ISIHLOKO ESISEKUQALISENI | UNKULUNKULU ULENDABA LAWE YINI?
UNkulunkulu Angakududuza
“UNkulunkulu oduduza abadanileyo, wasiduduza.”—2 KWABASEKHORINTE 7:6.
‘INdodana kaNkulunkulu yangithanda njalo yazinikela ngenxa yami.’—KWABASEGALATHIYA 2:20
KUNGANI ABANYE BETHANDABUZA? Abanye abantu bayabe bekufuna ukududuzwa kodwa abakhululekanga ukucela ukuthi uNkulunkulu abaduduze ngoba babona angani kulabanye abadubeka kakhulu ukwedlula bona. Omunye umama okuthiwa ngu-Raquel uthi: “Nxa ngikhangele abantu abanengi kakhulu emhlabeni, ngibona lezinkathazo abaphakathi kwazo, ngicina ngibona ezami zizincane kakhulu besengithikaza ukucela ukuthi uNkulunkulu angincedise.”
ILIZWI LIKANKULUNKULU LISIFUNDISANI? Kulokuthile uNkulunkulu asekwenzile ukuze ancedise abantu njalo abaduduze. Sonke emhlabeni sizalwa silesono, yikho kwezinye izikhathi sisenza izinto uNkulunkulu angazifuniyo. Lanxa kunjalo uNkulunkulu “wasithanda wathumela iNdodana yakhe [uJesu Khristu] njengomhlatshelo wenhlawulo yezono zethu.” (1 UJohane 4:10) Yikho-ke sithethelelwa izono ngenxa yokuthi uNkulunkulu wathuma uJesu ukuthi azosifela. Kanti njalo ukusifela kwakhe kwenza sibe lomzwangedwa ohlanzekileyo kanye lethemba lokuthola impilo engapheliyo emhlabeni omutsha olokuthula.a Kodwa umhlatshelo lo unceda abantu bonke nje yini, kumbe utshengisa ukuthi uNkulunkulu ulendaba lawe wena ngokwakho?
Umphostoli uPhawuli wayewuqakathekisa kakhulu umhlatshelo kaJesu. Yikho wabhala wathi: “Ngiphila ngokukholwa eNdodaneni kaNkulunkulu, eyangithandayo njalo yazinikela ngenxa yami.” (KwabaseGalathiya 2:20) UJesu wafa uPhawuli engakabi ngumKhristu. Kodwa uPhawuli wakuthatha ngokuthi umhlatshelo kaJesu wawuyisipho esiphiwe yena.
Yikho-ke uNkulunkulu wanika wena isipho ngokuthuma uJesu ukuthi azokufela. Isipho lesi sitshengisa ukuthi uyakuqakathekisa kakhulu. Singakwenza uthole “isikhuthazo esingapheliyo lethemba elihle” ukuze ‘uqiniswe kuzo zonke izenzo ezinhle lasemazwini amahle.’—2 KwabaseThesalonika 2:16, 17.
Sekwadlula iminyaka engaba yi-2 000 uJesu enikele ngokuphila kwakhe. Kodwa kuyini okutshengisa ukuthi lalamuhla uNkulunkulu ufuna ukuthi ube lobuhlobo obuhle laye?
a Ukuze ufunde okunengi ngomhlatshelo kaJesu, khangela isahluko 5 ebhukwini elithi IBhayibhili Lifundisani Sibili? elidindwa ngoFakazi bakaJehova.