Funda Kulokho Okwenziwa NguDanyeli

 1. Kuyini okwenza abaseBhabhiloni bamthanda umphrofethi uDanyeli?

UMPHROFETHI uDanyeli wayeseselijaha nje ngesikhathi ethunjwa ngabaseBhabhiloni bemsusa eJerusalema lapho ayehlala khona bemusa elizweni elalikhatshana kakhulu. Lanxa uDanyeli wayesesemncane iziphathamandla zeBhabhiloni zahle zamthanda zimbona nje. Phela ‘wayengelasici, ebukeka’ futhi wayevela emulini eyayihlonitshwa. (1 Sam. 16:7) Ngenxa yalokho abaseBhabhiloni bamqeqetsha befuna ukuthi ayesebenza esigodlweni.—Dan. 1:3, 4, 6.

 2. UJehova wayembona njani uDanyeli? (UHezekheli 14:14)

² UJehova wayethanda uDanyeli ngenxa yobuntu bakhe obuhle hatshi ngenxa yendlela ayebukeka ngayo kumbe isikhundla ayelaso. Kungenzakala ukuthi uDanyeli wayengabe eleminyaka engu-20 ngesikhathi uJehova embala phakathi kwamadoda ayelungile uNowa loJobe. Amadoda la ayekhonze uJehova ethembekile okweminyaka eminengi. (Gen. 5:32; 6:9, 10; Jobe. 42:16, 17; bala uHezekheli 14:14.) UDanyeli wenza okulungileyo okwempilo yakhe yonke futhi uJehova waqhubeka emthanda.—Dan. 10:11, 19.

 3. Sizaxoxa ngani esihlokweni lesi?

³ Esihlokweni lesi sizaxoxa ngezinto ezimbili ezenza uDanyeli waba ligugu kuJehova, isibindi lokuba qotho. Sizabona ukuthi kwakutheni aze atshengise ukuthi ulesibindi lokuthi kwakwenzakaleni aze atshengise ukuthi uqotho. Kuyini okwamnceda ukuthi abe lesibindi futhi abe qotho? Okunye esizaxoxa ngakho yikuthi singamlingisela njani. Lanxa isihloko lesi sibhalelwe abasakhulayo, kunengi sonke esingakufunda kuDanyeli.

 4. UDanyeli watshengisa njani ukuthi wayelesibindi?

⁴ Kwezinye izikhathi abantu abalesibindi bayatshaywa luvalo, kodwa kabavumi ukuthi lokho kubenze bayekele ukwenza okuqondileyo. UDanyeli wayelijaha elilesibindi. Asixoxeni ngezenzakalo ezimbili lapho atshengisa khona ukuthi ulesibindi. Esokuqala singabe senzakala eminyakeni engaba mibili abaseBhabhiloni betshabalalise iJerusalema. Inkosi yeBhabhiloni uNebhukhadinezari yaba lephupho elayethusayo. Yaphupha inkalakatha yesithombe. Inkosi yatshela amadoda ahlakaniphileyo ukuthi nxa engayitshelanga iphupho layo ayichazela lokuthi litshoni, yayizawabulala wonke kugoqela loDanyeli. (Dan. 2:3-5) Kwakungamelanga uDanyeli apholise amaseko ngoba kwakungabulawa abantu abanengi. Ngakho “waya enkosini wacela ukuthi imnike isikhathi ukuze abuye azoyichasisela iphupho layo.” (Dan. 2:16) Lokho kwakudinga isibindi lokholo. Phela eBhayibhilini akulalutho olutshengisa ukuthi uDanyeli wayeke wachasisa amaphupho. Wacela abangane bakhe uShadrekhi loMishekhi lo-Abhedinikhob ukuthi “bakhuleke kuNkulunkulu wasezulwini, bacele ukuthi abe lesihawu kubo, abavezele imfihlo le.” (Dan. 2:18) Lakanye uJehova wayiphendula imithandazo yabo. UDanyeli walichasisa iphupho likaNebhukhadinezari encediswa nguNkulunkulu. Yena labangane bakhe abasabulawanga.

 5. Kuyini okunye okwenzakalayo okwakudinga ukuthi uDanyeli abe lesibindi?

⁵ Kwathi sekudlule isikhathi uDanyeli echasise iphupho elalimayelana lenkalakatha yesithombe, kwenzakala okunye okwakudinga ukuthi atshengise ukuthi ulesibindi. UNebhukhadinezari waphinda waphupha iphupho elaliyinsindabaphenduli, waphupha inkalakatha yesihlahla. UDanyeli waqunga isibindi watshela inkosi ukuthi iphupho layo lalisitshoni, waze wayitshela lokuthi yayizaphambana isuke esihlalweni sayo sobukhosi okwesikhathi esithile. (Dan. 4:25) Inkosi yayingacabanga ukuthi uDanyeli usevukela ibisimbulala kodwa uDanyeli waba lesibindi wayichasisela iphupho layo.

 6. Kuyini okungabe kwanceda uDanyeli ukuthi abe lesibindi?

⁶ Kuyini okungabe kwanceda uDanyeli ukuthi abe yindoda elesibindi? Akuthandabuzwa ukuthi abazali bakhe bakulalela lokho uJehova ayekutshela abazali abangama-Israyeli, bamfundisa uMthetho kaNkulunkulu. (Dute. 6:6-9) Yikho kufanele ukuthi esakhula wafunda okunengi kubo. UDanyeli wayewazi kuhle uMthetho. Wayengazi iMithetho Elitshumi kuphela lokunye okulutshwana nje okwakusemthethweni kodwa wayekwazi lezinto okwakumele zidliwe ngama-Israyeli lalezo okwakungamelanga azidle.c (Levi. 11:4-8; Dan. 1:8, 11-13) UDanyeli wafunda lembali yabantu bakaNkulunkulu futhi wayekwazi ukuthi kuyini okwakusenzakala kubo nxa babeyekela ukulalela imithetho kaJehova. (Dan. 9:10, 11) Okwenzakala empilweni kaDanyeli kwamenza wangathandabuzi ukuthi uJehova lezingilosi zakhe ezilamandla babemsekela.—Dan. 2:19-24; 10:12, 18, 19.

 7. Kuyini okunye okwanceda uDanyeli ukuthi abe lesibindi? (Khangela lomfanekiso.)

⁷ UDanyeli wataditsha imibhalo eyayibhalwe ngabaphrofethi bakaNkulunkulu kugoqela leziphrofetho zikaJeremiya. Ngokuhamba kwesikhathi lokho ayekufunda kwenza wazwisisa ukuthi amaJuda ayesezakhululwa ekuthunjweni eBhabhiloni. (Dan. 9:2) Kumele ukuthi uDanyeli wamthemba kakhulu uJehova ngesikhathi ebona iziphrofetho eziseBhayibhilini zigcwaliseka. Labo abamthemba ngenhliziyo yonke uNkulunkulu bangaba lesibindi kungelani lokuthi kwenzakalani. (Khangela uRoma 8:31, 32, 37-39.) Okuqakatheke kakhulu okwanceda uDanyeli yikuthi wayehlala ethandaza kuYise osezulwini. (Dan. 6:10) Wavuma izono zakhe kuJehova wamtshela lokuthi wayesizwa njani futhi wacela lokuthi amncedise. (Dan. 9:4, 5, 19) UDanyeli wayengumuntu njengathi sonke. Kazalwanga elesibindi. Isibindi wasithola ngokutaditsha lokuthandaza langokuthemba uJehova.

 8. Singasithola njani isibindi?

⁸ Kumele senzeni ukuze sibe lesibindi? Abazali bethu bangasikhuthaza ukuthi sibe lesibindi. Kodwa isibindi kasisitholi kubo angathi sithola ilifa abasitshiyela lona. Nxa umuntu efuna ukuba lesibindi kumele enze lokho okwenziwa ngumuntu ofundela umsebenzi. Umuntu ofundela umsebenzi uyakhangelisisa okwenziwa ngumuntu omfundisayo abesezama ukumlingisela. Ngendlela efananayo lathi siba lesibindi nxa singakhangelisisa okwenziwa ngabantu abalaso besesibalingisela. Manje sifundani kuDanyeli? Kumele sibelazi kuhle iLizwi likaNkulunkulu njengaye. Okunye okumele sikwenze yikuhlala sithandaza kuJehova simtshela konke okusezinhliziyweni zethu ukuze sibe ngabangane bakhe abakhulu. Kanti njalo kumele simthembe uJehova siqiniseke ukuthi uyasisekela. Nxa singakwenza konke lokhu sizakuba lesibindi sokumelana lezilingo ezingasehlela.

 9. Ukuba lesibindi kusinceda njani?

⁹ Ukuba lesibindi kusinceda ngendlela ezinengi. Ngokwesibonelo, uBen wayefunda kwesinye isikolo eGermany lapho abantu ababekholwa ukuthi izinto zazenzakalela futhi becabanga lokuthi indaba eseBhayibhilini emayelana lokudalwa kwezinto iyinganekwane nje. Ngelinye ilanga uBen waphiwa ithuba lokuthi ame phambi kweklasi yonke abesechasisa ukuthi kungani ekholwa ukuthi izinto eziphilayo zadalwa. UBen waba lesibindi wakhuluma lokho ayekukholwa. Kwahamba njani? UBen uthi: “Umbalisi wami walalelisisa wasesenza amakhophi ezinto engangizisebenzisa ukuchasisa ukuthi kungani ngikholwa ukuthi izinto zadalwa, wawanika bonke abantwana eklasini.” Abantwana ababefunda loBen benzani? UBen uthi: “Abanengi babo balalelisisa futhi bangitshela ukuthi bayayihawukela indlela engenza ngayo.” Lokho okwenzakala kuBen kutshengisa ukuthi abantu abalesibindi bajayele ukuhlonitshwa ngabanye futhi banganceda abantu abalenhliziyo eziqotho ukuthi bafune ukufunda ngoJehova. Kuyacaca ukuthi kuyanceda kakhulu ukuthi sibe lesibindi.

10. Kutshoni ukuba qotho?

¹⁰ Ibala lesiHebheru elihunyutshwe ngokuthi “ukuba qotho” kumbe “uthando oluqotho” eBhayibhilini litsho ukunamathela emuntwini omthandayo ungamtshiyi loba sekutheni. Lijayele ukusetshenziswa nxa kukhulunywa ngendlela uJehova athanda ngayo izinceku zakhe. Ibala lelo liphinda lisetshenziswe nxa kukhulunywa langendlela izinceku zikaNkulunkulu ezithandana ngayo. (2 Sam. 9:6, 7) Ngokuhamba kwesikhathi siyabe silokhu sithuthukisa indlela esitshengisa ngayo ukuthi siqotho. Ake sibone ukuthi uDanyeli wakwenza njani lokho.

11. UDanyeli watshengisa njani ukuthi wayeqotho ngesikhathi esegugile? (Khangela umfanekiso ongaphandle.)

¹¹ UDanyeli wahlangana lezilingo ezinengi ezazidinga ukuthi atshengise ukuthi uqotho kuJehova. Kodwa isilingo esikhulu kakhulu samehlela esedlule iminyaka engu-90. Ngalesosikhathi iBhabhiloni yayisinqotshwe ngamaMede lamaPhesiya futhi yayisibuswa yiNkosi uDariyu. Iziphathamandla ezazisebenza esigodlweni zazingamthandi uDanyeli futhi zazingamhloniphi loNkulunkulu ayemkhonza. Ngakho zabumba icebo elalizakwenza ukuthi uDanyeli abulawe. Zenza inkosi yafaka umthetho owawuzatshengisa ukuthi uDanyeli wayezaqhubeka eqotho kuNkulunkulu wakhe yini kumbe wayezakuba qotho enkosini. Kwakumele uDanyeli ayekele ukuthandaza kuJehova okwamalanga angu-30 ukuze kukhanye ukuthi uqotho enkosini lokuthi angabi yindlubu ewele ephokweni. UDanyeli kazange akwenze lokho. Ngakho bambamba bamphosela emgodini wezilwane. Kodwa uJehova wamvikela ezilwaneni njalo wambusisa ngenxa yokuthi waba qotho. (Dan. 6:12-15, 20-22) Kuyini okungasinceda ukuthi sihlale siqotho njengoDanyeli?

12. Kuyini okwanceda uDanyeli ukuthi ahlale eqotho kuJehova?

¹² Njengoba kuke kwatshiwo, ukuze sibe qotho kuJehova kumele simthande kakhulu. UDanyeli wahlala eqotho kuJehova ngoba wayemthanda kakhulu uYise osezulwini. Akuthandabuzwa ukuthi okwenza uDanyeli wamthanda kakhulu uJehova yikuthi wayecabangisisa ngobuntu bakhe obuhle langokuthi wayebutshengisa njani ubuntu lobu. (Dan. 9:4) Kanti njalo uDanyeli wayecabangisisa ngazo zonke izinto ezinhle uJehova ayemenzela zona layezenzela abantu bakhe futhi wayembonga ngalokho.—Dan. 2:20-23; 9:15, 16.

13. (a) Yibuphi ubunzima abasakhulayo abahlangana labo? Nika isibonelo. (Khangela lomfanekiso.) (b) Usebenzisa lokho okubone kuvidiyo ungaphendula njani nxa abanye bengabuza ukuthi oFakazi bakaJehova bayabasekela yini labo abakhetha ukuba yizitabane?

¹³ Abasakhulayo labo baphila labantu abangamhloniphiyo uJehova labangelandaba lemithetho yakhe. Izikhathi ezinengi abantu abanjalo bayabazonda abantu abafuna ukwenza okufunwa nguNkulunkulu. Abanye baze babathwalise nzima abasakhulayo befuna ukuthi bangabi qotho kuJehova. Ngokwesibonelo ake sixoxe ngomunye osakhulayo okuthiwa nguGraeme ohlala e-Australia. Ngesikhathi esafunda wakubona okukhulu ngelinye ilanga. Umbalisi wababuza ukuthi babengenzani nxa babengalandwa ngumngane abatshele ukuthi uyisitabane. Umbalisi wathi bonke abangelahlupho ngokuthi umngane wabo abe yisitabane bame kwelinye icele eklasini kodwa abathi akuqondanga bame kwelinye icele. UGraeme uthi: “Iklasi yonke yasukuma yayakuma eceleni lalabo ababesithi ukuba yisitabane akulahlupho, kwasala mina lomunye owayenguFakazi.” Kwaba nzima kakhulu ngoba uGraeme kwasekumele atshengise ukuthi uzakuba qotho kuJehova kumbe hatshi. UGraeme uthi: “Kwaphela ihora lonke abanye abantwana kanye lombalisi besithwalise nzima futhi besichothoza. Ngenza konke okusemandleni ami ukuthi ngikuchasise kuhle lokhu engangikukholwa kodwa kabazange bake bangilalele.” Kwamphatha njani lokhu uGraeme? Uthi: “Ngangingakukholisi sibili ukuhlaselwa ngendlela enjalo kodwa kwangithokozisa kakhulu ukuthi ngahlala ngiqotho lokuthi kangizange ngesabe ukuchasisa engangikukholwa.”d

14. Kuyini okungasinceda ukuthi sihlale siqotho kuJehova?

¹⁴ Lathi singenelisa ukuqhubeka siqotho kuJehova nxa singamthanda kakhulu njengoDanyeli. Ukufunda ngobuntu bukaJehova kungasinceda ukuthi simthande kakhulu. Ngokwesibonelo, singafunda ngezinto azidalayo. (Rom. 1:20) Okunye okungakunceda ukuthi umthande futhi umhloniphe kakhulu uJehova yikubala izihloko kumbe ukubukela amavidiyo kungxenye ethi “Kwazenzakalela Yini?” Okunye ongakwenza yikubala ibhukwana elithi Ingabe Izinto Eziphilayo Zadalwa? lelithi The Origin Of Life—Five Questions Worth Asking. Omunye udadewethu osakhulayo okuthiwa ngu-Esther ohlala eDenmark wathi ngamabhukwana la: “Indlela abhalwe ngayo iyamangalisa. Amabhukwana la awakutsheli lokho okumele ukukholwe. Ayakutshela okuliqiniso wena ubusuzikhethela ukuthi uzakholwani.” UBen esike sakhuluma ngaye uthi: “Engakubala emabhukwini la kwaluqinisa kakhulu ukholo lwami. Kwangenza ngabona ukuthi uNkulunkulu nguye owadala izinto eziphilayo.” Nxa ungabala amabhukwana la mhlawumbe lawe ungacina usuvumelana lamazwi la aseBhayibhilini athi: “Ufanele Jehova Nkulunkulu wethu ukwamukela inkazimulo lodumo lamandla ngoba wadala zonke izinto.”—Isam. 4:11.e

15. Kuyini okunye okungasinceda ukuthi simthande kakhulu uJehova?

¹⁵ Okunye okungasinceda ukuthi simthande kakhulu uJehova yikufunda ngempilo yeNdodana yakhe uJesu. Omunye udadewethu osakhulayo ohlala eGermany okuthiwa nguSamira wakwenza lokhu. Uthi: “UJehova ngamazi kuhle ngokufunda ngoJesu.” Esesemncane uSamira wayengakuzwisisi ukuthi uJehova angaba ngumngane wakhe lokuthi angamthanda kodwa wayezwisisa ukuthi uJesu wayelobuntu obunjani. Uthi: “UJesu ngangimthanda ngoba wayelomusa futhi ebathanda abantwana.” Ukufunda okunengi ngoJesu kwamnceda ukuthi amzwisise uJehova futhi amthande. Ngenxa yani? Uthi: “Kancane kancane ngangilokhu ngizwisisa ukuthi uJesu ulingisela uYise kukho konke akwenzayo. UJesu ufuze uYise sibili. Ngananzelela ukuthi lokhu ngokunye okwenza uJehova wathuma uJesu emhlabeni. Wayefuna ukuthi azoncedisa abantu ukuthi bamazi ngcono uJehova.” (Joh. 14:9) Nxa ufuna ukuthi umazi kakhulu uJehova futhi ube ngumngane wakhe zinike isikhathi sokufunda okunengi ngoJesu. Ungenza njalo uzamthanda kakhulu futhi uzaqhubeka uqotho kuye.

16. Kusinceda ngani ukuba qotho? (IHubo 18:25; UMikha 6:8)

¹⁶ Izikhathi ezinengi nxa siqotho kwabanye siyathola abangane abaqotho futhi abangasoze basilahle loba sekutheni. (Ruthe. 1:14-17) Phezu kwalokho abantu abaqotho kuJehova bayahlaliseka ngoba uJehova uthembisa ukuthi uzakuba qotho kulabo abaqotho kuye. (Bala iHubo 18:25; uMikha 6:8.) Akucabange ngalokhu, lanxa sibancane kakhulu nxa siqathaniswa loMdali wethu onguSomandla yena usithembisa ukuthi uzahlala esithanda kakhulu. Nxa esithanda ngendlela enjalo akulalutho olungasehlukanisa laye kungelani lokuthi yisilingo esingakanani, yisitha esinjani ngitsho lokufa. (Dan. 12:13; Luk. 20:37, 38; Rom. 8:38, 39) Kuqakathekile sibili ukuthi silingisele uDanyeli futhi sihlale siqotho kuJehova.

17-18. Kuyini okunye esingakufunda kuDanyeli?

¹⁷ Esihlokweni lesi sifunde izinto ezimbili ngoDanyeli, ukuthi wayelesibindi futhi eqotho. Kodwa kulokunye okunengi esingakufunda kuye. Ngokwesibonelo uJehova wanika uDanyeli imibono lamaphupho futhi wamncedisa ukuthi achasise iziphrofetho. Iziphrofetho ezinengi azibhalayo sezagcwaliseka njalo ezinye zakhona zisitshela okunengi okuzakwenzakala emhlabeni esikhathini esizayo.

¹⁸ Esihlokweni esilandelayo sizahlola iziphrofetho ezimbili ezabhalwa nguDanyeli. Ukuzizwisisa kuzasinceda sonke ukuthi senze izinqumo ezinhle khathesi. Zizasinceda lokuthi sihlale silesibindi futhi siqotho, sibulungele ubunzima obuzayo.