UJehova Uyabathanda Labo Abathela Izithelo Ngokubekezela

1, 2. (a) Isibonelo sabafowethu labodadewethu abaqhubeka betshumayela lanxa abantu bengalaleli sikukhuthaza njani? (Khangela umfanekiso osekuqaliseni.) (b) UJesu wathi kwakunjani ukutshumayela edolobheni lakibo? (Khangela amabala angaphansi.)

USERGIO LO-OLINDA ngamaphayona adabuka e-United States futhi bobabili sebeleminyaka edlula 80. Umzalwane lo lomkakhe abasenelisi ukubhoda betshumayela ngoba sebekhulile. Kodwa nsuku zonke ekuseni bayavuka baye kwenye indawo ephithizelayo edolobheni, ngo-7 bayabe sebefikile kuleyondawo. Bangafika bayahamba bayekuma eduze kwesititshi samabhasi ukuze bahambise amabhuku ethu ebantwini abadlulayo. Abantu abanengi abalandaba labo kodwa uSergio lo-Olinda abasuki endaweni le njalo bayabobotheka nxa umuntu odlulayo ebakhangela. Emini bayatotoba babuyele emzini wabo. Ngelanga elilandelayo ngo-7 ekuseni bayabe sebekhona futhi endaweni yabo. Indoda le lomkayo batshumayela izindaba ezinhle okwamalanga ayisithupha iviki ngayinye umnyaka uze uyephela.

² Banengi abafowethu labodadewethu emhlabeni wonke abaqhubeka betshumayela njengoSergio lo-Olinda lanxa izindawo abatshumayela kuzo zilabantu abangalaleliyo. Mhlawumbe lawe utshumayela endaweni enjalo. Siyakubonga kakhulu ngokuthi uyabekezela njalo uqhubeka utshumayela lanxa abantu bengalaleli.a Isibonelo sakho esihle siyabakhuthaza abanye kugoqela lalabo asebelesikhathi eside bekhonza. Abanye ababonisi beziqinti bake bathi: “Ukutshumayela labafowethu labodadewethu abathembekileyo kuyangikhuthaza njalo kunginika amandla.” “Ukuhlala kwabo bethembekile kuyangikhuthaza ukuthi ngiphikelele futhi ngibe lesibindi enkonzweni.” “Isibonelo sabo siyangithokozisa kakhulu.”

 3. Yiphi imibuzo emithathu esizaxoxa ngayo njalo kuzasinceda ngani ukuyihlola?

³ Esihlokweni lesi sizaxoxa ngemibuzo emithathu: Kuyini okungabangela ukuthi sidane kwezinye izikhathi? Kutshoni ukuthela izithelo? Kuyini okuzasinceda ukuthi siqhubeke sithela izithelo ngokubekezela? Ukuthola izimpendulo zemibuzo le kuzasikhuthaza ukuthi siqhubeke sisenza umsebenzi wokutshumayela esawunikwa nguJesu.

 4. (a) Ukungalaleli kwamaJuda amanengi kwamphatha njani uPhawuli? (b) Kungani kwamphatha ngaleyondlela?

⁴ Sewake wadana yini ngenxa yokungalaleli kwabantu nxa utshumayela izindaba ezinhle? Umphostoli uPhawuli laye wake waba sesimeni esinjalo. Watshumayela okweminyaka ephose ibe ngu-30 futhi wenelisa ukusiza abantu abanengi ukuthi babe ngabafundi bakaKhristu. (ImiSeb. 14:21; 2 Khor. 3:2, 3) Lanxa kunjalo kazange aphumelele ukusiza amaJuda amanengi ukuthi akhonze uNkulunkulu weqiniso. AmaJuda amanengi kawazange amlalele futhi ayemhlukuluza. (ImiSeb. 14:19; 17:1, 4, 5, 13) Kwamphatha njani uPhawuli ukubona amaJuda engamlaleli? Wathi: “Ngikhuluma iqiniso ngikuKhristu . . . ngilosizi olukhulu lobuhlungu obungapheliyo enhliziyweni yami.” (Rom. 9:1-3) Kuyini okwenza uPhawuli wezwa ubuhlungu obunjalo? Wayewuthanda umsebenzi wokutshumayela futhi watshumayeza abantu ngenxa yokuthi wayebathanda. Yikho kwamzwisa ubuhlungu ukubona abantu bengafuni ukwamukela umusa kaNkulunkulu.

 5. (a) Kuyini okusifuqa ukuthi sitshumayele? (b) Kuyini okusenza sidane ngezinye izikhathi?

⁵ Lathi njengoPhawuli siyabatshumayeza abantu ngenxa yokuthi siyabathanda. (Mat. 22:39; 1 Khor. 11:1) Siyakwazi ukuthi ayikho into enhle ukwedlula ukukhonza uJehova njalo silesifiso sokuncedisa abanye ukuthi babone ubuhle lobu. Yikho sibakhuthaza ukuthi bafunde iqiniso ngoJehova kanye lalokho akuhlosileyo ngabantu. Nxa sitshumayela kufana lokuthi siyabe siphathele umuntu isipho esihle kakhulu futhi simncenga sisithi: “Thatha nansi isipho.” Nxa umuntu esala ukwamukela isipho esimphathele sona sizwa ‘ubuhlungu ezinhliziyweni zethu.’ Kayisikho ukuthi ubuhlungu esibuzwayo butshengisa ukuthi silokholo oluncane kodwa yibufakazi bokuthi siyawuthanda umsebenzi wokutshumayela. Siqhubeka sitshumayela lanxa kungenzakala ukuthi sidane ngezinye izikhathi. Abanengi bethu bangavumelana lodadewethu okuthiwa ngu-Elena oseleminyaka edlula 25 ephayona. Udade lo uthi: “Umsebenzi wokutshumayela kawulula. Kodwa awukho omunye umsebenzi engingawenza ngaphandle kwawo.”

 6. Yiwuphi umbuzo esizawuhlola?

⁶ Kuyini okungasisiza ukuthi sithele izithelo enkonzweni kungelani lokuthi sitshumayela ngaphi? Ukuze siphendule umbuzo lo oqakathekileyo ake sihlole imizekeliso emibili eyalandiswa nguJesu ephathelane ‘lokuthela izithelo’. (Mat. 13:23) Umzekeliso wokuqala esizaxoxa ngawo ngowevini loba isihlahla samagilebisi.

 7. (a) Ngobani abamela ‘umlimi,’ ‘ivini’ ‘lamagatsha’? (b) Sizaphendula wuphi umbuzo?

⁷ Bala uJohane 15:1-5, 8. UJesu watshela abaphostoli bakhe wathi: “Lokhu kungokwenkazimulo kaBaba ukuze lithele izithelo ezinengi, lizitshengisa ukuthi lingabafundi bami.” UJesu wachaza ukuthi uJehova “ungumlimi,” yena ‘ulivini eliqotho’ ikanti abafundi bakhe ‘bangamagatsha.’b Pho ziyini izithelo okumele abalandeli bakaKhristu bazithele? Emzekelisweni lo uJesu kazange atsho ngokuqondileyo ukuthi ziyini lezozithelo kodwa wakhuluma ngokuthile okuqakathekileyo okungasisiza ukuthi sithole impendulo.

 8. (a) Kungani kungaqondanga ukuthi sithi izithelo okukhulunywa emzekelisweni lo zimela abafundi abatsha? (b) Kuyini esikwaziyo ngoJehova nxa esinika umsebenzi othile?

⁸ UJesu wakhuluma ngoYise wathi: “Wonke amagatsha angatheli izithelo uyawaquma.” Lokhu kutshengisa ukuthi uJehova uthi siyizinceku zakhe kuphela uma sithela izithelo. (Mat. 13:23; 21:43) Emzekelisweni lo ukuthela izithelo akutsho ukwenza abafundi abatsha. (Mat. 28:19) Phela nxa kungaba njalo abafowethu labodadewethu abangenelisiyo ukwenza abafundi ngenxa yokuthi batshumayela ezindaweni ezilabantu abangalaleliyo bangacina bengani bazingatsha ezingatheliyo. Iqiniso yikuthi ngeke sibambe abantu ngamandla ukuthi babe ngabafundi. Khumbula ukuthi uJehova ulothando njalo ngeke athi senze into akwaziyo ukuthi asenelisi ukuyenza. Usicela izinto akwaziyo ukuthi sizazenza.​—Dute. 30:11-14.

 9. (a) Yiwuphi umsebenzi owenza sithele izithelo? (b) Yiwuphi umzekeliso esizaxoxa ngawo?

⁹ Pho ziyini izithelo okumele sizithele? Kucacile ukuthi izithelo zimela umsebenzi ngamunye wethu enelisa ukuwenza. Yiwuphi umsebenzi ongenza senelise ukuthela izithelo? Ngumsebenzi wokutshumayela izindaba ezinhle zoMbuso kaNkulunkulu.c (Mat. 24:14) Umzekeliso kaJesu womhlanyeli uyicacisa kuhle indaba le. Ake siwuhlole sizwe.

10. (a) Emzekelisweni womhlanyeli imelani inhlanyelo kanye lomhlabathi? (b) Isikhwebu sengqoloyi sithelani?

¹⁰ Bala uLukha 8:5-8, 11-15. Emzekelisweni womhlanyeli, inhlanyelo imela “ilizwi likaNkulunkulu” loba izindaba ezinhle zoMbuso. Umhlabathi umela izinhliziyo zabantu. Inhlanyelo eyawela emhlabathini omuhle yamila, yakhula yasiqala ukuthela izithelo njalo yathela okuphindwe ngekhulu. Ake sithi inhlanyelo le bekuyingqoloyi eyakhula yaze yaba lesikhwebu. Kuyini obekuzaphuma kulesosikhwebu? Ngezinye izikhwebu yini? Hatshi. Isikhwebu sengqoloyi sithela inhlanyelo loba intanga ezintsha ezingahlanyelwa zikhule besezithela ezinye izikhwebu. Emzekelisweni lo intanga eyodwa yamila, yakhula, yasithela okuphindwe ngekhulu. Lokhu kungenelana njani lomsebenzi wethu wokutshumayela?

11. (a) Umzekeliso womhlanyeli ungenelana njani lomsebenzi wethu wokutshumayela? (b) Yiphi indlela esithela ngayo inhlanyelo yoMbuso entsha?

¹¹ Ngesikhathi abazali bethu loba abanye oFakazi beqala ukusifundisa ngoMbuso kaNkulunkulu kwakufana lokuthi bahlanyele inhlanyelo emhlabathini omuhle. Akuthandabuzwa ukuthi bathokoza kakhulu lapho bebona sisamukela izindaba ezinhle. Inhlanyelo le abayihlanyelayo ezinhliziyweni zethu yaqhubeka ikhula yaze yalungela ukuthela izithelo. Njengoba sibonile ukuthi isikhwebu sengqoloyi sithela enye inhlanyelo hatshi esinye isikhwebu, yikho lathi sithela inhlanyelo yoMbuso entsha hatshi abafundi abatsha.d Sikwenza njani lokhu? Nxa sitshela abanye izindaba ezinhle zoMbuso kufana lokuthi sihaza inhlanyelo eyahlanyelwa ezinhliziyweni zethu. (Luk. 6:45; 8:1) Yikho umzekeliso lo usifundisa ukuthi nxa siqhubeka sitshumayela izindaba ezinhle zoMbuso kaNkulunkulu siyabe ‘sithela izithelo ngokubekezela.’

12. (a) Yisiphi isifundo esisithola emzekelisweni wevini lowomhlanyeli? (b) Isifundo lesi sikuncede njani?

¹² Sifundani emzekelisweni wevini lowomhlanyeli? Imizekeliso le iyasinceda sizwisise ukuthi ukuthela izithelo akuyi ngokuthi abantu esibatshumayezayo ensimini yethu bayalalela yini loba hatshi. Kodwa kuya ngokuthi siqhubeka sitshumayela yini. UPhawuli wakhuluma ngakho lokhu wathi: “Lowo lalowo uzavuzwa mayelana lokusebenza kwakhe.” (1 Khor. 3:8) Umvuzo siwuthola ngenxa yomsebenzi esiwenzileyo hatshi impumela yalowo msebenzi. Udadewethu okuthiwa nguMatilda oseleminyaka engu-20 ephayona uthi: “Kuyangithokozisa ukwazi ukuthi uJehova uyayibusisa imizamo esiyenzayo.”

13, 14. Yiziphi izizatho ezenza uPhawuli waqhubeka etshumayela lanxa abantu babengamlaleli?

¹³ Kuyini okuzasinceda ukuthi siqhubeke sithela izithelo ngokubekezela? Sibonile ukuthi uPhawuli wadana ngenxa yokuthi amaJuda ayengafuni ukulalela izindaba ezinhle zoMbuso. Lanxa kunjalo kazange akhalale kumbe ayekele ukuwatshumayeza. UPhawuli wabhalela amaKhristu eRoma eveza isifiso ayelaso ngalawomaJuda wathi: “Isifiso senhliziyo yami lomkhuleko wami kuNkulunkulu ngabako-Israyeli yikuba basindiswe. Ngoba ngingafakaza ngabo ukuthi batshisekela uNkulunkulu, kodwa ukutshiseka kwabo akugxilanga ekwazini.” (Rom. 10:1, 2) Yiziphi izizatho ezenza uPhawuli waqhubeka ngenkonzo yakhe?

¹⁴ UPhawuli uyasitshela ukuthi kuyini okwenza waqhubeka etshumayeza amaJuda. Isizatho sokuqala, wayefuqwa ‘yisifiso esasisenhliziyweni yakhe’ ngoba wayefisa ukuthi amaJuda asindiswe. (Rom. 11:13, 14) Esesibili, uPhawuli wakhuleka kuNkulunkulu ecelela amaJuda. Wayefuna ukuthi uJehova ancedise amaJuda amukele izindaba ezinhle zoMbuso. Esesithathu wathi: “Batshisekela uNkulunkulu.” UPhawuli wabona okuhle ebantwini laba lokuthi babengenelisa ukumkhonza uJehova. Wayelethemba lokuthi nxa amaJuda angafundiswa, angenelisa ukuntshintsha abe ngabalandeli bakaKhristu abatshisekayo njengaye.

15. Singamlingisela njani uPhawuli? Nika izibonelo.

¹⁵ Singamlingisela njani uPhawuli? Okokuqala kumele sibe lesifiso sokusiza labo ‘abamiselwe ukuphila okungapheliyo.’ Okwesibili kufanele simncenge uJehova ngomkhuleko ukuthi avule izinhliziyo zabantu ukuze basilalele. (ImiSeb. 13:48; 16:14) Omunye udadewethu okuthiwa nguSilvana oseleminyaka ephose ibe ngu-30 eliphayona uthi: “Ngingakangeni emzini womuntu nxa ngitshumayela ngiqala ngithandaze kuJehova ngicela ukuthi angisize ngibe lendaba labantu.” Okunye esikuthandazelayo yikuthi uNkulunkulu athumele izingilosi zisiqondise ebantwini abalesifiso sokulalela. (Mat. 10:11-13; Isam. 14:6) Umzalwane okuthiwa nguRobert osephayone okweminyaka edlula 30 uthi: “Kumnandi kakhulu ukusebenza lezingilosi ngoba zikwazi kuhle okwenzakala empilweni zalabo esibatshumayezayo.” Okwesithathu kufanele sizame ukubona okuhle ebantwini. Omunye umdala webandla okuthiwa nguCarl oseleminyaka edlula 50 ebhabhathiziwe uthi: “Nxa ngitshumayela ngiyazama ukukhangela izinto ezincane ezitshengisa ukuthi umuntu ulesifiso sokulalela, kungaba yikubobotheka, indlela angikhangela ngayo, umusa alawo loba umbuzo wakhe oqotho.” Kusegcekeni ukuthi singamlingisela uPhawuli ngokuqhubeka sithela izithelo ngokubekezela.

16, 17. (a) Sifundani emazwini atholakala kumTshumayeli 11:6? (b) Nika isibonelo esitshengisa ukuthi abantu bayawunanzelela umsebenzi wokutshumayela esiwenzayo?

¹⁶ Akumelanga sikhohlwe ukuthi ukutshumayela izindaba ezinhle zoMbuso kuyabasiza abantu lanxa kungakhanya kungelamuntu olalelayo. (UmTshu. 11:6, TBS) Abantu bayakubona konke esikwenzayo. Ngokwesibonelo bayayibona indlela esigqoka ngayo lendlela esiziphatha ngayo kanye lokuthi singabantu abalomusa lobungane. Yikho indlela esenza ngayo inganceda abantu abalemibono engaqondanga ngathi bacine bentshintsha. USergio lomkakhe u-Olinda esike sakhuluma ngabo ekuqaliseni bakubona lokhu.

¹⁷ USergio uthi: “Ngenxa yokugula sahlala isikhatshana singasahambi endaweni esasitshumayela kuyo. Sathi sesiqalisile ukuya khona abantu ababejayele ukusibona babesibuza besithi, ‘Besekutheni? Besesilikhumbula.’” U-Olinda laye wakhuluma ebobotheka wathi: “Abatshayeli bamabhasi babesiphakamisela izandla njalo abanye babememeza besithi, ‘Muhle umsebenzi wenu!’ Baze bacela labomagazini bethu.” Okunye okwamangalisa uSergio lo-Olinda yikuthi enye indoda yafika yama enqoleni ababetshumayela ngayo, yabanika amaluba yasibabonga ngomsebenzi omuhle abawenzayo.

18. Kuyini okwenza uzimisele ‘ukuthela izithelo ngokubekezela’?

¹⁸ Kasiqhubekeni sihlanyela inhlanyelo yoMbuso ngenkuthalo, ‘singasiphumuzi isandla sethu.’ Nxa sisenza njalo siyabe sitshengisa ukuthi siyakuqakathekisa ukunika ‘ubufakazi kuzo zonke izizwe.’ (Mat. 24:14) Okusithokozisa kakhulu yikwazi ukuthi nxa sikhuthele uJehova uzasamukela ngenxa yokuthi uthanda labo ‘abathela izithelo ngokubekezela.’