Qhubeka Usondela KuJehova

Kunengi osukufundile ngoJehova eBhayibhilini. Ulwazi lolu lukwenze wamthanda kakhulu uJehova waze wazinikela kuye njalo wabhabhathizwa. Nxa ungakakwenzi lokhu, akuthandabuzwa ukuthi ulesifiso sokukwenza masinyane. Kodwa kuzamele uqhubeke usondela kuJehova lanxa usubhabhathiziwe. Ungakwenza njani lokhu?

1. Kungani kumele uqhubeke uqinisa ubungane bakho loJehova?

Kumele sisebenze nzima ukuze sihlale singabangane bakaJehova. Kuqakathekile ukuthi senze njalo ukuze ‘singaphambuki’ ekukhonzeni. (KumaHebheru 3:12) Kuyini okuzakunceda ukuthi uqhubeke ukhonza uJehova uthembekile? Yikukhuthala emsebenzini wokutshumayela lakokunye konke esikwenzela uJehova. (Bala uFiliphi 3:16.) Akulalutho oluzakwenza uthokoze kakhulu ngaphandle kokukhonza uJehova!—IHubo 84:10.

2. Kuyini okunye okumele ukwenze?

Lanxa usuzaqeda ukufunda ibhuku leli, kulokunengi okumele uqhubeke ukwenza. IBhayibhili lithi kumele ‘sigqoke ubuntu obutsha.’ (Kwabase-Efesu 4:23, 24) Nxa ungaqhubeka ubala iLizwi likaNkulunkulu futhi ungena imihlangano yebandla, uzafunda okunengi ngoJehova langobuntu bakhe. Qhubeka uzama ngamandla akho wonke ukumlingisela empilweni yakho. Nxa kulalapho okumele ulungisise khona ukuze uthokozise uJehova, kwenze masinyane.

3. UJehova uzakuncedisa njani?

IBhayibhili lithi: “UNkulunkulu . . . ngokwakhe uzaqedisa ukuqeqetshwa kwenu. Uzaliqinisa njalo alenze libe lamandla, alimise phezu kwesisekelo esiqinileyo.” (1 UPhetro 5:10) Sonke sizalingwa ukuthi senze okubi kodwa uJehova uzasinika amandla okuthi sizinqobe izilingo lezo. (IHubo 139:23, 24) Uthembisa ukukuncedisa ukuthi ube lesifiso kanye lamandla okwenza izinto ezimthokozisayo.—Bala uFiliphi 2:13.

GEBHA UJULE

4. Qhubeka ubala iBhayibhili njalo uthandaza

Ukubala iBhayibhili lokuthandaza sokukuncedile ukuthi ube ngumngane kaJehova. Kodwa ukuqhubeka usenza njalo kuzakunceda njani?

Bala iHubo 62:8 beselixoxa ngombuzo olandelayo:

• Kumele imithandazo yakho ibe njani ukuze ubungane bakho loJehova buqine?

Bala iHubo 1:2 beselixoxa ngombuzo lo:

• Kumele wenzeni ngesikhathi ubala iBhayibhili ukuze ubungane bakho loJehova buqine?

Ungenzani ukuze uzwisise okubala eBhayibhilini? Ukuze uthole amanye amacebo angakunceda, bukelani IVIDIYO beselixoxa ngemibuzo elandelayo.

IVIDIYO: Thuthukisa Indlela Obala Ngayo IBhayibhili (5:22)

• Yiwaphi amacebo okubala iBhayibhili owathole kuvidiyo ongathanda ukuwasebenzisa?

• Yiziphi indaba eziseBhayibhilini ofisa ukuzizwisisa ngcono?

5. Hlela ukwenza okunengi ekukhonzeni uJehova

Ukukhuthala ekukhonzeni kuzakwenza usondele kuJehova. Bukelani IVIDIYO beselixoxa ngombuzo olandelayo.

IVIDIYO: Impilo Engcono Kulazo Zonke (3:31)

• Ukuhlela ukwenza okunengi ekukhonzeni kwamnceda njani uCameron?

Ayisithi sonke esingenelisa ukuyatshumayela kwamanye amazwe. Kodwa sonke singenelisa ukwenza okunengi ekukhonzeni. Bala iZaga 21:5 beselixoxa ngokuthi ungahlela ukwenzani . . .

• ebandleni.

• ekutshumayeleni.

Ivesi le ingakunceda njani ukuthi wenelise ukwenza okuhlelileyo?

Nanku okunye ongahlela ukukwenza

• Ukutshela uJehova konke okusenhliziyweni yakho nxa uthandaza.

• Ukubala iBhayibhili uliqede.

• Ukujayelana labo bonke abantu abasebandleni okulo.

• Ukudinga umuntu ongamfundisa iBhayibhili.

• Ukuba liphayona elisizayo kumbe elesikhathi sonke.

• Ukusebenzela ukuba yinceku ekhonzayo nxa ungumzalwane.

ISIFINQO

Qhubeka uqinisa ubungane bakho loJehova njalo wenze okunengi ekukhonzeni. Ungenza njalo uzathokoza kuze kube nini lanini!

Ufundeni?

• Kuyini okwenza ungathandabuzi ukuthi uJehova uzakuncedisa ukuthi uhlale uthembekile kuye?

• Ungabuqinisa njani ubungane bakho loJehova?

• Kuzakunceda njani ukuhlela ukwenza okunengi ekukhonzeni?

THOLA OKUNENGI

Bukela ividiyo le ukuze ubone ukuthi kungani uJehova efuna sihlale sithembekile kuye okwempilo yethu yonke.

Thembeka Njengo-Abrahama (9:20)

Bukela ividiyo le ukuze ubone ukuthi ungayivuselela njani intokozo yakho ekukhonzeni uJehova.

Ukuvuselela Intokozo Ngokutaditsha Lokucabangisisa (5:25)

Bala isihloko lesi uzwe ukuthi kuyini okungakunceda ukuthi wenelise ukwenza okuhlelileyo.

“Khuthala Ekukhonzeni Ukuze Udumise UMdali Wakho” (INqabayokulinda, July 15, 2004)

Kungani kumele siqhubeke sithuthuka ekukhonzeni? Bala isihloko lesi uzwe ukuthi kuyini ongakwenza ukuze uthuthuke.

“Sebenzela Ukuba Lokholo Oluqinileyo Ngoba Usuku LukaJehova Soluseduze” (INqabayokulinda, May 15, 2009)