‘Isimo Sakhe Esingabonakaliyo Sibonakala Ngokusobala’

Uyakholwa kuNkulunkulu yini? Nxa kunjalo ungabuqamba yini ubufakazi bokubakhona kwakhe? Iqiniso yikuthi silobufakazi obunengi bokuthi kuloMdali okhaliphileyo, olamandla, njalo olothando. Yibuphi lobo bufakazi njalo buqiniseke kangakanani? Ukuze sithole impendulo asikhangeleni amazwi omphostoli uPhawuli atholakala encwadini yakhe ayibhalela amaKhristu aseRoma.

UPhawuli wathi: “Kusukela ekudalweni komhlaba isimo sikaNkulunkulu esingabonakaliyo​—⁠amandla akhe angapheliyo kanye lobuNkulunkulu bakhe​—⁠sekubonakele ngokusobala, kuzwisiseka ngokwenziweyo, ukuze abantu bangabi lasizatho sokuzigeza.” (KwabaseRoma 1:20) UMdali wafaka uphawu endalweni yakhe njengoba uPhawuli esitsho. Asiwahlolisiseni amazwi kaPhawuli.

UPhawuli usitshela ukuthi izimpawu zobuntu bukaNkulunkulu ziyabonakala “kusukela ekudalweni komhlaba.” Evesini leli, ibala lesiGiriki elihunyutshwe ngokuthi “umhlaba” alitsho uMhlaba ngokwawo. Kodwa litsho abantu.a Yikho-ke, uPhawuli uthi kusukela abantu bedalwa, babebubona ubufakazi bezimpawu zobuntu boMdali ezintweni ezidaliweyo.

Ubufakazi lobu bugcwele yonke indawo. Asingeke sithi bufihlekile emvelweni kodwa ‘bubonakala ngokusobala.’ Kusukela kokukhulu kusiya kokuncane kakhulu, okudaliweyo akuvezi kuphela ukuba khona koMdali kodwa kuveza lezimpawu zakhe zobuntu ezinhle. Izinto ezidaliweyo zenziwe ngobunono okokuthi ziyasivezela ukukhalipha kukaNkulunkulu. Isibhakabhaka esigcwele izinkanyezi lokuduma kwamagagasi kuveza amandla akhe. Ukudla okutshiyeneyo okuhlabusayo, ubuhle bokuphuma lokutshona kwelanga, konke lokhu kutshengisa ukuthi uJehova uyabathanda abantu.​—IHubo 104:24; U-Isaya 40:26.

Ubufakazi lobu buyacaca yini? Buyacaca kakhulu okokuthi abangabuboniyo njalo abangafuniyo ukukholwa kuNkulunkulu ‘abala lasizatho sokuzigeza.’ Esinye isikhwicamfundo sikufananisa lalokhu: Cabanga ngomtshayeli onganaki ibhakane elithi “Ungadluleli Phambili​—⁠Yana Kwesokunxele.” Ipholisa lithi kame beselimbhalela itikiti. Umtshayeli uyazama ukuzivikela esithi kalibonanga ibhakane. Kodwa lokho akukhulumayo kakutsho lutho ngoba ibhakane leli lisegcekeni njalo akusikho ukuthi amehlo akhe afiphele. Yena njengomtshayeli ulomlandu wokubona kanye lokulandela amabhakane anjengalelo. Lokhu kufanana lobufakazi bemvelo obutshengisa ukuthi uNkulunkulu ukhona. “Ibhakane” lelo lisegcekeni nje. Thina senelisa ukulibona ngenxa yokuthi siyizidalwa ezicabangayo. Asingeke sibe lesizatho sokuzigeza nxa singalinaki.

Akuthandabuzwa ukuthi indalo iveza okunengi ngoMdali wethu. Kodwa kulelinye ibhuku eliveza okunengi kakhulu ngaye. Ibhuku lelo liBhayibhili. Kulo, singathola impendulo yombuzo lo oqakathekileyo: Iyini injongo kaNkulunkulu ngomhlaba wethu kanye labantu abahlala kuwo? Ukwazi impendulo yombuzo lo kungakunceda ukuthi usondele phansi kukaNkulunkulu ‘olesimo sakhe esingabonakaliyo, esibonakala ngokusobala’ emhlabeni esiphila kuwo.