesu bamenzani ngenxa yokutshumayela.” Impendulo le yaveza okunengi! Engananzeleli, wayesefanise oFakazi loJesu, njalo wayesefanise uhulumende lalabo ababeka uJesu icala. NgoMay 20, 1940, abahluli baphuma lesinqumo sokuthi oFakazi babengelacala.

¹⁰ Isinqumo esenziwayo sanceda ngani? Savikela ilungelo lokukhonza ngenkululeko ukuze kungabi lendawo, idolobho kumbe uhulumende owayengafaka umthetho ovimbela abantu ukuthi bakhonze bekhululekile. UMthethwandaba waphinda wathi okwenziwa nguJesse ‘kwakungaphambanisi ukuthula emphakathini.’ Yikho-ke isinqumo esenziwayo sakuveza egcekeni ukuthi oFakazi bakaJehova kabaphambanisi ukuthula emphakathini. Kwaba yikunqoba okukhulu ebantwini bakaNkulunkulu. Isinqumo lesi thina sisinceda njani lamuhla? Igqwetha elinguFakazi lithi: “Ilungelo lokukhonza sikhululekile singesabi ukuvinjelwa lisinika ithuba njengaboFakazi lamuhla, lokutshumayela izindaba eziletha ithemba kwabanye emiphakathini esihlala kuyo.”

11. Yiwuphi umkhankaso owenziwa ngabafowethu beCanada, futhi ngani?

¹¹ Ngeminyaka yabo-1940, oFakazi bakaJehova eCanada baphikiswa kakhulu. Yikho-ke ngo-1946 abafowethu benza umkhankaso wamalanga angu-16 wokuhambisa iphetshana elalilesihloko esithi Quebec’s Burning Hate for God and Christ and Freedom Is the Shame of All Canada, ukuze batshengise ukuthi uhulumende wayengalihloniphi ilungelo labo lokukhonza. Iphetshana leli elalilamakhasi amane laveza ukuthi abafundisi yibo ababekhwezela lokhu kuhlaselwa, laveza lolunya olwalusenziwa ngamapholisa kanye lamaxuku abantu ababephatha abafowethu ngodlakela edolobheni leQuebec. Iphetshana lathi: “Ofakazi bakaJehova lokhu bebotshwa okungekho emthethweni. Kulamacala angaba ngu-800 etheswe ofakazi bakaJehova eGreater Montreal.”

12. (a) Izitha zenzani ngomkhankaso lo? (b) Abafowethu betheswa icala lani? (Khangela lamabala angaphansi.)

¹² UMkhokheli weQuebec, uMaurice Duplessis, wancedisana loVilleneuve owayelesikhundla esontweni yamaRoma Katolika, bavuka ubhova baqalisa ukulwa “impi engelazwelo” laboFakazi ngenxa yephetshana labo. Ngesikhatshana nje inani lamacala lasuka ku-800 laya ku-1 600. Omunye udadewethu oliphayona wathi: “Amapholisa asibopha kanengi okokuthi sasingasakwazi lokuthi sabotshwa kangaki.” OFakazi ababetholakala behambisa iphetshana leli babesetheswa icala lokusakaza “amaphepha akhuthaza ukuvukela umbuso.”b

13. Ngobani abaqala ukuthonisiswa ngecala lokuvukela umbuso, njalo umthethwandaba wethula siphi isinqumo?

¹³ Ngo-1947, uMfowethu u-Aimé Boucher lamadodakazi akhe uGisèle, owayeleminyaka engu-​18, loLucille, owayeleminyaka engu-11 baba ngabokuqala ukuthonisiswa icala lokuvukela umbuso. Babehambise amaphetshana alesihloko esithi Quebec’s Burning Hate buqamama lepulazi labo, emaqaqeni aseningizimu yeQuebec City, kodwa babengakhanyi beyizephulamthetho ezihluphayo. UMfowethu uBoucher wayeyimvu yomuntu owayezigcinela ipulazi lakhe elincane ngokuthula, njalo wayefika edolobheni lapha lalaphayana ngenqola edonswa ngamabhiza. Lanxa kunjalo imuli yakhe yayisike yadliswa imbuya ngoluthi, njengalokho okwakubhalwe ephetshaneni. Umahluli owayethonisisa icala wayevele engabonani laboFakazi, yikho wala ukwamukela ubufakazi obabuveza ukuthi uBoucher labantwabakhe babengelacala. Esikhundleni salokhu walalela umtshutshisi owayesithi iphetshana lalisenza abantu bavukele, yikho wathi uBoucher labantwabakhebalecala. Ngamanye amazwi lokho umahluli ayekutsho yikuthi: Kulicala ukukhuluma iqiniso! U-Aimé loGisèle batholakala belecala lokusakaza amaphepha akhuthaza ukuvukela umbuso, baze bavalela loLucille ejele okwamalanga amabili. Abazalwane badlulisela icala eMthethwandaba Omkhulu kulayo yonke eCanada, njalo wavuma ukulithonisisa kutsha.

14. Abafowethu beQuebec benzani ngesikhathi behlukuluzwa?

¹⁴ Lanxa kunjalo, abafowethu labodadewethu eQuebec baqhubeka betshumayela ngoMbuso njalo bephumelela kungelani lokuthi babelokhu behlaselwa ngolunya. Ngemva kweminyaka emine kusukela umkhankaso uqalisile ngo-1946, oFakazi banda besuka ku-300 baya ku-1 000!c

15, 16. (a) UMthethwandaba Omkhulu weCanada wethula siphi isinqumo endabeni yemuli yakoBoucher? (b) Isinqumo leso sabasiza njani abafowethu kanye labanye abantu?

¹⁵ NgoJune 1950, uMthethwandaba Omkhulu weCanada owawulabahluli abangu-9 walithonisisa kutsha icala lika-Aimé Boucher. Ngemva kwezinyanga ezingu-6, ngoDecember 18, 1950, uMthethwandaba wathi wayengelacala. Kwasekutheni? UMfowethu uGlen How, igqwetha laboFakazi, wachaza ukuthi uMthethwandaba walalela amazwi kamsolwa okuzivikela ayesithi “ukukhuthaza ukuvukela” kutsho ukukhuthaza udlakela kumbe ukuzama ukugenqula uhulumende. Iphetshana “leli lalingakukhuthazi lokhu yikho-ke imibono eyayiphakathi kwalo yayingephuli mthetho.” UMfowethu uHow waqhubeka wathi: “Ngazibonela ngawami ukuthi uJehova wayesenze sanqoba.”d

¹⁶ Isinqumo esethulwa nguMthethwandaba Omkhulu sasisitsho ukuthi uMbuso kaNkulunkulu wawunqobile. Sahle sabulala wonke amacala okuvukela umbuso angu-122 ayengakathethwa, ayesetheswa oFakazi eQuebec. Isinqumo lesi saphinda senza ukuthi abaseCanada kanye labahlala emazweni wonke ake abuswa yiBritain babe lenkululeko yokutsho izikhalazo abalazo ngohulumende wabo. Kanti njalo ukunqoba lokhu kwenza ukuthi amasonto kanye lohulumende weQuebec bayekele ukuhlasela inkululeko yaboFakazi bakaJehova.e

17. Abanye ohulumende benzeni ukuze umsebenzi wethu wokutshumayela ubenzima?

¹⁷ Izinceku zikaJehova lamuhla zilingisela amaKhristu okuqala, ‘ngokungathengisi ilizwi likaNkulunkulu.’ (Bala u-2 Khorinte 2:17.) Lanxa kunjalo abanye ohulumende bazama ukusebenzisa imithetho yezokuthengiselana ukuze ukutshumayela kwethu kube nzima. Asihloleni amacala amabili aphendula umbuzo wokuthi oFakazi bakaJehova bathengisa ivangeli kumbe ngabatshumayeli.

18, 19. Ababusi beDenmark bazama njani ukuqeda umsebenzi wokutshumayela?

¹⁸ EDenmark. Mhlaka 1 October 1932, kwabekwa umthetho omutsha owawusithi umuntu owayethengisa amabhuku kwakumele abe lelayisensi. Kodwa abafowethu kabazange bawadinge lawo malayisensi. Ngelanga elilandelayo abamemezeli abahlanu batshona ekutshumayeleni eRoskilde, edolobheni elingaba ngamakhilomitha angu-30 entshonalanga yesigodlo seDenmark, iCopenhagen. Bathi sebetshayisa, omunye wabo u-August Lehmann wayengasabonakali. Wayesebotshelwe ukuthengisa engelalayisensi.

¹⁹ NgoDecember 29,1932, u-August Lehmann wamiswa phambi komthethwandaba. Wavuma ukuthi wayehambisele abantu amabhuku asekelwe eBhayibhilini, kodwa wala ukuthi wayewathengisile. Ababemthonisisa bavumelana laye. Bathi: “Umsolwa ulemali eyenela ukuthi azinakekele, njalo kazange athole inzuzo futhi ubengelanhloso yokuyithola, kodwa esikhundleni salokhu, akwenzayo kumdlela imali.” Umthethwandaba wenza isinqumo esasisekela oFakazi, wathi okwakwenziwe nguLehmann kwakungeke “kubizwe ngokuthi yikuthengisa.” Kodwa izitha zabantu bakaNkulunkulu zazizimisele ukuvimba umsebenzi wokutshumayela elizweni lonke. (Hubo. 94:20) Umtshutshisi wecala walidlulisela eMthethwandaba Omkhulu welizwe. Abafowethu benzani ngalokhu?

20. UMthethwandaba Omkhulu weDenmark wethula siphi isinqumo, njalo abafowethu benzani ngemva kwesinqumo leso?

²⁰ Kwathi sekusele iviki ukuthi icala leli liyethethwa eMthethwandaba Omkhulu, oFakazi kulolonke elaseDenmark batshumayela ngentshiseko. Isinqumo soMthethwandaba sethulwa kungoLwesibili mhlaka 3 October, 1933. Sasifanana lesasenziwe ngumthethwandaba omncane esasisithi u-August Lehmann wayengelacala. Isinqumo lesi sasisitsho ukuthi oFakazi babengaqhubeka betshumayela bekhululekile. Besuka lapho, abafowethu labodadewethu bangezelela umfutho ekutshumayeleni ukuze batshengise ukuthi babebonga uJehova ngokunqoba lokhu. Kusukela khonapho abafowethu abaseDenmark bebezenzela inkonzo yabo bekhululekile bengaphanjaniswa nguhulumende.

21, 22. Yisiphi isinqumo esethulwa nguMthethwandaba we-United States endabeni kaMfowethu uMurdock?

²¹ E-United States. NgeSonto mhlaka 25 February, 1940, uRobert Murdock, Jr., owayeliphayona kanye labanye oFakazi abayisikhombisa babotshwa ngesikhathi betshumayela eJeannette, idolobho eliseduze lePittsburgh, esePennsylvania. Batholakala belecala lokuthi babethengisa amabhuku bengela malayisensi. Icala labo balidlulisela eMthethwandaba Omkhulu wase-United States.

²² NgoMay 3, 1943, uMthethwandaba Omkhulu wakhipha isinqumo sawo esasivikela oFakazi. UMthethwandaba kawuzange uvumelane lomthetho wokuthi abantu babe lamalayisensi ngenxa yokuthi wawusenza “bafakwe icala ngento uhulumunde ayesithi balelungelo lokuyenza.” UMthethwandaba wawesula umthetho wamalayisensi ngenxa yokuthi “wawuthathela abantu inkululeko yokudinda lokusakaza amabhuku njalo wawuvimbela abantu ukuthi bakhonze bekhululekile.” UMahluli uWilliam O. Douglas wethula isinqumo abahluli ababesivumelene, wathi oFakazi bakaJehova “kabatshumayeli kumbe bahambise amabhuku esonto kuphela, kodwa bakwenza kokubili.” Waphinda wathi: ‘Umsebenzi lo kumele uhlonitshwe ngendlela okuhlonitshwa ngayo ukukhonza emasontweni kanye lokutshumayela phambi kwabantu.’

23. Kungani ukunqoba okwenzakala emithethwandaba ngabo-1943 kuqakathekile lakithi lamuhla?

²³ Isinqumo lesi esenziwa nguMthethwandaba Omkhulu saba yikunqoba okukhulu kwabantu bakaNkulunkulu. Sakuveza egcekeni ukuthi kasisibo bantu abahamba bethengisa, kodwa siyizikhonzi ezingamaKhristu. Kasisoze sikukhohlwe okwenzakala ngalelolanga ngo-1943, ngoba phakathi kwamacala angu-13 ayelethwe eMthethwandaba Omkhulu, oFakazi bakaJehova baphumelela kwangu-​12, okugoqela icala lika-Murdock. Izinqumo lezi ezenziwa emthethwandaba yizo ebezisetshenziswa nxa kuthethwa amanye amacala ebesiwetheswa yizitha zethu, zizama ukuhlasela ilungelo lethu lokutshumayela izindaba zoMbuso obala lasendlini ngendlu.

24. Senzani nxa ohulumende besenqabela ukutshumayela?

²⁴ Sonke esiyizinceku zikaJehova siyajabula kakhulu nxa ohulumende besinika ilungelo elisemthethweni lokutshumayela izindaba zoMbuso sikhululekile. Kodwa nxa bengafaka imithetho evimbela umsebenzi wethu kasiyekeli ukutshumayela, siyantshintsha izindlela ebesizisebenzisa kuphela. Njengabaphostoli, “simele silalele uNkulunkulu kulokulalela abantu!” (ImiSeb. 5:29; Mat. 28:19, 20) Kanti njalo siyadlulisela amacala esiwetheswayo emithethwandaba ukuze imithetho esicindezelayo isuswe. Cabanga ngezibonelo ezimbili.

25, 26. Kwasekutheni eNicaragua abafowethu baze baye eMthethwandaba Omkhulu, njalo kwaphetha ngani?

²⁵ ENicaragua. NgoNovember 19, 1952, uDonovan Munsterman owayengumnali njalo eyinceku yegatsha, wahamba waya emaWofisini akhangela ngezokuya kwamanye amazwe edolobheni laseManagua. Wayetshelwe ukuthi ayebona uCaptain Arnoldo García owayengumphathintambo emawofisini la. UCaptain García watshela uDonovan ukuthi bonke oFakazi bakaJehova eNicaragua “babengasavunyelwa ukuqhubeka betshumayela ngezimfundiso zabo lokwenza loba yini ephathelane lenkolo yabo.” Lapho ebuzwa ukuthi kungenxa yani, uCaptain García wachaza ukuthi uhulumende wayenganikanga oFakazi bakaJehova imvumo yokwenza inkonzo yabo, lokuthi babefakwe icala lokuba ngamakhomanisi. Ngobani ababesifaka icala? Ngabafundisi abangamaRoma Katolika.

²⁶ UMfowethu Munsterman wathi esuka lapho wadlulisela indaba le kuHlangothi lukaHulumende Olukhangela Ngezenkolo, kanye lakuMongameli welizwe lakibo u-Anastasio Somoza García, kodwa kabazange bamncede ngalutho. Ngakho abafowethu bantshintsha izindlela ababezisebenzisa. Bavala iWolu loMbuso, baqalisa ukuhlangana bengamaqembu amancane njalo babengasatshumayeli emigwaqweni, kodwa baqhubeka betshumayela izindaba zoMbuso. Kanti njalo babhalela uMthethwandaba Omkhulu waseNicaragua, becela ukuthi umthetho lo owawubavimbela ukuthi bakhonze wesulwe. Amaphephandaba abhala kanengi ngokuvinjelwa kwabafowethu kanye langalokho ababekubhalele uMthethwandaba Omkhulu, njalo umthethwandaba lo wavuma ukuphatha udaba lwabo. Kwenzakalani ngemva kwalokho? NgoJune 19, 1953 uMthethwandaba Omkhulu wakhipha isinqumo sawo esasisekela oFakazi. UMthethwandaba wathola ukuthi umthetho owawubavimbela ukuthi bakhonze, wawusephula amalungelo abo okuveza imibono yabo, okulandela umzwangedwa wabo lawokuveza abakukholwayo bekhululekile. Wanika lomlayo wokuthi uhulumende waseNicaragua laboFakazi balungisise ubudlelwano babo bube njengakuqala.

27. Kuyini okwamangalisa abantu beNicaragua ngesinqumo esethulwa nguMthethwandaba, njalo abafowethu babeqiniseka ngani?

²⁷ Abantu baseNicaragua bamangala kakhulu ukuthi uMthethwandaba Omkhulu wawusekele oFakazi. Phela abafundisi babesesatshwa okokuthi uMthethwandaba lo wawusiba leqiniso lokuthi kawuphikisani labo. Futhi abaphathintambo bakahulumende babelamandla okokuthi kwakukalutshwana ukuthi uMthethwandaba uphikisane lezinqumo zabo. Abafowethu babengathandabuzi ukuthi okwakubenze banqoba yikuthi babevikelwe yiNkosi yabo futhi babengazange bayekele ukutshumayela.​—ImiSeb. 1:8.

28, 29. Yiluphi untshintsho olwaba seZaire ngeminyaka yabo-1985?

²⁸ EZaire. Ngeminyaka yabo-1985, kwakulaboFakazi abangaba yi-35 000 eZaire, khathesi esibizwa ngokuthi yiDemocratic Republic of Congo. Ngenxa yokuthi izinhlelo eziphathelane loMbuso zazisanda, igatsha laqalisa ukwakha ezinye izakhiwo ezazizasetshenziswa. NgoDecember 1985, kwaba lomhlangano wezizwe esigodlweni saseKinshasa, njalo abantu abangu-32 000 ababesuka emazweni amanengi babegcwele enkundleni. Kodwa izinto zaqalisa ukuntshintsha. Kwenzakalani?

²⁹ UMfowethu uMarcel Filteau owayevela eQuebec eCanada, wayengumnali eZaire ngaleso sikhathi njalo wayeke wahlukuluzwa kusabusa uDuplessis. Walandisa lokho okwenzakalayo wathi: “NgoMarch 12, 1986 abafowethu ababekhokhela baqhutshelwa incwadi eyayibatshela ukuthi inhlanganiso yaboFakazi bakaJehova eZaire yayingasekho emthethweni.” Incwadi le yayisayinwe ngumongameli welizwe, uMobutu Sese Seko.

30. IKhomithi yeGatsha kwakumele yenza siphi isinqumo esinzima, njalo bakhetha ukwenzani?

³⁰ Ngelanga elilandelayo, umsakazo welizwe wamemezela wathi: “Kasisoze siphinde sizwe ngaboFakazi bakaJehova [eZaire].” Masinyane nje ukuhlukuluzwa kwasekuqalisile. AmaWolu oMbuso abhidlizwa, abafowethu bathathelwa impahla yabo futhi babotshwa, baphoselwa emajele njalo babhulwa. Abantwana abangoFakazi labo babefakwa emajele. Ngo-October 12, 1988, uhulumende wathathela inhlanganiso yethu izakhiwo zayo, njalo ibutho okwakuthiwa yi-Civil Guard lahamba layahlala emawofisini egatsha. Abafowethu abafaneleyo babhalela uMongameli uMobutu incwadi bekhalaza, kodwa kabazange bathole impendulo. Khathesi iKhomithi yeGatsha kwasekumele yenze isinqumo esinzima esokuthi, “Sidlulisele udaba lolu eMthethwandaba Omkhulu, kumbe silinde?” UTimothy Holmes owayengumnali njalo engumhleli weKhomithi yeGatsha lakulelo ngalesosikhathi uthi, “Sacela uJehova ukuthi asinike inhlakanipho njalo asiqondise.” Ngemva kokuthandaza lokuxoxa kabanzi, ikhomithi yabona ukuthi isikhathi sokuthi badlulisele udaba lolu emthethwandaba sasingakafiki. Esikhundleni salokhu bagxila ekunakekeleni abazalwane lasekutholeni ezinye izindlela zokuthi baqhubeke betshumayela.

31, 32. Yisiphi isinqumo esenziwa nguMthethwandaba Omkhulu weZaire, njalo kwabathinta njani abafowethu?

³¹ Ngemva kweminyaka ethile, ukuhlukuluzwa kwaboFakazi kwaqalisa ukwehla, abantu elizweni leli baqalisa ukuhlonipha amalungelo oluntu. IKhomithi yeGatsha yasibona ukuthi sasesifikile isikhathi sokuthi badlulisele udaba lwabo eMthethwandaba Omkhulu waseZaire. Ngesimanga, uMthethwandaba wavuma ukulalela isikhalazo sabo. Kwasekusithi ngoJanuary 8, 1993, sekudlule iminyaka ephose ibe yisikhombisa umongameli evimbele umsebenzi wabo, uMthethwandaba wathi lokho uhulumende ayekwenzile kwakungekho emthethweni, njalo umthetho wokuvimbela oFakazi wesulwa. Akucabange nje ukuthi lokho kwakusitshoni! Abahluli basebefake izimpilo zabo engozini ngokuthukulula ifindo elalibotshwe ngumongameli welizwe ngokwakhe! UMfowethu uHolmes uthi, “Ngesikhathi kudonselwana emthethwandaba, sayibona indlela uJehova aguqula ngayo izinto.” (Dan. 2:21) Ukunqoba lokhu kwaqinisa ukholo lwabafowethu. Bavuma ukuthi iNkosi uJesu yayiqondise abantu bayo ukuthi bakwazi okumele bakwenze lokuthi bakwenze nini.

³² Kuthe abafowethu sebekhululekile, iwofisi yegatsha yavunyelwa ukuthi ilethe abanali, yakhe amanye amawofisi njalo ingenise amabhuku asekelwe eBhayibhilini elizweni.f Izinceku zikaNkulunkulu emhlabeni wonke ziyajabula kakhulu lapho zibona indlela uJehova avikela ngayo ukukhonza kwabantu bakhe!​—Isaya. 52:10.

33. Kuyini esikufundayo endabeni lezi zomthethwandaba?

³³ Izindaba zasemthethwandaba esesixoxe ngazo zifakazela ukuthi uJesu usigcinile isithembiso sakhe esithi: “Ngizalinika amazwi lokuhlakanipha ukuze angabi khona ezitheni zenu ozalehlula loba aliphikise.” (Bala uLukha 21:12-15.) Ngezinye izikhathi bekuzicacela ukuthi uJehova ubesebenzisa oGamaliyeli balamuhla ukuze avikele abantu bakhe, loba ukuze enze ukuthi abahluli lamagqwetha alesibindi amele ukulunga. UJehova uzithundubezile izikhali zezitha zethu. (Bala u-Isaya 54:17.) Ukuphikiswa ngeke kumise umsebenzi kaNkulunkulu.

34. Kuyini okumangalisayo ngokunqoba kwethu emthethwandaba futhi lokhu kutshengisani? (Khangela lebhokisi elithi “Ukunqoba Okubabazekayo Emithethwandaba Okwenza Ukutshumayela NgoMbuso Kwaphumelela.”)

³⁴ Kungani kumangalisa ukuthi besinqoba emthethwandaba? Cabanga ngalokhu: OFakazi bakaJehova kayisibo bantu abadumileyo kumbe abalamandla. Kasivoti, kasisekeli imikhankaso yezombusazwe njalo kasizami ukusebenzisa abezombusazwe ukuthi bafake imithetho ehambelana lathi. Kanti njalo abanye bethu abacina sebesemithethwandaba emikhulu bakhanya ‘bengabantu makhaza abangafundanga.’ (ImiSeb. 4:13) Ngakho ngokubona kwabantu, imithethwandaba kayilasizatho sokusilamulela lesokukhipha izinqumo eziphikisana lalokho okutshiwo ngabezenkolo abalamandla labezombusazwe abasiphikisayo. Kodwa sekukanengi imithethwandaba ithatha elethu icele! Ukunqoba kwethu kutshengisa ukuthi sihamba loKhristu ‘phambi kukaNkulunkulu.’ (2 Khor. 2:17) Yikho-ke siyavuma ndawonye lomphostoli uPhawuli ukuthi: “INkosi [“uJehova,” NW] ingumsizi wami; kangiyikwesaba.”​—Heb. 13:6.