Lingazinqoba Izinhlupho Ezichitha Imizi

 1. Kuyini okwenzakalayo kwezinye izimuli?

IMOTA endala ingakhanya inhle sibili nxa igezisiwe yapendwa. Uyaze uphose uthi iphuma esitolo ngoba iyabe icwebezela. Kodwa phansi irusi iyabe isizenzela umathanda, isiyidla imota. Zinjalo ezinye izimuli. Nxa ubona ubaba, umama labantwana bebobotheka uyathi bayathokoza kanti qha, basebuhlungwini futhi kabahlalisekanga. Ngekhaya kuyabe kungela kuthula, kudliwa imbuya ngoluthi. Okunye okubangela lokho yikuthi abanye emulini bayabe bephilela utshwala njalo abanye belodlakela.

 2. (a) IBhayibhili lithini ngotshwala? (b) Kutshoni ukuphilela utshwala?

² IBhayibhili lithi akulanto embi ngokunatha utshwala obulingeneyo. Lithi okubi yikudakwa. (IZaga 23:20, 21; 1 KwabaseKhorinte 6:9, 10; 1 KuThimothi 5:23; KuThithusi 2:2, 3) Kodwa ukuphilela utshwala akusikho kudakwa nje. Yikububhudla nsuku zonke, kungabi lelanga lamahala. Kujayelekile ukuthi kube ngabantu abadala abaphilela utshwala, kodwa okudanisayo yikuthi labanye abasakhulayo bayabukhonza.

3, 4. Yibuphi ubunzima umama labantwana ababa phakathi kwabo nxa ubaba ephilela utshwala?

³ IBhayibhili lavele latsho kudala ukuthi ukudakwa kungenza ukuthi abantu bangahlalisani kuhle ngekhaya. (UDutheronomi 21:18-21) Amanyala enziwa ngumuntu ophilela utshwala angabathwalisa nzima bonke emulini. Nxa kuyindoda, inkosikazi ingalala ingalele izama ukunceda umkayo ukuthi atshiye utshwala loba ihlale isisesaba ukuthi pho uzakwenzani nxa esedakiwe.a Ingazama lokumfihlela utshwala loba ukubuchitha, ifihle imali yakhe, mhlawumbe ize imkhalele imbuza ukuthi kayithandi na imuli yakhe lokuthi kalandaba lempilo yakhe yini. Ingamcela lokuthi acabange ngokuthi uNkulunkulu yena uthini. Kodwa lanxa izama isazama, umkayo angaqhubeka ezinathela, ize icine isicaphuka futhi isizibona yehlulwe yimpilo. Engxenye ingacina ingasahlalisekanga, isizisola, ingasazithembi, isihlala ikhathazekile njalo isizeyisa.

⁴ Labantwana bathwala nzima nxa umzali ephilela utshwala. Abanye bahlala bemanxebanxeba ngokutshaywa. Abanye bayahlukuluzwa kwezemacansini. Kanti njalo bangazisola, bacabange ukuthi yibo abenza umzali athande utshwala. Ngokuya kwesikhathi bacina bengasathembi muntu, sebebona angathi wonke umuntu kathembekanga njengomzali wabo. Bayabe bengakhululekanga ukutshela abanye ukuthi kuhamba njani ngekhaya. Lokhu kungenza bakhule bengenelisi ukutsho okubakhathazayo futhi kungabalimaza. (IZaga 17:22) Lanxa sebekhulile bangaba ngabantu abangazithembiyo futhi abazikhangelela phansi.

 5. Umuntu ophilela utshwala angancediswa njani, njalo kungani kunzima ukumsiza?

⁵ Lanxa ingcitshi ezinengi zisithi uhlupho lomuntu ophilela utshwala kalulungiseki, ezinye zakhona zithi nxa kungaba lohlelo olungamnceda ukuthi engasabuthinti, angenelisa ukubutshiya. (Qathanisa loMathewu 5:29.) Akulula sibili ukusiza umuntu ophilela utshwala ngoba abanengi bandise ukwala ukuthi balohlupho. Lanxa kunjalo, umuntu ophilela utshwala angacina esezinuka amakhwapha nxa ebona ukuthi abanye emulini bazama ukulwisana lenhlupho abalethela zona. Enye ingcitshi esilesikhathi incedisa abantu abaphilela utshwala kanye lezimuli zabo yathi: “Ngibona angani okuqakatheke kakhulu yikuthi abanye emulini baqhubeke beziphilela impilo yabo futhi beziphatha kuhle. Kancane kancane lo odakwayo ucina esebona ukuthi impilo yakhe isitshiyene kakhulu leyabanye emulini.”

 6. Kuyini okunganceda izimuli ezilomuntu ophilela utshwala?

⁶ ILizwi likaNkulunkulu eliphefumulelweyo lingakunceda ukuthi uphile impilo enhle kungelani lokuthi kulomuntu ophilela utshwala ngakini. (U-Isaya 48:17; 2 KuThimothi 3:16, 17) Ake sikhulume ngezinye izimiso eziphathise izimuli ezilohlupho lolu.

 7. Ngubani okufanele asolwe ngokuthi omunye ngekhaya uphilela utshwala?

⁷ Ungazisoli ngokuthi kungabe kunguwe owabangela uhlupho. IBhayibhili lithi “lowo lalowo kumele athwale umthwalo wakhe.” Liphinda lithi “omunye lomunye wethu uzabika akwenzayo kuNkulunkulu.” (KwabaseGalathiya 6:5; KwabaseRoma 14:12) Umuntu ophilela utshwala angazama ukuzigeza esithi abanye emulini yibo abenza abe yisidakwa. Ngokwesibonelo angathi: “Ngabe lingiphatha kuhle, ngabe kanginathi.” Nxa angabona angani bavumelana laye, angaqhubeka ezinathela. Kodwa kungelani lokuthi kwenzakalani empilweni yethu loba ukuthi abanye basiphatha njani, sonke siyazikhethela esikwenzayo. Lezidakwa ziyazikhethela.​—Qathanisa loFiliphi 2:12.

 8. Lingenzani ukuze umuntu ophilela utshwala abone ukuthi akwenzayo akuqondanga?

⁸ Kwezinye izikhathi myekeleni avune akuhlanyelayo. EBhayibhilini kulesaga esikhuluma ngomuntu ololaka esingasebenza lasemuntwini ophilela utshwala. Sithi: “Ungamlamulela, usuzahlala umlamulela njalo.” (IZaga 19:19) Yikho-ke myekeleni avune izithelo zalokho akwenzayo. Nxa angangcolisa endlini loba enze okunye okubi ngesikhathi edakiwe, akube nguye okulungisayo.

9, 10. Kungani kufanele izimuli ezilomuntu oyisidakwa zicele ukuphathiswa, njalo kufanele zicele kubani?

⁹ Cela abanye ukuthi bakuphathise. KuZaga 17:17 kuthiwa: “Umngane ulothando ngezikhathi zonke, lomzalwane uzalelwa izikhathi zenhlupheko.” Nxa kulomuntu ophilela utshwala ngekhaya, liyabe liphakathi kohlupho sibili. Kufanele lidinge uncedo. Ngakho-ke lingathikazi ukucela ‘umngane olothando’ ukuthi aliphathise. (IZaga 18:24) Kungalisiza ukukhuluma labanye ababuzwisisayo ubunzima elikubo kumbe asebake baba kubo. Bangalinceda ukuze libone ukuthi kuyini elingakwenza lokungamelanga likwenze. Kodwa wobani lonanzelelo. Xoxani lomuntu elimthembayo, elikwaziyo ukuthi ‘ulesifuba.’​—IZaga 11:13.

¹⁰ Thembani abadala bebandla. Amadoda la angamaKhristu angalinceda kakhulu. Phela aselesikhathi ekhonza. Alolwazi oluzikileyo ngeLizwi likaNkulunkulu njalo akwazi kuhle ukusebenzisa izimiso ezikulo. Angaba “njengesihonqo sokuvikela umoya, lesiphephelo sokucatshela isiphepho, njengomthunzi wedwala elikhulu elizweni elomileyo.” (U-Isaya 32:2) Abadala bebandla abangamaKhristu bayabavikela abasebandleni ezintweni ezingabalimaza, kodwa kabacini khonapho. Bayabaduduza, babavuselele futhi balendaba lomuntu ngamunye othwele nzima. Yikho-ke gijimelani kubo nxa lilohlupho.

11, 12. Ngubani onganceda izimuli ezilomuntu ophilela utshwala, njalo angaziphathisa njani?

¹¹ Okuqakatheke kulakho konke yikuthi lithembele kuJehova. IBhayibhili lithi: “UJehova useduze labo abalezinhliziyo ezephukileyo asindise labo abadabukileyo emoyeni.” (IHubo 34:18) Nxa lisizwa lilenhliziyo ezephukileyo loba lidabukile emoyeni ngenxa yezinhlupho elizilethelwa ngumuntu ophilela utshwala, khumbulani ukuthi “uJehova useduze.” Uyabuzwisisa ubunzima eliphakathi kwabo.​—1 UPhetro 5:6, 7.

¹² Ukukholwa lokho uJehova akutshoyo eLizwini lakhe kungenza ukuthi lingakhathazeki kakhulu. (IHubo 130:3, 4; UMathewu 6:25-34; 1 UJohane 3:19, 20) Nxa lingalihlolisisa iBhayibhili njalo lenze elikufunda kulo, uNkulunkulu uzalipha umoya ongcwele ongenza ukuthi libe ‘lamandla amakhulukazi’ angalinceda ukuthi lilwisane lobunzima benu nsuku zonke.​—2 KwabaseKhorinte 4:7.b

13. Yiluphi olunye uhlupho oluchitha imizi eminengi?

¹³ Umuntu oyisidakwa angadala olunye uhlupho oluchitha imizi eminengi. Uhlupho lolu yikuhlukuluza abanye ngekhaya.

14. Kwaqala nini ukuba lodlakela ezimulini, njalo lamuhla kwenzakalani?

¹⁴ Umuntu wokuqala owaba lodlakela nguKhayini. Wabulala umfowabo u-Abela, bengabantu bomuzi munye. (UGenesisi 4:8) Kusukela ngaleso sikhathi banengi abantu abahlukuluza abanye ezimulini. Kulamadoda abhaxabula omkawo, abafazi abatshaya amadoda kanye labazali abathi bangabamba umntwana batshayele ukubulala. Bakhona labantwana ababaphatha kubi abazali babo asebeluphele.

15. Yikuphi okunye okwenzakala ebantwini abahlukuluzwayo ngekhaya?

¹⁵ Abantu abahlukuluzwayo ngekhaya kabakhali ngobuhlungu bamanxeba nje kuphela. Omunye umama owayehlala ebhulwa ngumkakhe wathi: “Uyabe usuhlala uzisola futhi usuzibona ungasimuntu walutho. Izikhathi ezinengi ekuseni kuyabe kusala lokuthi uvuke, uze ufise ukuthi ngabe nje okwenzakeleyo bekuliphupho elibi.” Labantwana abakhula behlukuluzwa kumbe bebona kuliwa ngekhaya bangahlukuluza ezabo izimuli nxa sebekhulile.

16, 17. Umuntu angayihlukuluza njani imizwa yabanye emulini, njalo lokhu kungabaphatha njani?

¹⁶ Abantu ezimulini kabahlukuluzwa ngokutshaywa kuphela. Izikhathi ezinengi bayabe behlukuluzwa ngamazwi. KuZaga 12:18 kuthiwa: “Amazwi okubhuda agwaza njengenkemba.” ‘Ukugwazwa’ okutshiwo lapha kugoqela ukubizwa ngamabizo okweyisa, ukutshingelwa, ukuhlala ugconwa, utshelwa inkalakatha zenhlamba loba uthenjiswa ukutshaywa. Lokhu kubangela ukuthi ube lamanxeba enhliziyweni, yikho izikhathi ezinengi abanye bayabe bengawaboni.

¹⁷ Okudanisa kakhulu yikubona umuntu ehlukuluza umntwana ngokuhlala emchothoza, emtshela ukuthi ungudanda loba uyisithutha futhi ekhuluma okunye okumenza azibone engasimuntu. Lokhu kungenza umntwana akhule ezeyisa. Lanxa iBhayibhili lisithi kufanele alaywe, liphinda lithi kubobaba: “Lingabathukuthelisi abantwana benu, hlezi badumazeke.”​—KwabaseKholose 3:21.

18. Uhlupho lomuntu ohlukuluza abanye ngekhaya luqala ngaphi, njalo iBhayibhili lingamnceda njani?

¹⁸ Uhlupho lomuntu ohlukuluza abanye ngekhaya luqalisela enhliziyweni lasengqondweni yakhe. Phela esikwenzayo siqala sikucabange. (UJakhobe 1:14, 15) Yikho-ke nxa efuna ukutshiya umkhuba wakhe kufanele aguqule indlela acabanga ngayo. (KwabaseRoma 12:2) Lanxa kungaba nzima, angenelisa ngoba iLizwi likaNkulunkulu lilamandla okuntshintsha abantu. Lingadiliza imicabango engaqondanga, ‘eyinqaba.’ (2 KwabaseKhorinte 10:4; KumaHebheru 4:12) Nxa umuntu angathola ulwazi oluqondileyo oluseBhayibhilini, angantshintsha uze umkhohlwe. Uyabe esegqoke ubumina obutsha.​—Kwabase-Efesu 4:22-24; KwabaseKholose 3:8-10.

19. AmaKhristu atshadileyo kufanele aphathane njani?

¹⁹ Mthande njalo umhloniphe umkakho. IBhayibhili lithi: “Amadoda kumele abathande omkawo njengemizimba yawo. Lowo othanda umfazi wakhe uyazithanda.” (Kwabase-Efesu 5:28) Liphinda lithi indoda kufanele imphathe ‘ngenhlonipho njengobuthakathaka.’ (1 UPhetro 3:7) Omama bona balaywa ukuba “bathande omkabo” njalo ‘babahloniphe’ kakhulu. (KuThithusi 2:4; Kwabase-Efesu 5:33) Akulandoda ethanda uNkulunkulu engathi iyamhlonipha umkayo yona ihlala imtshaya loba imtshela amazwi abuhlungu. Lenkosikazi ehlala itshingela umkayo, imphoxa loba imchothoza iyabe ingamthandi ngenhliziyo yonke njalo ingamhloniphi.

20. Ngubani ofuna abazali babakhulise kuhle abantwana, njalo kungani kungamelanga bakhangelele ukuthi umntwana uzakwenza izinto ezinhle kuphela?

²⁰ Baphathe kuhle abantwabakho. Kumele ubathande njalo utshengise ukuthi ulendaba labo. ILizwi likaNkulunkulu lithi abantwana ‘bayilifa elivela kuJehova, bangumvuzo ovela kuye.’ (IHubo 127:3) UJehova uphe abazali umsebenzi wokunakekela ilifa leli. IBhayibhili likhuluma ‘ngezindlela zobuntwana’ kanye ‘lobuthutha’ bomntwana. (1 KwabaseKhorinte 13:11; IZaga 22:15) Ngakho-ke akufanelanga umangale nxa ubona abantwabakho besenza izinto zobuthutha. Umntwana ngumntwana. Akumelanga ukhangelele ukuthi uzakwenza njengomuntu omdala. Kufanele ukhumbule ukuthi umntanakho unganani, ukuthi lamkhulisa njani kanye lokuthi wenelisa ukwenzani.​—Khangela uGenesisi 33:12-14.

21. UNkulunkulu ufuna abantwana babaphathe njani abazali babo asebeluphele?

²¹ Bahloniphe abazali asebeluphele. ULevi 19:32 uthi: “Sukumelani asebeluphele, lihloniphe abantu abadala.” Yikho-ke uMthetho kaNkulunkulu wawutshengisa ukuthi abadala kufanele bahlonitshwe njalo bangehliswa isithunzi. Kodwa lokhu kungaba lukhunyana nxa kuyikuthi umzali useluphele okokuthi usegula, usehlala ekhohlwa ezinye izinto loba usekhanya ehlupha. Lanxa kunjalo, abantwana bakhunjuzwa ukuthi kumele baqhubeke “besenanisa kubazali babo.” (1 KuThimothi 5:4) Lokhu kutsho ukubahlonipha lokungabaphathi njengabantwana, njalo kungagoqela lokusebenzisa imali yakho ukuze ubanakekele. Kuyakhanya-ke ukuthi iBhayibhili liveza ukuthi abazali asebeluphele akumelanga bahlukuluzwe loba batshelwe amazwi ahlabayo.

22. Kufanele ube ngumuntu onjani nxa ufuna ukutshiya umkhuba wokuhlukuluza abanye, njalo kuyini okungakunceda?

²² Funda ukuzibamba. KuZaga 29:11 kuthiwa: “Isiwula siyalukhihliza lonke ulaka lwaso, kodwa umuntu ohlakaniphileyo uyazithiba.” Manje ungenzani nxa ufuna ukuzithiba? Lungisa inhlupho masinyane kulokuthi uhlale usufuthelene. (Kwabase-Efesu 4:26, 27) Nxa ubona ukuthi usuthukuthele kakhulu, suka endaweni okuyo. Thandaza kuNkulunkulu ucele umoya wakhe ongcwele ozakusiza ukuthi uzibambe nxa sekunzima. (KwabaseGalathiya 5:22, 23) Okunye okungakunceda nxa usuzondile yikuphuma uhambahambe loba welule umzimba. (IZaga 17:14, 27) Zimisele ukuba ngumuntu “obekezelayo,” ophuza ukuzonda.​—IZaga 14:29.

23. UmKhristu othukuthela aze alwe lemuli yakhe loba labanye abantu angenziwani nxa engawutshiyi umkhuba wakhe?

²³ IBhayibhili lithi uNkulunkulu kayithandi ‘inzondo, lokuxabana, lentukuthelo.’ Liphinda lithi “abaphila kanje kabayikulidla ilifa lombuso kaNkulunkulu.” (KwabaseGalathiya 5:19-21) Ngakho-ke umKhristu othukuthela aze alwe lomkakhe loba abhambabule abantwana angacina esuswa ebandleni nxa engawutshiyi umkhuba wakhe. (Qathanisa lo-2 Johane 9, 10.) Ukumsusa kwenza ukuthi ibandla lihlale lihlanzekile, lingelabantu abalodlakela.​—1 KwabaseKhorinte 5:6, 7; KwabaseGalathiya 5:9.

24. (a) Umuntu ohlukuluzwa ngumkakhe angakhetha ukwenzani? (b) Abangane kanye labadala bebandla bangamncedisa njani ohlukuluzwayo, kodwa kuyini okungamelanga bakwenze?

²⁴ Pho ungenzani nxa umkakho ehlala ekutshaya futhi kuzikhanyela ukuthi kazimiselanga ukuntshintsha? Abanye bakhetha ukuqhubeka behlala laye ngenxa yezizathu ezithile. Kodwa abanye bakhetha ukusuka ngekhaya besesabela impilakahle yabo loba ukuthi bangabulawa. Bangesaba lokuthi bangacina bengasakhonzi kuhle. Umuntu ngamunye uyazikhethela ukuthi yena uzakwenzani, kodwa akumelanga akhohlwe ukuthi uJehova uthini. (1 KwabaseKhorinte 7:10, 11) Lanxa abangane, izihlobo loba abadala abangamaKhristu bengameluleka futhi bamncedise, akufanelanga bambambe ngamandla ukuthi enze okufunwa yibo. Nguye okufanele azikhethele.​—KwabaseRoma 14:4; KwabaseGalathiya 6:5.

25. UJehova ufuna ukuthi ezimulini abantu baphilisane njani?

²⁵ Lapho uJehova etshadisa u-Adamu lo-Eva wayengafuni ukuthi kube lezinhlupho ezichitha imizi. Wayengafuni lokuthi kube lezimuli ezilabantu abaphilela utshwala loba abahlukuluza abanye. (Kwabase-Efesu 3:14, 15) Wayehlose ukuthi emulini kube lokuthula lothando, abantu bazwelane njalo baqinisane ukholo. Kodwa uhlupho lwaqala u-Adamu lo-Eva baze bone.​—Qathanisa lomTshumayeli 8:9.

26. UJehova ubathembisani abazama ukwenza akufunayo?

²⁶ Okuhle yikuthi kwathi sekonakele uJehova kazange athi asechithekile kawasabutheki. Usithembisa ukuthi uzaletha umhlaba omutsha olokuthula, abantu ‘sebehlala ngokuvikeleka njalo kungekho obenza besabe.’ (UHezekheli 34:28) Akula oyabe ephilela utshwala, ehlukuluza abanye ngekhaya futhi zonke izinto ezichitha imizi ziyabe zingasekho. Lapho-ke abantu bayabe sebebobotheka okweqiniso, bengafihli ubuhlungu loba ukwesaba kodwa ‘bekholisa ukuthula okukhulu.’​—IHubo 37:11.