Impilo Yaqalisa Njani?

IBhayibhili lithi uNkulunkulu ‘nguye osinika ukuphila.’ (IHubo 36:9) Wena uyakukholwa yini lokhu? Abanye bathi zonke izinto ezikhona zazivelela. Nxa abakutshoyo kuliqiniso, kutsho ukuthi labantu baphongubakhona nje. Kodwa njengoba uJehova kunguye owadala izinto zonke, kumele ukuthi kukhona ayekuhlosile.a Ake sizwe ukuthi iBhayibhili lithi impilo yaqalisa njani lokuthi yiziphi izizatho ezingakwenza ukholwe elikutshoyo.

1. Umhlaba lezinkanyezi kwavela ngaphi?

IBhayibhili lithi: “Ekuqaleni uNkulunkulu wadala amazulu lomhlaba.” (UGenesisi 1:1) Abezesayensi abanengi bayavuma ukuthi amazulu lomhlaba kwaba lesiqalo. UNkulunkulu wakudala njani lokhu? Wasebenzisa umoya ongcwele okutsho amandla akhe ukuze adale umhlaba, amaplanethi lemithala egcwele izinkanyezi.—UGenesisi 1:2.

2. UNkulunkulu wawudalelani umhlaba?

UJehova ‘kawudalanga [umhlaba] ukuthi ungabi lalutho kodwa wawubumba ukuze kuhlalwe kuwo.’ (U-Isaya 45:18) Wadala umhlaba wethu waba muhle kakhulu ukuze sikholise ukuphila kuwo. (Bala u-Isaya 40:28; 42:5.) Abezesayensi bathi umhlaba awufanani lamanye amaplanethi ngoba yiwo wodwa olezinto zonke ezifunekayo ukuze abantu baphile.

3. Kuyini okwenza abantu bangafanani lezinyamazana?

UJehova waqala ngokudala umhlaba wasesenza izimila lezinyamazana. Ngemva kwalokho ‘wadala umuntu ngomfanekiso wakhe.’ (Bala uGenesisi 1:27.) Kuyini okwenza abantu bangafanani lezinyamazana? Kungenxa yokuthi senziwe ngomfanekiso kaNkulunkulu, okutsho ukuthi siyenelisa ukuba lobuntu obunjengobakhe. Lokhu yikho okwenza senelise ukuba lothando lokwahlulela kuhle. Siyenelisa lokufunda izindimi ezitshiyeneyo, ukukholisa umculo futhi siyathokoza nxa sibuka izinto ezinhle. Okunye njalo okwenza singafanani lezinyamazana yikuthi siyenelisa ukukhonza uMdali wethu.

GEBHA UJULE

Engxenyeni le uzabona ubufakazi obutshengisa ukuthi izinto ezikhona zadalwa. Lokhu kuzakwenza ukholwe ukuthi okutshiwo liBhayibhili ngendaba le kuliqiniso. Uzathola lokuthi indlela abantu abadalwe ngayo isifundisani ngoNkulunkulu.

4. Izinto eziphilayo zadalwa

Abantu bayabatshazwa nxa bangenza izinto ezitshiyeneyo bekopa ezintweni ezidaliweyo. Kodwa kuthiwani ngalowo owadala lokho abakopa kukho? Bukelani IVIDIYO beselixoxa ngombuzo olandelayo.

IVIDIYO: Ukukholwa KuNkulunkulu (2:43)

• Yiziphi izinto abantu abazenzileyo bekopa ezintweni ezidaliweyo?

Yonke indlu yakhiwa ngomunye umuntu. Pho ngubani owadala zonke izinto? Bala uHebheru 3:4 beselixoxa ngemibuzo le:

• Kuyini okuthanda kakhulu ezintweni ezidaliweyo?

• Uyakukholwa yini ukuthi izinto zonke zadalwa? Yindaba usitsho njalo?

Ubukwazi yini?

Ungathola okunengi mayelana lezinto ezidaliweyo ku-jw.org engxenyeni ethi “Kwazenzakalela Yini?” lethi “Okutshiwo Ngabanye Mayelana Lemvelaphi Yempilo.”

“Phela yonke indlu yakhiwa ngomunye umuntu, kodwa umakhi wezinto zonke nguNkulunkulu”

5. Izizatho ezenza sikholwe okutshiwo liBhayibhili mayelana lezinto ezidaliweyo

IVIDIYO: Amazulu Lomhlaba Kwavela Ngaphi?—Isiqephu (3:51)

• IBhayibhili lithi amalanga ayisithupha okudalwa kwezinto ayengamahola angu-24 yini?

• Okukhulunywa liBhayibhili ngokudalwa kwezinto kulengqondo yini? Kungani usitsho njalo?

Bala uGenesisi 1:1 beselixoxa ngombuzo lo:

• Abezesayensi bathi amazulu lomhlaba kwaba lesiqalo. Abakutshoyo kuhambelana njani lalokho osanda kukubala evesini le?

Abanye abantu bacabanga ukuthi uNkulunkulu wasebenzisa ukuzenzakalela kwemvelo ukuthi adale izinto ezikhona. Bala uGenesisi 1:21, 25, 27 beselixoxa ngemibuzo elandelayo:

• IBhayibhili lifundisa ukuthi uNkulunkulu wadala into eyodwa yini lapho okwavela khona inhlanzi, lezinyamazana labantu? Kungani usitsho njalo?

6. Abantu batshiyene lezinyamazana

Abantu batshiyene sibili lezinyamazana. Bala uGenesisi 1:26 beselixoxa ngombuzo lo:

• Kutshoni ukuthi uNkulunkulu wasidala ngomfanekiso wakhe futhi lokho kusitshengisani ngaye?

ISIFINQO

UJehova wadala amazulu lomhlaba lakho konke okukuwo.

Ufundeni?

• IBhayibhili lithini ngemvelaphi yamazulu lomhlaba?

• UNkulunkulu wadala into eyodwa yini lapho okwavela khona zonke izinto kumbe wadala izinto zonke ziyimihlobo etshiyeneyo?

• Kuyini okwenza abantu bangafanani lezinyamazana?

THOLA OKUNENGI

Bala isihloko lesi uzwe ngezinye izinto ezidaliweyo ezisitshiya singathandabuzi ukuthi kuloMdali.

“Izinto Ezidaliweyo Zisifundisani?” (Vukani!, September 2006)

Bukela ividiyo le ukuze ubone ubaba echasisela umntanakhe okutshiwo liBhayibhili ngokuthi izinto zadalwa njani.

“UJehova Wadala Izinto Zonke” (2:37)

Bala uzwe ukuthi imfundiso yokuzenzakalela kwemvelo iyahambelana yini lalokho okufundiswa liBhayibhili.

“UNkulunkulu Wasebenzisa Ukuzenzakalela Kwemvelo Ukuze Adale Izinto Yini?” (Isihloko esikuwebhusayithi yethu)

Izinto ezikhona zadalwa yini kumbe zazivelela? Bala uzwe ukuthi abezesayensi labezembali bathini.

Impilo Yaqalisa Njani?—Izimpendulo Zemibuzo Emihlanu Eqakathekileyo (Ibhukwana)