UDavida wakhuluma amazwi la akhuthazayo kuSawuli wathi: “Akungabi lomuntu ophelelwa lithemba ngenxa yomFilisti lo.” USawuli lebutho lakhe basebephelelwe lithemba sibili. Kungenzeka ukuthi babenze iphutha ngokuziqathanisa lenkalakatha yendoda le, phela bona babengacina okhalweni lwayo. Babezibona bempantshazwa yindoda le ingani bazintotoviyane. Ayisikho okwakusengqondweni kaDavida. Yena wayeyibona ngelinye ilihlo indaba le. Yikho wazimisela ukuthi aqondane laye uGoliyathi.—1 USamuyeli 17:32.

UDavida wayebona ukuthi uGoliyathi unganani futhi lezikhali zakhe wayezikhangele. Kodwa kazange avumele ukuthi izinto lezi zimethuse. Kazange enze iphutha elenziwa nguSawuli lebutho lakhe. UDavida kazange aziqathanise lesitha sakhe, kodwa waqathanisa uGoliyathi loJehova. UGoliyathi wayesedlula amanye amadoda ngobude, phela yena wayengamamitha angu 2.9 ubude. Lanxa kunjalo laye njengabantu bonke wayezifananela lesibungu nje nxa eqathaniswa loMbusi wendawo yonke. Njalo uJehova wayeselungele ukumhlifiza.

UDavida wahwatsha ilitshe esikhwameni eqonda kuGoliyathi. Walifaka endaweni yalo wabhodisa isavutha emoyeni saze saduma. UGoliyathi laye wasondela mhlawumbe ethe sece ngemva komthwali wehawu lakhe. Ubude bakhe babusenza kube nzima ngomthwali wehawu ukuthi amvikele ekhanda. UDavida yena wayevele eqophe lona.—1 USamuyeli 17:41.

Nxa likhuluma ngoGoliyathi iBhayibhili lithi ‘ubude bakhe babuzingalo eziyisithupha lesandla.’ (1 USamuyeli 17:4) Ingalo okukhulunywa ngayo lapha yayiyi-44.5 cm ubude; isandla sasiyi-22.2 cm. Singakuhlanganisa lokhu siphuma lamamitha angu-2.9. Abanye kabavumi ukuthi uGoliyathi wayengaba mude kangako. Kodwa ubukwazi yini ukuthi embalini yalamuhla kubhalwe ukuthi umuntu omude kulabo bonke ungamamitha angu-2.7? Pho nxa kulomuntu onjalo kungamangalisa yini ukuthi uGoliyathi wayemude kulaye nge-20 cm? UGoliyathi wayedabuka esizweni samaRefa, amadoda ayesaziwa ngobude obungajayelekanga. Umbhalo weGibhithe wangekhulu lesi-13 B.C.E. ubika ukuthi amanye amaqhawe aseKhenani ayesesatshwa ayedlula amamitha angu-2.4 ubude. Lanxa ubude bukaGoliyathi bumangalisa ngeke sibuphike.