ISIFUNDO 39
UNkulunkulu Uthini Ngegazi?
Igazi liqakathekile ngoba ngeke siphile singelalo. UNkulunkulu nguye kuphela okumele asitshele ukuthi silisebenzise njani igazi njengoba kunguye owasidalayo. Uthini uNkulunkulu ngegazi? Kuqondile yini ukuthi silidle kumbe silifakwe emzimbeni nxa siselatshwa? Kuyini okungasinceda ukuthi sikhethe kuhle endabeni le?
1. UJehova uthini ngegazi?
UJehova watshela izinceku zakhe wathi: “Ukuphila kwesidalwa sonke ligazi laso.” (ULevi 17:14) Kuye igazi limela ukuphila. Njengoba impilo iyisipho esiligugu esisiphiwe nguNkulunkulu, igazi lalo liqakatheke kakhulu.
2. UNkulunkulu uthi kuyini okungamelanga sikwenze ngegazi?
Kungakabunjwa ibandla lamaKhristu, uJehova watshela izinceku zakhe ukuthi zingadli igazi. (Bala uGenesisi 9:4 loLevi 17:10) UJehova wawuphinda umthetho lo esebenzisa iqula elikhokhelayo ngemva kokubunjwa kwebandla lamaKhristu. Wathi: ‘Liqhubeke lixwaya . . . igazi.’—Bala imiSebenzi 15:28, 29.
Kutshoni ukuxwaya igazi? Ake sithi udokotela ukutshele ukuthi ungasanathi utshwala, ubuzakwenzani? Ubungakudla yini ukudla okulotshwala? Ubuzabufaka yini emzimbeni ngemithambo yegazi? Ubungasoze ukwenze lokhu! Lomthetho kaNkulunkulu wokuxwaya igazi utsho ukuthi akumelanga silinathe kumbe sidle ukudla okulegazi loba inyama yenyamazana engazange yophe.
Kuthiwani ngokusebenzisa igazi endabeni zokwelatshwa? Ezinye indlela zokwelatshwa kusetshenziswa igazi kazimthokozisi uNkulunkulu, njengokufakwa igazi lilonke kumbe izingxenye zalo ezine. Izingxenye zakhona yilezi: ama-red cells, ama-white cells, ama-platelets, le-plasma. Ngezinye izikhathi kungaba nzima ukwazi ukuthi indlela esifuna ukwelatshwa ngayo iyavumelana yini lomthetho kaNkulunkulu omayelana legazi. Ngokwesibonelo, ezinye indlela zokwelatshwa zingadinga ukuthi kusetshenziswe izingxenyana zegazi kumbe igazi lalowo owelatshwayo. UmKhristu ngamunye kumele azikhethele endabeni le.a—KwabaseGalathiya 6:5.
GEBHA UJULE
Engxenyeni le uzabona amacebo azakunceda ukuthi ukhethe kuhle endabeni yokwelatshwa kusetshenziswa igazi.
3. Khetha ukwelatshwa ngendlela ethokozisa uJehova
Ungabakwazi njani ukuthi indlela ofuna ukwelatshwa ngayo ithokozisa uNkulunkulu? Bukelani IVIDIYO beselixoxa ngokuthi kungani kuqakathekile ukwenza okulandelayo ungakakhethi indlela yokwelatshwa.
Ukuthandaza ucela ukuhlakanipha.—UJakhobe 1:5.
Ukuhlola izimiso eziseBhayibhilini ubusubona lokuthi ungazisebenzisa njani.—IZaga 13:16.
Ukudingisisa ukuthi yiziphi indlela zokwelatshwa ezisetshenziswayo lapho ohlala khona.
Ukuhlola ukuthi yiziphi indlela zokwelatshwa ongasoze uzamukele.
Ukukhetha ngendlela ezakutshiya ulomzwangedwa ohlanzekileyo.—ImiSebenzi 24:16.b
Ukukhumbula ukuthi akulamuntu okumele akwenzele isinqumo endabeni yokwelatshwa, kungaba ngumkakho, umdala webandla kumbe lowo okufundisa iBhayibhili.—KwabaseRoma 14:12.
Ukubhala phansi okukhethileyo.
4. OFakazi bakaJehova bafuna ukwelatshwa ngendlela engcono kakhulu
UmKhristu angenelisa ukwelatshwa ngendlela engcono kakhulu engazange ephule umthetho kaNkulunkulu omayelana legazi. Bukelani IVIDIYO.
Bala uThithusi 3:2 beselixoxa ngombuzo lo:
Kungani kuqakathekile ukuthi sikhulume ngomusa lalabo abaselaphayo?
Esingakwamukeliyo |
Okumele umKhristu azikhethele khona |
|---|---|
A. I-Plasma |
Izingxenyana zegazi ezithethwe ku-plasma |
B. Ama-White cells |
Izingxenyana zegazi ezithethwe kuma-white cells |
C. Ama-Platelets |
Izingxenyana zegazi ezithethwe kuma-platelets |
D. Ama-Red cells |
Izingxenyana zegazi ezithethwe kuma-red cells |
5. Nxa kumele kusetshenziswe izingxenyana zegazi
Igazi lilezingxenye ezine ezigoqela ama-red cells, ama-white cells, ama-platelets, le-plasma. Phakathi kwezingxenye lezi kulezingxenyana ezitshiyeneyo.c Ezinye izingxenyana zisetshenziswa ukulungisa imithi yokwelapha imikhuhlane ethile kumbe eyokumisa ukopha.
UmKhristu ngamunye kumele akhethe ukuthi uzavuma yini ukwelatshwa kusetshenziswa izingxenyana zegazi loba hatshi. Lesi yisinqumo okumele azenzele sona esebenzisa umzwangedwa wakhe ofundiswe liBhayibhili. Abanye bangakhetha ukwala ukwelatshwa kusetshenziswa izingxenyana zegazi. Abanye njalo bakhululekile ukwelatshwa kusetshenziswa izingxenyana zegazi.
Cabanga ngombuzo lo nxa ususenza isinqumo:
Ngiyenelisa yini ukuchasisela udokotela ukuthi kungani ngivuma kumbe ngisala ukufakwa izingxenyana zegazi?
NXA OMUNYE ANGATHI: “Kubi yini ukufakwa igazi?”
Wena uthini ngendaba le?
ISIFINQO
UJehova kafuni sisebenzise kubi igazi ngoba lingcwele.
Ufundeni?
Kungani uJehova esithi igazi liqakathekile?
Sikwazi njani ukuthi umthetho kaNkulunkulu wokuxwaya igazi utsho lokungafakwa igazi?
Kuyini okungakunceda ukuthi ukhethe kuhle endabeni yokwelatshwa kusetshenziswa igazi?
THOLA OKUNENGI
Bala isihloko lesi ubone okuzakunceda ukhethe ukuthi uzavuma yini ukwelatshwa kusetshenziswa igazi lakho loba hatshi.
“Imibuzo Ebuzwa Ngabafundi” (INqabayokulinda, October 15, 2000)
Bala isihloko lesi ukuze ubone okuzakunceda ukhethe ukuthi uzavuma yini ukwelatshwa kusetshenziswa izingxenyana zegazi loba hatshi.
“Imibuzo Ebuzwa Ngabafundi” (INqabayokulinda, June 15, 2004)
Bala isihloko lesi uzwe ukuthi kuyini okwenza omunye udokotela wakholwa ukuthi indlela uJehova abona ngayo igazi iqondile.
“Sengiwuzwisisa Umthetho KaNkulunkulu Omayelana Legazi” (Vukani!, December 8, 2003)
Bukela ividiyo le ubone ukuthi abadala abakumaKhomithi Asebenzelana Lezibhedlela babancedisa njani abafowethu labodadewethu.
a Bala Isifundo 35 esilesihloko esithi, “Kuyini Okuzakunceda Ukuthi Ukhethe Kuhle?”
b Bala umcijo wesihlanu othi, “Nxa Kumele Kusetshenziswe Izingxenyana Zegazi” Lamabala Asekucineni 3 athi “Izindlela Zokwelatshwa Kusetshenziswa Igazi.”
c Abanye odokotela bathi izingxenyana ezitholakala egazini ziyazifananela nje lezingxenye ezine zegazi. Yikho kuzamele uchasisele udokotela wakho ukuthi kungani ungasoze ufakwe igazi lilonke kumbe ama-red cells, ama-white cells, ama-platelets loba i-plasma.