Majaha, Lingenzani Ukuze Abanye Balithembe?

 1. Kuyini esingakutsho ngabafowethu abasakhulayo?

BAFOWETHU abasakhulayo kunengi elingakwenza ukuze lincede ibandla. Phela inengi lenu lilamandla. (Zaga. 20:29) Liluncedo sibili kubafowenu labodadewenu. Mhlawumbe likhangelele phambili ukuthi libe zinceku ezikhonzayo. Kodwa lingacabanga ukuthi abanye balibona lisesebancane kumbe ukuthi alikakulungeli ukuphiwa imisebenzi eqakathekileyo. Lanxa lisesebancane kukhona elingakwenza khathesi ukuze lithenjwe futhi lihlonitshwe ngabanye ebandleni.

 2. Sizaxoxa ngani esihlokweni lesi?

² Esihlokweni lesi sizaxoxa ngokwenzakala eNkosini uDavida. Sizaphinda sibone okwenzakala emakhosini amabili akoJuda, u-Asa loJehoshafathi. Sizahlola ubunzima obehlela amadoda la amathathu lokuthi enzani besesibona ukuthi abafowethu abasakhulayo bangafundani kuwo.

 3. Abafowethu abasakhulayo bangabanceda njani asebekhulile abasebandleni?

³ UDavida esaselijaha wayengumngane oseduze kaJehova njalo wafundela ukwenza izinto ezazizanceda abanye. Ngokwesibonelo, wasebenza nzima ukuze abe yingcitshi yokutshaya ichacho futhi lokhu kwanceda uSawuli, inkosi eyayigcotshwe nguNkulunkulu. (1 Sam. 16:16, 23) Majaha, abanengi benu kukhona abangakwenza ukuze bancede abanye ebandleni. Ngokwesibonelo asebekhulile bayathokoza nxa libancedisa ukuthi babekwazi ukusebenzisa ezempucuko nxa betaditsha lalapho besemihlanganweni yebandla. Lingabanceda sibili abafowenu labodadewenu laba ngolwazi elilalo ngezempucuko.

 4. Abafowethu abasakhulayo bangamlingisela njani uDavida? (Khangela umfanekiso ongaphandle.)

⁴ Nsuku zonke uDavida wayesenza izinto ezenza abanye bamthemba. Ngokwesibonelo, esakhula wayekhuthele ekweluseni izimvu zikayise. Lo kwakungumsebenzi oyingozi. Ngokuhamba kwesikhathi watshela iNkosi uSawuli wathi: “Inceku yakho yayiselusa izimvu zikayise. Kwathi kufike isilwane kumbe ibhere lajwamula imvu emhlambini, ngalilandela, ngalitshaya ngahlenga imvu emlonyeni walo.” (1 Sam. 17:34, 35) UDavida wayekwazi ukuthi kungumlandu wakhe ukuthi anakekele izimvu. Yikho waba lesibindi wazilwela ukuze azivikele. Abafowethu abasakhulayo bangamlingisela ngokukhuthala emisebenzini abayiphiweyo.

 5. Ngokwalokho okutshiwo kuZaga 3:32, kuyini okuqakatheke kakhulu okumele abafowethu abasakhulayo bakwenze?

⁵ UDavida waba ngumngane kaJehova oseduze ngesikhathi esesemutsha. Ubungane lobu babuqakatheke kakhulu ukwedlula ukuba lesibindi kumbe ukuba yingcitshi yokutshaya ichacho. UDavida wayengaboni uJehova enguNkulunkulu wakhe kuphela, kodwa wayembona engumngane wakhe oseduze. (Bala iZaga 3:32.) Bafowethu abasakhulayo, into eqakatheke kakhulu okumele liyenze yikuqinisa ubungane benu loYihlo osezulwini. Nxa lingenza njalo lizaphiwa eminye imisebenzi ebandleni.

 6. Abanye babembona njani uDavida?

⁶ Abanye abantu babecabanga ukuthi uDavida wayesasemncane kumbe ukuthi wayengafanelanga ukwenza eminye imisebenzi. Ngokwesibonelo, ngesikhathi esithi uzakulwa loGoliyathi, iNkosi uSawuli yazama ukumvimba isithi: “Wena ungumfana nje.” (1 Sam. 17:31-33) Umfowabo wayesanda kumsola ngokuthi kayenzi kuhle imisebenzi ayiphiweyo. (1 Sam. 17:26-30) Kodwa uJehova wayengamboni engumfana nje ongancedi ngalutho kumbe owehluleka ukwenza imisebenzi. Wayemazi kuhle. UDavida wenelisa ukumlahlela phansi uGoliyathi ngenxa yokuthi wathemba umngane wakhe uJehova.—1 Sam. 17:45, 48-51.

 7. Ufundani kokunye okwenzakala kuDavida?

⁷ Bafowethu abasakhulayo lifundani kulokho okwenzakala kuDavida? Kumele libekezele. Kungathatha isikhathi ukuthi abantu abalazi kusukela lisesebancane bananzelele ukuthi selikhulile. Kodwa uJehova kagxili ekuthini uleminyaka emingaki. Ukwazi kuhle futhi uyakwazi lalokho owenelisa ukukwenza. (1 Sam. 16:7) Qinisa ubungane bakho laye. UDavida wakwenza lokho ngokukhangela izinto uJehova azidalileyo langokucabangisisa ngokuthi izinto lezo zimfundisani ngoMdali. (Hubo. 8:3, 4; 139:14; Rom. 1:20) Okunye ongakwenza yikucela uJehova ukuthi akunike amandla owadingayo. Ngokwesibonelo, abanye esikolo bakwenza inhlekisa yini ngenxa yokuthi unguFakazi kaJehova? Nxa kunjalo, khuleka kuJehova umcela ukuthi akuncedise uqinisele futhi usebenzise izinto ozifunda eLizwini lakhe, emabhukwini ethu lakumavidiyo. Nxa ungabona indlela uJehova akuncedisa ngayo nxa uphakathi kohlupho, kawusoze uthandabuze ukuthi uzakuncedisa nxa ungahlangana lobunzima esikhathini esizayo. Kanti njalo abanye bazakuthemba nxa bangananzelela ukuthi uyamthemba uJehova.

8-9. Kuyini okwanceda uDavida ukuthi abekezele futhi abafowethu abasakhulayo bafundani kuye?

⁸ Ake sixoxe ngobunye ubunzima obehlela uDavida. Wathi esegcotshiwe ukuthi abe yinkosi walinda iminyaka eminengi engakaqalisi ukubusa koJuda. (1 Sam. 16:13; 2 Sam. 2:3, 4) Kuyini okwamnceda ukuthi abekezele? Wenza lokho ayesenelisa ukukwenza kulokuthi akhathazeke ngesimo ayekuso. Ngokwesibonelo, ngesikhathi ehlala elizweni lamaFilisti ayebalekele kulo, wasebenzisa ithuba lelo ukuthi alwe lezitha zako-Israyeli. Ngokwenza njalo wayevikela imingcele yakoJuda.—1 Sam. 27:1-12.

⁹ Bafowethu abasakhulayo lifundani kuDavida? Sebenzisani wonke amathuba elilawo ukuthi lenzele abafowenu labodadewenu imisebenzi ebandleni. Ake sixoxe ngalokho okwenzakala kuRicardo.b Kusukela esasemncane, wayefisa ukuba liphayona. Kodwa abadala bamtshela ukuthi kakakulungeli. Lanxa kunjalo kazange adane futhi kazange azonde kodwa wangezelela inkonzo yakhe. Uthi: “Nxa ngicabanga ngalesosikhathi ngiyabona sibili ukuthi kwakumele ngithuthuke lokuthi ngilungiselele impindela ngayinye. Ngaqalisa ukuba leqiniso lokuthi ngiyaphindela kubo bonke abantu abafuna ukufunda. Ngesikhathi leso ngaba lesifundo sami sokuqala. Ukuhlala ngisekutshumayeleni kwanginceda ukuthi ngingatshaywa kakhulu luvalo.” Khathesi uRicardo liphayona elikhutheleyo futhi useyinceku ekhonzayo.

10. UDavida wenzani engakenzi isinqumo esiqakathekileyo?

¹⁰ Ake sihlole okunye okwenzakala kuDavida. Ngesikhathi esendaweni yamaFilisti ecatshele iNkosi uSawuli wasuka lamadoda ayelawo batshiya izimuli zabo baya empini. Ngalesosikhathi isitha safika sahlasela imizi yabo sathumba lezimuli zabo. UDavida kazange azitshele ukuthi njengoba wayeliqhawe lamaqhawe wayengeluka icebo elihle lokukhulula izimuli zabo. Kodwa wacela uJehova ukuthi amkhokhele. Wathi umphristi okuthiwa ngu-Abhiyathari abuye le-efodi wasebuza uJehova esithi: “Ngililandele yini lelixuku elihlaselayo?” UJehova wamtshela ukuthi alilandele wasemqinisekisa ukuthi uzaphumelela. (1 Sam. 30:7-10) Bafowethu abasakhulayo lifundani endabeni le?

11. Kuyini okumele ukwenze ungakenzi izinqumo?

¹¹ Cela abanye bakucebise ungakenzi izinqumo. Xoxa labazali bakho. Abadala labo bangakunika amacebo amahle. UJehova uyawathemba amadoda la awabekileyo njalo lawe kumele uwathembe. Uwabona ‘eyizipho’ emabandleni. (Efe. 4:8) Uzakwenza izinqumo ezinhle nxa ungalingisela ukholo lwawo njalo ulandele amacebo amahle akunika wona. Khathesi asixoxeni ngokuthi sifundani eNkosini u-Asa.

12. Yibuphi ubuntu iNkosi u-Asa eyayilabo ngesikhathi iqalisa ukubusa?

¹² Ngesikhathi u-Asa eqalisa ukubusa esikhundleni sikayise u-Abhija wayethobekile futhi elesibindi. Ngokwesibonelo, wakhipha izithombe elizweni. Waphinda “walaya abakoJuda ukuba bakhonze uJehova uNkulunkulu waboyise, balandele yonke imithetho lemilayo yakhe.” (2 ImiLan. 14:1-7) Langesikhathi uZera umTopiya ezohlasela koJuda elamasotsha angu-1 miliyoni, u-Asa wacela uncedo kuJehova wathandaza esithi: “Jehova, kakho omunye onjengawe ongavikela ababuthakathaka kwabalamandla. Sisize, O Jehova Nkulunkulu wethu, ngoba thina sithembele kuwe.” Amazwi la aveza ukuthi u-Asa wayengakuthandabuzi ukuthi uJehova uzamsindisa yena labantu bakhe. Wathembela kuYise osezulwini futhi “uJehova wawatshaya wawabhuqa amaKhushi.”—2 ImiLan. 14:8-12.

13. Kuyini okwenzakala ku-Asa futhi kwabangelwa kuyini?

¹³ Kakuthandabuzwa ukuthi kwakusesabisa ukumelana lebutho elikhulu kangaka. Kodwa u-Asa walinqoba ngoba wathembela kuJehova. Okudanisayo yikuthi wathi esesethuselwa yinkosi embi yako-Israyeli uBhahasha, kazange athembe uJehova. Kodwa wacela uncedo enkosini yaseSiriya. Isinqumo lesi samthela emanyaleni. UJehova wasebenzisa umphrofethi uHanani ukuthi amtshele amazwi la: “Ngenxa yokuthi wethembele enkosini yase-Aramu [yaseSiriya] wadela ukwethembela kuJehova uNkulunkulu wakho, ibutho lenkosi yase-Aramu [yaseSiriya] seliphunyukile esandleni sakho.” Kusukela ngalesosikhathi u-Asa wayesehlala esempini. (2 ImiLan. 16:7, 9; 1 AmaKho. 15:32) Abafowethu abasakhulayo bafundani?

14. Ungatshengisa njani ukuthi uthembela kuJehova futhi ngokwalokho okutshiwo ku-1 Thimothi 4:12, kuzakwenzakalani nxa ungenza njalo?

¹⁴ Hlala uthobekile futhi uthembela kuJehova. Ngesikhathi ubhabhathizwa watshengisa ukuthi ulokholo oluqinileyo lokuthi uyamthemba njalo wathokoza ukukwamukela ngazo zombili emulini yakhe. Khathesi sekumele uqhubeke uthembela kuye. Kulula ukuthi uthembele kuJehova nxa kumele wenze izinqumo eziqakatheke kakhulu kodwa uzakwenzani nxa sekumele wenze lezo ezingaqakathekanga kangako? Kuqakathekile ukuthi uthembele kuJehova kuzo zonke izinqumo ozenzayo kungelani lokuthi ngeziphathelane lalokho ozilibazisa ngakho, imisebenzi ofuna ukuyenza loba okunye nje empilweni. Ungathembi okwakho ukuhlakanipha kodwa dinga ukuthi iBhayibhili lithini ubususenza lokho elikutshoyo. (Zaga. 3:5, 6) Nxa ungenza njalo uJehova uzathokoza futhi labanye ebandleni bazakuhlonipha.—Bala u-1 Thimothi 4:12.

15. Ngokwalokho okutshiwo ku-2 ImiLando 18:1-3; 19:2, yiwaphi amaphutha enziwa yiNkosi uJehoshafathi?

¹⁵ Ulesono njengathi sonke yikho ngezinye izikhathi uzaphambanisa. Kodwa lokho akumelanga kukuvimbe ukuthi wenze konke okusemandleni akho enkonzweni kaJehova. Ake sixoxe ngeNkosi uJehoshafathi. Yayisenza kuhle okunye okumangalisayo. UJehoshafathi wathi eqalisa nje ukubusa “wadinga uNkulunkulu kayise njalo walalela imilayo yakhe.” Ngaphezu kwalokho wathuma izikhulu kuwo wonke amadolobho akoJuda ukuthi ziyefundisa abantu ngoJehova. (2 ImiLan. 17:4, 7) Lanxa wenza konke lokho wayeke enze izinqumo ezimbi. Esinye isinqumo asenzayo sabangela ukuthi akhuzwe ngumphrofethi kaJehova. (Bala u-2 ImiLando 18:1-3; 19:2.) Bafowethu abasakhulayo, lifundani kuJehoshafathi?

16. Ufundani kulokho okwenzakala kuRajeev?

¹⁶ Samukele iseluleko osiphiwayo futhi usisebenzise. Engxenye lawe njengamajaha amanengi kukuthwalisa nzima ukuqakathekisa izinto eziphathelane lokukhonza. Ungadani nxa kuyikuthi unjalo. Umfowethu okuthiwa nguRajeev wakhuluma ngokwenzakala kuye ngesikhathi esakhula wathi: “Ngangingakwazi ukuthi ngifuna ukwenzani empilweni. Njengabanengi abasakhulayo ngangizithandela imidlalo lokuzikholisela kulokuya estadi lasekutshumayeleni.” Manje kuyini okwamncedayo? Yiseluleko asinikwa ngomunye umdala owayekhathazekile ngaye. URajeev uthi: “Wanginceda ukuthi ngicabangisise ngalokho okutshiwo ku-1 Thimothi 4:8.” URajeev watshengisa ukuthi uthobekile ngokulalela iseluleko asiphiwayo wasecabangisisa ngalokho okwakuqakathekile empilweni yakhe. Uthi: “Ngakhetha ukuqakathekisa izinto eziphathelane lokukhonza.” Kwaphetha ngani? Uthi: “Ngemva kweminyaka emilutshwane ngiphiwe iseluleko ngaba yinceku ekhonzayo.”

17. Abafowethu labodadewethu bazizwa njani ngabafowethu abasakhulayo?

¹⁷ Abafowethu labodadewethu bayaliqakathekisa lina bafowethu abasakhulayo elikhonza uJehova ‘limanyene’ labo. (Zef. 3:9) Bayayithanda intshiseko elilayo emisebenzini eliyiphathisiweyo. Bayazigqaja sibili ngani!—1 Joh. 2:14.

18. Ngokwalokho okutshiwo kuZaga 27:11, uJehova uzizwa njani ngamajaha amkhonzayo?

¹⁸ Majaha, lingakhohlwa ukuthi uJehova uyalithanda lokuthi uyalithemba. Watsho ukuthi ngezinsuku zokucina kuzakuba lebutho lamajaha elizazinikela kuye ngenhliziyo yonke. (Hubo. 110:1-3, NWT) Uyakwazi ukuthi liyamthanda lokuthi lizimisele ukwenza konke okusemandleni enu ekumkhonzeni. Yikho bekezelela abanye, uzibekezelele lawe. Nxa ungaphambanisa samukele iseluleko futhi uvume ukulaywa unanzelela ukuthi kuvela kuJehova. (Heb. 12:6) Khuthala emisebenzini oyiphiweyo. Kodwa okuqakatheke kulakho konke yikuthi wenze uYihlo osezulwini azigqaje ngawe.—Bala iZaga 27:11.