Umazi Kuhle Kangakanani UJehova?

1-2. Indaba ka-Angelito isifundisa ukuthi kumele senzeni?

ABAZALI bakho ngoFakazi bakaJehova yini? Nxa kunjalo, ungakhohlwa ukuthi kawungeke ube ngumngane kaJehova ngenxa nje yokuthi abazali bakho bangabangane bakhe. Ngamunye wethu kumele asebenze nzima ukuze abe ngumngane kaJehova kungelani lokuthi abazali bethu bangoFakazi loba hatshi.

² Ake sixoxe ngomzalwane okuthiwa ngu-Angelito. Bonke abangakibo ngoFakazi. Kodwa ngesikhathi esesemncane wayezizwa engekho eduze kukaNkulunkulu. Uthi: “Ngangikhonza uJehova ngenxa yokuthi ngangifuna ukulandela okwakusenziwa ngabangakithi.” Kodwa u-Angelito wazinika isikhathi sokubala iLizwi likaNkulunkulu lokucabangisisa ngayekubala futhi waqalisa ukuthandaza kanengi kuJehova. Kuyini akufundayo? Uthi: “Ngafunda ukuthi ukuze ngibe seduze loBaba osezulwini uJehova kumele ngimazi mina ngokwami.” Indaba ka-Angelito yenza sizibuze imibuzo eqakathekileyo. Owokuqala, yiwuphi umehluko okhona phakathi kokwazi uJehova lokumazi kuhle? Owesibili, kumele senzeni ukuze simazi kuhle?

 3. Yiwuphi umehluko okhona phakathi kokwazi uJehova lokumazi kuhle?

³ Singacabanga ukuthi siyamazi uJehova ngenxa yokuthi siyalazi ibizo lakhe kanye lalokho akukhulumileyo kumbe akwenzileyo. Kodwa ukwazi izinto lezi akutsho ukuthi simazi kuhle uJehova. Nxa sifuna ukumazi kuhle kumele sizinike isikhathi sokufunda ngaye langobuntu bakhe. Singenza njalo sizazwisisa ukuthi kungani esitsho futhi esenza izinto ezithile. Lokhu kuzasinceda sazi ukuthi esikucabangayo lesikwenzayo kuyamthokozisa yini. Nxa sesikwazi ukuthi kuyini uJehova afuna sikwenze, kumele sikwenze.

 4. Ukuxoxa ngezibonelo eziseBhayibhilini kuzasinceda njani?

⁴ Abanye abantu bangasihleka ngenxa yokuthi sifuna ukukhonza uJehova futhi bangasiphikisa okuzwayo nxa singaqalisa ukungena imihlangano yebandla. Kodwa nxa singamthemba uJehova kasoze asilahle loba sekutheni. Nxa singenza njalo siyabe siqalisa ubungane loNkulunkulu obuzahlala kuze kube nini lanini. Kodwa singenelisa yini ukumazi kuhle uJehova? Ye. Okwenziwa ngamadoda ayelesono uMosi leNkosi uDavida kutshengisa ukuthi singenelisa ukumazi kuhle uJehova. Sizaphendula imibuzo emibili ngesikhathi sixoxa ngokwenziwa ngamadoda la. Owokuqala, enzani ukuze amazi uJehova? Owesibili, sifundani kulokho akwenzayo?

 5. UMosi wakhetha ukwenzani?

⁵ UMosi wakhetha ukukhonza uNkulunkulu. Ngesikhathi eleminyaka engaba ngu-40 uMosi wakhetha ukuzihlanganisa lama-Israyeli kulokuthi aziwe ngokuthi “uyindodana yendodakazi kaFaro.” (Heb. 11:24) UMosi watshiya isikhundla esiphezulu. Wayekwazi ukuthi uFaro uzazonda abile lapho ekhetha ukuzihlanganisa lama-Israyeli ayeyizigqili eGibhithe. Phela uFaro wayengumbusi olamandla kakhulu futhi amaGibhithe ayecabanga ukuthi ungunkulunkulu. Okwenziwa nguMosi kutshengisa ukuthi wayelokholo oluqinileyo njalo emthemba uJehova. Indlela uMosi ayemthemba ngayo uJehova yiyo eyenza waba ngumngane wakhe okwempilo yakhe yonke.​—Zaga. 3:5.

 6. Indaba kaMosi isifundisani?

⁶ Sifundani? Lathi njengoMosi kumele sikhethe ukuthi sizakhonza uJehova futhi sizihlanganise labantu bakhe yini. Kungadingeka ukuthi sitshiye ezinye izinto ukuze sikhonze uNkulunkulu futhi singaphikiswa ngabantu abangamaziyo. Kodwa nxa simthemba uBaba wethu osezulwini kasisoze sithandabuze ukuthi uzasisekela.

7-8. Kuyini okunye uMosi akufundayo ngoJehova?

⁷ UMosi waqhubeka efunda ngobuntu bukaJehova njalo esenza intando yakhe. Ngokwesibonelo, ngesikhathi uJehova emcela ukuthi akhiphe isizwe sako-Israyeli eGibhithe wayengazithembi futhi watshela uJehova kanengi ukuthi kenelisi ukwenza umsebenzi ayemnike wona. Indlela uJehova amphendula ngayo yatshengisa ukuthi ulozwelo futhi wamnceda ngayekudinga. (Eks. 4:10-16) Lokhu kwenza uMosi wenelisa ukutshela uFaro izahlulelo ezilamandla ezivela kuJehova. Ngemva kwalokho uMosi wabona uJehova esebenzisa amandla akhe ukusindisa ama-Israyeli lokubhubhisa uFaro kanye lamabutho akhe eLwandle Olubomvu.​—Eks. 14:26-31; Hubo. 136:15.

⁸ Ama-Israyeli ayekhonona njalo nje ngesikhathi uMosi esewakhiphile eGibhithe. Lanxa kunjalo uMosi wabona indlela uJehova abekezelela ngayo abantu laba ayebakhulule ebugqilini. (Hubo. 78:40-43) Waphinda wabona ukuthi uJehova uthobekile ngesikhathi ekhetha ukungatshabalalisi ama-Israyeli lapho emcela ukuthi enze njalo.​—Eks. 32:9-14.

 9. Ngokwalokho okutshiwo kuHebheru 11:27, babunjani ubungane bukaMosi loJehova?

⁹ Ubungane bukaMosi loJehova baqhubeka buqina kakhulu langesikhathi esesukile eGibhithe okokuthi kwakungathi uyambona uYise osezulwini. (Bala uHebheru 11:27.) IBhayibhili litshengisa ukuthi ubungane babo babuseduze kangakanani, lithi: “UJehova wayekhuluma loMosi ubuso ngobuso njengomuntu ekhuluma lomngane wakhe.”​—Eks. 33:11.

10. Kumele senzeni nxa sifuna ukumazi kuhle uJehova?

¹⁰ Sifundani? Nxa sifuna ukumazi kuhle uJehova kumele sifunde ngobuntu bakhe futhi senze intando yakhe. Lamuhla intando kaJehova yikuthi “yonke imihlobo yabantu isindiswe njalo ithole ulwazi oluqondileyo lweqiniso.” (1 Tim. 2:3, 4) Enye indlela esenza ngayo intando kaNkulunkulu yikufundisa abantu ngaye.

11. Ukufundisa abanye ngoJehova kusinceda njani ukuthi simazi kuhle?

¹¹ Izikhathi ezinengi nxa sifundisa abantu ngoJehova lathi sibamazi kuhle. Ngokwesibonelo, siyabona ukuthi uJehova uyabazwela abantu nxa esikhokhela kulabo abafisa ukuba ngabangane bakhe. (Joh. 6:44; ImiSeb. 13:48) Siyakubona ukuthi iLizwi lakhe lilamandla ngoba linceda abantu esibafundisa iBhayibhili ukuthi batshiye imikhuba emibi njalo bagqoke ubuntu obutsha. (Kol. 3:9, 10) Kanti njalo siyabona ukuthi uJehova uyababekezelela abantu abasensimini yethu ngoba usithuma kubo kanenginengi ukuthi siyebafundisa ukuze basindiswe.​—Rom. 10:13-15.

12. Ngokwalokho okutshiwo ku-Eksodusi 33:13, uMosi wacelani kuJehova futhi kungani?

¹² UMosi wayebuqakathekisa ubungane bakhe loJehova. UJehova wasebenzisa uMosi ukuthi enze izimanga ezinengi yikho uMosi wayemazi kuhle uJehova. Lanxa kunjalo uMosi wamcela ukuthi amncede amazi ngcono. (Bala u-Eksodusi 33:13.) Ngesikhathi esenza isicelo leso wayeseleminyaka engaphezu kwengu-80 kodwa wayekwazi ukuthi kunengi okwakumele aqhubeke ekufunda ngoYise osezulwini olothando.

13. Yiphi enye indlela esingatshengisa ngayo ukuthi siyabuqakathekisa ubungane bethu loJehova?

¹³ Sifundani? Kumele sihlale sibuqakathekisa ubungane bethu loJehova kungelani lokuthi sesileminyaka emingaki simkhonza. Enye indlela esingatshengisa ngayo ukuthi siyabuqakathekisa ubungane bethu loNkulunkulu yikuthandaza.

14. Ukuthandaza kusinceda njani ukuthi sifunde ngoNkulunkulu?

¹⁴ Ukukhulumisana kuhle kungumgogodla waloba yibuphi ubungane. Yikho lathi singasondela kuNkulunkulu ngokuhlala sithandaza kuye singesabi ukumtshela lokho okusenzikini yezinhliziyo zethu. (Efe. 6:18) Owesifazana okuthiwa nguKrista ohlala eTurkey uthi: “Ngaso sonke isikhathi nxa ngitshela uJehova okusenhliziyweni yami besengibona engincedisa, ngizwa sengimthanda futhi sengimthemba kakhulu. Ukubona uJehova ephendula imithandazo yami kwenza ngambona enguBaba loMngane wami.”

15. UJehova wathini ngeNkosi uDavida?

¹⁵ INkosi uDavida yazalelwa esizweni esasizinikele kuJehova uNkulunkulu. Kodwa kayizange iphongukhonza uJehova ngenxa yokuthi yikho okwakusenziwa yimuli yangakiyo. Yazikhethela ukuba ngumngane kaNkulunkulu futhi uJehova wayeyithanda kakhulu. UJehova ngokwakhe wathi uDavida ‘yindoda evumelana lenhliziyo yakhe.’ (ImiSeb. 13:22) Kuyini okwenza uDavida waba seduze loJehova kangaka?

16. UDavida wafundani ngoJehova ngesikhathi ekhangela izinto ezidaliweyo?

¹⁶ UDavida wafunda ngoJehova ezintweni ezidaliweyo. UDavida esesemncane wayeqeda isikhathi esinengi eselusa izimvu zikayise. Kungenzakala yiso isikhathi aqalisa ngaso ukucabangisisa ngezinto ezidalwe nguJehova. Ngokwesibonelo, wayesithi nxa ekhangela phezulu ebusuku abone izinkulungwane zezinkanyezi. Kodwa kazange aphonguzikhangela nje, wazwisisa lobuntu balowo owazidalayo. Wabhala wathi: “Amazulu afakaza inkazimulo kaNkulunkulu; lomkhathi utshumayela umsebenzi wezandla zakhe.” (Hubo. 19:1, 2) Ngesikhathi uDavida ecabangisisa ngendlela emangalisayo abantu abadalwe ngayo wabona ukuthi uJehova uhlakaniphile. (Hubo. 139:14) Lapho ecabangisisa ngezinto ezidalwe nguJehova, wananzelela ukuthi mncane kakhulu nxa eqathaniswa laye.​—Hubo. 139:6.

17. Kuyini esizakufunda nxa sicabangisisa ngezinto ezidaliweyo?

¹⁷ Sifundani? Thanda izinto ezidaliweyo. Zinike isikhathi sokubuka umhlaba lo omuhle uJehova awudalileyo ukuze ubone indlela omangalisa ngayo. Nsuku zonke cabangisisa ngokuthi izinto ezidaliweyo ezigoqela izimila, izinyamazana labantu zikufundisani ngoJehova. Nxa ungenza njalo uzafunda izinto ezinengi ngoYihlo olothando. (Rom. 1:20) Ukubuka izinto ezidaliweyo kuzenza ukuthi uthando lwakho ngoJehova lukhule nsuku zonke.

18. Ngokwalokho okutshiwo kuHubo 18, uDavida wananzelelani?

¹⁸ UDavida wananzelela ukuthi wayencediswa nguJehova. Ngokwesibonelo, wabona ukuthi uJehova nguye owamncedisa ukuthi abulale isilwane lebhere ngesikhathi evikela izimvu zikayise ekuhlaselweni zinyamazana lezi. Lapho enqoba inkalakatha yendoda enguGoliyathi wazibonela ukuthi uJehova nguye owayemncedisa. (1 Sam. 17:37) Ngemva kokubalekela iNkosi uSawuli eyayilomhawu wananzelela ukuthi uJehova nguye owamkhululayo. (Hubo. 18, isihloko sendaba) Aluba uDavida wayezigqaja, wayezazitshaya isifuba ngakho konke akwenzayo. Kodwa wayethobekile yikho wabona ukuthi uJehova nguye owayemncedisa.​—Hubo. 138:6.

19. Isibonelo sikaDavida sisifundisani?

¹⁹ Sifundani? Kumele sicele uJehova ukuthi asincedise, sizame lokubona ukuthi usincedisa njani futhi nini. Nxa sithobekile sizavuma ukuthi kulezinye izinto esingenelisi ukuzenza lokuthi uJehova uyasincedisa ukuthi senze lokho esingakwenelisiyo. Sonke isikhathi nxa simbona esincedisa, ubungane bethu laye buzaqina. Lokhu kwenzakala ku-Isaac, umzalwane ohlala eFiji osekhonze uJehova okweminyaka eminengi. Uthi: “Nxa ngicabanga okwenzakala empilweni yami kudala, ngiyayibona indlela uJehova angincedisa ngayo kusukela ngiqalisa ukufunda iBhayibhili kuze kube khathesi. Lokhu kwenze ngabona ukuthi uJehova ukhona sibili.”

20. Ubungane bukaNkulunkulu loDavida busifundisani?

²⁰ UDavida walingisela ubuntu bukaJehova. UJehova wasidala ngendlela yokuthi siyenelisa ukulingisela ubuntu bakhe. (Gen. 1:26) Nxa singaqhubeka sifunda ngobuntu bakhe sizamlingisela ngendlela engcono kakhulu. UDavida wayemazi kuhle uYise osezulwini yikho wayesenelisa ukumlingisela endleleni ayephatha ngayo abanye. Ake sixoxe ngesibonelo esisodwa. Lanxa uDavida wonela uJehova ngokufeba loBhathisheba langokubulalisa u-Uriya, uJehova wamtshengisa isihawu. (2 Sam. 11:1-4, 15) Lokhu kwakungenxa yokuthi uDavida wayelingisela uJehova ngokuba lesihawu kwabanye. Wayengumngane kaJehova oseduze yikho ama-Israyeli ayemthanda kakhulu futhi uJehova wamsebenzisa njengesibonelo kwamanye amakhosi ako-Israyeli.​—1 AmaKho. 15:11; 2 AmaKho. 14:1-3.

21. Ngokwalokho okutshiwo ku-Efesu 4:24 lo-5:1, kungani kumele ‘silingisele uNkulunkulu’?

²¹ Sifundani? Kumele ‘silingisele uNkulunkulu.’ Ukwenza njalo kuyasinceda futhi kwenza sifunde okunengi ngaye. Nxa simlingisela siyabe sitshengisa ukuthi singabantwabakhe.​—Bala u-Efesu 4:24 lo-5:1.

22-23. Kuzakwenzakalani nxa singasebenzisa lokho esikufunda ngoJehova?

²² Sesibonile ukuthi sifunda ngoJehova ezintweni azidalileyo laseLizwini lakhe. IBhayibhili lilezibonelo ezinengi zabantu ababethembekile esingabalingisela, abanye babo nguMosi loDavida. UJehova usesinikile esikudingayo, sekusalele kithi ukuthi sizinike isikhathi sokufunda okunengi ngaye.

²³ Sizafunda ngoJehova kuze kube nini lanini. (UmTshu. 3:11) Ngakho okuqakathekileyo yikuthi senzani ngalokho esikwaziyo ngoJehova hatshi ukuthi kungakanani esikwaziyo ngaye. Nxa singasebenzisa lokho esikufundayo njalo sizame ukulingisela uBaba wethu olothando, uzaqhubeka esondela kithi. (Jak. 4:8) ILizwi lakhe lisitshela ukuthi kasoze abalahle loba sekutheni labo abazama ukumazi kuhle.