Sonke Singancedisa Abafunda IBhayibhili Ukuthi Bathuthuke Baze Babhabhathizwe

 1-2. Kuyini okunganceda umuntu ofunda iBhayibhili ukuthi athuthuke aze abhabhathizwe?

U-AMY ohlala eFiji uthi: “Ngangikuthanda engangikufunda eBhayibhilini futhi ngangikwazi ukuthi kuliqiniso. Kodwa ukuba labafowethu labodadewethu yikho okwanginceda ngatshintsha indlela engangiphila ngayo njalo ngabhabhathizwa.” Sifunda isifundo esiqakathekileyo kulokho okwenzakala ku-Amy: Kubalula ukuthi umuntu ofunda iBhayibhili athuthuke aze abhabhathizwe nxa encediswa ngabanye ebandleni.

² Sonke ebandleni singancedisa abafunda iBhayibhili ukuthi bathuthuke baze babhabhathizwe. (Efe. 4:16) Udade oliphayona okuthiwa nguLeilani ohlala eVanuatu uthi: “Kulesitsho esithi umntwana ozalelwe ebantwini uphathwa ngabantu. Ngendlela efananayo singathi umfundi wenziwa libandla lonke.” Abazali lezihlobo lababalisi kanye labanye nje bayancedisa ukuthi umntwana akhule kuhle. Lokhu bakwenza ngokumkhuthaza langokumfundisa izinto eziqakathekileyo empilweni. Abafowethu labodadewethu labo bangacebisa, bakhuthaze futhi babe yisibonelo kulabo abafunda iBhayibhili. Bangenza njalo bazabanceda ukuthi bathuthuke baze babhabhathizwe.—Zaga. 15:22.

 3. Ufundani kulokho okwatshiwo ngu-Ana, uDaniel loLeilani?

³ Kungani ummemezeli oqhuba isifundo seBhayibhili kumele avume nxa abanye ebandleni befuna ukuncedisa lowo amfundisayo? Udade oliphayona eliqakathekileyo okuthiwa ngu-Ana ohlala eMoldova uthi: “Kulezinto ezinengi umuntu ofunda iBhayibhili ayabe edinga ukuncediswa kuzo futhi kunzima ukuthi omfundisayo amncedise kuzo zonke.” UDanielb laye oliphayona eliqakathekileyo elizweni lelo uthi: “Abanye abamemezeli bajayele ukutsho okuthile okuthinta inhliziyo yomfundi ebengingeke ngikutsho mina.” ULeilani yena uthi: “Nxa abafowethu labodadewethu betshengisa umfundi ukuthi bayamthanda lokuthi balendaba laye uyananzelela ukuthi singamaKhristu eqiniso sibili.”—Joh. 13:35.

 4. Sizaxoxa ngani esihlokweni lesi?

⁴ Mhlawumbe uyazibuza ukuthi ungamncedisa njani umfundi ukuthi athuthuke khona kungayisuwe omfundisayo. Asixoxeni ngokuthi singenzani nxa omunye engasicela ukuthi sihambe laye esifundweni sakhe lokuthi singenzani nxa isifundo leso sesiqalisa ukungena imihlangano yebandla. Sizaxoxa langokuthi abadala bebandla bangabancedisa njani abafunda iBhayibhili ukuthi bathuthuke baze babhabhathizwe.

 5. Kumele wenzeni nxa omunye engakucela ukuthi uhambe laye esifundweni sakhe?

⁵ Kungumlandu womuntu ofundisayo ukuthi ancede umfundi wakhe azwisise iLizwi likaNkulunkulu. Nxa angakucela ukuthi uhambe laye kumele ukhumbule ukuthi umsebenzi wakho ngowokumncedisa. (UmTshu. 4:9, 10) Kodwa ungenzani ukuze uwenze kuhle umsebenzi lo?

 6. Ungakusebenzisa njani okukuZaga 20:18 nxa omunye angakucela ukuthi uhambe laye esifundweni sakhe?

⁶ Lungiselela. Cela ofundisayo ukuthi akutshele okuthile ngomfundi. (Bala iZaga 20:18.) Ungambuza imibuzo le: “Kuyini okwaziyo ngomfundi? Lifunda siphi isihloko? Kuyini ofuna umfundi asale ekubambile esihlokweni leso? Kukhona yini okumele kumbe okungamelanga ngikwenze loba ngikutsho nxa sesisesifundweni? Ngingenzani ukuze ngincede umfundi athuthuke?” Kulezinye izinto eziyimfihlo ofundisayo angeke akutshele zona ezimayelana lomfundi wakhe. Kodwa lokho azakutshela khona kuzakunceda. Umnali okuthiwa nguJoy ujayele ukutshela ahamba labo okuthile ngezifundo zakhe. Uthi: “Lokho kwenza engihamba laye abe lesifiso sokuncedisa umfundi lokuthi abone ukuthi uzathini ngesikhathi sifunda.”

 7. Kungani kumele ulungiselele nxa othile ekucele ukuthi uhambe laye esifundweni sakhe?

⁷ Nxa omunye angakucela ukuthi uhambe laye esifundweni sakhe, kungaba kuhle ukuthi ulungiselele isihloko esizafundwa. (Ezra. 7:10, NWT) Umzalwane okuthiwa nguDaniel esike sakhuluma ngaye uthi: “Ngiyathokoza nxa engicele ukuhamba laye elungiselele isifundo. Lokhu kwenza akhulume izinto ezizanceda umfundi.” Kanti njalo umfundi uzabona ukuthi lobabili lilungiselele futhi lokho kuzenza ukuthi laye alungiselele. Lanxa ungasoze wenelise ukulungiselela okuzwayo, zama ukudinga imicijo eqakathekileyo kulokho okuzafundwa.

 8. Ungenzani ukuze imithandazo yakho ibemihle nxa uphelekezela omunye esifundweni sakhe?

⁸ Umthandazo uqakatheke kakhulu nxa kufundwa. Yikho cabanga ngokuthi uzakuthini nxa ungacelwa ukuthi ukhuleke. Nxa ungenza njalo imithandazo yakho izathinta inhliziyo yomfundi. (Hubo. 141:2) UHanae ohlala eJapan ulokhe eyikhumbula imithandazo eyayisenziwa ngudade owayeke ahambe lodadewethu owayemfundisa iBhayibhili. Uthi: “Ngabona ukuthi wayemthanda sibili uJehova futhi lami ngangifuna ukuba njengaye. Ngangibona lokuthi uyangithanda nxa wayengiqamba ngebizo emithandazweni.”

 9. Ngokwalokho okutshiwo kuJakhobe 1:19, ungenzani ukuze ube ngumsizi omuhle?

⁹ Ncedisa ofundisayo. Udade okuthiwa ngu-Omamuyovbi oliphayona eliqakathekileyo eNigeria uthi: “Umsizi omuhle uyalalelisisa nxa kufundwa. Ukhuluma izinto ezincedayo kodwa kakhulumi kakhulu ngoba uyananzelela ukuthi kayisuye ofundisayo.” Manje ungakhuluma nini futhi kuyini ongakutsho? (Zaga. 25:11) Lalelisisa nxa kufundwa. (Bala uJakhobe 1:19.) Ungenza njalo uzakwazi ukuthi kumele ukhulume nini. Kodwa kumele uqale ucabange ungakakhulumi. Ngokwesibonelo, akumelanga ukhulume kakhulu, ungene ofundisayo emlonyeni kumbe uvuse indaba etshiyeneyo. Kodwa ungacacisa okufundwayo ngamazwi amalutshwane nje, ngomzekeliso loba ngombuzo. Ngesinye isikhathi ungabona angani awulanto etheni ongayitsho. Kodwa nxa ungamncoma umfundi futhi utshengise ukuthi ulendaba laye uzamnceda ukuthi athuthuke.

10. Okwenzakala kuwe kunganceda njani ofunda iBhayibhili?

¹⁰ Mxoxele okwenzakala kuwe. Ngamafitshane ungatshela umfundi indlela owafunda ngayo iBhayibhili, ubunzima owabunqobayo kumbe indlela uJehova akuncedisa ngayo, nxa ubona angani kungamnceda. (Hubo. 78:4, 7) Mhlawumbe lokho kungaba yikho kanye umfundi akudingayo. Kungaqinisa ukholo lwakhe futhi kumkhuthaze ukuthi aqhubeke ethuthuka aze abhabhathizwe. Kanti njalo kungamnceda abone ukuthi angalwisana njani lobunzima aphakathi kwabo. (1 Phet. 5:9) UGabriel ohlala eBrazil futhi oliphayona ulokhe ekhumbula ukuthi kuyini okwamncedayo ngesikhathi efunda iBhayibhili. Uthi: “Nxa ngangisizwa abazalwane belandisa okwenzakala kubo nganginanzelela ukuthi uJehova uyabubona ubunzima obusehlelayo. Kwanginceda ngabona ukuthi nxa bona benelisa ukulwisana lobunzima, lami ngingenelisa.”

11-12. Kungani kumele simamukele ngazo zombili umfundi obuya emhlanganweni webandla?

¹¹ Umfundi kumele angene imihlangano yebandla maviki wonke ukuze athuthuke aze abhabhathizwe futhi lokhu kuzamnceda. (Heb. 10:24, 25) Kumele ukuthi omfundisayo uzamnxusa emihlanganweni yebandla. Nxa angabuya, sonke singamkhuthaza ukuthi aqhubeke esenza njalo. Kodwa singakwenza njani lokhu?

¹² Mamukele ngazo zombili. (Rom. 15:7) Nxa umfundi angazizwa esekhaya uzakuba lesifiso sokuqhubeka ebuya eWolu yoMbuso. Akumelanga sidlulise amalawulo nxa simamukela kodwa kumele simbingelele ngomusa futhi simethule kwabanye. Kumele sixoxe laye ngoba lowo omfundisayo angabe engakafiki eWolu kumbe ephathekile ngeminye imisebenzi yebandla. Kufanele simlalelisise nxa ekhuluma futhi sitshengise ukuthi silendaba laye. Ukwenza konke lokhu kuzamnceda njani umfundi? Ake sixoxe ngoDmitrii owabhabhathizwa eminyakeni esanda kwedlula njalo oseyinceku ekhonzayo. Ulokhe ekhumbula okwenzakala eqala ngqa ukubuya emhlanganweni webandla, uthi: “Ngangimile phandle kweWolu yoMbuso ngisesaba, omunye umzalwane wasengilanda wathi ngingene laye phakathi. Abantu abanengi babuya bazongibingelela futhi lokhu kwangitshiya ngibambe owangaphansi. Ngakholisa kakhulu okokuthi ngasengifisa ukuthi ngabe kuba lomhlangano webandla nsuku zonke. Ngangingakaze ngikubone okunje.”

13. Indlela oziphatha ngayo imnceda njani umfundi?

¹³ Woba yisibonelo esihle. Indlela oziphatha ngayo inganceda umfundi ananzelele ukuthi singamaKhristu eqiniso. (Mat. 5:16) UVitalii oliphayona eMoldova uthi: “Ngabona indlela abanye ebandleni ababephila lababeziphatha ngayo. Lokhu kwangenza ngangathandabuzi ukuthi oFakazi bakaJehova yinkolo yeqiniso.”

14. Isibonelo sakho singamnceda njani ofunda iBhayibhili ukuthi aqhubeke ethuthuka?

¹⁴ Umfundi kumele akusebenzise lokho akufundayo ukuze afanele ukubhabhathizwa. Lokhu akulula ngezinye izikhathi. Kodwa nxa angabona indlela wena okukunceda ngayo ukulandela lokho okutshiwo liBhayibhili angafisa ukukulingisela. (1 Khor. 11:1) Zwana okutshiwo nguHanae esike saxoxa ngaye: “Abafowethu labodadewethu babesenza khona kanye engangikufunda. Ngabona ukuthi lami ngingabakhuthaza abanye, ngibaxolele futhi ngitshengise ukuthi ngiyabathanda. Babehlala bekhuluma izinto ezinhle ngabanye njalo ngangifisa ukubalingisela.”

15. Singamsebenzisa njani uZaga 27:17 emuntwini ofunda iBhayibhili?

¹⁵ Woba ngumngane wakhe. Qhubeka utshengisa ukuthi ulendaba lomfundi nxa esebuya emihlanganweni yebandla. (Flp. 2:4) Zama ukumazi ngcono. Ungamtshela ukuthi kuyakuthokozisa ukubona indlela athuthuka ngayo njalo ungambuza ukuthi uqhuba njani ezifundweni zakhe zeBhayibhili. Ungambuza ngabangakibo langomsebenzi wakhe. Kodwa nanzelela ukuthi awumbuzi imibuzo ezamenza abe lenhloni. Ukuxoxa ngezinto lezi kungenza libe ngabangane futhi lokhu kuzamnceda ukuthi athuthuke aze abhabhathizwe. (Bala iZaga 27:17.) Khathesi uHanae seliphayona lesikhathi sonke. Uyakhumbula ngesikhathi eqalisa ukungena imihlangano yebandla. Uthi: “Ngathi sengiqalisa ukuba labangane ebandleni ngasengikukholisa ukuya emihlanganweni yebandla futhi ngangihamba lanxa ngidiniwe. Ngangikukholisa ukuba labangane bami laba, njalo lokhu kwanginceda ukuthi ngiqede ubungane labantu abangamkhonziyo uJehova. Ngangifuna ukuba ngumngane kaJehova lokuba seduze labafowethu labodadewethu yikho ngakhetha ukuthi ngibhabhathizwe.”

16. Kuyini okunye ongakwenza ukuze uncede umfundi abone ukuthi uqakathekile ebandleni?

¹⁶ Nxa umfundi eqhubeka ethuthuka menze abone ukuthi laye uqakathekile ebandleni. Lokhu ungakwenza ngokumnxusa emzini wakho lasemibuthanweni eliba layo labanye abazalwane. (Heb. 13:2) UDenis ohlala eMoldova ukhumbula ngesikhathi esafunda iBhayibhili. Uthi: “Mina lomkami sanxuswa kanengi ukuthi sizekwejisa labazalwane futhi sizilibazise labo. Basitshela ukuthi uJehova wayebancedise njani empilweni zabo njalo lokhu kwasikhuthaza kakhulu. Izikhathi esasiziqeda sindawonye zasenza sangathandabuzi ukuthi sifuna ukukhonza uJehova lokuthi sizathokoza nxa singenza njalo.” Nxa umfundi weBhayibhili esengummemezeli ungamcela ukuthi ahambe lawe ekutshumayeleni. Umfowethu ohlala eBrazil okuthiwa nguDiego uthi: “Abazalwane abanengi babengicela ukuthi ngiphume labo ekutshumayeleni. Lokhu kwanginceda ukuthi ngibazi kuhle futhi ngafunda okunengi kubo njalo ngasondela kuJehova loJesu.”

17. Abadala bangabanceda njani abafunda iBhayibhili?

¹⁷ Zinikeni isikhathi sokuba labafundi beBhayibhili. Badala, nxa lingatshengisa abafundi ukuthi liyabathanda lokuthi lilendaba labo lizabanceda ukuthi bathuthuke baze babhabhathizwe. Lingazama yini ukuhlala lixoxa labo emihlanganweni yebandla? Bazabona ukuthi lilendaba labo nxa lingakhumbula amabizo abo ikakhulu nxa libaqamba. Lingatshintsha yini inhlelo zenu ukuze lihambe labamemezeli nxa besiya ezifundweni zabo? Nxa lingenza njalo linganceda abafundi ngendlela ebelingayicabangeli. Udade oliphayona okuthiwa nguJackie ohlala eNigeria uthi: “Abantu abanengi engifunda labo iBhayibhili bayamangala nxa ngibatshela ukuthi umzalwane engake ngabuya laye ngumdala webandla. Omunye waze wathi: ‘Umfundisi wami ngeke afa akwenza lokho. Uvakatshela abanothileyo kuphela, lakho nxa bembhadala.’” Khathesi umfundi lo sengena imihlangano yebandla.

18. Abadala bangakwenza njani lokho okutshiwo kumiSebenzi 20:28?

¹⁸ Qeqetshani njalo likhuthaze abamemezeli. Badala, lilomlandu wokuncedisa abamemezeli ukuthi babe zingcitshi emsebenzini wokutshumayela lowokufundisa. (Bala imiSebenzi 20:28.) Nxa ummemezeli esesaba ukuqhuba isifundo wena ukhona ungacela ukusiqhuba. UJackie esike sakhuluma ngaye uthi: “Abadala bahlala bebuza ngezifundo zami. Bayanginika amacebo nxa ngilohlupho ngazo.” Kunengi abadala abangakwenza ukuze bakhuthaze abamemezeli. (1 Thes. 5:11) UJackie wengeza esithi: “Ngiyathokoza nxa abadala bengikhuthaza futhi bengitshela ukuthi bayawuqakathekisa umsebenzi engiwenzayo. Amazwi abo ayangivuselela njengamanzi aqandayo nxa kutshisa. Enza ngibone ukuthi ngenza umsebenzi omuhle ekufundiseni abantu iBhayibhili futhi enza ngithokoze kakhulu.”—Zaga. 25:25.

19. Kuyini okusithokozisayo?

¹⁹ Lanxa ungelasifundo seBhayibhili osiqhubayo khathesi, ungenelisa ukuncedisa omunye ukuthi athuthuke aze abhabhathizwe. Siza ofundisayo ngemicijo oyilungiselele kuhle kodwa ungakhulumi kakhulu. Woba ngumngane labantu abafunda iBhayibhili ababuya emihlanganweni yebandla futhi ube yisibonelo esihle kubo. Badala, khuthazani izifundo zeBhayibhili ngokuzinika isikhathi sokuba lazo njalo liqeqetshe abamemezeli liphinde libancome. Kambe kuyini okuthokozisa ukwedlula ukwazi ukuthi senze okuthile, lanxa kukuncane ekuncediseni omunye ukuthi athande futhi akhonze uBaba wethu uJehova?